Fale Talifononga ʻo Sionisoní

Ko e Fale Talifononga Sionisoní, ko ha konga mahuʻinga ia hono fakalele ʻo e kolo ʻo e Kāingalotu ʻi Ketilaní. Naʻe hoko ia ko ha hōtele, ʻa ia naʻe lava ke maʻu ai ʻe he kau ʻaʻahi ʻoku fefonongaʻakí ha meʻatokoni pea mo ha mohenga pehē foki ki ha feituʻu ke tauhi mo tokangaekina ai ʻenau fanga hōsí.

Naʻe langa ʻa e fale talifonongá ʻi he 1813 ʻe Pita Falanisē pea ko e fuofua fale piliki ia ʻi Ketilaní. Naʻe fakatau ʻe he Siasí ʻa e kelekelé mo e falé ʻi he taimi naʻe kamata fakatahataha mai ai e Kāingalotú ʻi he ʻēlia Ketilaní ʻi he 1833. Naʻe tokangaʻi ʻe Sione Sionisoni ʻa e falé ʻi he faʻahitaʻu fakatōlau ʻo e 1833 pea fokotuʻu ko e Fale Talifononga Sionisoní.  
 
Naʻe hoko foki ʻa e fale talifonongá ko ha ʻōfisi, loki fakataha, falekoloa paaki, holo fakasōsiale, mo ha mīsiume fakataimi. Hili hono fakaʻauha e mīsini paaki ʻi Mīsulí, naʻe tauhi fakataimi ha mīsini paaki ʻe taha ʻi he Fale Talifononga Sionisoní.

Ko e ngaahi meʻa mahuʻinga kehe naʻe hoko ʻi hení ko hono fakafeʻiloaki e lakanga ʻo e pēteliaké ʻe Siosefa Sāmitá mo e mavahe ʻa e Kōlomu ʻo e Kau ʻAposetolo ʻe Toko Hongofulu Mā Uá ʻi heʻenau fuofua misioná. ʻI he faʻahitaʻu māfana foki ʻo e 1835, naʻe fakatau mai ai ʻe Siosefa Sāmita ha ngaahi sino fakatolonga mo ha ngaahi takainga tohi ʻa ia naʻá ne maʻu mei ai ʻa e tohi ʻa ʻĒpalahamé. Naʻe fakaʻaliʻali ʻa e ngaahi meʻá ni ʻi he Fale Talifononga Sionisoní ko ha konga ʻo ha fakaʻaliʻali nounou.  
 
Ko e Fale Talifononga Sionisoní, ko ha toe langa foʻou ia ʻo e fuofua falé ʻi he feituʻu tatau pē. Naʻe faʻu e konga ki muʻa ʻo e falé ke ne fakafōtunga ʻa e fale senituli 19. ʻOku hoko he taimí ni e tafaʻaki ki loto ʻo e Fale Talifononga Sionisoní ko ha ʻēlia fakaʻaliʻali, ʻokú ne akoʻi fekauʻaki mo e hisitōlia ʻo Ketilaní. 

Meʻa ke ʻAmanaki Ki Aí

Ko e tafaʻaki ki loto ʻo e Fale Talifononga Sionisoní ko ha ʻēlia fakaʻaliʻali mo e ako. Ko e ngaahi fakaʻaliʻali ʻe niʻihi ʻoku ngāue ʻaki ha ngaahi touch screen (ngāue ʻaki ʻa e ala ki he screen) mo ha ngaahi vitiō. ʻOku ʻatā ʻa e kau faifekaú ke nau tokoniʻi koe, ka ko e kotoa ʻo e aʻusiá ʻoku takitaha ʻalu pē.