Vukei ira na Gonevuli mera Karona na Nodra iVakadinadina

Ni sa kidavaki ki na soqoni bibi oqo nodra na dauveituberi ni lotu ena Lotu i Jisu Karisito ni Yalododonu Edaidai. Ena vica na yabaki, keitou dau vakasoqoni ira vata na dauveituberi ni lotu ni VVL vakadua na yabaki ena dua na soqoni totoka vakatokai na Dua na Yakavi kei dua na Vakaitutu Raraba. Bogi nikua, eda na tomana tiko na ivakarau oya nida sota meda na rogoci Elder Dale G, Renlund ena itinitini ni noda soqo. Keitou vakayacora oti talega na koniferedi e matana votu ni VVL ena Koronivuli torocake e Brigham Young, ia na soqo ena yabaki oqo e imatai tiko ni gauna meda soqoni vata kina na veitabana kece ni iVakarau ni Vuli ni Lotu meda veivakavulici vakaikeda, soli vakasama, veivosakitaka na sasaga meda veivakavulici vakavinaka cake, semati vata na dauveituberi ni lotu mai na Semineri kei na Inisitute, e BYU, BYU–Idaho, BYU–Hawaii, BYU–Pathway, kei na Ensign College. Me kena taucoko, o ira na dauveituberi oqo era vakavulici ira e rauta ni veimama na milioni na itabagone qasecake ena Lotu, me ikuri ni gonevuli kece era volayaca ena semineri.

Me matata na vuna keitou cakava kina na sasaga oqo e baleta me salavata kei na naki dina ni vakavulici ni veikavakalotu ena VVL. Au dau vosa vakawasoma me baleta na duidui ni itavi e vakayacora na koronivuli yadua ena parokaramu ni VVL. Me ivakaraitaki, au vakatoka na BYU me Mata baleta na nona itavi me matataka na parokaramu kei na Lotu vaka dau tuva soqoni, liutaka, ka dauveivakavulici. Tarava, vakasamataka na BYU–Idaho, au vakatoka me Dauniveivakavulici baleta e nona itavi vakatabakidua me veivakavulici; BYU–Hawaii me noda uluvatu ena Esia/Pasifika, ena nona vakabibitaka ka goleva vakatabikidua na iwasewase ni takete ni Lotu; kei na Ensign College e Vakarautaka na Lewenivuli me Vakayagataki, ka vakanamata ki na kila vakacakacaka. Kei BYU–Pathway ena Vakarawarawataka na Gaunisala, ka yacovi ira e levu cake na gonevuli ni vakatauvatani kei na noda veiunivesiti ena vuli sau rawarawa, ena ivakatagedegede e cake onolaini. E dina, na Semineri kei na Inisitute e yacovi ira na gonevuli ka ra sega ni vuli ena vei univesiti ni Lotu ka iYaqa Vakayalo vei ira na itabagone qase cake, se vanua cava ga era vuli kina.

Dina ni duidui na veitavi oqo, ia, e tiko e rua na sala era umani vata kina na veikoronivuli oqo. Na imatai sai koya na inaki ni iVakarau ni Vuli ni Lotu vakataki koya, oya me vakarautaki ira na tisaipeli i Jisu Karisito mera na veiliutaki e nodra veivale, ena Lotu, kei na nodra vei itikotiko. Se mani vakacava na duidui ni itavi ni nomuni veikoronivuli, na koronivuli yadua ni VVL e tatauvata na nodra inaki ena veiliutaki vakatisaipeli. Me vakatabakidua ki na ivavakoso oqo, e tiko talega na ikuri ni itavi ka wasei ena veitabana ni VVL vaka dauveivakavulici ena veika vakalotu. Ena Jiune ni 2019, a vakadonuya kina na Matabose ni Vuli ni Lotu e dua na itukutuku bibi ka tuvanaki kina na itavi ni vuli vakalotu ena iVakarau ni Vuli ni Lotu, ka dau vakatokai vakavuqa me itukutuku “Vaqaqacotaki ni Vuli Vakalotu”. Na ivakaro oqo e lako mai vakadodonu ena kena matata kei na veidusimaki mai na Matabose ni Vuli ni Lotu. Na itekivu ni parakaravu ni ivolatukutuku oya e kaya, “Na vulici ni veika vakalotu e tiko ena dua na itutu matalia ka talei ena inaki ni veikoronivuli yadua. … E tiko ena uto sara ga ni inaki ni veikoronivuli yadua.” Na idusidusi ni VVV e vakamatatataka sara ni uto ni inaki ni vulici ni veika vakalotu e vakaoqo: “Na inaki ni vulici ni veika vakalotu oya me vakavulici na kosipeli vakalesui mai i Jisu Karisito mai na ivolanikalou kei ira na parofita ni gauna oqo ena sala ena vukea kina na gonevuli yadua me vakatorocaketaka nona vakabauta kei na ivakadinadina baleti Tamada Vakalomalagi, … Jisu Karisito, … na kosipeli vakalesuimai, … kei na [parofita bula]; yaco me tisaipeli ena nona bula taucoko; … [ka] vaqaqacotaka [nodra] rawata [noda gonevuli] mera kunea na isaunitaro, walia na vakatitiqa, ka sauma ena vakabauta.” Na uto ni inaki oya ena loma ni iVakarau ni Vuli ni Lotu e usutu tiko ni ka eda tiko kina eke nikua. Eda sega ni cakava oqo nida vakanamata kina, ena yaco me dredre na vakamacalataki na uma ilavo levu a vakayagataka na Lotu ena veikoronivuli yadua oqo.

