Fale o Eteuati ma Ann Hunter

A o nonofo ai i lenei fale, sa auauna atu le au Hunters i totonu o le nuu o le feagaiga o Navu ma sa faamanuiaina i le vaaia o le aai o le malumalu ma lo latou aiga o tuputupu ae. Na auai Ann i le Aualofa a Tamaitai o Navu ia Aokuso 1843. Ia Novema 1844, na valaauina ai Eteuati e avea ma Epikopo o le Uarota Lona 5 a Navu, lea na aofia ai tiute e pei o le fesoasoani e faatulaga galuega o le sefuluai e fausia ai le malumalu ma le aoina mai o taulaga anapogi e toe tufatufa atu i tagata fou malaga mai ma isi e manaomia le fesoasoani. O le tausaga lava lena, na fanauina ai e Ann le la tama e toatasi, o Ann.

Sa nonofo le aiga o Hunter i lenei fale mai le 1842 i le 1846. Na liliu Eteuati ma Ann Hunter i Le Ekalesia a Iesu Keriso o le Au Paia o Aso e Gata Ai i le 1840. Ona la faatauina atu lea o la laua faatoaga manuia i le Itumalo o Chester, Penesilevania, faia ni fuafuaga e fausia ai lenei fale ae la te lei taunuu atu, ma fesoasoani i isi tagata o le Ekalesia mai la latou paranesi i le lotoifale, e aofia ai le aiga o Gheen, e mulimuli i le valaauga faaperofeta e faapotopoto i Navu.

I le taumafanafana o le 1842, sa lafi ai Iosefa Samita i le Fale o Hunter ina ia aloese ai mai leoleo o e na ulufale atu i Navu ma le faamoemoe e pue faapagotaina o ia ma toe ave o ia i Misuri. A o lafi ai, sa faaauau pea e Iosefa ana matafaioi o se perofeta ma se taitai, ma fesootai atu faaaliga paia i tagata o le Ekalesia e ala i tusi tusitusia. I lenei fale, sa ia faalauina atu ai ni tusi se lua e faatatau i le sauniga o le malumalu ua lauiloa o le papatisoga mo e ua maliliu, o vaega o loo i ai nei o vaega 127 ma le 128 i le Mataupu Faavae ma Feagaiga.

Faitau e uiga i le solaese mai o Iosefa Samita mai faatinoga le talafeagai faaletulafono, e aofia ai lona taimi i le lafi ai i le Fale o Eteuati ma Ann Hunter lea na ia maua ai faaaliga e faatatau i papatisoga mo e ua maliliu i le Au Paia, Voluma 1,Mataupu 39.

O Mea e Faamoemoe i ai

O le Fale o Hunter o se fale e tolu potu e taialaina mo maimoaga e aofia ai le potu malolo, ofisa, ma le umukuka o le taumafanafana. A uma le malaga maimoa i le fale, o le a faasavali atu e faifeautalai oe i lalo o le mati’e i le Fale o Gheen e faaiu ai le malaga maimoa i le Aai o le Malumalu.

360° le Faasologa