Yacova kei Revurevu ni Semineri kei na Inisitute

Brother Chad H Webb:Au marau meu wasea vei kemuni nikuana veisau kina sasaga ni Semineri kei na Inisitute me vakalevutaki na vanua eda rawa ni yacova ka vaka yacoka kina kei na cava e yaco tiko vei ira noda itabagone kei ira era qasecake e veiyasai vuravura. So vei kemuni sa na sarava se rogoca oti beka eso na tiki ni vosa oqo ena veituvaki duidui eso. Ia au vakabauta ni tiko na yaga ni kena laurai na nodra veiuturi vinaka na veitikina kece ka nanumi na veika me tarava mai.

Vei kemuni na sega ni cakacaka ena S&I, au nuitaka ni na yaga ka veivuke talega vei kemuni na itukutuku oqo.

O keitou kece na cakacaka ena tabana ni Vuli ni Lotu keitou dau vakasamataka vakawasoma na sala me tarai cake kina na vakabauta na iVakabula ka tokoni ira vakavinaka cake na noda gonevuli ena nodra sasaga me bulataka na kosipeli. Ena lima se ono na yabaki sa oti, ena neitou raica ni lutu na volayaca ki na inisitute me vica vata na yabaki, keitou a kauwai sara kina vakalevu. Na neitou kila talega ni vuqa na itabagone qase cake era a sotava tiko na veibolebole dredre sara ena nodra vakabauta, keitou a vinakata me veivuke baleta keitou kila ni inisitute e rawa ni dua na sala vinaka vei ira mera ciqoma kina na veitokoni era gadreva. Keitou via kila se cava tale keitou rawa ni cakava, sega wale ga mera uqeti mera vakaitavi ia me kilai talega na sala me keitou vakayaco-ka vakalevu kina ena nodra bula. Keitou nanuma ni na bibi me raici edua na sala mera rogoci kina vakaidina, me kilai vinaka kina na nodra bolebole, vaqarai se cava e rawa ni cakava na inisitute me veivuke kina. Keitou biutavata edua na timi ena loma ni Semineri kei na Inisitute ka vakatoka me Komiti ni Veivakatorocaketaki ni Inisitute.

Na komiti oqo a cakacaka taumada vata kei na tabana ni Vakadidike ni Veivakacokotaki me cakava eso na vakadidike baleti ira na itabagone qase cake ena Lotu. Eratou cakacakavata kei na BYU AdLab me raica se veisau cava keitou rawa ni cakava kina inisitute me vukei ira na itabagone qasecake ena nodra gagadre.

Na veika oqo a veivuke vakalevu ka vakauqeti keitou me keitou cakava e levu tale na ka me kunei eso na madigi me vakatetea na veivakayarayarataki kei na vakayaco-ka ni inisitute. Ka keitou mani sauma na Bonneville Communications me cakava edua na vakadidike titobu.

E ratou vakanamata ka vakatarogi ira e sivia na 5,000 na itabagone qasecake, oka kina e levu era sega ni lewe ni inisitute se ena Lotu ena gauna oya. Na vakadidike e vakayacori ena lima na iwase ni vuravura ka kumuni kina e levu sara na itukutuku yaga.

Na uto ni veika era tukuna vei keitou na itabagone qasecake oya nira vinakata ka gadreva e va na ka:

Era vinakata na inisitute me sotava vinaka na nodra gagadre ka sauma na nodra taro eso.

Era vinakata mera vakila nira ciqomi—okati kina e dua na ilawalawa tamata era na vukei ira me bulataka na kosipeli ka okati ena dua na inaki, mera vakila kina nira tiki ni dua na ka yaga.

Era kerea talega me vakarawarawataki na tiko ena inisitute me rawa nira vakaitavi se mani vakacava na nodra osooso kei na veika e gadrevi ena nodra gauna.

E levu era a vinakata mera vakila na nona loloma na Tamada Vakalomalagi ka vakila nira voleka vua na iVakabula. Keitou vakatoka me “saumaki vei Jisu Karisito.” E vukei keitou o Elder Gilbert me kila ni kena oqo a duidui vakalevu sara mai vei ira na kena vo.

