William and Esther Gheen Home

Sa tahanang ito, inilaan ng pamilya Gheen ang kanilang buhay sa pagtatayo ng Sion. Nag-ambag si William tuwing ikasampung araw ng kanyang paggawa para tumulong sa pagtatayo ng templo sa pamamagitan ng pagpapatakbo ng mga kabayo para ihatid ang mga batong naka-quarry sa lokasyon ng pinagtatayuan. Sumali si Esther sa Female Relief Society noong 1842. Siya at ang kanyang mga anak ay nagbigay ng donasyon sa penny drive na idinaos ng Relief Society para makalikom ng pondo na ipagpapatayo ng templo.

Sina William at Esther Gheen ay nabinyagan at nakumpirma na mga miyembro ng Ang Simbahan ni Jesucristo ng mga Banal sa mga Huling Araw noong 1839 sa Pennsylvania. Noong 1842, kasama ang pamilya Hunter, si William, Esther, at ang kanilang anim na anak ay lumipat ng 900 milya mula sa Chester County, Pennsylvania patungong Nauvoo, Illinois. Bumili sila ng isang ektaryang lupain na pababa lamang mula sa templo at nagtayo dito ng bahay na yari sa ladrilyo. Noong Disyembre 1844, ibinigay nila ang kalahati ng kanilang isang ektaryang lote bilang ikapu. Ang pamilya Gheen ay nanirahan sa tahanang ito mula 1842 hanggang 1846.

Habang nakatira sa tahanang ito, ang pamilya Gheen ay pinagpala ng mga ordenansa sa templo. Noong 1843, dalawang beses nagpunta sina William at Esther sa bautismuhan ng templo upang mabinyagan para sa mga kapamilya na pumanaw na bago pa man nila natanggap ang ipinanumbalik na ebanghelyo ni Jesucristo. Kasunod ng biglaang pagkamatay ni William noong Hunyo 1845, nanatiling tapat si Esther. Sa Nauvoo Temple, natanggap niya ang kanyang endowment noong Disyembre 1845 at nabuklod sa pamamagitan ng proxy sa kanyang yumaong asawang si William para sa kawalang-hanggan noong Pebrero 2, 1846.

Basahin ang tungkol sa nagkakaisang pagsisikap at ang paghihirap ng mga Banal na itayo ang Nauvoo Temple, kabilang na ang salaysay tungkol sa pag-aambag ni Esther Gheen ng sinulid na sarili niyang gawa sa Mga Banal, Tomo 1, Kabanata 41.

Ano ang Aasahan

Ang Gheen Home ay may dalawang silid na malilibot nang may gabay na sakop ang silid-kainan at sala. Pagkatapos ng paglilibot sa Gheen Home, maaari mo nang libutin ang iba pang bahagi ng Nauvoo.

360° Walkthrough