Ka tiki kina ni inaki eda sota kina nikua oya nida wasea vata tiko edua na inaki ni VVL kei na ivakaro vaka-dauveituberi ni veika vakalotu me vakatorocaketaki na ivakadinadina ka vukei ira na gonevuli mera yaco me tisaipeli ka kunea na isau ki na nodra taro kei na nodra vakabauta. Au vinakata talega meu vakavinavinakataki Chad Webb ena nona veiliutaki. O Baraca Webb e liutaka tiko na Semineri kei na Inisitute ni Lotu. Ia ena rua na yabaki sa oti, a dabe-vakatulewa talega kina ena Komiti ni Vulici ni Veikavakalotu ka ra lewena na mata mai na veitabana ena iVakarau ni Vuli ni Lotu. Ena vukuna levu duadua oya o ira na komiti e rawa kina meda soqoni vata nikua vaka-dauveituberi ni VVL. Au via vakaraitaka talega na veitokoni mai vei ira yadua na noda peresitedi ni VVL: Peresitedi Reese, Peresitedi Meredith, Peresitedi Kauwe, Peresitedi Kusch, Peresitedi Ashton, kei Baraca Webb. O ira na iliuliu oqo era sa vakaroti mera “iliuliu ni bula savasava kei na veika vakayalo” ni nodra koronivuli. Na ivakaro oqo a tau ena vakacurumi nei Peresitedi Kauwe ka tokaruataki tale ena veisoqo vakaoqo ni VVL. Au na vakaraitaka eke e vica na itaba mai na veisoqo oqori. Oni na rawa ni raici Peresitedi Kauwe. Na ivakaro a lako mai vei Peresitedi Holland, ka tokaruataki vei Peresitedi Ashton, vakakina vei Peresitedi Reese, ka wale tikoga oqo vei Peresitedi Meredith. Ka sega ni ka vakacalaka, na nodra tiko vata kei keda nikua o ira na vei peresitedi oqo. Era iliuliu vakasakiti, kau vakaraitaka noqu vakavinavinaka vei iratou ena nodratou veiliutaki kei na yalodina me vukei keda me tavoci na nodra Koniferedi na Dauveituberi ni Veika vakalotu.

Au gadreva meu tukuna na ituvaki eso ka tokona na noqu itukutuku nikua. Ena noqui tukutuku taumada vei ira noda qasenivuli ni lotu—Ena noqui tukutuku vakayabaki vei ira noda qasenivuli ni veikavakalotu ena loma ni rua na yabaki sa oti, au a kerei kemuni moni vakanamata ena ka keitou vakatoka me ivakasala vakaparofita vei ira na itabagone qasecake. Keitou a tovolea talega me vakabibitaka ni veiulutaga ka lisitaki eke era na veisautaki vakaidina. E sega ni dua na ka e kurabuitaki baleti iratou na iulutaga e lima oqo, ia e dodonu mera na vakavoui ni keitou dusimaki mai vei iratou na parofita kei na iapositolo, vakauasivi ke baleti ira na itabagone qasecake. Na vakanuinui sai koya moni kua walega ni tugana na vei itukutuku oqo, ia o keda kece meda vulica na sala meda rogoci ira kina na parofita bula ka vukei ira noda gonevuli me vulica na sala mera bulataka kina na nodra itukutuku.

