Maa Tulimanu o Siona: Faaaliga o le Nofoaga Autu mo Tagata Asiasi i Navu

I le vaega 124 o le Mataupu Faavae ma Feagaiga, ua faasino faafa ai e Iesu Keriso ia Navu o se “maa tulimanu o Siona” (tagai i fuaiupu 2, 23, 60, ma le 131). O se maa tulimanu o se maa tele o loo faataatia i le tulimanu o le faavae o se fale. E maua ai le faatulagaga lelei, malosi, ma le mausali i le fausaga atoa. O Siona e mafai ona faauigaina o “tagata o le Alii,” “o e loto mama,” po o se nofoaga patino e totonugalemu i le malumalu e pei o Ierusalema.² Na ta’ua e le Alii le siteki o Navu “o se maatulimanu o Siona” aua o faaaliga faaperofeta ma feagaiga o le malumalu na Ia faaalia mai ai iina faapea foi ma le nuu o tagata talitonu o le a tuuina atu ai le faatulagaga lelei, malosi, ma le mausali i le Ekalesia atoa mo augatupulaga o le a sosoo ai.

A o le’i nofoia Europa i le seneturi lona 19, sa nonofo tagata o le nuu i le pioga faasolofanua o Navu i le Vaitafe o Misisipi mo augatupulaga.⁴ Na ta’ua e nisi o le Quashquema, o se upu Meskwaki o lona uiga o le “nofoaga filemu.”⁵ Ae e oo atu i le 1832, ina ua mae’a se feagaiga ma le malo feterale, sa faamalosia tagata Amerika moni e o ese.⁶ E le’i umi ae amata ona fuafua e le ‘aufaisea se aai tuaoi sa latou faaigoaina o Venus ma mulimuli ane o Commerce, ae o le popolevale i faletupe i le atunuu atoa i le 1837 na suia ai a latou fuafuaga. Na amata ona saili e tagata na faalauiloaina le aai se tasi e faatauina le fanua.


I le taumalulu o le 1838–1839, na tutulieseina ai le Au Paia o Aso e Gata Ai mai o latou fale i Misuri. E toatele na sulufa’i i le Teritori o Aioua po o le taulaga o Quincy, Ilinoi. Sa taumafai le Au Paia o Aso e Gata Ai i le tele o taimi e mulimuli i le faatonuga a Iesu Keriso e fausia se aai, ae o taimi uma lava sa faamalosia ai i latou e lafoai a latou taumafaiga. O lenei, i le tautotogo o le 1839, i le faapotopoto ai i se fale le tumau ma faatasi ai ma le Perofeta o Iosefa Samita o se pagota i Liperate, Misuri, sa latou feagai ma se filifiliga: pe tatau ona latou faapotopoto e toe fausia se aai ma lamatia mai sauaga, pe tatau ona latou faataapeapeina i totonu o le faitau aofai toatele?⁷ I le iloaina o tulaga lamatia ae faalagolago i le Atua, na faatagaina ai e Iosefa Samita ia taitai o le Ekalesia e faatau mai fanua mo le faapotopotoina. Sa toe faaigoa e Iosefa le aai o Navu, o se upu Eperu e faaliliuina ai i nisi taimi o “matagofie.”⁸


Sa o atu le Au Paia o Aso e Gata Ai e galulue. Sa latou faamātūtūina fanua faataufusi, totoina faatoaga ma togalaau aina, fausia fale ma auala, ma amata ni pisinisi. I le taimi lava lea e tasi, sa latou taliaina ai galu o tagata liliu mai Amerika i Matu ma Europa. I lona tulaga maualuga, na sili atu le faitau aofai o Navu i le 10,000, ma avea ai o se tasi o aai aupito tetele i le setete o Ilinoi. I le ogatotonu sa tu ai le Malumalu o Navu, na faapaiaina i le 1846 o le maota o le Alii, o le mea sili na ausia na taualuga ai o le “maa tulimanu o Siona.”

O Navu e faatusa i le maualuga o le misiona a Iosefa Samita e toefuatai mai le talalelei a Iesu Keriso. O iinei na faaali mai ai e le Alii se malamalamaaga sili atu i le ata o le faaolataga ma sauniga ma faamanuiaga toefuataiina o le malumalu. Sa aoao atu e Iosefa le Au Paia e mafai ona faamauina faatasi i latou e sauniuni ai mo le faaeaga ma le ola e faavavau. Sa Ia aoao atu foi i latou e mafai ona latou tutu atu mo o latou tuaa ua maliliu ma maua sauniga o le a mafai ai ona latou faatasitasi i le isi olaga.

Papatisoga mo e ua Maliliu

Sa talai atu Iosefa Samita e uiga i le aoaoga faavae o le papatisoga mo e ua maliliu i le taimi o se falelauasiga ia Aokuso 1840. Ina ua mae’a lenei aoaoga faatoa faaalia mai, sa amata ona faia e le Au Paia papatisoga sui i le Vaitafe o Misisipi. I se faaaliga mulimuli ane, na aoao mai ai le Alii e tatau ona faatino le sauniga i totonu o malumalu (tagai Mataupu Faavae ma Feagaiga 124:29–36).

