“Sawv Daws Los Txhos Caug Pe Nws”

Kuv cov kwv tij thiab cov muam, zoo siab kawg uas peb pib ib lub caij nyoog Christmas tshiab thaum peb ua koob tsheej txog peb tus Cawm Seej thiab tus Txhiv Dim, tus Tswv Yexus Khetos, txoj kev yug los.

Yog ib lub sij hawm dawb ceev txhua zaus ib tug me nyuam yug los. Cia li saib peb tus tub xeeb ntxwv ua li cas thawj zaug uas nws puag nws tus kwv.

[video]

Kuv yeej paub yog vim li cas thaum hmo dawb huv 2,000 tawm xyoo tas los nyob ze lub zos Npelehees, cov tim tswv saum ntuj ceeb tsheej tau zoo siab hu nkauj! Ib tug tim tswv tau qhia cov neeg yug yaj txog qhov tseeb tseem ceeb no:

“Kuv los ntawm no yog coj txoj moo zoo uas yog txoj kev zoo siab kawg nkaus rau txhua haiv neeg los qhia rau nej paub.

“Hnub no nej tus Cawm Seej twb yug los rau hauv Daviv lub nroog lawm, nws yog Khetos uas yog tus Tswv.”¹

Thiab tam sim no, kuv cov kwv tij thiab cov muam, thov kom peb “sawv daws los txhos caug pe Nws.”²

Ib yam li nej feem coob, Christmas twb hloov kuv lub siab ntau lawm. Kuv nco txog thaum kuv yog ib tug me nyuam es twb muaj kev Ntxhov Siab Loj Tshaj Plaws rau tej xyoo 1930. Tsis muaj nyiaj txiag ntau. Tej khoom plig los yeej muaj nqis heev.

Kuv niam kuv txiv twb ua rau kuv thiab kuv cov kwv tij cov muam nyiam Christmas heev. Txhua xyoo peb tsev neeg tau “sawv cev rau Santa” pab lwm tsev neeg. Peb tau npaj tej khoom plig zoo thiab xa mus nyob rau Hmo Ua Ntej Christmas. Thaum peb tsav tsheb ntawm lawv lub tsev mus, lawv txoj kev yoj tes thiab tej lub ntsej muag uas los kua muag ua rau peb paub kev xyiv fab ntawm kev pub rau lwm tus.

Kuv nyiam tej zaj nkauj ntawm Christmas thaum ntawd—thiab kuv tseem nyiam heev. Txhua xyoo, kuv tus poj niam thiab kuv wb nyiam mloog thiab hu zaj nkauj Mexiyas uas Handel sau. Kuv nyiam lub ntsiab Henplais ntawm lo lus hauleluyas. Lo lus no txhais tias “qhuas tus Tswv Yehauvas uas yog Vajtswv.”³ Cov lus hauv zaj nkauj no tsis hais txog tus Tswv txoj kev yug los xwb tiam sis kuj hais txog Nws txoj kev kav hauv lub caij milenias.

Thaum kuv yog ib tug tub hluas kuv pib muaj ib zaj lus tim khawv txog Vajtswv uas yog Leej Txiv thiab Nws Leej Tub uas Nws Hlub, Yexus Khetos. Kuv tau kawm los paub ntawm kuv tus kheej tias Yexus Khetos tau yug los ntawm tus nkauj xwb Maivliag, uas yog “ib tug uas Vajtswv xaiv thiab muaj nuj nqis heev.”⁵ Kuv paub tias Nws yeej yog Vajtswv Leej Tub⁶ thiab tus tseem ceeb tshaj plaws ntawm tag nrho tib neeg zaj keeb kwm.

Cia li xav seb qhov uas Yexus Khetos tau ua yeej loj npaum li cas—txhua yam yog raws nraim li Nws Leej Txiv lub siab nyiam! Yexus yeej yog ib tug Vajtswv lawm thaum Nws nqis los rau hauv lub ntiaj teb kom ua ib txoj hauj lwm tseem ceeb rau peb txhua tus. Yog ib txoj hauj lwm uas cawm peb txoj sia thiab hloov peb lub neej. Yog ib txoj hauj lwm uas peb txhua tus ua tsis taus peb tus kheej.

Tus Cawm Seej “raug tej kev mob thiab tej kev txom nyem thiab tej kev ntxias txhua yam”⁷ Nws thiaj li yuav paub “pab [peb] ntawm sab cev nqaij daim tawv raws li [peb] tej kev qaug dag qaug zog.”⁸

Ob peb lub hlis tas los, kuv tau kawm ntau ntxiv txog kev mob thiab qhov uas kev mob uas rau kuv lub siab dawb huv. Kuv yeej muab siab npuab tus Cawm Seej thaum kuv sim xav txog qhov uas Nws raug txom nyem loj npaum li cas. Kuv lub siab yeej tsis txawj to taub tias Nws tau ris tag nrho tej kev mob, tag nrho tej kev txhaum, tag nrho tej kev ntxhov siab, thiab tag nrho tej kev txom nyem ntawm txhua leej txhua tus uas tau ua neej nyob!

Yog kev siab hlub uas loj tshaj qhov tib neeg txawj to taub los yog txawj piav txog, tus Cawm Seej tau cia Nws tus kheej raug kev txom nyem loj kawg nkaus ntawm sab ntsuj plig thiab sab cev nqaij daim tawv.