Ena vakasama vata oya, au gadreva meu vakanamata ena dua vei ira na ivakasala vakaparofita oya ka tiko e yaloqu. E sureti ira na itabagone qasecake o Peresitedi Russell M. Nelson mera karona nodra ivakadinadina. Yalo vinaka mo kila ni kevaka o vinakata mo muria na parofita, mo nanuma e rua na ka. iMatai, ni tokaruataka o koya edua na itukutuku, ka ikarua, na gauna e vakamamasu kina vei keda. O na raica na ivakarau ruarua oqo ena itukutuku nei Peresitedi Nelson mo karona na nomu ivakadinadina, ka cavuti taumada ena lotu ni itabagone qasecake ena Me ni 2022, ni a kaya: “Au vakamasuti kemuni moni karona nomuni ivakadinadina. Cakacakataka. Taukena. Karona. Susuga me na tubu kina. Vakania ena dina. Kua ni vakaduka ena nodra vuku lasu na tagane kei na yalewa tawavakabauta ka qai vakataroga se cava sa malumalumu kina na nomu ivakadinadina. Ni o cakava nomu ivakadinadina me ka bibi duadua vei iko, sarava na cakamana ena yaco kina nomu bula.”

E muri ena yabaki vata oya, a solia kina o Peresitedi Nelson edua na ivakaro vata oya, ki na Lotu raraba ena nona vosa ni koniferedi raraba ni Okotova 2022: “Ena inaki oqo, au vakatetea kina Lotu raraba na ivakaro vata ga au a solia vei ira na itabagone qasecake ena vula o Me sa oti. Au a vakauqeti ira ena gauna oya—au masuti kemuni oqo—moni karona na nomuni ivakadinadina kei Jisu Karisito kei na Nona kosipeli. Cakacakataka. Susuga me na tubu kina. Vakania ena dina. Kua ni vakaduka ena nodra vuku lasu na tagane kei na yalewa tawa vakabauta. Ni o tomana tiko mo vaqaqacotaka na nomu ivakadinadina kei Jisu Karisito me ka bibi duadua vei iko, o na qai sarava na cakamana ena yaco ki na nomu bula.”

Ena vakamamasu nei Peresitedi Nelson meda karona noda ivakadinadina, au via wasea kina eso na noqu sala ki na ivakadinadina. Oqo ena noqu itukutuku vakai au, ka dina niu sa vola oti, e noqu vakanuinui oya mona rawa ni vakila ni vaka e daru dabe vata ka veitalanoa wale tikoga. O keda yadua e dui tu na noda ilakolako vakai keda ni vakabauta. E vakakina o ira noda gonevuli. Nikua au via wasea eso na noqu. Na noqu ilakolako ki na ivakadinadina a tekivu vakasabalia. Au a tubu cake ena dua na itikotiko raraba sega ni Yalododonu Edaidai e Scottsdale, Arizona. Ena dua na soqo ni qito e koronivuli, niu vakarau tiko meu veitaucici au raici Baraca Butler, na noqu iLiuliu ni Cauravou ni sarasara tiko. E matalia sara vei au nona tiko e kea. A sega soti ni levu na ka keirau taleitaka vata. Au kila ni a sega ni dau sarava vakalevu na veitaucici. Vakasauri sara a kaya vei au na Yalo, “Clark, na Lotu oqo e dina baleta e sega tale ni dua na sala e rawa me tiko kina eke o koya nikua. Ena tiko beka edua na vuna bibi ena nona vakabauta ka vakavuna vua me tokoni iko kina.” Sai koya sara ga oya. A sega ni yaco oqo niu a vulica tiko na ivolanikalou se ena loma ni dua na soqoni ni soli ivakadinadina. A yaco ga ena vuku ni ivakaraitaki ni nona veiqaravi yalodina edua na tamata. Au nanuma vakavinaka nikua na veika au a vakila me vaka ena siga a yaco kina.

