Txoj Kev Kaj thiab txoj Sia ntawm lub Ntiaj Teb
Zaj lus uas txhua tus paub thiab nyiam txog tus Cawm Seej txoj kev yug los nyob hauv tshooj ob ntawm phau Lukas nyob hauv Phau Tshiab. Kuv zoo siab ua Vajtswv tsaug txhua zaus kuv nyeem txog Yauxej thiab Maivliag txoj kev mus rau Npelehees, lub dab nyuj, tus Tswv Yexus Khetos txoj kev yug los, thiab cov tim tswv uas tshaj tawm txog “txoj moo zoo uas yog txoj kev zoo siab kawg nkaus rau txhua haiv neeg” (Lukas 2:10).
Qhov uas tau muab txoj moo zoo Txum Tim Rov Qab Los nyob hauv hnub nyoog kawg no ua rau peb muaj ib zaj ntxiv txog tus Cawm Seej txoj kev yug los nyob hauv Phau Ntawv Maumoos. Kuv zaj lus yuav hais txog zaj lus no uas hais txog thawj lub caij Christmas. Thaum peb xav txog zaj no ua ke, cov kwv tij thiab cov muam, kuv caw nej kom nej xav tias yuav zoo li cas yog nej nyob ntawd thiab tsis txhob mloog kuv hais lus xwb.
Kuv thov kom tus Vaj Ntsuj Plig Dawb Huv yuav pab nej nruab cov vaj lug kub no rau nej tus kheej thiab nej tsev neeg (saib 1 Nifais 19:23) thiab ua rau nej lub siab puv npo nrog lub txiaj ntsim ntawm lub caij Christmas.
Xamuyees tus Neeg Lamas
Peb zaj lus no pib nyob hauv thaj av Xalahelas ob peb xyoos ua ntej tus Cawm Seej yug los. Xamuyees tus Neeg Lamas tuaj rau cov neeg kom qhia txog kev hloov siab lees txim thiab qhia tej uas yuav muaj los yav tom ntej txog tus Khetos. Tam sim no kuv xav kom nej ua tib zoo xav seb yuav zoo li cas yog nej muaj 10 xyoo thiab nej nyob hauv ib pawg neeg uas mloog Vajtswv tus yaj saub qhia txog tej uas yuav muaj los yav tom ntej.
Xamuyees hais tias: “Saib seb, kuv muab ib lub cim rau nej; vim tshuav tsib xyoos ntxiv uas yuav los, thiab saib seb, thaum ntawd Vajtswv Leej Tub yuav los txhiv tag nrho sawv daws uas yuav ntseeg nws lub npe.
“Thiab saib seb, kuv yuav muab qhov no rau nej ua lub cim rau thaum lub caij nws los; vim saib seb, yuav muaj tej teeb ci heev saum ntuj, kawg tias hmo uas ua ntej nws los nws yuav tsis tsaus ntuj li, kawg tias nws yuav tshwm rau neeg pom zoo li yog nruab hnub.
“Yog li ntawd, yuav muaj ib hnub thiab ib hmos thiab ib hnub, uas yuav zoo ib yam li ib hnub xwb thiab yuav tsis muaj tsaus ntuj; thiab qhov no yuav yog ib lub cim rau nej. …
“Thiab saib seb, yuav muaj ib lub hnub qub tshiab sawv tuaj … ; thiab qhov no los kuj yuav yog ib lub cim rau nej thiab (Hilamas 14:2–5).
Tus Cawm Seej txoj Kev Yug Los
Sij hawm dhau mus ces “tej kev qhia tej uas yuav muaj los yav tom ntej ntawm tej yaj saub tau pib muaj txhij zuj zus ntxiv tuaj; vim tau pib muaj ntau yam cim loj thiab tej txuj ci tseem ceeb loj dua tau raug ua nyob hauv cov neeg” (3 Nifais 1:4).
Cia li xav seb yuav zoo li cas yog tsib xyoos twb dhau mus thiab nej muaj 15 xyoos lawm. Nej tseem nco txog Xamuyees tej lus qhia tej uas yuav muaj los yav tom ntej thaum nej xav txog nej lub neej niaj hnub no.
“Tiam sis tau muaj ib txhia uas tau pib hais tias lub sij hawm twb dhau rau tej lus hais uas kom muaj lawm, uas tau raug hais los ntawm Xamuyees, tus Neeg Lamas.
