Mo Tina o Fanau Laiti
O Le Auala na Fesoasoani ai le Taotoga o le Taliga o Lo’u Atalii ia te A’u e Faafailele Ai Lana Sootaga i le Atua
Sa ou lagonaina le aoaoina o a’u e lo’u Faaola ia iloa o Ia e pule ma tausia lo’u atalii.
Ina ua asiasi atu Iesu Keriso i sa Nifae ina ua mavae Lona Toetu, “sa oo ina poloai mai o ia ia avatu a latou fanau laiti.
“… Ma sa soso ese le motu o tagata seia oo ina aumai i latou uma ia te ia” (3 Nifae 17:11–12; faaopoopo le faamamafa).
O le asō, e faapefea ona tatou “soso ese” ma aumai e oo lava i o tatou tamaiti laiti ia te Ia? Sei ou faasoa atu se tala na fesoasoani ou te malamalama ai i le ala e mafai ai ona ou faia lenei mea i ona po nei.
I le avea ai ma se pepe ma se tamaitiiti laitiiti, sa tele ni taotoga a lo’u atalii laitiiti e tuu i ai faagaau e aveesea mai ai vai mai ona taliga. E oo atu i le taimi ua fa ona tausaga, e tasi le taliga sa le’i lelei, ma ua malo le vai. O le taotoga e tasi mulimuli o le a iloa ai pe o le a le toe mafai ai ona toe lagona se mea i lena taliga.
O le iloaina sa ma manaomia se fesoasoani faalelagi, sa amata ai ona ma aoaoina ma lo’u toalua le ma atalii ma le loto i ai e uiga i le mana o le Atua na tuuina mai e ala i faamanuiaga faaleperisitua, tatalo, ma le faatuatua, a o saili foi ma le filiga lena mana mo ia. Sa sili atu le tuga o le taotoga nai lo isi. A o ala a’e o ia, ma tagi ma luluti i le tiga, na te le’i faatagaina a’u e opo—pe pa’i foi—ia te ia. Sa ou le mautonu! Ae e lei umi ae toe malosi o ia, ma sa ma o i le fale e faatali e vaai pe o le a faamaloloina lelei lona taliga.
Mo ni vaiaso, sa tatalo lo ma atalii i tatalouma ina ia faamaloloina lona taliga. Sa tatalo ma tatalo lo matou aiga, ae o taimi uma lava sa ia tatalo ai mo ia lava, sa sili atu ona ou lagonaina le filemu. Sa amata ona ia teufatuina i le sailia o se faamanuiaga mai lona Tama oi le Lagi.
Sa ou lagonaina le aoaoina o a’u e lo’u Faaola ia iloa o ia e pule ma tausia lo’u atalii. O le mea e sili ona taua, sa ou vaaia ua amata foi ona malamalama lo’u atalii. Sa foliga mai na ia iloa, e oo lava i lona talavou, sa faatasi le Atua ma ia. Sa mafai ona ou iloa sa ia lagonaina se fesootaiga patino. Sa ou lagonaina le filemu. Po o le a lava le taunuuga, o le a faatasi le Tama Faalelagi ma Iesu Keriso ma ia ma faamalosia o ia—ma lo matou aiga—e taulima soo se mea sa manaomia mai ia te ia.
Taitaiina Atu o i Latou i le Tama Faalelagi ma Iesu Keriso.
O lenei aafiaga na tatalaina ai ni vaaiga taua se lua.
Muamua, sa manaomia ona ou faalagolago i le Tama Faalelagi ma Iesu Keriso ma lo La’ua atamai ma le alofa mo lo’u atalii.
E tetee atu i soo se tulaga o lo’u loto faatinā e aua nei puipuia, faaleleia, ma laveai la’u fanau mai a latou taua. Ae o nisi taimi, o le alofa ma le taitaiina atu o i latou i lo latou Tama Faalelagi ma lo latou Faaola a o latou tauina a latou taua o le mea lea e sili ona faamanuiaina ai i latou.