Ni oti edua se rua na yabaki, au a ciqoma na noqu veikacivi ni kaulotu ki na Japan Kobe Mission. Au nanuma sara na imatai ni siga ena KVK. A ka marautaki na sota kei ira na itokani, vakaveikilaitaki kei ira na dauveituberi, na vakilai ni kaukauwa ena vakasoqoni vata mai na veiyasai vuravura. Ia ena mataka ka tarava ni taqiri na alamu ena 6:00 na mataka, e dredre sara ga noqu yadra, ka yacovi au edua na taqaya levu. Au veinanuyaka, “Se na rawa vakacava meu cakava na ka oqo? Au sega ni kila seu na rawa ni yadra vakamataka e veisiga ena loma ni rua na yabaki ka tarava, qai vacava na vulici ni vosa dredre vaka Japani.” Vakasauri, na dina ni noqu iLiuliu ni Cauravou ena nona lako mai ki na vanua ni veitaucici au kila ni sa rauta vinaka ena vukei au ena loma ni rua na yabaki. A gadrevi me titobu cake noqu kila, kei na ivakadinadina oya a dodonu me yavutaki ena kosipeli. Au a tekivu me wilika vagumatua na iVola i Momani e veimataka. A taqiri na alamu ena 6:00 na mataka, au dabe ena desi ena VVL ena rarama ni cina kei na idabedabe qiqi, niu wilika ka vulica na iVola i Momani. Niu yacova na itinitini, au a wilika na yalayala ni iVola i Momani ena Moronai 10:3–5. Au kila na ivolanikalou oya niu a se gonevuli gone voli ni semineri. Au tekiduru ena masu ka kerea na vakadeitaki ni noqu vakabauta. Ia niu vakataroga na Turaga, a sega ni dua na ka a yaco mai. Au rarawa sara ga. Au dabe tale ena noqu idabedabe, ka raica ni sa vo ga e rua na draunipepa ki na itinitini ni iVola i Momani. Au nanuma meu sa vakaotiva mada ga. Ni vo ga e tolu na tikina ena Moronai 10, Moronai 10:32, au wilika kina na tikina oqo: “Io, dou lako mai vei Karisito, ka mo dou vakataucokotaki vua, ka vakuwai kemudou mai na veika kecega sa sega ni vakalou; ka kevaka dou sa vakuwai kemudou mai na veika kecega sa sega ni vakalou ka lomana na Kalou ena nomudou igu, vakasama, kei na nomudou kaukauwa kecega, sa na qai rauti kemudou na nona—” au a sega ni wilika rawa. Au tagi. Vosota. “Sa na qai rauti kemudou, na nona loloma soli wale dou sa vakataucokotaki kina ena vukui Karisito.” Niu wilika na tikina oya, e a yaco mai vei au na rarama kei na matata ni kila-ka. Au sega ni cakitaka rawa. E veilaveti ka katakata, ka vakasinaiti na noqu bula taucoko. Ena gauna oya, au kila kina ni iVola i Momani e dina ka nona itavi me vakadinadinataka ni o Jisu sai koya na Karisito.

Au, gole i Japani vata kei na ivakadinadina kaukauwa oqo. A tomani tikoga vakamalua na vakadeitaki ni noqu ivakadinadina ia e sega soti ga ni vaka na mataka lailai oya ena KVK. Kei na dua na bogi ucauca ni keirau vakarau moce, keirau rogoca edua na tukituki e katuba. Keirau a veiraici. A tiko na neirau icili e dakuni, ni itikotiko ni kaulotu. Ena noqu kurabui ni rawa ni lako mai ena bogi levu edua ki na neirau icili, au a gole yani ka dolava na katuba ka raici noqu peresitedi ni kaulotu ni duri tu ena tau ni uca vata kei na nona iviu. A kaya, “Gilbert Chōrō, Elder Gilbert, vakaisulu. Kedatou na lai raici Elder Matsuo.” O tamai Elder Matsuo a tauvi kenisa tiko ka sa voleka ni mate. Au nanuma sara niu kila na ka sa yaco. Ia niu vodo kina lori ni kaulotu, e golevi au mai o Peresitedi Matsumori ka vakamacalataka ni tinai koya na daukaulotu a mate ena dua na vakacala ka ena siga oya. A qai kaya, “Masulaka me kedatou rawa ni vakila ka kila na ka ena veivakacegui vua na daukaulotu oqo.” Au luvuci sara ga ka yalolailai. Au nanuma vinaka tiko na yavavala ni iquaqua ni iloilo ni motoka ni keitou lako tiko ena vakanomodi. Vakasauri, a kauti au na Yalotabu ki na Alama 7:12: ki yaloqu: “A sa ciqoma ko koya na nodra malumalumu, me vakasinaiti na lomana ena loloma cecere, me vaka na veika vakayago, me rawa kina ni vakila me vaka na veika vakayago na sala me vukei ira kina na nona tamata me vaka na nodra veimalumalumu.” Au kila ni Veisorovaki i Jisu Karisito a rawa kina vei keda meda lako curuma na ivalavala ca. Au kila ni na vukei keda o Karisito meda na vakaturi cake ka bula tale. Ia ena bogi oya ena gaunisala e Osaka, au vulica kina nio Jisu Karisito e rawa talega ni vakacegui keda ena noda dredre, ena noda rarawa, ni sega ni dodonu na bula. Au sega ni kila na ka sotava tiko na daukaulotu gone oya, ia ena cakamana ni Veisorovaki, e tiko e Dua e kila. Ena bogi oya, ni oti e dua na yabaki ni noqu kaulotu, a vakadinadinataka vakaukauwa vei au na Yalo, vakadua tale, ni dina na iVola i Momani, ka nona itavi me vakadinadinataka ni o Jisu na Karisito.