Faaeega o le Mana Paia

A o le’i fausiaina le malumalu, sa tuuina atu e Iosefa le potu pito i luga o lona Faleoloa Piliki Mumu e tuuina atu ai le faaeega paia ia Me 1842. Na muamua valaaulia e Iosefa ni alii se toaiva e maua o latou faaeega paia. A o le’i maliu o ia, sa tuuina atu e Iosefa le faaeega paia i tagata e 60, e aofia ai ma tamaitai e 28.⁹

Faamauina mo le Faavavau

E pei o isi sauniga, o faamauga o faaipoipoga sa muai faia i fafo atu o le malumalu. E lua masina talu ona uma le faamauga o Iosefa ma Ema ia Me 1843, na tusifaamaumauina ai e Iosefa se faaaliga e uiga i le feagaiga fou ma tumau-faavavau o le faaipoipoga. O lenei feagaiga na folafola mai ai e tausia faatasi aiga e le gata mo le olaga ae faapea foi mo le olaga pe a mavae le olaga nei (tagai Mataupu Faavae ma Feagaiga 132).

Na faaali mai e le Alii nei sauniga a o mamanuina ma fausia e le Au Paia le malumalu. A o faamae’aina vaega o le malumalu, o le a faapaiaina e taitai perisitua ni avanoa mo le faatinoina o sauniga o le malumalu a o faaauau pea le fausiaina o le fale atoa. Mulimuli ane, na faia papatisoga mo e ua maliliu, sauniga o faaeega paia, ma faamauga i totonu o le Malumalu o Navu.

O le totonugalemu o le fausiaina o Navu o se maatulimanu o Siona o le fausiaina lea o se malumalu. Toetoe lava o tagata uma o le nuu o Navu sa valaaulia e fesoasoani e fausia le malumalu. O nisi sa totogiina ni totogi mo a latou galuega ae o isi na foai atu o latou taimi, tupe, taleni, ma galuega i le silia ma le lima tausaga o fausiaina. O nisi o tagata faigaluega sili ona tomai o maa, o e na vaneina ni mea teuteu i ni maa ma faatulaga uma maa a o tulai mai puipui o le malumalu.

I le aso 11 o Iuni, 1842, na vaaia ai e le tagata liliu mai Peretania ma le tomai i maa o William Player le faatulagaina o le uluai maamora o le Malumalu o Navu.

E le gata i le fausiaina o le malumalu, ae sa faalatalata atili atu foi le Au Paia o Aso e Gata Ai e ala i tapuaiga faalelotu i totonu o le malumalu. E ui lava ina sa latou sauniuni e o ese mai lo latou aai pele o le malumalu i le taumalulu o le 1845–1846, ae sa faaauau pea ona maua e le Au Paia sauniga ma osia feagaiga ma le Atua ma le tasi ma le isi i le malumalu i le ao ma le po. I masina pupuu e tolu, e silia ma le 5,000 le Au Paia na maua faaeega paia ma e silia ma le 2,000 na faamauina. O nei sootaga o feagaiga na faapaiaina i le Malumalu o Navu na fusia faatasi ai le nuu faatupulaia o le Au Paia. A o latou saili ia iloa Siona i le lalolagi atoa i le tele o tausaga na sosoo ai, sa latou fausia i luga o le maatulimanu faavae o faamanuiaga o le malumalu na faaalia i Navu.

I le aso 3 o Fepuari, 1846, sa faaauau ai pea ona faatautaia e le Au Paia i Navu ia sauniga ma osia feagaiga ma le Atua ma le tasi ma le isi e ui lava ina sa sauniuni le vaega muamua e amata la latou malaga ese mai le aai i le taeao.

“O le Toefuataiga o se faagasologa, e le o se mea e tupu, ma o le a faaauau pea seia oo ina toe afio mai le Alii. O le faamoemoega autu lava o le faapotopotoina o Isaraelu, o le aumaia lea o faamanuiaga o le malumalu i fanau faamaoni a le Atua. Pe a tatou saili atu i auala e faataunuu ai lena faamoemoega i le mataalia atili, e faaali mai e le Alii ni malamalamaaga sili atu. O le Toefuataiga faifai pea e manaomia ai faaaliga faifai pea.” —Peresitene Russell M. Nelson¹⁰

O le galuega o le faaolataga ma le faaeaga na faia i malumalu o le Au Paia o Aso e Gata Ai i le lalolagi atoa i le taimi nei na amata i Navu. I lalo o faatonuga paia, na faailoa atu ai e Iosefa Samita feagaiga o le malumalu ma sauniga o le perisitua e fesootai ai i le Au Paia i Navu. Sa malamalama Iosefa o nei sauniga o le a faaatoatoaina e ala i faaaliga faifai pea.

Ina ia saunia mo le faaauauina o faaaliga faaperofeta, sa faamatuu atu e Iosefa ki e tatau ai o le perisitua i le Korama a Aposetolo e Toasefululua a o le’i leva ae maliu o ia i le Falepuipui o Karefasi. I le faaaogaina o nei ki, na faatonuina ai e Aposetolo le faamae’aina o le Malumalu o Navu ma le faatautaia o sauniga o le malumalu i le faitau afe o le Au Paia o Aso e Gata Ai a o le’i malaga atu i Sisifo o Amerika.

Ina ua mavae le malaga ese atu o le Au Paia mai lo latou aai, sa faaleagaina le uluai Malumalu o Navu i le afi ma le asiosio. E silia ma le 150 tausaga talu ona tuua e le Au Paia ia Navu, na faapaiaina ai e Peresitene Gordon B. Hinckley le Malumalu o Navu Ilinoi ua toe faafouina. O le faaaliga faifai pea lea e fausia i luga o faaaliga faalefaavae o le malumalu, o le mea lea ua avea ai Navu ma lona malumalu ma se tasi o nofoaga aupito paia i le lalolagi, e moni lava “o se maatulimanu o Siona.”