Peb hwm tus Me Nyuam Mos Liab ntawm Npelehees vim Nws yog tus uas theej peb lub txhoj nyob hauv lub Vaj Khexemanes thiab nyob saum tus ntoo khaub lig pem Khaulakhauthas. Txoj kev txi no txhiv peb txhua tus dim yog peb xaiv kom hloov siab lees txim thiab coj raws li Nws. Ces, qhov tseem ceeb tshaj plaws uas Nws ua hauv lub ntiaj teb, Nws tawm lub ntxa los thaum txog hnub thib peb, ua rau peb txhua tus txais tau txoj koob hmoov uas yog kev sawv rov los muaj lub neej tom qab peb tuag.

Nyob hauv lub caij no, peb hu nkauj los yog hais tias, “Thov kom nej muaj Christmas zoo siab.” Kuv cov kwv tij thiab cov muam, qhov uas kuv lub siab xav kom nej txhua tus txais tau los muaj ob peb yam. Tiam sis, tsis yog qhov uas kuv xav kom nej txais tau, yeej yog qhov uas uas kuv thov Vajtswv kom nej txais tau hauv lub caij Christmas no.

Qhov thib ib, kuv thov kom nej yuav hnov tus Cawm Seej txoj kev hlub uas nyob mus ib txhis li rau nej tus kheej. Yexus Khetos twb paub nej txij thaum ua ntej lub neej no los. Nws paub thiab pom nej tam sim no. Nws pom tau nej te kev xyiv fab thiab nej tej kev tu siab. Nws twb raug txhua yam no dua.

Nws pab nej tu siab thaum nej raug kev nyuaj siab thiab Nws zoo siab kawg txhua zaus nej ua ncaj ncees, txawm yog nej raug dab tsi los xij.

Kuv thov Vajtswv kom nej yuav txais tau ib zaj lus tim khawv tias Yexus Khetos yeej yog Vajtswv Leej Tub, Nws muaj Vajtswv lub hwj chim thiab vim Nws tau theej peb lub txhoj, nej yeej tsis tas xav tias nej yuav tsum nyiaj tej teeb meem ntawm lub neej no nej tus kheej xwb. Thaum nej rau siab thov, nrhiav, thiab khob,⁹ nej txais tau Nws lub hwj chim kom pab nej, txhawb nej lub zog, thiab kho nej zoo.¹⁰

Kuv thov kom nej yuav siv tus Cawm Seej txoj Kev Theej Txhoj thaum nej hloov siab lees txim txhua hnub, ua kom nej lub neej dawb huv zuj zus, thiab nrhiav Vajtswv txoj kev pab thaum nej ua txhua yam. Los yog hais tias, kuv thov Vajtswv kom nej yuav muaj kev xyiv fab los ntawm kev xav txog tej yam xilethi-aus.

Kuv kuj thov Vajtswv tias nej yuav siv lub caij no kom haj yam siv zog hawm Vajtswv. Cia li rov qab kawm Yexus Khetos tej lus qhia thiab kawm txog Nws txoj Kev Theej Txhoj. Tsis muaj leej twg hauv lub ntiaj teb uas hlub nej npaum li Nws. Tsis muaj leej twg uas to taub nej zoo dua los yog paub nej tej kev tu siab thiab tej kev qaug zog npaum li Nws. Tsis muaj leej twg hauv lub ntiaj teb uas muaj hwj chim npaum li Yexus Khetos muaj. Tsis muaj leej twg nyob no uas xav kom nej hloov los ua neeg zoo npaum li Nws. Tsis muaj leej twg uas thov Leej Txiv kom pab nej npaum li Nws.

Tus Tswv Yexus Khetos yog peb tus Cawm Seej thiab peb tus Txhiv Dim. Nws yog Vajtswv Leej Tub, Ixayees tus Dawb Huv. Nws yog tus uas Pleev Roj Rau.¹¹ Raws li Nws Leej Txiv qhia, Nws yog tus uas Tsim tag nrho txhua yam uas tau tsim lawm.¹² Yexus Khetos yog tus Yehauvas Zoo Kawg Nkaus, tus Vajtswv ntawm Phau Qub.¹³ Nws yog tus Emanu-es uas Vajtswv cog lus yuav los.¹⁴ Nws yog tus uas Coj Yam Ntxwv rau peb¹⁵ thiab tus uas Daws Peb Zaj rau Leej Txiv.¹⁶ Vim muaj Nws txoj moo zoo uas tau muab txum tim rov qab los, tib neeg muaj tag nrho cov koob hmoov ntawm Nws lub pov thawj hwj thaum lawv los cuag Nws thiab hloov los ua neeg zoo tag nrho dhau los ntawm Nws.

Cov kwv tij thiab cov muam, thov kom peb hais “hauleluyas” hauv peb lub neej tas li, qhuas tus Tswv uas yog Vajtswv thiab Yehauvas. Nyob hauv lub caij nyoog Christmas zoo kawg nkaus no, thov sawv daws los txhos caug pe Nws, Khetos uas yog tus Tswv!

Kuv paub tias Vajtswv muaj txoj sia nyob. Yexus yog tus Khetos! Nov yog Nws lub Koom Txoos. Nws coj Kev Muab Nws txoj Moo Zoo Txum Tim Rov Qab Los. Kuv ua tim khawv txog qhov no los ntawm Yexus Khetos lub npe dawb ceev, amees.