Au lesu mai na kaulotu ka vakamautaki Christine ena Valetabu e Salt Lake. Keirau a toki i Kalifonia, qai muri ki Boston. A tomani tikoga vakamalua na vakadeitaki, ni noqu ivakadinadina, ia, a sega soti ga ni vaka na mataka lailai oya ena KVK se ena bogi oya ena dua na tolo ni sala levu e Osaka. Ena dua na Sigatabu a yaco vei au edua na ivakadinadina kaukauwa ia a sega ni namaki mai vua na Yalo. Au a tiko ena dua na iwase ni ivolanikalou ka vuqa era sega ni dau gole kina me tarai cake kina nodra ivakadinadina. E tiko ena Alama 30, ena dua na lesoni e valenilotu, kau na vakatoka me ivunau i Korio, na vanua a cakitaka kina o Korio na Karisito, ka tovolea me vagalalataki ira na tamata mai na isau ni nodra digidigi, ka tukuna nida vakabulai ga ena noda vuku. E vakabibitaka vakalevu na ka eda rawa ni vakatoka nikua me ivakarau ni veika dodonu. A vosabeca talega vakaukauwa o Korio na nodra vakabauta eso me ivalavala sesewa ni nodra qase. Ni vakamuria tiko o qasenivuli ni Matawilivola ni Sigatabu na lesoni, au a tekivu vakananuma ni kevaka a vola vakataki koya o Josefa Simici na iVola i Momani, ena sega beka ni a vakacurumi Korio kina. A bula donuya o Josefa Simici edua na gauna bulabula vakalotu ni nodra vakabauti Jisu Karisito na tamata. E se bera ni sotava beka o koya edua na tamata me saqata vakaukauwa na ivunau i Karisito me vakai Korio se, meu kuria, o Neori se o Seremi, ka ratou tiko kece ena iVola i Momani. Ia eda kila ni a volai na iVola i Momani me baleta na noda gauna. Au raica rawa na mataqali ile vakaoqo mai vei ira na tamata au sotava vakawasoma ena ivakarau ni vuli e Cambridge, Massachusetts. Niu vakananuma na ka matalia oqo ena loma ni dua na kalasi ni Matawilivola ni Sigatabu, ka sa tiko rawa edua na ivakadinadina titobu ni iVola i Momani, a kaya vei au na Yalo, “Clark, na iVola i Momani e dina, ka nona itavi me vakadinadinataka ni o Jisu na Karisito.”

Na veika oqo a tomani tikoga ena noqu bula taucoko. Dua na gauna au a masu tiko e valetabu me baleti ira na itabagone ena loma ni siti e Boston. Niu wilika na ivolanikalou ena Mosaia 3:17, a vakavulica vei au na Yalo ni sala au rawa ni vukei ira kina na cauravou oqo ena veika era sotava tiko sai koya ena vuku i Jisu Karisito duadua ga. Dua na gauna au a vulica tiko na Alama 36 ka kila kina na ivakarau ni volavola vaka Iperiu ka tiko ena iwase kece ni vola oya, ka utona tiko na nona vakabulai o Alama Lailai. E veivakurabuitaki, ni veigauna kece edua kina noqu ivakadinadina me baleta na iVola i Momani, e a salavata mai kei na ivakadinadina kei Jisu Karisito. A yaco tale oqo ena soqoni ni koniferedi raraba ni marama ena Okotova ni 2018. A vakatetea kina o Peresitedi Nelson edua na veisureti vei ira na sisita ena Lotu mera wilika na iVola i Momani ni bera ni cava na yabaki, ka toqa na vanua kece e cavuti kina na iVakabula, kei na veitikina kece e tukuni kina na iVakabula. Ena noqu via tokoni watiqu kei iratou na luvei keirau yalewa e ono, au a tomani iratou ena veisureti oya. Au se qai ciqoma walega na ilavelave oqo ni iVola i Momani. E dua na ilavelave vou ni iVola i Momani. Au toqa na veivanua kece a cavuti kina na iVakabula. Na veidrauni pepa yadua ka tukuni Jisu Karisito era a toqai ena penikau damudamu. Niu yabaki 48, ka tiko noqu ivakadinadina titobu ni iVola i Momani kei na iVakabula, a tukuna tale vei au na Yalotabu ena vula i mago oya, e veimataka niu wilika na veidraunipepa oqo, “Clark, na ivola oqo e dina, ka vakadinadinataka ni o Jisu na Karisito.”

