Khetos Tau Yug Los Kom Cawm Neeg Txoj Sia

Kuv nyiam Christmas heev! Cov vaj lug kub, cov nkauj, thiab kev muaj lub siab dawb siab zoo los muaj thoob plaws lub ntiaj teb hauv lub caij dawb huv no.

Txij thaum yav tas los, kuv tus poj niam nrog kuv nyob hauv ob peb lub teb chaws hauv lub caij Christmas. Wb nyiam saib tej kab lig kev cai thiab tej yam sib txawv uas tib neeg ua koob tsheej txog Christmas. Kuv xav txog tej yam no los twb pab kuv to taub tias Christmas yog ib yam rau txhua leej txhua tus. Yog ib yam rau cov me nyuam, cov niam tsev txiv tsev, cov pog, yawg, niam tais, yawm txiv, phauj, txiv ntxawm, txiv hlob, thiab cov kwv tij cov muam. Yog ib yam rau cov neeg uas lawv lub neej tsis muaj teeb meem thiab cov uas muaj mob, txom nyem thiab raug kev sim siab. Yog ib yam rau cov uas ua tsov ua rog thiab cov uas muaj kev thaj yeeb nyab xeeb. Yog ib yam rau cov uas siv zog coj raws li tus Cawm Seej, rau cov uas tsis tau hnov Nws lub npe, thiab cov uas xyeej Nws thiab. Yog ib yam rau cov uas ua neej nyob ua ntej Nws yug los. Christmas yog ib yam rau txhua leej txhua tus!

Christmas yog ib yam rau sawv daws vim Vajtswv tau txib Nws Leej Tub rau peb txhua leej txhua tus.¹ “Vim ib tug me nyuam yuav yug los rau peb.”²

Vim tus Cawm Seej tau yug los, ua neej tsis ua txhaum hlo li, theej peb lub txhoj, thiab sawv rov los, peb txhua tus txais tau lub txiaj ntsim sawv hauv qhov tuag rov qab los thiab. Tsis muaj leej twg uas ua neej nyob hauv lub ntiaj teb yuav tsis txais lub txiaj ntsim no. Tsis tas li ntawd xwb, “qhov muag tsis tau pom thiab qhov ntsej tsis tau hnov … tej uas Vajtswv npaj tseg rau cov neeg uas hlub Vajtswv.”³

Txawm yog nyob hauv lub caij nyoog twg los sis raug xwm txheej dab tsi los, tib neeg tseem zoo siab vim tus Cawm Seej yug los. Nws tau los muab txhua tus ntawm Leej Txiv Saum Ntuj Ceeb Tsheej cov me nyuam “kev kaj siab nyob hauv lub neej no thiab txoj sia nyob mus ib txhis hauv lub neej uas yuav los.”⁴

Txij thaum Adas thiab Evas los, cov neeg ncaj ncees tau tos ntsoov rau tus Cawm seej txoj kev yug los, tus uas yuav ua kom muaj raws li Leej Txiv txoj hau kev rau Nws cov me nyuam.⁵ Yaxayas thiab Nifais tau hais txog Nws txoj kev yug los thiab Nws ntiag tug hauj lwm.⁶ Nws txoj kev yug los thiab Nws txoj hauj lwm hauv lub ntiaj teb yeej koom ua ke.

Cia li xav txog Anas thiab Xime-oos, uas pom tus me nyuam mos liab Yexus thiab paub tias tus no yog “lub teeb uas yuav ci mus rau”⁷ neeg ntiaj teb tag nrho thiab ua rau lawv cia siab tias yuav txais kev txhiv dim.⁸ Yeej yog vim li no tus tim tswv thiaj li hais tias zaj lus no yog “txoj moo zoo uas yog txoj kev zoo siab kawg nkaus rau txhua haiv neeg.”⁹ Peb zoo siab thaum twg ib tug me nyuam mos liab yug los, tiam sis tus me nyuam no yeej txawv lwm tus.

