O Navu Iloga ma le Falepuipui o Karefasi o ni nofoaga e taua i le talafaasolopito o Le Ekalesia a Iesu Keriso o le Au Paia o Aso e Gata Ai.
“O augatupulaga e lei fananau mai o le a nonofo ma le fiafia i tulaga ese i vaaiga ua tatou oo i ai, o mea le lelei ua tatou onosaia; o le maelega lē faavaivai ua tatou faaalia; o faigata e le mafai ona faatoilaloina ua tatou faatoilaloina i le faataatiaina o le faavae o se galuega na aumaia ai le mamalu ma faamanuiaga o le a latou iloaina.”
O Navu Iloga, o loo i ai i sisifo tutotonu o Ilinoi i le Iunaite Setete o Amerika, o se nofoaga taua faasolopito o Le Ekalesia a Iesu Keriso o le Au Paia o Aso e Gata Ai. I le taumalulu o le 1838–1839, na tutulieseina ai le Au Paia o Aso e Gata Ai mai o latou fale i Misuri, ma e toatele na iu lava ina maua lo latou ala i le eria i totonu ma autafa o le nuu na toe faaigoa o le aai o Navu. E ala i faaaliga, na valaau atu ai Iesu Keriso i tagata o Navu ina ia avea ma se “maa tulimanu o Siona,” ma saunia ai se faavae malosi e mafai ona tuputupu ae ai le Ekalesia. O le vaega autū i le vaaiga i le aai ma olaga o le Au Paia o Aso e Gata Ai o le Malumalu o Navu. I lalo o le taitaiga faaperofeta a Iosefa Samita ma Polika Iaga, sa faapotopoto ai lenei nuu o le Au Paia o Aso e Gata Ai e le gata e fausia lenei aai o le malumalu ae faapea foi ona osia feagaiga paia ma le Atua ma le tasi ma le isi e ala i sauniga o le malumalu.
Falepuipui o Karefasi
O le Falepuipui o Karefasi, e tusa ma le 20 maila i sautesasae o Navu, o le nofoaga talafaasolopito lea na fasiotia ai le Perofeta o Iosefa Samita ma lona uso o Ailama e se vaega o tagata faatupu vevesi i le aso 27 o Iuni, 1844. O le maliu faamaturo o le Perofeta ma le Peteriaka o se matuai faataumaoi lava i le Au Paia o Aso e Gata Ai. E ui i lea, a o faavauvau le Au Paia i nei toesea tetele, sa latou mulimuli foi i le taitaiga a aposetolo o loo soifua e faaauau le galuega o le toefuataiga o le talalelei a Iesu Keriso i aso e gata ai.
I le lua tausaga ina ua mavae le faamaturoina, na faamaeaina ai e le Au Paia le fausiaina o le Malumalu o Navu ma faia sauniga paia na fusia ai i latou i le Atua ma le tasi ma le isi. Ae na latou iloaina ua lata ina muta lo latou taimi i lo latou aai o le malumalu pele. E oo atu i le faaiuga o le 1846, e faitau afe le Au Paia ua tuua Navu ma le faamoemoe e mafai ona latou fausia se fale e sili atu ona filemu o Siona i sisifo.
O Le Malumalu o Navu
O Navu Iloga ma le Falepuipui i Karefasi ua faasoa mai ai taimi faavae i le talalelei toefuataiina a Iesu Keriso lea o loo faaauau pea ona aafia ai le Ekalesia i aso nei. I Navu, na maua ai e Iosefa Samita ni faaaliga taua mai le Alii—e aofia ai sauniga o le malumalu o le papatisoga mo e ua maliliu, le faaeega paia, ma faamaugao aiga e faavavau; na malaga atu aposetolo i misiona i atunuu mamao; na atiina ae e tagata faatauoloa se tamaoaiga malosi lea na lagolagoina le fausiaina o malumalu; ma sa faavaeina le Aualofa a Tamaitai e tausia i latou e manaomia le fesoasoani. I le Falepuipui o Karefasi, na faaiuina ai e Iosefa Samita lana galuega i le tino, ma tuua ai se molimau le maluelue e uiga i le Faaola soifua o Iesu Keriso.
I aso nei, e mafai e tagata asiasi i Navu Iloga ma le Falepuipui i Karefasi, pe i le tagata lava ia pe i luga o le initoneti, ona iloa tala o le faatuatua, auaunaga, galuega, tuuto, faalavelave, faamoemoe, ma le filemu. O nei nofoaga ma tala e mafai ona musuia ai tagata e faamalosia lo latou lava faatuatua ia Iesu Keriso, osia ma tausia feagaiga ma le Atua, faasoa atu le talalelei a Iesu Keriso i isi, ma atiina ae nuu o loo latou nonofo ai.