Na inaki ni inisitute sai koya me vakatitobutaka na saumaki vei Jisu Karisito kei na Nona kosipeli vakalesuimai. Na kena vo era sala ga ki na kena rawati na inaki. E dodonu mera semati kina inaki ni saumaki, de na qai sega ni kunea na itabagone qasecake edua na kena yaga vei ira. E rawa ni keitou bulia na isema ka sega ni veimuataki kina saumaki se veivakataukenitaki ena dua na kalavo se timi ni qito. Ia sega ni ka oya keitou vaqara tiko. E gadrevi me keitou vukei ira mera raica rawa na sala e sauma kina na kosipeli na vakatataro ni lomadra ka vukei ira ena nodra bolebole ni veisiga. Ka gadrevi me keitou bucina na okati kina veiyalayalati. Na veika kece keitou cakava e dodonu me veimuataki kina saumaki.

Ka keitou mani tarogi ira tale na itabagone qase cake “Se na vakacava ke veisemati vakavinaka cake na inisitute, bucina na veivakataukenitaki, ka na rawati ena veisala ena vakatitobutaka na saumaki?”

Na kena macala e bucini kina e vica na vakatutu ka vakayagataki tiko ena parokaramu digitaki ena loma ni va na yabaki sa oti. Oqo e vica na kena ivakaraitaki.

Me vakaveiwekanitaki na inisitute, keitou tauyavutaka eso na vuli leleka. Na vuli erua- kina lima na macawa na kedra balavu era yavutaki vakatabakidua ena nodra gagadre na itabagone qase cake. Me ikuri ni kalasi tuvai vaka semesita, era rawa ni lako mai ka ena dua ga na gauna lekaleka mera vakaraitaka na nodra nanuma. Na vuli oqo era yavutaki tikoga ena ivolanikalou kei na nodra ivakavuvuli na parofita ni gauna oqo kei na iliuliu ni Lotu tale eso.

Keitou vakuria talega eso na veikalasi vovou. Me ivakaraitaki, keitou tauyavutaka edua na kalasi mai na ivola nei Elder Anderson The Divine Gift of Forgiveness, ka sa ciqomi sara vakalevu.

Keitou vakavinavinaka talega vei Elder Uchtdorf, ni a vakaveikilaitaka na Veivakavulici ena iVakarau ni iVakabula vei ira kece na noda qasenivuli. Oya na yavu ni neitou veituberi, oka kina na sala me caka kina na veikalasi me yaga vakalevu.

Ena sasaga ni kena vakalevutaki na vakilai ni veiciqomi, keitou sa vakabibitaka na vakasama nei Peresitedi Nelson ni gauna o vukea kina edua me lako mai vei Jisu Karisito me caka ka maroroi veiyalayalati, o sa vakasoqoni Isireli tiko. Vinaka vakalevu nomuni cakacaka vakaukauwa ena vakatetei ni veisureti kei na veivakayaloqaqataki vei ira na mai via vuli.

Ena dua ga na ivakaraitaki, ena yabaki sa oti e Loma i Amerika ga, o ira noda qasenivuli era a sureta e sivia na 25,000 na itabagone kei ira na qase cake mera tiko ena kalasi. Keitou a kerei ira talega na noda gonevuli mera sureti ira na nodra itokani. E yaco, me sivia na 30,000 na itokani mai na vei matalotu tale eso, era papitaiso kina e sivia na 9,000 na tamata. Ena veiveisau kece keitou sa cakava, au nanuma ni vuna levu duadua e tubu kina na volayaca kina semineri kei na inisitute baleta ni vuqa vei kemuni sa raica rawa na raivotu a vakavulica o Peresitedi Nelson me vakasoqoni edua na itaba itabagone kei ira na qase cake. Vinaka vakalevu na yalo ni veivakasokumuni kei na nodra kau mai e vuqa tale na itabagone vei Jisu Karisito. Na levu ga ni noda muria tiko na raivotu vakaparofita, na levu talega ni igu eda na rawata ena cakacaka oqo.

Keitou sa cakava talega eso na ka, me vaka na vakavoui ni kalasirumu kei na vakabibitaki ni kena sotavi nodra gagadre na gonevuli mai na kena vakacavari ga na lesoni. Keitou solia talega vei ira na gonevuli na galala me digitaka na tiki ni lewenivuli cava era vinakata mera vakayagataka vakalevu se vakalailai kina na nodra gauna.