Yexus Khetos, tus uas yog txoj kev kaj thiab txoj sia ntawm lub ntiaj teb no, tau yug los ua ib tug me nyuam mos liab hauv ib lub nkuaj tsiaj. Phau Ntawv Maumoos hais txog ib lub sij hawm—ib hnub, ib hmo, thiab ib hnub uas tsis muaj kev tsaus ntuj nti—uas yog ib lub cim txog Nws txoj kev los. Tej qhov txuj ci tseem ceeb yog tej lub cim txog qhov uas txoj Kev Kaj ntawm lub Ntiaj teb twb los,¹⁰ tus uas yuav txhiv peb dim kev txhaum thiab kev tuag. Peb pab tau kom faib Nws txoj kev kaj rau lub ntiaj teb.

Nyob rau lub caij Christmas, cov me nyuam yaus kuj hnov tau peb tus Cawm Seej txoj kev hlub. Yav tas los, wb ib tug ntxhais, Sonja, sau ntawv txog ib txoj kev sib tham nrog nws tus tub uas muaj tsib xyoos.

Nws sau ntawv, “Thaum kuv coj Andrew mus pw hmon no nws hais rau kuv tias, ‘Xyoo tom ntej no, kuv tsis xav tsom ntsoov rau tej khoom plig, tiam sis kuv xav tsom ntsoov rau tej yam uas kuv yuav pub rau Yexus.’ Kuv nug nws seb ua cas nws no tau lub tswv yim ntawd, thiab nws qhia kuv tias yog los ntawm nws tus xib hwb hauv lub Koom Haum Me Nyuam Yaus. Zoo siab kawg rau lub Koom Haum Me Nyuam Yaus.”¹¹

Yog kawg. Zoo siab kawg rau lub Koom Haum Me Nyuam Yaus. Tam sim no, 14 xyoo tom qab ntawd, Andrew ua ib tug tub txib thiab siv lub caij Christmas no qhia Yexus Khetos zaj lus rau lwm tus. Nws sau hais tias, “Yexus tau muab txhua yam rau peb … [thiab] Nws tau tsim peb thiab yuav ris tag nrho peb tej kev txhaum. Yog vim li no kuv thiaj li nyob no ua tub txib.”¹²

Lub caij Christmas yog ib lub sij hawm tshwj xeeb kom xav txog tej yam uas tseem ceeb pub rau lwm tus. Tej zaum peb yuav xav pab lwm tus muaj kev cia siab¹³ uas los ntawm qhov uas lawv paub tus Cawm Seej thiab lawv muab peb lub siab rau Nws.

Wb tus ntxhais Alisa tau tso lub ntiaj teb no tseg ob peb xyoos tas los vim nws mob cancer, thiab kuv nyiam tej yam uas nws xav txog Christmas, txawm yog thaum ntawd nws mob heev los. Ib xyoo nws sau hais tias:

“Kuv tau ib yam tshwj xeeb hauv lub caij Christmas. Yog ib yam tseem ceeb kawg. … Kuv tau ib tsab email ua ntej hnub Christmas los ntawm tus kws pab tu mob hauv kuv tus kws kho mob hoob kas. Nws hais tias, “Nyob zoo Christmas—twb sim seb pom tias koj lub qog hlav muaj ib qho uas hloov [ntawm keeb kwm roj ntshav].” … Es qhov no muaj lub ntsiab dab tsi rau kuv? Lawv pom zoo muab … ib cov tshuaj … uas tab kaum qhov cancer [rau cov uas muaj qhov hloov hauv no]. Tsis yog kev kho mob, tiam sis yog ib cov tshuaj zoo uas ua rau tej qog hlav … nqig mus sai sai. … Tu siab uas thaum kawg lub cev pib ua rau cov tshuaj ntawd tsis ntxim zuj zus, ces qhov mob cancer yuav rov qab los. … Tiam sis kuv xav zoo li twb pub kuv yuav ua neej ob peb lub hlis ntxiv. Thiab yuav zoo li cas? … Ib lub caij sov ntxiv? Ib lub caij so uas kuv yuav nrog kuv cov me nyuam nyob? Kuv quaj thaum kuv nyeem tsab email ntawd thiab ua Vajtswv tsaug rau qhov zoo tshaj plaws no.”¹⁴

Alisa twb muaj sij hawm nrog nws tsev neeg nyob ntxiv. $Nws tau hais txog ib lub sij hawm uas nws tsev neeg tau muab ib qhov khoom plig rau lawv tus neeg zej zog. Zaj no qhia tias tej lub sij hawm peb tsis ua zoo tag nrho thaum peb pub khoom plig rau lwm tus. Nws sau hais tias:

“Muaj ib hmo peb tau nyiag mus … tso khoom plig rau ntawm qhov rooj. Cov tub twb npaj kom khiav mus nkaum hauv tej qhov chaw zoo tshaj plaws.

