ʻApi ʻo ʻOasoni mo Malinitā Haití

ʻOku fakatātaaʻi ʻe he ʻApi Haití ʻa e fuʻu mahuʻinga ʻo e ongoʻi kau atu ki he koló ki hono langa hake ʻo Nāvuú. ʻI hono fakahoungaʻi ʻa e ngāue fakafaifekau ʻa ʻOasoní mo e ngaahi feilaulau ʻa Malinitā ʻi he taimi ko iá, naʻe langa ai ʻe he ngaahi kaungāʻapí ʻa e ʻapí ni maʻá e fāmili Haití ʻi he 1843.

Naʻe nofo ʻa e fāmili Haití ʻi heni mei he 1843 ki he 1846. Neongo ko e lahi taha ʻo e ngaahi ʻapi ʻo Nāvuú naʻe ngaohi fakahisitōlia ʻaki ʻa e papa, ka ko e taha ʻeni ʻo e ʻapi papa pē ʻe ua naʻe toe fakaleleiʻi ʻi he Feituʻu Fakahisitōlia ko Nāvuú ʻi he ʻaho ní. Neongo naʻe lahi ha ngaahi fale piliki mei he ngaahi taʻu ʻo e 1840 tupú ne nau kei tuʻu pē ʻi he koló, ka ko e lahi taha ʻo e ngaahi ʻapi papá naʻe ʻikai ke nau hao. Tānaki atu kia ʻOasoni, Malinitā, mo ʻena fānaú, naʻe nofo mo Mele ʻAna Palaisi mo Māʻata Poloueti, ko ha ongo papi ului foʻou mei ʻIngilani, ʻi heni fakataha mo e fāmili Haití ʻo aʻu ki he hiki ʻa e fāmilí ki he hihifó ʻi Mē 1846.

Naʻe mali ʻa ʻOasoni Haiti mo Malinitā Sionisoni ʻi Ketilani, ʻOhaiō ʻi he 1834. ʻI ha hili ha ngaahi māhina siʻi mei ai, naʻe ui ʻa ʻOasoni ke ngāue ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá. ʻI he fononga ʻa e niʻihi kehe ʻi he kōlomú mei Nāvū ki ʻIulopé, naʻe ʻalu ʻa ʻOasoni ki Selusalema ke fakatapui ʻa e fonuá ki he foki atu ʻa e kakai Siú pea mo ha tāpuaki ki he hako ʻo ʻĒpalahamé. ʻI he ʻaho 24 ʻo ʻOkatopa, 1841, naʻe fakahoko ai ʻe ʻOasoni Haiti ha lotu fakatapui fakalaumālie ʻi he Moʻunga ʻo e ʻŌlivé. Naʻá ne foki ki Nāvū hili e laka hake ʻi he taʻu ʻe ua ʻene mavahé. Lolotonga e mamaʻo ʻa ʻOasoní, naʻe kau atu ʻa Malinitā ki he Kautaha Fineʻofa ʻo e Kakai Fefine ʻo Nāvuú pea naʻe hoko ʻene ngāue tokoní mo hono tokoniʻi ia ʻe hono ngaahi kaungāʻapí, ko ha fakafiemālie kiate ia.

Meʻa ke ʻAmanaki Ki Aí

Ko e ʻApi ʻo ʻOasoni mo Malinitā Haití ko ha takimamata loki ua ia. ʻOku kau ʻi he ʻapí ha fakaʻaliʻali tataki pē ʻe kita ʻoku fakamatalaʻi ai ʻa e ngaahi fuofua misiona ʻe fā ʻa e Kau ʻAposetoló ki tuʻapuleʻangá, pea ko e loki talanoa levá ko ha takimamata ia ʻoku tataki ʻe he kau faifekaú. Hili ʻa e takimamata ʻo e ʻApi Haití, te ke lue pe fakaʻuli ki he ʻApi ʻo Hiipa mo Vilate Kimipoló ke hoko atu ʻa e takimamata ʻi he Ngaahi ʻApi ʻo e Kau ʻAposetoló.

Vakai takai ʻi he 360°