Ko e Halanga ki he Feituʻu Ne Fakafoki Mai Ai ʻa e Lakanga Taulaʻeiki Faka-ʻĒloné

ʻI he ʻaho 15 ʻo Mē 1829 naʻe ʻalu ai ʻa Siosefa Sāmita mo ʻene tangata tohi ko ʻŌliva Kautelé “ki he vao ʻakaú ke lotu mo fehuʻi ki he ʻEikí ʻo kau ki he papitaiso ki he fakamolemole ʻo e ngaahi angahalá, ʻa ia naʻá ma ʻilo ha lau ki ai ʻi hono liliu ʻo e ngaahi laui peletí [Tohi ʻa Molomoná] ngaahi peletí.” Naʻe tali ʻe he ʻOtuá ʻenau lotú ʻaki haʻane ʻomi ha talafekau ʻāngelo: ko Sione Papitaiso, ʻa ia naʻá ne papitaiso ʻa Sīsū Kalaisí. Naʻe pehē ʻe Sione hili ʻene hilifaki hono nimá ki honau ʻulú, “Kiate kimoutolu ʻa hoku ongo kaungā-tamaioʻeiki, ʻi he huafa ʻo e Mīsaiá, ʻoku ou foaki ʻa e Lakanga Fakataulaʻeiki ʻo ʻĒloné..”

Naʻe fakamatalaʻi ʻe Sione naʻe maʻu ʻe he Lakanga Taulaʻeiki Faka-ʻĒlone ko ʻení “ʻa e ngaahi kī ʻo e . . . ongoongolelei ʻo e fakatomalá, pea mo e papitaiso ʻi he fakauku ke fakamolemoleʻi ʻa e ngaahi angahalá.” Naʻá ne toe talaʻofa foki ʻe toki foaki kimui ange ha lakanga fakataulaʻeiki ʻe taha, fakataha mo e “mālohi ʻo e hilifaki ʻo e nimá, ke maʻu ʻa e meʻafoaki ʻo e Laumālie Māʻoniʻoní.” Hili hono foaki kia Siosefa mo ʻŌliva ʻa e Lakanga Taulaʻeiki Faka-ʻĒloné, naʻe fakahinohinoʻi kinaua ʻe Sione ke na fepapitaisoʻaki ʻi he Vaitafe Sesikuehana ofi maí.

Neongo ʻoku ʻikai ʻiloʻi ʻa e feituʻu totonu naʻe hā ai ʻa Sione Papitaiso kia Siosefa mo ʻŌlivá, ka ʻoku ʻi ai ha hala ʻoku kamata ʻi he tuliki fakatokelau-hihifo ʻo e Senitā Ki he Kau ʻAʻahí ʻo ʻalu ai ki ha vao ʻakau māpele, hangē ko e feituʻu naʻe fakamatalaʻi ʻi he ngaahi lekooti fakahisitōliá. Ke paotoloaki ʻa e toputapu mo e fakaʻofoʻofa ʻo e vao ʻakau ko ʻení, ʻoku kole ki he kau ʻaʻahí ke nau nofo maʻu ʻi he fanga kiʻi hala kuo fakaʻilongaʻí, fakaʻapaʻapaʻi ʻa e ʻātakai fakanatulá, mo lea fanafana.

Meʻa ke ʻAmanaki Ki Aí

ʻOku ʻikai kau ʻa e fanga kiʻi halá ia ʻi he takimamata naʻe fai ʻi he Feituʻu ne Fakafoki Mai ai e Lakanga Fakataulaʻeikí. Ongoʻi tauʻatāina ke ke vakaiʻi kinautolu ʻiate koe pē. ʻOku ʻi ai ha fanga kiʻi hala ʻe tolu ʻoku nau faʻu ha pelu fakafuopotopoto ʻi he feituʻu ko ia. Ko e hala lōloa tahá ʻoku meimei maile ʻe 0.11, pea ko e hala nounou tahá ʻoku meimei maile ʻe 0.03. ʻOku fokotuʻu ʻi he fanga kiʻi hala nounoú ʻa e fanga kiʻi fakamatala fakaʻilonga.

360 ° Walkthrough