Dapit sa Balay ni David Whitmer

Niadtong tingpamulak sa 1838, si David ug ang iyang pamilya mibalhin gikan sa Far West ngadto sa Richmond sa Distrito sa Ray, Missouri. Didto, mitukod si David og usa ka panimalay nga usa ka bloke Silangan sa balay hukuman duol sa sentro sa lungsod. Si David ug ang iyang pamilya nagpuyo diha sa balay sa Richmond hangtod Hunyo 1, 1878, diin usa ka buhawi ang miguba niini. Human sa buhawi, ang balay gitukod pag-usab.

Si David Whitmer ug ang iyang pamilya apil sa unang mga Santos sa Ulahing mga Adlaw nga nanimuyo sa Missouri. Niadtong 1832, miestablisar sila og gamay nga sityuhan sa gawas sa Independence. Ang mga nagpuyo sa Missouri miabog ni David, ug sa branch nga iyang gidumala, gikan sa ilang mga panimalay niadtong Nobyembre sa misunod nga tuig. Nakadangop sa Distrito sa Clay niadtong 1834, si David midawat og tawag sa pagdumala sa ikaduha nga stake sa Simbahan.

Pagka-1837, si David ug ang iyang pamilya mibalhin ngadto sa Far West, Caldwell Co., Missouri. Didto, ang tensyon mitumaw tali sa mga sakop sa pamilyang Whitmer ug sa mga lider sa Simbahan. Wala madugay human sa iyang pagbalhin ngadto sa Far West, Si David nawad-an na og pagsalig sa pagpangulo ni Joseph Smith ug miapil sa mga misupak sa Simbahan. Si David ug ang iyang pamilya sa kataposan mibalhin ngadto sa Richmond. Bisan og dili na miyembro sa Ang Simbahan ni Jesukristo sa mga Santos sa Ulahing mga Adlaw, si David nagpadayon sa pagpamatuod sa Basahon ni Mormon. Nagpuyo siya sa Richmond, nagnegosyo og paabangan nga mga kabayo hangtod sa iyang kamatayon niadtong Enero 25, 1888. Adunay usa ka monumento sa Tulo ka Saksi lakip ni David Whitmer, sa Sementeryo sa Richmond Pioneer, katunga sa milya (.8 km) amihanang silangan sa Sementeryo sa Richmond.

Magbasa pa og dugang mahitungod sa kinabuhi ni David Whitmer didto sa Missouri sa Volume 1, Mga Kapitulo 26–27 ug Volume 2, Kapitulo 30.

Unsa ang Mapaabot

Karon, ang orihinal nga panimalay ni David Whitmer wala na magbarog. Usa ka andana nga bilding nga bika nag-okupar sa dapit. Usa ka gamay nga plake nga bronse sa bahin sa bilding tupad sa Ikaduhang Simbahan sa Baptist nagtimaan sa dapit sa panimalay ni David Whitmer. Ang bilding pribado nga gipanag-iya.