Sam ntxhi lus, es ob tug tub ntxiv mloog zoo thaum nws hais tias, “‘Yog tias lawv pom peb ces …, Peb yuav tsum muaj tej pob daus hauv peb txhais tes.’

“James to taub. ‘Yog li koj hais. Yuav ntaus lub qhov rooj kom muab kaw los?’

“[Sam teb hais tias], ‘Tsis yog, yuav txawb rau lawv lub ntsej muag.’”¹⁵

Alisa kuj sau ntawv txog ib lub sij hawm thaum nws nrog nws tus tub ntxawg, Luke, nyob, thaum nws muaj rau xyoo xwb. Nws sau hais tias:

“Hmo no thaum wb pw hauv nws lub txaj uas muaj tej lub teeb me me saum nws lub qhov rais, kuv nug nws … , ‘Nim no, koj xav thov kom tau dab tsi?’”

“‘Es, kuv xav txog ib yam dab tsi.’

“‘Tiag los?’

“‘Yuav siv hauv txhua lub caij nyoog.’

“‘Tiag los?’

“Nws tos kom teb ntev. ‘Yog kev khawm thiab kev hnia los ntawm kuv niam.’

“Tsim nyog muab nws hnia thiab khawm 100 zaus tam sim ntawd. ‘Me tub Luke, koj tau qhov ntawd lub sij hawm twg los tau!’

“Tiam sis thaum kuv tawm nws chav txaj mus ua rau kuv poob siab me ntsis. Tej zaum qhov kuv hais tsis muaj tseeb. Kuv ua Vajtswv tsaug tias xyoo no nws txais tau qhov no thiab txais tau tej khoom plig thiab.”¹⁶

Alisa tej kev xav tshoov kuv lub siab txog kev cia siab ntawm lub caij Christmas. Nws sau hais tias:

“Kuv xav tsis thoob txog kev cia siab hauv lub caij no. Thaum kuv xav txog qhov txuj ci tseem ceeb ntawm Yexus Khetos thiab Vajtswv tej txiaj ntsim, ua rau kuv cia siab rau txhua yam thiab txhua tus. Tsis yog kev cia siab tias txhua yam yuav zoo tag nrho, tiam sis txhua yam yuav zoo txaus, thiab thaum kawg yuav muaj kev zoo xwb. Nyob hauv peb txhua tus lub neej. Kuv tsis xav tias lig dhau rau peb txais tau tej txuj ci tseem ceb, hloov siab, thiab txais tau kev kaj siab lug. Kuv ntseeg qhov no kawg kuv lub siab lub ntsws. Kuv lees hais tias yooj yim rau kuv muaj kev cia siab rau lwm tus, nyuaj rau kuv cia siab txog kuv tus kheej. Tiam sis kuv tab tom kawm. ‘Ntseeg txhua yam, cia siab rau txhua yam, nyiaj dahu txhua yam.’ Yeej yog ib qho yooj yim. Thiab zoo nkauj kawg.”

Hais txog nws tus tub, nws hais tias, “James ntaus ib zaj nkauj rau kuv thaum txog hmo ua ntej Christmas thiab kuv nyiam cov lus ntawm zaj nkauj no:

Nws tau yug los kom cawm neeg dim. Cawm nej thiab cawm kuv. Yeej yog ib lub txiaj ntsim uas Nws ib leeg xwb muaj hwj chim pub rau peb. Txawm yog peb raug xwm txheej dab tsi los xij, thov kom peb yuav nco ntsoov Nws tej lub txiaj ntsim hauv peb lub neej hauv lub caij Christmas no.

Los ntawm Yexus Khetos lub npe, amees.