Nida lesu tale ki na vosa nei Peresitedi Nelson kau a cavuta mai liu: “Au vakamasuti kemuni mo ni karona na nomuni ivakadinadina. Cakacakataka. Taukena. Karona. Susuga me na tubu kina. Vakania ena dina. Kua ni vakadukara ena nodra vuku lasu na tagane kei na yalewa tawavakabauta ka qai vakataroga se cava sa malumalumu kina na nomu ivakadinadina. … Ni o cakava nomu ivakadinadina me ka bibi duadua vei iko, sarava na cakamana ena yaco kina nomu bula.” Au vakadinadinataka na veicakamana oqori. Au vakalougatataki ena vuqa na sala baleta niu cakava na noqu ivakadinadina me bibi ena noqu bula taucoko.

Taciqu kei na ganequ, nida qasenivuli ni veikavakalotu meda vukei ira noda gonevuli mera karona nodra ivakadinadina. Au gadreva meu cavuta e lima na sala e rawa nida vakavulici ira kina noda gonevuli mera karona kina nodra ivakadinadina. iMatai, vukei ira mera vakayagataka nodra digidigi. iKarua, vukei ira mera ivakaraitaki vei ira na tani, vakabibi vei ira era sotava tiko na dredre. iKatolu, taroga na taro ena vakabauta. iKava, goleva na ivurevure sinai ena dina. Kei na ikalima, vakararavi vua na Yalo.

iMatai, meda vakavulica vei ira na gonevuli ni tarai cake ni ivakadinadina e rawa ena vakatulewa matau. E dau cavuta vakalevu o C. S lewis na malanivosa “Na sala totolo ni kena rawati edua na ka sai koya me caka vakavinaka.” Ena taura na cakacaka me vakatitobutaki kina na vakabauta kei na bula vakatisaipeli. E nakiti na kena caka. E vakavulica o Alama ni tarai cake ni ivakadinadina e gadrevi kina na nomu vakasama taucoko: “Ia raica, kevaka moni yadra mada ka vakayadrata na yagomuni, mo ni vakatovotovotaka kina na noqu vosa, ka vakatovolea vakalailai na vakabauta, io, kevaka mada ga ko ni gadreva moni vakabauta, mo ni laiva na gagadre oqo me kadre e lomamuni, me yacova ni ko ni sa vakabauta ena kena ivakarau ka rawa mo ni vakabauta kina e dua na tiki lailai ni noqu vosa.”

Na ikarua ni ivakavuvuli eda rawa ni vakavulica me vukei ira na gonevuli mera karona nodra ivakadinadina oya mera ivakaraitaki vei ira na tani, ka vakabibi vei ira era sotava tiko na dredre. Na itabatamata oqo e kauwaitaki ira vakalevu na nodra icaba kei ira na sotava tiko na bolebole ena nodra bula. E vakavulica vei keda o Peresitedi Nelson meda kua ni vakalewai ira na tani era sotava tiko na dredre.

“Kevaka era kalawa tani na itokani kei na matavuvale mai na Lotu, lomani ira tikoga. E sega ni nomu itavi mo vakalewa nona digidigi e dua tale me vaka ni sega ni dodonu me dua e vakacacani iko nio yalodina tiko.

“Qo, yalovinaka, rogoci au niu tukuna, mo kua ni liutaki vakatani mai vei ira ka vakani na nodra vakatitiqa ena veika o sega ni rawa ni raica ena nodra bula.”

Na lomalomarua kei na vakatitiqa e rawa ni veidewavi, ia e vaka talega kina na vakabauta kei na inuinui. E tomana o Peresitedi Nelson:

“Vakauasivi, laiva mera raica nomu itokani dauvakatitiqa na levu ni nomu lomana na Turaga kei na Nona kosipeli. Vakidacalataka na yalodra dauvakatitiqa ena nomu vakabauta!

