O mea e ao ona iloa e uiga i le itulau autu a le Ekalesia

E Talileleia Tagata Asiasi i Taimi Uma.

O loo faapea mai ‟Talileleia Tagata Asiasi” i luga o o tatou fale uma—ma e moni lava! Pe e te fia avea ma se tasi o Le Ekalesia a Iesu Keriso o le Au Paia o Aso e Gata Ai, asiasi ai ma se uo, pe na o sina fiailoa laitiiti, matou te fiafia lava e vaai ia te oe.

O Mea e Faamoemoeina mai Sauniga i Aso Sa

O le Ekalesia o se nofoaga o le alalafaga ma le aoaoina, ae o le mea e sili ona taua o se nofoaga e tapuai ai i le Atua ma Iesu Keriso. O a tatou aulotu uma e 30,000 i le salafa o le lalolagi e mulimuli i se mamanu tutusa e lua itula mo sauniga i Aso Sa:

Sauniga Faamanatuga

I le taimi ua tatou ta’ua o le “sauniga faamanatuga,” e potopoto faatasi tagata uma o le faapotopotoga. O le sauniga e aofia ai se tatalo amata ma le tatalo faaiu, ni nai viiga, ma lauga e tuuina atu e tagata o le Ekalesia.

O le vaega aupito taua o le sauniga faamanatuga o le taumamafa i le faamanatuga, lea e talitutusa ma le Komunio i isi lotu Kerisiano. I le taimi o le faamanatuga, tatou te manatua ai Iesu Keriso a o tatou fetagofi atu i se fasi falaoa ma se ipu vai e faatusa i le tino ma le toto na Ia ositaulagaina mo i tatou. I lenei taimi sili ona filemu, tatou te taumafai ai e mafaufau e uiga i auala e mafai ai ona tatou mulimuli ia te Ia ma le faamaoni atili i le vaiaso a sau.

I le avea ai ma se tagata asiasi, o le a lē faamoemoeina oe e te faatinoina soo se mea e te lagona ai le lē to’afimalie. Ia lagona le saoloto e na o le nofo ai i le potopotoga ma talia le aafiaga.

O Vasega

E faaopoopo atu i le sauniga faamanatuga, e valaaulia tagata e nonofo mo se itula lona lua o le aoaoina i se faatulagaga e toalaiti atu.

E o tamaiti i le Peraimeri, lea latou te aoaoina ai tala o tusitusiga paia, pese, ma lesona talafeagai e uiga ia Iesu ma Lana talalelei. E auai le autalavou i vasega talitutusa mo o latou lava vaitausaga.

I Aso Sa fesuia’i, e auai faatasi tagata matutua i le Aoga Sa, e suesueina ai tusi o tusitusiga paia ua filifilia mo suesuega a le Ekalesia atoa i lena tausaga. O isi vaiaso, e vaevaeina ai i ni vasega eseese mo alii (ua ta’ua o le korama a toeaina) ma tamaitai (ua ta’ua o le Aualofa).

Afai e te le o mautinoa po o fea e te alu i ai, tau lava o le fesili, ma o le a fesoasoani se tasi ia te oe e saili le vasega sa’o.

Members of the Sunday School Teacher's Council meet together to discuss Sunday School issues and learn from each other.

O Isi Gaoioiga a le Ekalesia

Afai e te auai i se sauniga tapuai i le Aso Sa faatasi ma i matou pe i ai foi se uo o se tagata o la tatou Ekalesia, atonu e valaaulia oe i se tasi o isi gaoioiga o loo faia i la outou aulotu i le lotoifale. O ni nai faataitaiga e aofia ai:

Gaoioiga faaagafesootai, e pei o se fiafia o le Kerisimasi.
Gaoioiga faalevaiaso a le autalavou.
Inisitituti o mataupu faalelotu mo talavou matutua e suesue ai tusitusiga paia ma fegalegaleai faatasi ai.
Galuega faatino fesoasoani i Nuu.
O vasega o le Ola Tutoatasi
Konaseti po o isi faatinoga o faatufugaga.

Fesili Masani

O le a le ofu e tatau ona ou ofuina i le lotu?

E sili atu ona talileleia lou susū mai i le tulaga e pei ona e i ai. Afai e te popole o le a e tu matilatila mai, matou te taumafai e ofu ni ofu manaia atu nai loo lavalava e ofuina i le vaiaso atoa, e atagia ai lo tatou migao mo le Atua. O laei masani o le a e vaai i ai i le lotu o se ofutino ma se fusiua mo alii ma se sakete po o se ofu mo tamaitai.

Pe o le a iloa e tagata uma o a’u o se tagata asiasi?

E i ai a matou tagata asiasi i le toetoe lava o faapotopotoga uma, o lea ua matou masani ai lava i le vaaia o foliga fou. I se potopotoga toatele, atonu e le iloa lava e tagata o oe o se tagata asiasi. I isi eria, atonu e mātau oe e tagata ma faatalofa atu. Po o le a lava le itu, aua e te faatuai ona faailoa atu oe lava ma fai atu soo se fesili atonu o ia te oe.

Pe tatau ea ona ou auai e faatino se mea?

Leai. A tauaaoina atu le falaoa ma le vai o le faamanatuga i le faapotopotoga, e mafai ona tau lava o lou pasi atua o le fata i le isi tagata ona e toe saofai lelei lea ma olioli i le vaega o totoe o le sauniga. O le a e vaai i tagata o ofo mai e auai i isi auala, e pei o le taliina o se fesili a se faiaoga i le taimi o le Aoga Sa, ae e te lē tau siiina fua lou lima pe afai e le o se mea lena e te manao e fai.

Pe o le a talosagaina a’u e foai atu se tupe?

Leai. Matou te talitonu i le tulafono o le sefuluai o loo maua i le Tusi Paia. Ae o o tatou tagata o e filifili e totogi sefuluai latou te faia faalilolilo na o i latou, ae le o se vaega o le sauniga tapuai. O le a lē talosagaina oe mo ni foai i le taimi o se sauniga.

E mafai ona ou aumaia la’u fanau?

Ioe! O se ekalesia faauō-faaleaiga lenei. E nonofo faatasi tamaiti ma o latou mātua i le taimi o le sauniga faamanatuga autu ona auai lea i gaoioiga faatasi ma tamaiti po o le autalavou o lo latou lava matutua a o o atu le au matutua i le Aoga Sa. O vasega a tamaiti ma le autalavou e taitaia i taimi uma e ni tagata matutua se toalua pe sili atu. O se faapaologa mo tinā e maua ai se vaega patino mo le fafagaina o pepe po o isi manaoga.

E te fia alu i le lotu ae le na o oe?

O tagata o la matou Ekalesia o e volenitia o ni faifeautalai i la outou eria e mafai ona asiasi vave atu ia te outou e fesoasoani ia te oe ia iloa mea e faamoemoeina ma tali ai au fesili. E mafai foi ona latou faasaoina se nofoa mo oe pe a e sauni e asiasi i ai.