Me vakarawarawataki, na veisau levu duadua sai koya na inisitute ena initaneti. Na iwiliwili ni volayaca ena initaneti e veiyabaki era sa tubu ena—sivia na 25,000, tubu ena 9,000 mai na rua na yabaki sa oti. A vu vakalevu oqo mai na cakacaka vata kei na BYU–Pathway Worldwide ka na vu levu duadua tiko ni noda tubu ena veigauna mai muri.

Keitou vakarautaka talega na vakarawarawataki ni gauna kei na vanua ni kalasi mera tiko rawa kina na gonevuli.

Keitou vakarautaka na itaviqaravi kei na ivurevure tale eso kina veivale ni inisitute, ka sa kauta mai e levu na igu kei na marau kei na levu tale na itabagone mera vakaitavi ena inisitute. Keitou sa cakacaka vata talega kei na veitaba ni Lotu eso me vakayacori na inisitute ena veivanua vakadonui vou ni soqoni vata.

Mera vakauqeti e vuqa tale na gonevuli mera vakaitavi, a bulia o Peresitedi Nelson edua na vidio ni veisureti. Keitou a katona talega na vosa mai vei ira na gonevuli baleta na veika era sotava ena inisitute. Keitou vakatoka na vidio me “Au Taleitaka na Inistitute.” Oqo edua na iwase ka rau cokoti vata kina.

[vidio]

Kofi: Au nanuma ni inisitute e vukei au dina meu kila vinaka na noqu iVakabula ka sega ni kilai Koya ga ia meu vulica na veika baleti Koya ka kila se tiki ni noqu bula cava au rawa ni veisautaka meu vakataki Koya kina.

Lily: Au taleitaka na inisitute baleta niu lomani Jisu Karisito, ka dua na vanua au rawa ni veitalanoataki Koya kina. Ka tiko na kaukauwa nida veitalanoataki Jisu Karisito. Kau vakila na kaukauwa oya ena noqu bula.

Peresitedi Russell M. Nelson: Kemuni na taciqu kei na ganequ, au lomani kemuni. Au dau nanumi kemuni ka dau masulaki kemuni vakawasoma. Oni bula tiko ena dua na itaba gauna ka sega ni tautauvata kei na dua tale. Oni tiko ena yabaki ni bula oni cakava tiko kina eso na vakatulewa bibi, ka na vakayaco-ka kina vo ni nomu bula vakayago kei na bula tawamudu. Na veivakatulewa oqo era na rairai veiluvuci ka veivakarerei ena so na gauna, ia e marautaki talega baleta nida bula tiko ena dua na gauna bibi.

Au via sureti iko mo cakava edua na ka ena vukei iko ka vica wale sara na ka ena rawa ni cakava vakakina: gole i inisitute. Au saravi iratou tiko oqo na luvequ, makubuqu, kei na vuqa na makubuqu vakarua era tiko ena inisitute. Na goleva na inisitute e yaco kina na veisau ni bula vei iratou. E sa vukei ratou na inisitute, ka na vukei iko me vakatitobutaka na nomu saumaki vei Jisu Karisito. Na tiko ena inisitute ena vukei iko mo vakila vakalevu cake na loloma cecere nei Tamada Vakalomalagi vei iko.

Na inisitute ena vakarautaka vei kemuni na qasenivuli veivakauqeti, itokani yalodina, kei na yalo ni veivakataukenitaki. Ena vukei iko mo raica na vuna e veimuataki kina ki na marau tawa-yalani na bulataki ni kosipeli. Na tiko ena inisitute ena vukei iko mo bulataka na kosipeli ka vakila na reki levu, ena gauna oqo.

Kevaka o via kila na dina me baleta o cei o iko, lako kina inisitute. Kevaka o via kila na inaki ni bula, tiko ena inisitute. Kevaka o vinakata mo tiko ga ena salatu ni veiyalayalati, gole kina inisitute. Kevaka o vinakata mo vulica na sala mo laiva kina na Kalou me qaqa tikoga ena nomu bula, gole kina inisitute. Kevaka o vinakata mo dautataro, gole kina inisitute.

Au yalataka vei kemuni na veivakalougatataki oqo ka tukuna noqu lomani kemuni ena yaca tabu i Jisu Karisito, emeni.