“Thiab lawv tau pib thuam lawv tej kwv tij, hais tias: Saib seb lub sij hawm twb dhau lawm, thiab tsis muaj li Xamuyees tej lus; yog li ntawd, nej txoj kev xyiv fab thiab nej txoj kev ntseeg txog yam no tau tsis muaj nuj nqis.
“Thiab tau muaj tias lawv tau ua ib qho kev xeeb txob loj heev thoob plaws rau hauv thaj av; thiab cov neeg uas tau ntseeg tau pib tu siab heev, ntshai nyob tsam tej yam uas tau hais lawm yuav tsis muaj los.
“Tiam sis saib seb, lawv tau saib tos ruaj nrees rau hnub ntawd thiab hmo ntawd thiab hnub ntawd uas yuav zoo li ib hnub uas yuav tsis muaj hmo ntuj, xwv kom lawv yuav paub tias lawv txoj kev ntseeg tsis tau raug tsis muaj nuj nqis.
“Nim no tau muaj tias tau muaj ib hnub uas tau teem cia los ntawm cov neeg tsis ntseeg lawm, tias tag nrho cov uas tau ntseeg tej kev li kev cai ntawd yuav tsum raug tua tsuas yog lub cim ntawd yuav tsum muaj los xwb, tej uas tau raug muab los ntawm Xamuyees tus yaj saub” (3 Nifais 1:5–9).
Cov kwv tij thiab cov muam, peb puas muaj peev xwm to taub hais tias yuav zoo li cas yog tias peb tos lub cim txog Nws txoj kev los thiab yuav luag txog lub sij hawm uas peb yuav raug tua tuag? Peb puas muaj peev xwm nyob ruaj khov rau siab ntseeg, los sis peb puas poob siab thiab ntshai?
Ces, lub cim uas Xamuyees qhia hais tias yuav muaj thaum Yexus Khetos yug los tau tshwm sim. Nyob hauv ib lub caij thaum muaj neeg thuam cov uas ntseeg ntuj thiab thaum yus muaj kwv yees li 15 xyoos, ua rau yus xav tsis thoob thaum muaj ib hmo lub hnub poob lawm tiam sis tsis muaj kev tsaus ntuj.
“Thiab cov neeg tau pib xav tsis thoob vim tsis muaj kev tsaus ntuj thaum hmo ntuj tuaj. …
Thiab lawv tau pib paub tias Vajtswv Leej Tub yuav tsum tshwm sim sai sai; muaj tseeb tiag, … tag nrho cov neeg … tau xav tsis thoob heev kawg nkaus uas lawv tau vau rau hauv av. …
Thiab tau muaj tias tsis muaj kev tsaus ntuj nyob tag nrho hmo ntawd, tiam sis nws tau kaj zoo li nws yog thaum tav su. Thiab tau muaj tias lub hnub tau rov qab tuaj thaum sawv ntxov dua, … thiab lawv paub lawm tias nws yog hnub uas tus Tswv yuav los yug, vim yog lub cim uas tau muaj lawm.
“Thiab nws tau muaj los, muaj tseeb tiag, tag nrho txhua yam, txhua lo huv si, raws li tej lus ntawm tej yaj saub.
“Thiab tau muaj tias ib lub hnub qub tshiab kuj tau tshwm tuaj, raws li txoj lus” (3 Nifais 1:15, 17, 19–21).
Hnub uas Yexus yug los yog ib hnub uas cov ntseeg dim txim nyob hauv Sab Ntuj Tshiab. Qhov kaj uas yog lub cim ntawm tus Cawm Seej txoj kev yug los.
Tus Cawm Seej txoj Kev Tuag thiab txoj Kev Sawv Rov Los
Cov kwv tij thiab cov muam, tam sim no cia li xav seb yuav zoo li cas yog 30 xyoo twb dhau mus es nej yuav luag muaj 50 xyoo lawm. Nej tseem nco ntsoov txog Xamuyees tej lus qhia thiab tej yam uas muaj los thaum nej yog ib tug tub hluas los sis ntxhais hluas thaum lub cim txog tus Tswv txoj kev yug los tshwm sim.
