Giunsa Pagpakigtambayayong sa Simbahan sa mga Organisasyon aron sa Pag-atiman Niadtong Nanginahanglan
Ang Simbahan ni Jesukristo sa mga Santos sa Ulahing mga Adlaw nag-awhag sa mga miyembro niini sa pagsunod sa una ug ikaduha nga dagkong mga sugo, nga mao ang “una, sa paghigugma sa Dios ug, ikaduha, sa paghigugma sa atong silingan” (Presidente Russell M. Nelson, Oktubre 2019). Ang makitawhanon ug mga proyekto sa pagserbisyo mahinungdanon nga bahin niana nga paningkamot sa paghigugma ug pag-atiman sa tanang anak sa Dios sa tibuok kalibotan, dili igsapayan sa kaliwatan, relihiyon, o nasyonalidad. Sa mga dapit nga gitutokan, nakigtambayayong kami uban sa mga organisasyon sa tanan nga gidak-on aron makahimo og usa ka mas dakong epekto sa kalibotan.
Ang Epekto sa mga Pakigtambayayong
Ang Simbahan nagtuman sa makitawhanong misyon niini pinaagi sa pakigtambayayong sa ubang mga organisasyon. Ang mga pakigtambayayong uban sa mga dili pang-negosyo ug dili pang-gobyerno nga mga organisasyon naglakip sa mga donasyon sa mga kapanguhaan o boluntaryo nga mga miyembro sa Simbahan alang sa makitawhanon nga mga proyekto. Pinaagi sa pagtinabangay, makahimo kita og mas dakong epekto sa paghatag og dinalian nga tabang ug pagpalig-on sa pagbarog pinaagi sa kinaugalingong paningkamot alang sa tanang mga anak sa Dios.
– Presidente Dallin H. Oaks, Unang Magtatambag sa Unang Kapangulohan
Atong Tibuok Kalibotan nga Prayoridad: Kababayen-an ug Kabataan
Usa sa mga paagi nga makahimo kita og labing dako nga epekto mao ang paghatag og prayoridad sa kahimsog ug kaayohan sa kababayen-an ug sa kabataan. Nagtinguha kita nga makigtambayayong uban sa mga organisasyon nga naghatag og prayoridad usab niini nga paningkamot. Kini nga tibuok kalibotan nga prayoridad naglakip og mga proyekto sa pag-atiman sa inahan ug sa bag-ong natawo, mga pagbakuna, edukasyon, ug nutrisyon sa bata.
Giunsa Pagpili sa Simbahan ang mga Pakigtambayayong
Ang Simbahan ni Jesukristo sa mga Santos sa Ulahing mga Adlaw nagsunod sa makitawhanong mga baroganan nga gisawhan sa tanang makitawhanong mga organisasyon. Kini nga mga baroganan naglakip sa katawhan, neyutralidad, kawalay pagpihig, ug kagawasan. Ang Simbahan nagtinguha nga makigtambayayong uban sa mga organisasyon kansang mga mithi nahiuyon sa amoa. Ang Simbahan usab nangita og mga organisasyon kansang makitawhanong mga proyekto:
- Nagtinguha sa pagtabang niadtong labing talandogon, nga walay pagtagad sa kaliwatan, relihiyon, o nasyonalidad.
- Pag-atiman sa dinalian nga mga panginahanglan samtang nagpalig-on sa mga benepisyaryo sa mas maayo nga pag-atiman alang sa ilang umaabot nga mga panginahanglan.
- Pagpalambo sa kamalahutayon pinaagi sa paggamit sa lokal nga mga kapanguhaan aron sa pagtubag sa lokal nga panginahanglan.
Sa Unsang Paagi Gisuportahan sa Simbahan ang Pagboluntaryo sa Komunidad?
“Ang mga Santos sa Ulahing mga Adlaw, sama sa ubang mga sumusunod ni Jesukristo, kanunayng naglantaw og mga paagi sa pagtabang, sa pagbayaw, ug paghigugma sa uban” (Presidente Russell M. Nelson, Oktubre 2019). Kon nangita kamo og mga boluntaryo alang sa inyong organisasyon o proyekto sa serbisyo, ikonsiderar ang pag-post sa inyong proyekto ngadto sa JustServe.org. Daghang miyembro sa Simbahan ug uban pa sa komunidad ang naggamit niini nga plataporma sa pagpangita og mga oportunidad sa pagboluntaryo ug ganahan nga motabang.
Unsay Gisulti sa Uban nga mga Organisasyon Bahin sa Among Buhat
—Barron Segar, Presidente ug CEO sa World Food Programme USA
—Kerri Murray, Presidente sa ShelterBox USA
—Michelle Nunn, Presidente ug CEO sa CARE USA
Mga Kanunayng Ipangutana
Unsa ang Kalainan tali sa mga Pilantropo ug sa Makitawhanon nga mga Serbisyo sa Simbahan?
Ang departamento sa mga Pilantropo sa Ang Simbahan ni Jesukristo sa mga Santos sa Ulahing mga Adlaw mao ang responsable sa philanthropic nga mga kontribusyon ngadto sa Simbahan ug sa mga kaubanan niini nga mga programa ug mga institusyon. Kini nga departamento nagdumala sa manggihatagon [charitable] nga mga donasyon nga bahin sa makitawhanon nga mga paningkamot sa Simbahan, samtang ang Welfare and Self-Reliance nga departamento sa Humanitarian Services ang nagdumala sa mga operasyon ug pagpatuman sa mga makitawhanon nga mga proyekto.
Kinsa ang Akong Kontakon sa Pakigtrabaho uban sa Simbahan?
Imbis nga modawat og mga hangyo alang sa pondo o pagpakigtambayayong, mangayo kami diha sa mga dapit nga gitutokan aron makahimo og mas dako nga epekto. Makigtambayayong kami sa daghang masaligan nga makitawhanong mga organisasyon nga nag-implementar sa mga baroganan sa pagbarog pinaagi sa kinaugalingong paningkamot diha sa ilang mga programa ug adunay naprobahang mga rekord sa kalamposan.