[cava na vidio]

Na vidio e sa tiko ena mataveilawa ni Lotu. Era vakayagataki ena tavata ni vakau itukutuku raraba, ena vei kalasirumu, vata kei ira na iliuliu ni matabete, ka levu vei kemuni oni a vakayagataka ena lotu ni TQC. Vinaka vakalevu nomuni vakayagataka na veiiyaya oqo me vakatetei kina na veisureti kei na yalayala ni parofita.

Au taleitaka na vidio baleti ira na gonevuli. Era sega ni tuvai, ka vuqa vei ira era tukuna na vakayaco-ka ni nodra kalasi ena nodra vukei mera kila na iVakabula ka muri Koya. Vinaka vakalevu na veika oni cakava tiko; Au taleitaka meu rogoca nodra ivakadinadina. Eda vakavinavinaka talega vei Peresitedi Nelson ena nona vosa, ka sa tarai ira vakaidina eso na itabagone qase cake.

Niu tiko voli mai San Diego kei Elder Stevenson, e gole mai vei au edua na goneyalewa ni oti na lotu ka kaya ni nanuma ga ni sa oti na gauna ni nona tauri kalasi ena inisitute ni oti nona taurivola. Ia ni oti nona rogoca na parofita ni wasea na nona yalayala, a volayaca vakatotolo sara ki na dua tale na kalasi, ka sa vakalougatataki sara kina vakalevu.

Na vatuka ni veisasaga kece oqo kei na so tale oya na tubu ni inisitute.

Ni oti e lima na yabaki na kena lutu, ena loma ni rua na yabaki sa oti eda sa vakuria kina e 57,000 tale na gonevuli. Oya e 20 na pasede ni tubu—ka keitou kila ni levu talega na iwiliwili ni gonevuli era vakaitavi era sega ni volayaca. Na iwiliwili levu duadua ena walu na yabaki, ka keitou marau me raica na tubu veitaravi e veiyabaki.

Na tubu ni volayaca edua walega na tiki ni italanoa. Ena vanua kece au lakova, au rogoca na italanoa ni veisau ni nodra bula na tamata. Nira tekivu me vulica ena yalodina na itabagone na ivolanikalou, era na vakalougatataki ka rawata na veivakauqeti kei na inuinui. Ka yaco tiko oqo ena noda veikalasi e veisiga.

Me ikuri ni volayaca vakayabaki, keitou kila ni 95 na pasede ni tabagone qase cake sega ni vakawati lotu bula era a tauri inisitute ena dua na gauna vaka itabagone qase cake, ka levu ena maliwa ni yabaki 18 kei na 24. Ia keitou sega ni loma vakacegu kina; keitou cakava tiko na ka kece keitou rawata me dodoliga yani vei ira kece bulabula se segana itabagone qase cake. Sa nuitaki ni pasede ena sivia na 100 na pasede vei ira na bulabula tiko baleta ni inisitute sa rawa ni yacovi ira kece na TQC sega ni vakawati ena lotu era vakaitavi tiko kei na vuqa vei ira era sega tiko ni vakaitavi me vukei ira mera lesu tale mai.

Ena yabaki oqo, keitou kila nina vakuri tale e 20,000 na gonevuli ni institute. E kena ibalebale ni keitou sa soqona rawa e sivia na 77,000 na iwiliwili ni gonevuli ena loma ni tolu na yabaki sa oti, ka sivia na 100,000 ena semineri kei na inisitute. E rawa niu cavuta tale oya? Sivia na 100,000 na ikuri ni gonevuli ena tolu na yabaki—ena vuku ni nomuni gugumatua!

E kena ibalebale oya ni 100,000 tale na tamata sa nodra na madigi mera raica na veiwekani ni kosipeli kina nodra bula, vakila nira ciqomi, ka vakatitobutaki nodra saumaki vei Jisu Karisito kei na Nona kosipeli vakalesui mai. Vinaka vakalevu!

Na cava tale e tarava kina inisitute?

Keitou na vakanamata tikoga kina inaki ni Semineri kei na Inisitute ka muria tiko. Keitou sega ni veivakatorocaketaki wale tikoga. Keitou cakava tiko me tete na vanua e rawa ni yacovi ka vakalevutaki na neitou vakayaco-ka.

