Hiram and Sarah Granger Kimball Home

Bagama’t ang Hiram and Sarah Granger Kimball Home ay hindi isang lugar kung saan tumanggap ng mga paghahayag o nagbigay ng mga inspiradong sermon si Propetang Joseph Smith, ipinapaalala nito sa atin kung paanong kung minsan ay handa ang mga propeta na tanggapin ang salita ng Panginoon dahil una silang natuto mula sa mga salita at halimbawa ng iba. Simula sa tahanang ito, ang di-makasariling paglilingkod ng isang maliit na grupo ng kababaihang Banal sa mga Huling Araw ay nakatulong kay Joseph Smith na magkaroon ng inspirasyon na tanggapin ang kalooban ng Diyos na lumikha ng isang organisasyon para sa kababaihan ng Simbahan.

Lumipat sina Hiram at Sarah sa bahay na ito mga pitong buwan matapos silang magpakasal. Si Hiram, na hindi miyembro ng ipinanumbalik na Simbahan ni Jesucristo hanggang noong 1843, ay nanirahan sa Commerce, Illinois, bago dumating ang mga Banal sa mga Huling Araw at pinalitan ng Nauvoo ang pangalan ng lungsod. Ang mga Kimball ay isa sa iilang mayayamang pamilya sa Nauvoo, dahil sa mga negosyo at lupa na pagmamay-ari ni Hiram. Sina Hiram at Sarah ay nanatili sa Nauvoo nang mas matagal kaysa sa karamihan ng iba pang mga Banal sa mga Huling Araw, na umalis sa tahanang ito at lumipat sa Salt Lake Valley noong 1851.

Ang Kimball Home ay mahalaga dahil sa mga pag-uusap na naganap sa loob ng tahanang ito. Si Margaret Cook, isang mananahi na nagtatrabaho para kay Sarah, ay gustong tumulong sa pagtatayo ng Nauvoo Temple sa pamamagitan ng pagtatahi ng mga polo para sa mga builder o tagapagtayo. Isang araw noong 1842, tinalakay ng dalawang babae ang pagtatatag ng isang sewing society upang makatulong sa gawain, at pagkalipas ng mga araw, mga labindalawang iba pang kababaihan sa kapitbahayan ang nagpulong sa sala ng bahay na ito para sa unang pagpupulong ng samahan o society. Mula sa maliit na sewing society na ito, nabuo ang Female Relief Society of Nauvoo. Kalaunan ang grupong ito ay magiging pandaigdigang organisasyon ng kababaihan na kilala bilang Relief Society.

Basahin ang tungkol kay Sarah Granger Kimball at sa organisasyon ng Nauvoo Female Relief Society sa Mga Banal, Tomo 1, Kabanata 37.

360° Walkthrough