Fale o Iosefa Knight

O Iosefa le Matua ma Polly Knight o ni uo faamaoni a le Perofeta o Iosefa Samita ma o nisi ia o uluai tagata talitonu i fafo atu o le aiga o Samita. I le 1826, na faafaigaluegaina ai e Iosefa Knight le Matua ia Iosefa Samita e avea ma se tagata faigaluega i le ao a o faauo Iosefa Samita ia Ema Hale. Sa matua faatuatuaina e Knight ia Samita o lea sa ia faatagaina ai o ia e nonō lana solofanua ma le taavale solofanua e malaga ai i Haramoni e asiasi ia Ema. I le aso 22 o Setema, 1827, o le po lea na maua ai e Iosefa Samita papatusi auro mai le agelu o Moronae, sa i ai Iosefa Knight le Matua o se tasi o le au lagolago a le Perofeta lea sa faatalitali i le Fale o le Faatoaga a le Aiga o Samita mo lona toe foi mai.

I le taimi o le faaliliuga o le Tusi a Mamona, sa saunia ai e le au Knight ia tupe, meaai, ma isi punaoa e lagolago ai Iosefa ma Ema Samita a o ia faaliliuina le Tusi a Mamona. Na faamatalaina e Iosefa Knight le Itiiti lona malaga faatasi ma lona tama i ni nai taimi e “vaai ia [Iosefa] ma avatu ia te ia se mea e ola ai.” Ia Me 1829, na maua ai e Iosefa Samita se faaaliga mo Iosefa Knight le Matua lea ua tusi faamaumauina nei i le Mataupu Faavae ma Feagaiga 12. Ina ua uma ona faatulagaina le Ekalesia i le amataga o Aperila 1830, sa malaga atu Iosefa Samita ma Oliva Kaotui i Colesville, lea sa la faatulagaina ai se paranesi i le taimi o se fonotaga i le fale o Knight.

O Iosefa Knight le Matua o se faifaatoaga, o se fai falaoamata, ma se faatau saito i Colesville, Niu Ioka. Na manatu Knight o Iosefa Samita “o le faifaatoaga sili lea ona lelei ua ia faafaigaluegaina.” Ina ua ta’u atu e Iosefa ia Knight e uiga i faaaliga na ia mauaina, sa vave ona talitonu Knight ia te ia. Sa tumau pea le lagolago faamaoni o le aiga o Knight ia Iosefa Samita ma tagata faamaoni o le Ekalesia e ala i le tele o femalagaaiga, sauaga, ma tofotofoga na sosoo ai.

Faitau e uiga i mea na tutupu i le Fale o Iosefa Knight le Matua i le Au Paia Voluma 1, Mataupu 9.

O Mea e Faamoemoe i Ai

O le a tuuina atu e Docents ia te oe se maimoaga taamilo i le fale.