Me veivuke ni rawati oya, keitou solia tiko na ikuri ni veidusimaki kei na iwalewale ni veivakatorocaketaki mai muri. Na iwalewale oqo e tekivu ena vakarorogo mera vukei na itabagone qase cake mera vakila nira lomani ka rogoci. Vakasaqara mo kila vakavinaka nodra gagadre. Sureti ira mera tiki ni cakacaka.

Tarava, veivakasalataki vata ka vaqara na iwali eso e tiko ni nanumi tiko na lawatu eso kei na ivurevure e tiko.

Qai vaqara na veivakadonui me vakayagataki kina na veiiwali eso oqori ka vakarautaka na vatukana, veidutaitaka na vatukana me kunei na kedra yaga, ka vakarogoci ira tale na ivavakoso.

Ena loma ni cakacaka ni vakadidike oqo, cakacaka vakavoleka kei nomu dairekita ni vanua se iwasewase. Era na solia na veituberi kei na veidusimaki e vakaibalebale.

Me vaka e tukuna o Elder Neil L. Andersen:

“Eda sa dau ni veivakatorocaketaki kece sara. Meda maroroya tikoga na yalo vata oya ena noda vakasama ka kila tiko ni Lotu oqo e Lotu ni veivakatorocaketaki. O keda eda sa Lotu i Jisu Karisito, kei na veiivakavuvuli oqori era tawamudu. Ia eda dau veivakatorocaketaki baleta nida dau moici keda tikoga, eda tubu tikoga, ka dau cakava me vinaka cake tikoga edua na ka. Ia au namaka, ena gauna vata oqori, meda imuri vinaka. … Eda sa dau ni veivakatorocaketaki kece.”

Au taleitaka na veika a vakavulica o Elder Anderson. Eso na ka ena sega vakadua ni veisau, me vaka na ivakavuvuli tawamudu ni kosipeli. Ia eda moica na parokaramu ni Lotu me sotava vakavinaka nodra gagadre na lewena.

Na uto ni veika keitou na daucakava tikoga sai koya na vakavulici ni kosipeli i Jisu Karisito me vaka e kunei ena vosa ni Kalou kei na yalo ni Yalo Tabu.

Ena neitou sasaga me caka oqo ena sala e vakanamata kina vei ira na vuli, keitou uqeti kemuni moni vakaitavi ena cakacaka oqo ni rogoci ira ka golevi ira na gonevuli.

Yalovinaka mo nanuma: na ka kece eda cakava ena vakatorocaketaki ni inisitute e dodonu me salavata kei na kena inaki ka vukei ira na itabagone qase cake mera vakatitobutaka nodra saumaki vei Jisu Karisito.

Ia, qo, vakacava na semineri? Me vaka au a cavuta, na semineri sa vakila tale tikoga na tubu. E sega sara ni vaka na inisitute, ia eda sa tubu ena 5 na pasede ena loma ni rua na yabaki sa oti ena semineri. Oqo e se tubu vinaka, baleta ni dina ga ni lutu na iwiliwili ena 50,000 na gonevuli mai na 2018, eda tubu tiko ga. Ena yabaki sa oti eda a yacova na 54.4 na pasede ni volayaca a rawa ni caka ena semineri. E iwiliwili duadua e cake keitou bau ripotetaka, ka tubu ena 49 na pasede mai na lima yabaki sa oti. Ena yabaki oqo, keitou namaka tiko me tosoya cake tale na pasede oya ki na 56 ka vakuria tale e 3,000 na gonevuli.

Keitou marautaka na ka oqo. Dua tiko na neitou dairekita ni tabana ena Valenivolavola ni Lotu ka, ena gauna edau rawaka kina nona timi, ena dau kailavaka, “Aisi kirimu vei keda kece! Au via tukuna oya i vuravura taucoko, donu?” Na cakacaka uasivi kece oqo ko ni cakava me tosoi cake kina na volayaca ko ni cakava tiko, o—kemuni kece, ni lai gunu aisi kirimu, yalovinaka. Ka marautaka! E totoka dina na ka e yaco tiko. Vinaka, vinaka vakalevu. Ni keitou marau tiko ka sega ni lomavakacegu, keitou dau tarogi keitou tikoga se, “Na cava tale keitou rawa ni cakava me vakalougatataki ira kina na itabagone ena semineri?”

