Ngaahi Founga ʻe 25 ke Kau Ai ʻi he Polokalama Fakaemāmani Lahi maʻá e Houʻeiki Fafiné mo e Fānaú

ʻI he taimi ʻokú ke tāpuakiʻi ai ha fefine, ʻokú ke tāpuakiʻi foki ai hono fāmilí, koló, mo e puleʻangá. Ko e meʻa tatau pe, ʻi he taimi ʻoku ke tapuakiʻi ai ha fānau, ʻokú ke tokateu ai he kahaʻú. Ko e ʻuhinga ʻeni ʻoku kamata ai ʻa e fakalakalaka fakaemāmani lahí ʻaki hono fakamuʻomuʻa e tuʻunga lelei ʻo e kakai fefiné mo e fānaú. Kuo fakamuʻomuʻa ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻa e ngaahi fiemaʻu ʻa e houʻeiki fafiné mo e fānaú—ʻo fakafou ʻi he tokangaekina e ngaahi faʻē toutamá mo e pēpē valevalé, tokoni ʻi he meʻakai fakatupu moʻui lelei ʻa e fānaú, huhu maluʻí, mo e akó fakaemāmani lahi. ʻI hoʻo muimui ki he fekau ʻa e Fakamoʻuí ke tokangaʻi ʻa kinautolu ʻoku faingataʻaʻiá, ʻokú ke kau ai ʻi he ngāue fakaemāmani lahí ni.

ʻOku kau ʻi he lisi ko ʻení ha ngaahi fakakaukau ke ke fakakaukau mo lotua ai e faʻahinga meʻa te ke lava ʻo fai ʻi ho ʻapí, kaungāʻapí, mo e koló ke tokoni ki he ngaahi fiemaʻu ʻa e houʻeiki fafiné mo e fānaú. Feinga ke tataki fakalaumālie koe ki he feituʻu ʻoku fiemaʻu ai koe ʻe he ʻEikí mo e tokotaha ʻoku totonu ke ke taki, tataki, mo ʻaʻeva ʻi hono tafaʻakí. ʻI hoʻo tokoni ki ho fāmilí, kaungāʻapí, mo e tukui koló, ʻokú ke hoko ai ko ha konga ʻo e ngāue fakaemāmani lahi ʻa e Fineʻofá—ʻi hono ʻomi e ʻofa mo e fakafiemālie ʻa Sīsū Kalaisí ki hotau ngaahi tokoua mo e tuongaʻane ʻi he funga ʻo e māmaní.

