Lucy Mack Smith Home

Ang Lucy Mack Smith Home ay nagbibigay ng parangal sa ina ni Propetang Joseph Smith. Isang tapat na tagasuporta ng kanyang anak at ng Simbahan na ipinanumbalik sa pamamagitan niya, malaki ang naiambag ni Lucy sa kasaysayan ng Pagpapanumbalik, kabilang na ang pangangalaga sa alaala ng Propeta matapos itong mamatay, sa pamamagitan ng kanyang mga isinulat.

Dahil tapat sa pangangalaga sa ina ng yumaong Propeta, binili ng Simbahan ang bahay para kay Lucy mula kina Joseph Bates Noble at Mary Beman Noble. Si Lucy ay nanirahan dito sa loob lamang ng maikling panahon, lumipat sa tahanan noong Abril 1846 at lumipat sa taon ding iyon upang manirahan kasama ang kanyang anak na si Lucy Millikin. Noong nakatira si Lucy Mack Smith sa tahanang ito, nakikipagkita siya sa mga bisita sa Nauvoo. Sa bayad na 25 sentimo ay ipinapakita niya ang ilan sa mga Egyptian relic na nauugnay sa Aklat ni Abraham.

Sa buong buhay ni Lucy Mack Smith, siya ay maimpluwensyang miyembro at lider sa Ang Simbahan ni Jesucristo ng mga Banal sa Huling Araw. Kahit matanda na siya, patuloy siyang aktibong nakikibahagi sa relihiyosong komunidad. Sumapi siya sa Female Relief Society of Nauvoo sa pangalawang pulong nito noong Marso 24, 1842, kung saan nanalangin siya na “nawa ang mga pagpapala ng langit ay matamo ng Relief Society.” Nagbigay din siya ng mahahalagang talaan para sa Simbahan sa pamamagitan ng kanyang personal na kasaysayan. Ilang buwan lamang matapos ang pagpaslang kina Joseph at Hyrum sa Carthage Jail, sinimulan niyang idikta ang kuwento ng kanyang buhay at pamilya, na nagbigay ng natatanging mga ideya na ginagamit pa rin hanggang ngayon.

Basahin kung paano hinarap ni Lucy ang pagkamatay ng kanyang mga anak na sina Joseph at Hyrum sa Mga Banal, Tomo 1, Kabanata 45.

Ano ang Aasahan

Ang Lucy Mack Smith Home ay isang silid na malilibot na may kasamang tour guide at makikita rito ang kusina at bed alcove. May opsiyonal na tour sa dalawang silid-tulugan sa itaas na nakatuon sa pamilyang Noble na nanirahan sa bahay bago tumira doon si Lucy Mack Smith. Kung hindi mo pa ito nagagawa, inirerekomenda naming libutin ang Hiram and Sarah Granger Kimball Home, na siyang pangalawang tahanan sa Relief Society Foundations tour.

360° Walkthrough