Ena vica na yabaki sa oti, au wasea kina ni ka vinaka duadua eda rawa ni cakava me vakatoroicaketaki kina na semineri oya me tomani tiko ga na vakayagataki ni vulici ni ivunau. Na levu ga ni noda rawa ni vakayagataka na vulici ni ivunau me vaka na kena inaki, na levu ni kena rawa ni vakalougatataki ira na itabagone ena Lotu. Na vulici ni ivunau ena sureta na vakatitobutaki ni saumaki, veisemati, kei na veivakataukenitaki vei ira noda gonevuli ni semineri.

Mai na gauna oya, keitou sa biuta cake tale edua na vakatutu bibi. Tekivu ena 2025, keitou na tavoca kina na lesoni ni vakavakarau kina bula e vuravura taucoko me sotavi na gagadre e tiko era kunea rawa na noda itabagone kei na iliuliu.

Na lesoni veiuqeti oqo e tara na ulutaga me vaka na vakavakarau kina kaulotu kei na valetabu, vuli, ituvaki ni yago kei na vakasama, nodra ivakavuvuli na parofita ni gauna oqo, kei na vuqa tale. Na lesoni ena tokona na ivakarau ni vakavulici ni ivolanikalou sa yaco tiko kei na sasaga ni vulici ni ivunau.

Ena nona vosa vei ira noda itabagone, noda komisina, o Elder Clark G. Gilbert, noda komisina, a kaya,“ Na veilesoni oqo ni vakavakarau kina bula era vakarautaki me vukei iko me vaqaqacotaka na nomu veiwekani kei na Kalou ka rawata na Nona veivuke!”

E kaya tale, “O Peresitedi Nelson sa yalataka nio vakaitavi ena semineri, ‘o ira na [itabagone] era na ciqoma na isau ni so na [nodra] taro dredre sara. [Era] na kunea eso na itokani e rawa [nira] nuitaka. [Era] na yaco me tisaipeli dina ni Turaga ko Jisu Karisito.’”

Kevaka o vakatataro tiko me baleta na vakatorocaketaki ni semineri, ena gauna mada oqo, meda vakanamata kina kena vakavulici vakaituvatuva na ivolanikalou, vakayagataki na vulici ni ivunau, ka vakayagataki vakavinaka na lesoni ni vakavakarau ki na bula. Oqori na sala au vakabauta eda na sotava vakavinaka kina nodra gagadre na itabagone ena Lotu ena gauna sara ga oqo.

Vinaka vakalevu na veika koni cakava tiko mera tokoni na itabagone kei ira era qase cake e veivanua. Na nomuni sasaga sa vakatetea tiko na vanua e yacova ka vakayaco-ka kina na Semineri kei na Inisitute ena veisala yaga eso.

Au marautaka vakalevu na vakuri ni 100,000 tale na gonevuli kina noda veikalasi ena vica na yabaki sa oti—kei na toso cake ni veisemati, veivakataukenitaki, kei na kena vakarawarawataki ka sa veimuataki tiko kina nodra saumaki vei Jisu Karisito.

Meda tomana tikoga na toso oqo ena veiyabaki ka tu mai mera na kalougata kina e vuqa vakavuqa na luvena na Tamada Vakalomalagi.

Au vakadinadinataka ni sa vakatotolotaka tiko na Turaga na Nona cakacaka. Sa dua na veivakalougatataki levu meda tiki ni veika oqori. Kau vakadinadinataka nio Jisu na Karisito, na iVakabula kei vuravura; ni tiko edua na Nona ituvatuva uasivi na Tamada Vakalomalagi vei ira na luvena; ka uto ni ituvatuva uasivi oya o Jisu Karisito me veivakabulai ka vakacerecerei ira na luvena na Tamada Vakalomalagi. Oqo na Nona matanitu e vuravura, ka marautaki me tiki ni matanitu oya ena sala cava ga. Nida oga ka solia noda bula ena vakadinadinataki Jisu Karisito sa ka yaga dina. Au marau niu tiki ni cakacaka oya ka vakadinadinataki Jisu Karisito kei na Nona Lotu dina e vuravura, o ira na parofita bula, na iVola i Momani, kei na veivakalougatataki kece sa noda ena vuku ni kosipeli vakalesuimai i Jisu Karisito e vuravura. Ena yaca i Jisu Karisito, emeni.