Feituʻu Faiʻanga Papitaiso ne Fakafoki Mai Ai e Lakanga Fakataulaʻeikí

ʻI he ʻaho 15 ʻo Mē 1829, naʻe hā mai ha ʻāngelo kia Siosefa Sāmita mo ʻŌliva Kautele ʻi he vao ʻakau ofi ki he ʻapi ʻo e fāmili Sāmitá. Naʻe “[pehē ʻe he ʻāngeló] ko hono hingoá ko Sione, ʻa ia ʻoku ui ko Sione Papitaiso ʻi he Fuakava Foʻoú.” Naʻe foaki ʻe Sione ʻa e Lakanga Taulaʻeiki Faka-ʻĒloné kia Siosefa mo ʻŌliva, ʻo foaki kiate kinaua ʻa e mafai ke fai papitaiso ʻi he fakauku ke fakamolemoleʻi ʻa e ngaahi angahalá. Naʻe fakahinohinoʻi leva ʻe Sione ʻa Siosefa mo ʻŌliva ke na “ō ʻo papitaiso.” Naʻe tomuʻa papitaiso ʻe Siosefa ʻa ʻŌliva, pea toki papitaiso ʻe ʻŌliva ʻa Siosefa (Siosefa Sāmita—Hisitōlia 1:68–72). Naʻe hiki ʻe Siosefa Sāmita ʻa e aʻusia ko ʻení ʻo pehē: “ʻI heʻema ʻalu hake pē mei he vaí ʻi he hili homa papitaisó, naʻe hoko kiate kimaua ʻa e ngaahi fuʻu tāpuaki lalahi mo nāunauʻia mei heʻema Tamai Fakahēvaní...Naʻe fakapito ʻa kimaua ʻaki ʻa e Laumālie Māʻoniʻoní, peá ma nēkeneka ʻi he ʻOtua ʻo homa fakamoʻuí” (Siosefa Sāmita—Hisitōlia 1:73).

ʻI he ʻaho ní, ʻoku hoko ʻa e konga ko ʻeni ʻo e Vaitafe Sesikuehaná ko ha feituʻu lōngonoa maʻá e kau ʻaʻahí ke nau fakakaukau ai ki he fakafoki mai ʻa e lakanga fakataulaʻeikí mo e ouau ʻo e papitaisó ʻi hotau kuongá.

Laukonga lahi ange fekauʻaki mo hono fakafoki mai ʻo e lakanga fakataulaʻeikí ʻe Sione Papitaisó mo e papitaiso ʻo Siosefa Sāmita mo ʻŌliva Kautelé ʻi he Kau Māʻoniʻoní Vōliume 1, Vahe 7.

Meʻa ke ʻAmanaki Ki Aí

ʻOku talitali lelei ʻa e kau ʻaʻahí ke nau lue takai ʻo fiefia ʻi he Vaitafe Sesikuehaná mo e feituʻu faiʻanga papitaisó.

360° Walkthrough