Joseph Knight Home

Sina Joseph Sr. at Polly Knight ay matatapat na kaibigan ni Propetang Joseph Smith at kabilang sila sa mga unang tao na hindi miyembro ng pamilya Smith na naniwala sa propeta. Noong 1826, kinuha ni Joseph Knight Sr. si Joseph Smith bilang trabahador habang nililigawan ni Joseph Smith si Emma Hale. Lubos ang pagtitiwala ni Knight kay Smith kaya pinayagan niya itong hiramin ang kanyang kabayo at bagon para maglakbay patungo sa Harmony para bisitahin si Emma. Noong Setyembre 22, 1827, ang gabi kung kailan natanggap ni Joseph Smith ang mga laminang ginto mula sa anghel na si Moroni, si Joseph Knight Sr. ay kabilang sa mga tagasuporta ng Propeta na naghihintay sa Smith Family Farm Home para sa kanyang pagbabalik.

Ang mga Knight ay nagbigay ng pera, pagkain, at iba pang mapagkukunan para masuportahan si Joseph at Emma Smith habang ginagawa ni Joseph Smith ang pagsasalin ng Aklat ni Mormon. Naalala ni Joseph Knight Jr. na ilang beses niyang sinamahan ang kanyang ama para “bisitahin [si Joseph] at dalhan siya ng mga pangangailangan sa buhay.” Noong Mayo 1829, tumanggap si Joseph Smith ng paghahayag para kay Joseph Knight Sr. na nakatala ngayon sa Doktrina at mga Tipan 12. Matapos maorganisa ang Simbahan noong unang bahagi ng Abril 1830, naglakbay sina Joseph Smith at Oliver Cowdery patungo sa Colesville, kung saan inorganisa nila ang isang branch sa isang pulong sa tahanan ng mga Knight.

Si Joseph Knight Sr. ay isang magsasaka, miller, at grain dealer sa Colesville, New York. Itinuturing ni Knight si Joseph Smith bilang “ang pinakamahusay niyang trabahador.” Nang sabihin ni Joseph kay Knight ang mga pangitaing natanggap niya, kaagad na naniwala si Knight sa kanya. Ang pamilya Knight ay nanatiling tapat na tagasuporta ni Joseph Smith at matatapat na miyembro ng Simbahan sa kabila ng maraming paglalakbay, pag-uusig, at pagsubok na dumating.

Basahin ang mga pangyayaring naganap sa Tahanan ni Joseph Knight Sr. sa Mga Banal Tomo 1, Kabanata 9.

Ano ang Aasahan

Ang mga tour guide ay magbibigay ng isang guided tour ng tahanan.