Ib lub cim txog Khetos txoj kev tuag uas Xamuyees qhia yog peb hnub uas muaj kev tsaus ntuj nti (saib Hilamas 14:27; 3 Nifais 8:3).
“Thiab tau muaj tias tau muaj kev tsaus ntuj tuaj nyob tag nrho rau saum thaj av, kawg tias thaum kawg cov neeg uas nyob hauv es tsis tau vau yeej hnov raug tej huab ntawm txoj kev tsaus ntuj;
“Thiab yeej muaj tsis taus qhov pom kev li, vim yog txoj kev tsaus nti, thiab yeej tsis muaj neeg taws tau tswm ciab, los sis tsau; thiab yeej tsis muaj neeg rauv tau taws … , ces thiaj li muaj tsis taus ib qho pom kev hlo li;
“Thiab tsis pom muaj ib qho teeb, los sis hluav taws, los sis ib qho kaj qauj les li, thiab tsis pom lub hnub, los sis lub hli, los sis tej hnub qub, vim tej huab ntawm txoj kev tsaus ntuj tuab heev li uas tau muaj nyob rau saum thaj av.
“Thiab tau muaj tias nws tau muaj nyob ntev tau peb hnub uas tsis tau pom muaj teeb li” (3 Nifais 8:20–23).
Yuav zoo li cas yog tias muaj peb hnub tsaus ntuj nti ces, tsis ntev tom qab ntawd, muaj 2,500 tus neeg uas sib sau ua ke nyob ntawm lub tuam tsev nyob hauv thaj av Huaj Vam? Nej puas txawj xav tias yuav zoo npaum li cas thaum lub sij hawm uas tus Cawm Seej nqi saum ntuj los thiab hais tias, “Saib seb, kuv yog Yexus Khetos. … Kuv yog qhov kaj thiab txoj sia ntawm lub ntiaj teb”? 3 Nifais 11:10–11; ntxiv qhov uas ntawv qaij).
Los ntawm thawj cov lus uas tus Cawm Seej hais kom piav txog Nws tus kheej rau cov neeg uas sib sau ua ke nyob ntawm lub tuam tsev, Nws hais tias Nws yog “qhov kaj.” Xamuyees hais tias yuav muaj ib lub cim uas yog qhov kaj. Lub cim qhov kaj tshwm sim thaum tus Cawm Seej yug los. Qhov kaj uas muaj tseeb, uas yog Yexus Khetos, ua rau cov neeg uas sib sau ua ke txoj kev ntshai thiab kev tsaus ntuj ploj mus huv tib si.
Zaj uas hais txog lub caij Christmas thawj zaug hauv Phau Ntawv Maumoos pab peb kawm thiab to taub hais tias Yexus Khetos yog qhov kaj uas ci nyob hauv qhov tsaus ntuj (saib Q&K 10:57–61). Txhua lub sij hawm, txawm peb raug dab tsi los yog, thiab txhua zaus peb muaj teeb meem, Yexus Khetos yog txoj kev kaj uas ua rau peb txoj kev ntshai ploj mus, nplij peb lub siab thiab coj peb kev, thiab ua rau peb muaj kev kaj siab lug thiab kev xyiv fab uas kav mus ib txhis.
Peb tej kab lig kev cai thaum lub caij Christmas feem ntau muaj ntau hom teeb uas ci ci—cov teeb uas dai ntawm ntoo, cov teeb nyob hauv thiab nyob saum peb lub tsev, cov tswm ciab saum peb cov rooj. Thov kom cov teeb ntawm lub caij no ua rau peb nco txog tus uas yog lub hauv paus ntawm txhua yam kev kaj.
Hmo no nyob hauv koj tej kev
Lub teeb kav ib txhis ci.
Kom muaj raws li neeg cia siab rau
Kom kev ntshai ploj hlo li.
(“Au lub Me Zej Zos Npelehees,” Cov Nkauj Qhuas Vajtswv, zaj 94).
Kuv ua tim khawv tias Yexus yug los nyob hauv Npelehees, Nws ua Nws txoj hauj lwm qhuab qhia hauv lub ntiaj teb no tiav lawm, thiab Nws muaj txoj sia nyob niaj hnub no vim Nws yog peb tus Tswv uas tau sawv rov los. Kuv ua tim khawv li no los ntawm Yexus Khetos lub npe dawb ceev, amees.