“Ni o karona na nomu ivakadinadina ka susuga me tubu, o na yaco mo iyaya ni cakacaka kaukauwa ena liga ni Turaga.”

Ena iotioti ni vakasama oqo—nodra vakavulici noda gonevuli mera iyaya ni cakacaka ka ivurevure mai vua na Turaga—e vanua au nanuma ni tiko kina vei keda na madigi meda vukei ira na itabagone qase cake ena nodra ivakadinadina. Vakavulici ira mera dua na rarama. Vakavulici ira mera dua na itokani. Vakavulici ira mera dua na ivurevure vei ira na tani. Vei ira era se bera ni kunea rawa na nodra vakabauta, vakavulici ira mera cakacaka ena nodra qaravi ira na tani. E vuqa na ivakadinadina e yaco mai ena cakacaka ni veiqaravi vei ira na tani. Noqu ivakadinadina kau a ciqoma ena valetabu na Boston Massachusetts Temple, ni o Karisito na isaunitaro ki na noqu bula vaka itabagone, a yaco mai baleta niu a cakava tiko na veika kece au kila meu veivuke kina. Vakavulici ira noda gonevuli mera rarama, ena qai tubu na nodra ivakadinadina.

O keda, e dodonu, eda vakavulica ni VINAKA me tiko na taro. O Elder Renlund ena vosa tiko vakalailai ena tikina oqo ena bogi nikua. O Peresitedi Nelson a vakamacalataka, “Kevaka e tiko na nomu taro—kau nuitaka ni tiko—vakasaqara na kena isau ena gagadre dina mo vakadinata.” Ia me vaka sa dusia oti o Peresitedi Jeffrey R. Holland, “Ena so na gauna eda nanuma ni kena vakaraitaki vakadodonu na vakatitiqa e sa ivakaraitaki cecere ni noda yaloqaqa vakayalo mai na kena vakaraitaki vakadodonu na vakabauta. E sega ni vakakina!” Ena nona vakamamasu na tama ni gone tauvimate vua na iVakabula, “Turaga, au sa vakabauta; ni vukea na noqu tawa vakabauta,” e a tekivu o koya mai na itutu ni vakabauta. A vulica o koya ni se gone—se au a vulica niu se gone, niu kauta vei tamaqu edua na lomatarotaro baleta na vakabauta, au a nanuma niu sa rui vuku ena noqu taroga edua na ka kau nanuma ni na sega ni kila o koya. Niu yabaki 15, au vuku cake mai vei tamaqu, e dau qaqa tu ga o koya ena neirau veiba kece. Ka oqo sa tiko edua na noqu taro dredre vua. Mai na nona sauma na noqu taro, ka mani kaya ga, “Clark, sa tarogi oti talega vei au na taro oqori. Ena noqu bula, edau tiko e rua na noqui binibini taro: edua nai binibini ni veika au kila kei na ibinibini ni veika e dredre na kena kilai. Ni toso tiko na gauna, au raica ni tubu tiko ga na ibinibini ni veika au kila, ka lutu sobu tiko na ibinibini ni veika au sega ni kila.”

Kevaka o na toso iliu ena vakabauta, au yalataka vei iko ni oqo na ka ena yaco. E sega ni kena ibalebale meda kua ni walia na taro kei na kauwai e tiko vei ira na tamata, ia meda vukei ira mera toso ki liu ena vakabauta. Oqo na ka au nanuma ni a cavuta tiko o Elder Larry Corbridge ena lotu e BYU ni a tukuna vei ira na gonevuli eke mera vakanamata ki na taro bibi ka laiva na kena vo me qai saumi ni toso tiko na gauna. E vakananumi keda vakavuqa o Peresitedi Nelson ni tarai cake ni ivakadinadina e dodonu talega me okati kina na rai ki na ivurevure era sinai ena dina. “Vakania [nomu ivakadinadina] ena dina. Kakua ni vakadukadukalitaka ena nodra ivakavuvuli lasu na tagane kei na yalewa tawavakabauta ka qai vakataroga se cava sa malumalumu kina na nomu ivakadinadina.” Eso na itabagone qase cake era vakila ni sala duadua ga me qaqaco kina nodra vakabauta oya mera rogoci ira era saqata ka ra meca ni Lotu. Era nanuma ni oya ena vaqaqacotaka edua na ivakadinadina. Ena veiituvaki vaka oya, e dodonu meda vukei ira noda gonevuli mera kila na inaki e salamuria mai. O Korio, Neori, kei Seremi eratou a sega ni via vukei ira na muri iratou tiko ia eratou a vinakata ga me vakadonuya na cala ni nodra digidigi ka vunautaka yani na nodratou ile. Vakavulica vei ira nomu gonevuli ni “eso na ivurevure era nakiti mera vakavuna na tawa veivakabauti, taqaya, kei na vakatitiqa.” Vukei ira mera rai vei ira na parofita bula, ki na ivolanikalou, vata kei ira na iliuliu nuitaki ni Lotu.

