Falekoloa Ngaohi Talamu Papá

Naʻe tuʻu ʻa e Falekoloa Ngaohi Talamu Papá ʻi he fakatokelau-hihifo ʻo e ʻApi ‘o Siosefa mo Lusi Sāmita ‘i he Fāmá, pea ko e taha ia ʻo e ngaahi feituʻu naʻe fufuuʻi ai ʻe Siosefa Sāmita ko e Siʻí, ʻa e ʻū lauʻi peleti koula naʻe liliu mei ai ʻa e Tohi ʻa Molomoná. Hili ha taimi nounou mei hono maʻu ʻe Siosefa ʻa e ʻū lauʻi peletí, naʻe omi ha niʻihi ʻo e ngaahi kaungāʻapi ʻo e Fāmili Sāmitá ki he ʻApi Sāmitá ʻo kumi ʻa e ʻū lauʻi peletí. ʻI he fakalalahi ange ʻa e fakamanamana ʻe kaihaʻasi ʻa e ʻū lauʻi peletí, naʻe kofukofuʻi kinautolu ʻe Siosefa ʻaki ha tupenu pea fufuuʻi ia ʻi he konga ki ʻolunga ʻo e falekoloá. Naʻá ne toʻo leva ʻa e ngeʻesi puha naʻe faʻo aí ʻo mono ʻi lalo he ʻū laʻipapa he falikí. Naʻe haʻu ha kau fakatanga he pō ko iá ʻo hua ʻa e Falekoloa Ngaohi Talamu Papá. Naʻa nau maʻu ʻa e ngeʻesi puha ʻi he lalo falikí, ka naʻe ʻikai ke nau kumi ʻi ʻolunga ʻi he fatá ʻa ia naʻe fufuuʻi malu ai ʻa e ʻū lauʻi peletí.

Naʻe akoʻi ʻa e fefakatauʻaki talamú (ngaohi ʻo e talamú) kia Siosefa Sāmita ko e Lahi, ʻe heʻene tamai ko ʻAsaelí, pea akoʻi ia ʻe Siosefa ko e Lahí ki hono foha ko Hailamé. ʻI ha fale meimei tatau mo ʻení, naʻe ngaohi mo fakaleleiʻi ʻe Siosefa ko e Lahí mo Hailame ʻa e ngaahi talamú, kató, mo e naunau fale maʻamaʻá ke nau fakaʻaongaʻi pea mo fakatau atu ki he niʻihi kehé. Neongo ʻoku ʻikai ʻiloʻi ʻa e ʻuluaki feituʻu naʻe tuʻu ai ʻa e Falekoloa Ngaohi Talamu Papá, ka ʻoku tonu ʻa hono toe fokotuʻu ʻo e fale ngaohiʻanga talamu papa ko ʻení mo e vahaʻataimi naʻe nofo ai ʻa e famili Samitá ʻi hení.


Ako lahi ange fekauʻaki mo e feinga ʻa ʻAlamā ke fufuuʻi ʻa e ʻū lauʻi peletí mei ha niʻihi te nau ala kaihaʻasi ʻi he Kau Māʻoniʻoní Voliume 1, Vahe 5.

Meʻa ke ʻAmanaki Ki Aí

ʻOku kau ʻa e Falekoloa Ngaohi Talamu Papá ʻi he ngaahi feituʻu ʻoku fai ki ai ʻe he kau faifekaú ha takimamata ʻo e ngaahi ʻapi ʻo e fāmili Sāmitá, ʻa ia ʻoku kau foki ai ʻa e ʻApi ʻo Siosefa Sāmitá ʻi Heʻene Kei Siʻí pea mo e ʻApi ʻo e Fāmili Sāmitá ʻi he Fāmá.