Lubnganan nga Dapit ni David Whitmer

Ang lubnganan nga dapit ni David Whitmer anaa sa Sementeryo sa Richmond. Gilubong siya tupad sa iyang asawa, si Julie Ann Jolly Whitmer, ug sa iyang anak, si David J. Whitmer. Mga inskripsyon diha sa timaan sa lubnganan nagpamatuod sa Basahon ni Mormon ug sa mahangtorong mga kamatuoran niini.

Isip usa sa Tulo ka Saksi, si David Whitmer wala gayod molimod sa iyang pagpamatuod sa Basahon ni Mormon. Human mobiya sa kalihokan sa Simbahan ug mibalhin gikan sa Far West niadtong 1838, si David migahin sa nahibilin sa iyang kinabuhi didto sa Richmond, Missouri. Didto, nagnegosyo siya og paabangan nga kabayo ug nagserbisyo isip mayor gikan sa 1867–1868. Namatay siya sa didto sa Richmond niadtong Enero 25, 1888.

Adunay usa ka monumento sa Tulo ka Saksi, lakip ni David Whitmer, sa Sementeryo sa Richmond Pioneer, usa ka milya (1.6 km) amihanang silangan sa Sementeryo sa Richmond.

Magbasa pa og dugang mahitungod sa kinabuhi ni David Whitmer didto sa Missouri sa Volume 1, Mga Kapitulo 26–27 ug Volume 2, Kapitulo 30.

Unsa ang Mapaabot

Ang Sementeryo sa Richmond, sa Habagatang Dakong Dalan, pinitsahan og 1875. Libre kini ug abli ngadto sa publiko gikan sa kaadlawon hangtod sa kilom-kilom. Ang lubnganan ni David Whitmer nahimutang sa 21 ka pye (6.4 ka metro) gikan sa luyong utlanan sa sementeryo ug 33 ka pye (10 ka metro) silangan sa Tunga-tunga nga Dalan sa Sementeryo. Usa ka dako nga anapog nga monumento nagtimaan sa lubnganan ni David.