E i ai so latou Tama Faalelagi alofa o loo i ai se fuafuaga atoatoa. Ma o nisi taimi, i Lona atamai ma le alofa, Na te faatagaina ai a tatou fanau ia lagona le tiga, mafatiaga, ma le tuuatoatasi a o latou faatautaia lenei aafiaga faaletino ma avea e faapei o Ia. Sa ou iloaina afai ou te aveesea faigata, e mafai ona ou taofia nisi o avanoa mo le tuputupu ae i le galuega mamalu a le Tama Faalelagi.
Lona lua, sa ou iloaina o se faamanuiaga fiafia le fesoasoani e faafailele le sootaga a a tatou fanau ia Iesu Keriso ma le Tama Faalelagi a o lei lava lo latou matutua e osia ai feagaiga ma i La’ua.
Faamumuina le Afi
Na saunoa Elder Neil L. Andersen o le Korama a Aposetolo e Toasefululua, “O la tatou lu’i i le avea ai ma matua ma faiaoga e le o le fatuina lea o se ute faaleagaga i o latou agaga ae ia faamumuina le afi o lo latou ute faaleagaga ua leva ona mumu i le afi o lo latou faatuatua i le muai olaga.”
E mafai ona tatou faamumuina lena afi o le faatuatua i le tele o auala laiti ma faatauvaa, e aofia ai le aoao atu o mataupu faavae taua e tolu i a tatou fanau:
Tatalo ia Iloa o Loo I Ai le Atua
I le aoaoina o a tatou fanau e avatu le faafetai ma ole atu mo faamanuiaga, e mafai ona tatou mafaufau i le fautuaga faigofie na tuuina mai e Peresitene Susan H. Porter, Peresitene Aoao o le Peraimeri, i tamaiti ia “tatalo ia iloa … ‘Tama Faalelagi, o e i ai moni iina?’”
A o tatou fesoasoani i tamaiti e sasaa atu o latou loto ma faalogo i o latou lagona ma mafaufauga e oo mai i o latou mafaufau, “e mafai ona latou iloa mo i [latou lava] o loo i ai o Ia iina ma e alofa o Ia ia te [i latou].”
Ona mafai lea ona tatou fesoasoani e faafesootai a tatou fanau ia te Ia pe a latou manaomia le fesoasoani i le aoaoina o se mea fou. O le liliu atu o o latou loto talavou ia te Ia e mafai ona avea ma se mamanu masani o le tuputupu ae.
Iloa le Agaga Paia
Pe a tatou vaai ua lagonaina e se tamaitiiti le uunaiga a le Agaga Paia, e mafai ona tatou fesili, “O le a sou lagona? O fea e te manatu e o mai ai na lagona? O le a sou manatu i le mea e finagalo le Tama Faalelagi e te iloa?” E faafuasei lava, ona aoao oe e lau tama e uiga i le Agaga Paia.
Ia Malamalama i le Paia o le Afioga a le Atua
E tusa lava pe laiti tele tamaiti e faitau, e mafai ona latou aoao e ala i lau faataitaiga e paia le afioga a le Atua ma e faamanuiaina i tatou pe a tatou mulimuli i Ana afioga.
Ua ou vaai i tamaiti ua ta’i tolu tausaga o opoina tusitusiga paia ma makaina ma le fiafia ia fuaiupu ma “faitau” a latou lava kopi. E tusa lava pe na faau i lalo upu, sa latou aoaoina e taua le fiafia i le afioga a le Atua!
Taialaina o i Latou ia Lagona Lona Faatasi Mai
E mafai ona e fai atu i lau fanau se fesili ou te fiafia e fai atu i tamaiti i le Peraimeri: “O faapefea ona faamanuiaina oe ona o Iesu Keriso?” Atonu e maofa a latou tali ia te oe.
E mafai e tamaiti ona aoao e faalagolago ia te Ia mo le faamafanafanaga, malosi, ma le malamalama. E mafai ona tatou “soso ese” mo i latou e vaai, lagona, ma iloa Lona mana ma le i ai i o latou olaga talavou.
Sa faamanuiaina lo ma atalii i le faamalologa atoatoa ma le toefuataiga o lana faalogo, ae e tusa lava pe lei i ai o Ia, sa ou aoaoina pea le auala e fesoasoani ai i la’u tama e fesootai atu ia Iesu Keriso ma le Tama Faalelagi.
E ala i auala laiti ma faatauvaa, sa amata ai ona susulu malamalama mai lana ute faaleagaga.