1. Poupouʻi e tohi mo e laukonga pea mo e ako ʻa e houʻeki fafiné mo e fānaú ʻi hono ʻiloʻi mo fakafepakiʻi e ngaahi fakafeʻātungia ʻi homou koló.
2. Tokoniʻi e fānaú ke nau laukonga leʻolahi. ʻOku ʻikai ha meʻa te ne fakatupulaki lahi ange e taukei mohu fakakaukau ʻa e fānaú ʻo laka ʻi he laukonga mo e kakai lalahi ʻoku tokanga kiate kinautolú.
3. Kumi pe ko e hā e ngaahi pole ʻi homou koló ʻe ala taʻofi ai e ngaahi faʻē olopoʻoú mei hono maʻu e tokanga maʻá e pēpē valevalé. Feinga ke fakaleleiʻi e ngaahi pole ko iá.
4. Hulohula, puna, kaka, mo vaʻinga mo e fānaú ʻi he falikí. ʻOku tokoni e ngaungaué ki hono fakatupulaki e ʻatamai ʻo e fānaú mo fakamālohia honau ngaahi sino ʻoku kei tupú.
5. Tō ha ngoue pea vahevahe ʻa e fuá mo ho kaungāʻapí. Fakakau e fānaú ʻi hono tokangaʻi e ngoué.
6. Ako fekauʻaki mo hono fakatolonga ʻo e meʻakaí, ke lava ʻo kai ia ʻi he taimi ʻoku ʻosi ai ʻa e toʻukaí. Pea tuku ki he tafaʻakí ʻa e meʻakai ʻoku ʻikai maumaú, ʻi he taimi ʻe malava aí, ke tānaki ha meʻakai talifaki fakatuʻupakē.
7. Ako e meʻa ʻe lava ʻo fakahoko ke tokoni ki he ngaahi fāmili ʻoku nau fakafalala ki he tufa meʻakai ʻi homou koló pea tokoni ʻi hono tokangaekina e faingataʻa ko iá.
8. Ngāue mo homou puleʻanga fakalotofonuá ke fakapapauʻi ʻoku maʻu ʻe homou koló ha vai maʻa, ʻea, mo e maʻuʻanga meʻakai ʻoku hao mei he koví mo e ʻulí.
9. Palani ha ngaahi ʻekitivitī ʻa e Fineʻofá ʻoku fakahoko ai ha tokoni mo e ako fekauʻaki mo e ngaahi ngāue fakaemāmani lahí, pea fealeaʻaki ʻi homou Fineʻofá ki ha ngaahi founga ke kau ai.
10. Faleʻi ha fefine ʻi he hala ki he moʻui fakafalala pē kiate kitá.
11. ʻI he taimi ʻe malava aí, matuʻaki fakahuhu hoʻo pēpeé ʻi he ʻuluaki fuofua māhina ʻe onó. Kamata fakafeʻiloaki hoʻo pepeé ki he meʻakai fakatupu moʻui leleí ʻi he māhina ʻe ono pea hoko atu e fakahuhú ke ʻoange ki hoʻo pepeé ʻa e ivi kotoa pē ʻokú ne fiemaʻú ʻi ha taʻu ʻe taha.
12. Fakapapauʻi ha ʻātakai fakataautaha mo poupou ʻi he lotú mo e ngāué maʻá e ngaahi faʻē ʻoku nau fakahuhu pe pamú.
13. Poupouʻi ʻa e sivi fakaesino maʻu peé ke maʻu e tokanga ʻoku fiemaʻú kau ai e tokanga ki he fakaʻehiʻehí, tokanga kimuʻa mo e hili e fāʻelé maʻá e houʻeiki fafine feitamá, mo e huhu maluʻi tuʻupau maʻá e fānaú.
14. Kai mo e fānaú ʻa e meʻakai fakatupu moʻui leleí. Tuku ke nau tokoni atu ke fili mo teuteuʻi e meʻatokoní pe fakamāmālohí. Talanoa fekauʻaki mo e ngaahi lelei ʻo e meʻakai fakatupu moʻui leleí lolotonga hono teuteu fakatahá.
15. Kumi ha fakaneifua kehe makehe mei he meʻa ʻoku lahi ai e suká ki he ngaahi ʻekitivitī ʻi he lotú, fakamālohisino sipotí, mo e fakamāmālohi he tuku ʻa e akó.
16. Feohi kei iiki maʻu pē mo e fanga kiʻi pēpeé mo e fānau valevalé. ʻOku hanga ʻe he fesiofaki, talanoa, mo e vaʻinga mo e fanga kiʻi pēpeé ʻo langaki ha fehokotaki mālohi ʻi honau ʻatamaí.
17. Tokoniʻi ha kiʻi tamasiʻi ʻi heʻene ngāue fakaako mei ʻapi ʻi he tuku ʻa e akó.
18. Meʻaʻofa ange ha ʻū tohi pea vahevahe ʻa e ʻuhinga naʻá ke fili ai ia ki he tokotaha ko iá. ʻI hono maʻu e ʻū tohi ʻi he ʻapí ʻoku ʻomi ai ha faingamālie ke ako mo tupulaki ai.
19. Poupouʻi ʻa e ngaahi laipeli fakalotofonuá mo ha ngaahi maʻuʻanga tokoni taʻetotongi kehe mo e ʻū tohí.
20. Talanoa ki homou ngaahi ʻapiako fakalotofonuá fekauʻaki mo ʻenau ngaahi taumuʻa ki he meʻatokoni mo e fakamāmālohi fakatupu moʻui leleí. Fakakaukau ki he meʻa ʻe lava ke fai ʻe he mātuʻá mo e koló ke tokoni aí.
21. Talanoa kei taimi maʻu pē mo e fānaú. Fai ange ha ngaahi talanoa pea tuku ke nau vahevahe atu ʻenau ngaahi talanoá.
22. Fakamālohia e mahuʻinga fakataautaha ʻa ha kiʻi tamasiʻi ʻaki hono tokoniʻi ia ke ne ʻiloʻi hono ngaahi meʻafoakí mo e ngaahi talēnití. Tokoniʻi e fānaú ke fakaʻaongaʻi ʻenau ngaahi meʻafoakí mo e talēnití ke tāpuekina e niʻihi kehé.
23. ʻOange ki he fānaú ha fatongia ʻi ʻapi ke tokoni ke nau mahuʻingaʻia ʻi he ngāué, ako e mahuʻinga ʻo e ngāue fakatahá mo e moʻui fakafalala pē kiate kitá, pea mo tanumaki ʻene mahuʻingaʻia pē ʻiate iá.
24. ʻAukai mo foaki ha tokoni fakapaʻanga. Ko e founga faingofua ʻe taha te ke lava ai ʻo tokoní ko e fakaʻehiʻehi mei he maʻu meʻatokoní kae lava ha taha kehe ʻo kai.
25. Kau pe fokotuʻu ha ngāue ʻi he JustServe ʻoku tokoni ai ki he houʻeiki fafine mo e fānau ʻi homou koló.