Jeso Keresete ke Mmoloki wa Gago

Fa Modimo a re romela mo lefatsheng go ithuta le go gola, O ne a itse re tlaa dira diphoso. Ke sone se A re neetseng Mmoloki.

Re dumela fa Jeso Keresete e le Morwa Modimo tota le leloko le le tlhomologileng la Bomodimo, le Modimo Rara le Mowa o o Boitshepo. O tlile mo lefatsheng go diragatsa thomo ya selegodimo, kwa a neng a tlaa:

• Itemogela diteko tsa botshelo jo.
• Ruta le go paka ka Modimo.
• Diragatsa dikgakgamatso tse dikgolo.
• Boga le go re swela dibe go re letlelela go phepafadiwa go tswa mo sebeng
• Fenya loso ka Tsogo ya Gagwe, a re neela tsela ya gore rotlhe re tsosiwe.

Jeso Keresete e ne e le sekao sa lorato le le itshekileng. Ka bopelonomi o fodisitse balwetse le digole, a jesa ba ba tshwerweng ke tlala, a tsosa baswi, a tlhokomela bahumanegi, a amogela ba ba kobilweng, le go direla botlhe ba ba neng ba mmatla ka boikanyego.

Mmoloki o utlwa lorato le bopelonomi tse di tshwanang mo go wena.

Jaaka Bakeresete, re leka go nna jaaka Mmoloki le go supa lorato lwa Gagwe mo go tsotlhe tse re di dirang.

Jeso e ne ele moruti mogolo. Dithuto tsa gagwe, tse di neetsweng dingwaga tse di 2,000 tse di fitileng, di santse di tlhotlheletsa batho lefatshe lotlhe ka bophara go tshela matshelo a botoka gompieno. O rutile matshwititshwiti, mme Baebele e ruta gore le gone o ne a tsaya nako a ikopanya le batho ka bongwe.

Mongwe le mongwe wa rona, go akaretsa le wena, o ka ikutlwela boitumelo le kagiso tse dikgolo ka go sala morago dithuto tsa ga Jeso Keresete. Phuthego ya gago e e gaufi ya Kereke ya ga Jeso Keresete ya Baitshepi ba Malatsi a Bofelo e na le bokopano jwa beke le beke kwa o ka ithutang mo gontsi ka ga ka fa dithuto tse di go amang ka teng. Buka ya ga Momone le yone e na le polelo ya dithuto tsa ga Keresete tse di ka tlaleletsang tseo tsa mo Baebeleng.

Setlhabelo le Loso lwa ga Jeso Keresete

Le ntswa Mmoloki a tshedile botshelo jo bo itekanetseng, bangwe ba ikutlwa ba tshosediwa ke tlhotlheletso ya Gagwe kgotsa ba ne ba le bogale jaaka a ne a supa boitimokanyi jwa bone. Ba ne ba loga leano la gore Jeso a bolawe.

Bosigo jwa pele a bapolwa, Jeso Keresete o ne a ya kwa Tshimong ya Gethesemane, kwa a bogileng botlhoko le bolwetsi jwa mongwe le mongwe wa bana ba Modimo. Se se mo kgontshitse go tlamela thuso le pholo mo seemong sengwe le sengwe.

O ne a okwa, a tshwarwa, a itewa, sotlwa, le go kokotelwa mo mokgorong. Morago ga malatsi a mararo, O ne tsoga go tshela gape, a fenya loso le sebe. Lentswa loso lwa ga Jeso Keresete le ne le le botlhoko le gone le sa siama, setlhabelo sa Gagwe sa legodimo se dirile kgonagalo ya mongwe le mongwe wa rona go itshwarelwa le go tsoga mo baswing.

Re Ka Itshwarelwa Ka Tetlanyo ya ga Keresete

Fa Jeso Keresete a boga mo Tshimong ya Gethesemane le mo mokgorong, O ne a itseela mo go ene dibe tsa rona. O ne a duela tlhwatlha ya tshiamo gore mongwe le mongwe wa rona o ka amogela mautlwelobotlhoko. Fa re ikwatlhaya ka tlhwaafalo, re ka itshwarelwa.

Re Ka Tshela Gape Ka Tsogo

Jeso Keresete o ne a tsoga go tswa mo baswing mo letsatsing la boraro morago ga Papolo ya Gagwe. Ka ntlha ya Ene, mongwe le mongwe wa rona le gone o ka tsoga le go tshela gape. Re ka tshela le Modimo le bao re ba ratang mo mmeleng o o itekanetseng, o gololesegile mo bolwetsing, khutsafalo, le botlhoko.

Mmoloki o a kgathala ka ga wena le go go tlhaloganya. O ikutlwetse bokete jwa diteko tse di thata mme o bogetse dibe tsa gago. O go laletsa go Mo sala morago le go bona kagiso.