3 Mataupu Faavae o le Talalelei e Fesoasoani e Taiala Oe i Polokalama o Tafaoga Faamasani
Sa i ai se taimi na taumafai ai e faaaoga se polokalama o tafaoga faamasani e sue ai lau soa e faavavau?
O tafaoga faamasani e mafai ona matuai manaia ma malie! Peitai, e mafai foi ona faigata le feiloai atu i se tasi e tutusa ma ou tulaga faatauaina—aemaise lava pe afai e te le nofo latalata i le toatele o tagata O Le Ekalesia a Iesu Keriso o le Au Paia o Aso e Gata Ai (pe atonu foi ua uma ona e iloaina tagata uma i la outou eria). I lo’u tulaga, o le meafaigaluega sili ona faamanuiaina o tafaoga faamasani na fesoasoani ia te au e fesootai ai ma isi o se polokalama.
I le taimi muamua, sa ou le talitonu ma masalosalo o le a ou feiloai i se tasi i le ala lenei. Ma sa luitauina! Sa ou onosaia le tele o le teenaina. Ae sa ou fatuina foi ni fesootaiga anoa.
Ina ua ou alu i se polokalama o tafaoga faamasani, sa taialaina au e nei mataupu faavae e tolu o le talalelei. Afai e te filifili e faaaoga se polokalama o tafaoga faamasani, ou te faamoemoe e mafai foi ona latou taialaina oe!
“Matou te talitonu ia faamaoni.”
O le faamaoni o se uunaiga ofoofogia muamua, ma o se faavae malosi mo se faaipoipoga e faavavau.
Na aoao mai Sister Ann M. Dibb, o le sa avea muamua ma Fesoasoani Lua i le Au Peresitene Aoao o Tamaitai Talavou: “Pe a tatou faamaoni i mea uma, tetele ma laiti, tatou te lagonaina le filemu o le mafaufau ma se lotofuatiaifo manino. E faatamaoaigaina a tatou sootaga aua e faavae i le faatuatuaina. Ma o le faamanuiaga silisili e oo mai i le faamaoni o le mafai lea ona tatou maua le mafutaga ma le Agaga Paia.”
E taua le faamaoni i lau talaaga otooto ma fegalegaleaiga ma isi. O nisi nei o auala e mafai ona e faamaoni ai:
-
Faaali atu ata moni, o loo i ai nei o oe lava.
-
Ia faamaoni e uiga i lou matua.
-
Afai e te le fiafia i se tasi, ia faamaoni nai lo le faalata po o le faatafai ia i latou.
-
Aua le pepelo e uiga i lau aoga, maualuga, ma isi mea faapena. Pe a e faamaoni e uiga ia te oe lava, o le a talisapaia e lau paaga oe ma e mafai ona latou faatuatuaina oe.
“Ua tele lava le taua o agaga i le silafaga a le Atua.”
Ia talanoa faasamasamanoa ma naunau ia faamasani i tagata eseese. E tele naua mea e sili atu ona taua nai lo foliga vaaia faaletino ma le tosina atu i ai. Atonu e iu ina e maua se taimi sili ma se tasi e le masani ona e faamasani i ai. Taulai atu i uiga auaumama faaleagaga, tulaga faatauaina fefaasoaai, ma le auala latou te taulimaina ai oe (ma isi!).
Na saunoa mai Elder Dieter F. Uchtdorf o le Korama a Aposetolo e Toasefululua, “I le fuafuaga o le fiafia a le Atua, e le o tele se mea tatou te sailia mo se tasi e atoatoa ae mo se tagata o loo i ai, i le olaga atoa, e mafai ona tatou auai i taumafaiga e fausia se sootaga alofa, tumau, ma sili atu ona atoatoa.”
Tuu atu i tagata se avanoa. Atonu e tosina atu oe i se tasi e te lei faamoemoeina! E lei fetaui moni lava lo’u toalua ma le uiga tonu o le mea sa ou manatu sa ou manao ai. Sa ou manatu o le a ou faaipoipo i se tagata e fiafia e talatalanoa e pei lava o a’u, ae nai lo lena, sa ou faaipoipo i se tagata matamuli. E talenia Gavin i le onosai, toafimalie, ma e le gaoiā; Na te faapaleniina a’u.
Ia tatala lou mafaufau ma lou loto—e te le iloa lava po o ai o le a lua fesootai.
“Faalagolago i le Agaga lena e taitai ia faia mea lelei.”
E ui ina aoga polokalama o tafaoga faamasani, ae o loo i ai lapataiga mo le saogalemu e mafaufau i ai.
Sa ou alu i ni nai tafaoga faamasani lea na tuua ai au ma le lagona le saogalemu. Sa i ai se taimi sa gaogaoina ai lo’u manava ae ou te le’i alu e tafao, ma sa ou lagona e tatau ona faaleaogaina; peitai, sa ou fefe e faatiga lagona o lau paga, o lea sa ou alu ai lava.
E lei umi ae ua manino mai sa le faaaloalo lenei alii i o’u tapulaa. Sa ia faia ni faamatalaga na ou lagona ai le le toafimalie, ma sa ou moomoo maimau pe ana ou faalogo i le uunaiga na ou mauaina e faaleaoga le tafaoga faamasani.
Afai e te lagona le le saogalemu po o le le toafimalie i soo se tasi, e le afaina le vave alu ese po o le faaleaogaina o le tafaoga. Ia ogatusa ma le Agaga ma ia naunau e mulimuli i faaaliga e te maua.
O nisi nei o auala e mafai ona e faamautinoa ai le saogalemu o lau tafaoga faamasani:
-
Feiloai i se nofoaga faitele nai lo le fai i lau paga e piki oe mai lou fale.
-
Faailoa atu i se tasi le mea o le a e alu i ai ma po o le a le umi o le a e alu ai.
-
Ia i ai se uo e mafai ona e faafesootaia pe afai e te oo i se tulaga matautia.
O le faalagolago i le Agaga e mafai foi ona faauigaina o le iloaina pe tatau ona e faaauauina se mafutaga. E ui e agalelei le mafaufau i lagona o isi, ae e le o se mea atamai le fetuunaia o ou faaaliga faaletagata lava ia ona o le lagona tausalaina.
Manatua: “e fiafia le Alii i taumafaiga.
Afai e te lagona o le faataitaia o se polokalama o tafaoga faamasani o se auala lelei lea mo oe e feiloai ai i tagata, ia iloa o le a eseese aafiaga o tagata uma. Atonu o le a e maua lau soa e faavavau. Pe e mafai foi ona e aoao e faatautaia lelei sootaga ma alu ese mai lou sone toafimalie.
Po o le a lava le mea e tupu, e alofa le Atua ia te oe. E silafia e Ia lou loto. Na saunoa mai Sister Joy D. Jones, o le sa avea muamua ma Peresitene Aoao o le Peraimeri: “E fiafia le Alii i taumafaiga, ma o taumafaiga e aumaia ai taui. Tatou te aoao pea. O loo tatou alualu pea i luma pe a tatou taumafai e mulimuli i le Alii.”
O tafaoga faamasani e ala i polokalama e mafai ona faigata, ae a faaaogaina ma le amiotonu, e mafai ona latou faafesootaia oe ma tagata lelei. O le a oo mai faamanuiaga ia te oe a o e ola ai i nei mataupu faavae o le talalelei ma faia le mea sili e te mafaia e avea ai faapei o Keriso a o e saili mo lau soa e faavavau.