Ngaahi Fehuʻi Angamaheni fekauʻaki mo e Lotú
ʻE pau nai ke u kau?
ʻOku talitali lelei ʻa e kau ʻaʻahí ke nau kau mai, ka ʻoku ʻikai ko ha meʻa pau ia. ʻI he taimi ʻoku tufaki ai ʻa e mā mo e vai ʻo e sākalamēnití (meimei tatau mo e Taliʻeikí) ki he haʻofangá, kapau ʻoku ʻikai ke ke ongoʻi fiemālie ke maʻu ia, paasi pē ʻa e laulaú ki he tokotaha hokó. Makehe mei aí, ongoʻi tauʻatāina ke nofo fiemālie pē ʻo vakai ki he meʻa ʻoku faí.
ʻE lava nai ke u kau atu kapau ʻoku ʻikai ko ha mēmipa au?
ʻIo! ʻOku fakaafeʻi koe ke tau kau fakataha ʻi he ngaahi ʻekitivitī fakauiké, ngaahi meʻa fakasōsialé, ngaahi ngāue tokoní, mo e ngaahi houalotu ʻi he lotú. Te mau fiefia ke maheni mo koe pea te mau houngaʻia ʻi hoʻo kau ki he ngaahi meʻa ʻi he koló.
Ko e hā e vala ʻoku totonu ke u tuí?
ʻOku talitali lelei koe ke ke haʻu pē ʻi ho tuʻunga lolotongá. Kapau ʻokú ke hohaʻa te ke hā makehe, ʻoku mau feinga ke tui ha vala ʻoku lelei ange ʻi homau vala ʻi he toenga ʻo e uiké, ke fakahaaʻi ʻemau ʻapasia ki he ʻOtuá. Ko e teunga angamaheni taha te ke sio ki ai ʻi he lotú ko ha sote mo e hēkesi maʻá e houʻeiki tangatá mo ha piva pe kofu maʻá e houʻeiki fafiné.
Ko e hā hono fuoloa ʻo e ngaahi houalotu ʻa e Siasí?
ʻOku muimui e ngaahi haʻofanga lotu ʻi he funga ʻo e māmaní ki ha sīpinga tatau ʻo e houa ʻe ua ki he ngaahi houalotu ʻi he Sāpaté. ʻOku ʻi ai ha fakataha ʻe ua, pea ko e fakataha takitaha ʻoku houa ʻe taha.
Lolotonga ʻa e meʻa ʻoku mau ui ko e “houalotu sākalamēnití,” ʻoku fakataha kotoa ai ʻa e kāingalotu ʻo e haʻofangá. ʻOku kau ʻi he fakatahaʻanga ko ʻení ha ngaahi hiva, lotu, mo ha ngaahi malanga (pe “ngaahi lea”) ʻoku fai ʻe ha kāingalotu kehekehe ʻo e haʻofangá ‘i he uike takitaha. Ka ko e konga mahuʻinga taha ʻo e fakatahá ʻa e taimi ʻoku mau maʻu ai ʻa e sākalamēnití (ʻa ia ʻoku mei tatau mo e taliʻeikí) ke fakamanatua ʻa e Fakamoʻuí.
Makehe mei he houalotu sākalamēnití, ʻoku fakaafeʻi ʻa e kakaí ke nau nofo ʻi ha houa hono ua ʻo e akó ʻi ha feituʻu siʻisiʻi ange ʻi ha ngaahi kalasi ki he kakai tangatá, houʻeiki fafiné, toʻu tupú, mo e fānaú.
Ko e hā ʻa e uooti pe kolo?
Ko e ngaahi uōtí mo e koló ko ha ngaahi kulupu ia ʻo ha kāingalotu ʻo e Siasí ʻoku nofo ʻi ha ʻēlia fakasiokālafi pau. Te ke lava ʻo fakakaungāmeʻa ʻi ha uooti, ongoʻi ʻokú ke kau ki ai, mo fengāueʻaki mo e niʻihi kehe ʻi homou koló. Fakatatau mo e feituʻu ʻokú ke nofo aí, ʻe lava ke kehekehe pē ʻa e ngaahi uooti mo e ngaahi kolo ʻoku ʻi aí.
Ngaahi uooti angamahení
ʻOku talitali lelei ha taha pē ke kau ki ha haʻofanga lotu angamaheni. ʻI ha haʻofanga lotu angamaheni, ʻoku ngāue fakataha ai ʻa e kakai ʻo e toʻu kotoa pē ʻi he kolo ʻo e Siasí. ʻOku lotu fakataha ʻa e ngaahi fāmilí, kau taautaha lalahí, fānaú, uitoú, mo e ngaahi hoa mali kei talavoú ʻi he fakatahaʻanga tatau pē.
Ngaahi uooti lea fakafonuá
ʻI ha ngaahi feituʻu ʻe niʻihi, mahalo te ke fakatokangaʻi ʻoku ʻi ai ha ngaahi uooti pe kolo ʻoku lisi atu mo ha lea fakafonua ʻi he tafaʻakí. Ko e ngaahi haʻofanga lotu ʻeni ʻoku nau fakahoko ha ngaahi fakataha ʻi ha lea fakafonua kehe mei he lea fakafonua angamaheni taha ʻo e feituʻu ʻokú ke fekumi aí.
Ngaahi Uooti ʻo e Kau Taautaha Lalahi kei Talavoú
Ko e ngaahi uooti kau taautaha lalahi kei talavoú ʻoku maʻá e niʻihi fakafoʻituitui teʻeki mali ia ʻoku taʻu 18-35. ʻOku faʻa maʻu ʻa e ngaahi haʻofanga lotu ko ʻení ʻo ofi ki he ngaahi ʻapiako ako māʻolunga angé pea ʻoku fakahoko ai ha ngaahi ʻekitivitī ʻi he lolotonga ʻo e uiké makehe mei he ngaahi houalotu ʻo e Sāpaté.
Ngaahi Uooti ʻa e Kau Taautaha Lalahí
Ko e ngaahi haʻofanga lotu kakai lalahi tāutahá ʻoku maʻá e niʻihi fakafoʻituitui ʻikai mali ʻoku taʻu 36-45. ʻOku tokoni ʻa e ngaahi haʻofanga lotu ko ʻení ke lotu mo ngāue fakataha ʻa e kakai ʻoku nau ʻi ha tūkunga tatau mo ha fiemaʻu tataú.
ʻE lava nai ke u vakai ki ha mape mo e ngaahi faiʻanga Lotu kotoa pē?
ʻIo. ʻOku fakaʻaongaʻi ʻe he The Meetinghouse Locator ha mape ke fakahaaʻi kotoa e ngaahi taimi mo e feituʻu te ke lava ʻo lotu ai ʻi he māmaní.