E dua vei ira na ivurevure bibi duadua ka sinai ena dina eda rawa ni rai kina sai koya na Yalo Tabu. Vakavulica vei ira na gonevuli mera kila na cava era vakila ni tiko na Yalo Tabu ka kidava na gauna e biubiu kina ni vakatanitaki na dina. Au a vuli mai na ka au a sotava ena ulutaga oqo wale tikoga oqo e BYU–Hawaii ena dua na soqoni ni taro kei na saumi taro vata kei Peresitedi Henry B. Eyring kei Peresitedi Keoni Kauwe. A tarogi keitou edua na gonevuli se vanua cava era na gadreva kina na Yalo Tabu ena nodra bula. Ni cavu vosataka na vosa nei Peresitedi Nelson “Ia ena veisiga ka lako mai, ena sega ni rawa na bula tiko vakayalo ke sega na cakacaka veituberi, veidusimaki, ka veivakacegui ni Yalo Tabu,” a qai kerei au o Peresitedi Eyring meu sauma na taro. Oqo edua na taro au sa dau sauma vakadrau na gauna niu se peresitedi tiko kina ni BYU–Idaho. Au kaya nira na gadreva na Yalo na gonevuli nira vakatulewataka na cava mera vulica, o cei mera gadiva, vanua mera tiko kina, cakacaka mera cakava, kei na vuqa tale na digidigi ni bula era sotava tiko na noda itabagone qase cake. A qai kerei ira na gonevuli o Peresitedi Eyring mera wilika tale na malanivosa nei Peresitedi Nelson. Ena gauna oqo, a cegu o koya ena vosa bula. A vakamatataka o Peresitedi Eyring ni parofita a digitaka na vosa bula ena dua na inaki. A vakamacalataka nira bula tiko na gonevuli ena dua na gauna e vakayaco-ka vakalevu tiko kina na vunica me vakatanitaka na dina ka kevaka e sega ni tiko kei ira na Yalo Tabu, era na vakacalai me baleta na veika bibi duadua ena dina ni kosipeli. Ena nona vosa “Vakasama Vakasilesitieli,” a kaya kina o Peresitedi Nelson: “Ni sega ni vakaiyalayala na nona dauveivakacalai na vuni ca. Yalovinaka vakarautaki iko. Kua ni tauri ivakasala mai vei ira na tawa vakabauta. Vaqara na veidusimaki mai vei ira na domo o nuitaka—ira na parofita, daurairai, ka dauvakatakila kei na vakasolokakana ni Yalo Tabu.”

Taciqu kei na ganequ, meda vakavulici ira noda gonevuli mera karona nodra ivakadinadina. Vakavulici ira mera cakacakataka, taukena, karona, ka susuga me na tubu kina. Ena vuku ni ka oqo, meda vakavulici ira mera vakayagataka nodra digidigi, mera rarama vei ira na tani, taro ena vakabauta, rai ki na ivurevure e sinai ena dina, ka vulica na vakararavi vua na Yalo Tabu. Na iDusidusi ni Vaqaqacotaki ni Veivakavulici ni Lotu e solia vei keda na ivakaro meda cakava oqo mai vuni yaloda. Sa vaka yacoka tiko na nomuni sasaga. Kakua ni vakabauta na italanoa mai taudaku. Era gole tiko mai vakayauyau kina inisitute o ira na itabagone qasecake. Era gole tiko vakayauyau ki na koronivuli ni Lotu o ira na itabagone qasecake. E tubu na vakabauta ena loma ni Lotu, ena veigauna dredre mada ga oqo. Era vulica tiko na noda gonevuli mera karona na nodra ivakadinadina, ka ra sa toro vakavoleka tiko vei Karisito. E tiko edua na noqu ivakadinadina baleta na iVakabula. Au kila ni sa dina na iVola i Momani. Kau tusanaka ni nona inaki me vakadinadinataka ni ko Jisu na Karisito. Meda sureti ira noda gonevuli mera kunea na veidina vata oya. Ena yacai Jisu Karisito, emeni.