O le Fale o Polika ma Mary Ann Iaga

I le Fale o Polika ma Mary Ann Iaga, e faalogo ai tagata asiasi i tala e uiga i le taitaiga a Polika Iaga i Navu o le peresitene o le Korama a Aposetolo e Toasefululua. Latou te aoaoina ai foi faamatalaga e uiga i le olaga o le aiga i le fale i Navu, o la latou faaiuga e tuua lo latou fale ma le aai, ma a latou taumafaiga e tapena mo se olaga fou i Sisifo.

O le fale piliki lenei o le fale lona lua lea o le aiga o le au Iaga i Navu. O le fale muamua i Navu, lea na siitia i ai Mary Ann ma le la fanau ia Setema 1840 i le taimi na malaga ai Polika e faamisiona i Egelani, o se fale laau e le’i mae’a. Ina ua toe foi i le fale i le 1841 ia Polika, sa galue o ia e faauma le fauga. O le taimi lea, sa agai ai i luma le fausaga o le fale piliki o le aiga. Sa masii atu le au Iaga i le fale fou lenei i le aso 31 o Me, 1843, ma sa nonofo ai iina seia oo ina latou tuua Navu i a Fepuari 1846.

Sa faaopoopo le taitaiga a Polika Iaga i le Ekalesia a o nonofo le Au Paia i Navu. I le aso 14 o Aperila, 1840, a o auauna atu i Egelani, sa lagolagoina o ia e avea ma peresitene o le Korama a le Toasefululua. A o nonofo ai i lenei fale, sa feiloai Polika ma isi uso o le Korama a le Toasefululua, faapea foi taitai faalemalo, o tagata fou liliu mai, ma faifeautalai ua mae’a mai misiona. I le maea ai o le faamaturoina o Iosefa Samita i le aso 27 o Iuni, 1844, na avea Polika Iaga ma taitai sinia o le Ekalesia. A o faatupula’ia feteenaiga i Navu i le mavae ai o le faamaturoina, sa atili ona faateleina tiutetauave o Polika. Sa saunia o ia ma isi taitai o le Ekalesia e ave le Au Paia i le mea lea ua ta’ua nei o Iuta. O nei tapenaga na aofia ai le saunia o tulaga manaomia faaletino e pei o taavaletoso ma sapalai. O le mea na sili ona taua, sa vave ona galulue le nuu e faauma le Malumalu o Navu ina ia mafai ai e tagata o le ekalesia ona maua o latou sauniga o le malumalu. A o lei tuua e le Au Paia ia Navu, sa faatino e Polika ma isi aposetolo ia faaeega paia ma faamauga mo le faitauafe o tagata i le Maota o le Alii.

Faitau e uiga i le matafaioi a Polika Iaga i le tapenaga o le Au Paia e malaga i le Vanu o Sate Leki i le Au Paia, Voluma 2, Mataupu 1.

O Mea e Faamoemoe i ai

O le malaga maimoa i le Ala o Paionia o se maimoaga e taialaina, lea e amata i le Faletele o Fitugafulu ma faaiuina i le Fale o Polika ma Maria Ann Iaga. O le fale o Polika ma Mary Iaga o se maimoaga e taialaina o potu-e tele e aofia ai le umukuka ma le potumoe. A maea le maimoaga i le Fale o le au Iaga, ona e saoloto lea e asiasia vaega o totoe o Navu. Atonu e te fia maimoa i isi aafiaga o le Alasopo o Paionia e pei o le Alasopo o le Faamoemoe, po o le Maafaamanatu o Paionia ma le Malaga i le Ofoofogia.