1 Ndien edikem ete enye ɔnɔ mmɔ uyo ete yak mmɔ ewet mme ikɔ emi Ete eke ɔkɔnɔde Malachi, emi enye editiŋde inɔ mmɔ. Ndien edikem ete ke ini ema ekewet mmɔ enye anam mmɔ aŋwaŋa. Ndien emi edi mme ikɔ emi enye eketiŋde ɔnɔ mmɔ, ete: Ntem ke Ete ɔkɔdɔhɔ Malachi—Sese, ami nyɔdɔŋ isuŋutom mi, ndien enye eyebem mi iso ɔkɔdiɔŋ usuŋ, ndien Jehovah emi mbufo eyomde ayabuat mbufo ke temple esie, kpa isuŋutom ediomi, emi mbufo enemde esit ebaŋa, esese, enye eyedi, Jehovah mme Udim ɔdɔhɔ.

2 Edi anie ekeme ndiyɔ usen edidi esie, ndien anie ekeme ndiyɔ ke ini enye owutde idem? Koro enye etiede nte ikaŋ usɔ-gold, ye nte suɔp ɔdiɔŋ-ɔfɔŋ.

3 Ndien enye eyetie nte anditem nyuŋ nnam silver asana; ndien enye ayanam nditɔ Levi esana, onyuŋ ɔdiɔŋ mmɔ nte gold ye silver, man mmɔ ewa uwa enɔ Jehovah ke nnen nnen ido.

4 Ke ini oro ke uwa Judah ye Jerusalem edinem Jehovah esit, nte ke mme usen eset, ye nte ke eyo oko.

5 Ndien ami nyasaŋa ŋkpere mbufo ke ubiereikpe; ndien ami nyɔsɔp ntiense mbaŋa mbia-idiɔŋ, ye mme esin- efibe, ye mbon uŋwɔŋɔ ke nsu, ye mmɔ emi efikde anam-utom ke mme utip esie, ebe-akpa ye eyen-akpa, ye emi esinde esen-owo, inyuŋ ibakke mi, Jehovah mme Udim ɔdɔhɔ.

6 Koro ami ndi Jehovah, ami ŋkpuhɔke; ke ntak oro ikaŋ itaha mbufo nditɔ Jacob.

7 Tɔŋɔ ke eyo mme ete mbufo mbufo emewɔrɔ ekpɔŋ mme edinam mi, inyuŋ inimke mmɔ. Ekabade etiene mi ndien ami nyakabade ntiene mbufo, Jehovah mme Udim ɔdɔhɔ. Edi mbufo ebup ete: Didie ke nnyin idifiak?

8 Nte owo okpotuk Abasi? Edi mbufo emetuk mi. Ndien mbufo edɔhɔ ete: Nnyin ituk fi ke nso? Ke mme ubak kiet ke itie duop ye mme uwa.

9 Esuŋi mbufo ye isuŋi, koro mbufo emetuk mi, kpa ofuri idut emi.

10 Mbufo eda kpukpru mme ubak kiet ke itie duop edi ufɔk ubonoŋkpɔ, man udia odu ke ufɔk mi; ndien edomo mi ke emi ese, Jehovah mme Udim ɔdɔhɔ, mme ami ndiberekede mme window heaven nnɔ mbufo, nyuŋ ŋwaŋa edidiɔŋ nnɔ mbufo tutu ufaŋ ididuhe ndibɔ enye.

11 Ndien ami nyaduat andita ke ntak mbufo, ndien enye idibiatke mbuŋwum iŋwaŋ mbufo; ŋko vine mbufo idiforoke ayara ke ini misimke ke iŋwaŋ, Jehovah mme Udim ɔdɔhɔ.

12 Ndien kpukpru mme idut eyekot mbufo mbon emi ediɔŋde, koro mbufo edidide isɔŋ inemesit.

13 Mme ikɔ mbufo edi mkpɔsɔŋ ye ami, Jehovah mme Udim ɔdɔhɔ. Edi mbufo edɔhɔ ete: Nso ke nnyin itiŋ idian fi.

14 Mbufo emedɔhɔ ete: Edi ikpikpu ndinam ŋkpɔ nnɔ Abasi, ndien nso idi udori ete ke nnyin iminim mme edinam esie inyuŋ isaŋa mfuhɔ-mfuhɔ ke iso Jehovah mme Udim?

15 Ndien idahaemi nnyin ibat ite ke ɔfɔn ye mme ataŋidem; iŋ, ke mme anam ibak eforo; iŋ, ite ke mmɔ emi edomode Abasi ke akpanikɔ ke enam ebɔhɔ.

16 Ndien mmɔ emi ebakde Jehovah etiŋ ye kiet eken, ndien Jehovah akpaŋutɔŋ onyuŋ okop mmɔ; ndien ema ewet ŋwed editi ke iso esie enɔ mmɔ emi ekebakde Jehovah, ye emi ekekerede ebaŋa enyiŋ esie.

17 Ndien mmɔ eyedi okim, Jehovah mme Udim ɔdɔhɔ, ke usen oro emi ami nditaŋde nsɔŋ-urua itiat mi; ndien ami nyatua mmɔ mbɔm nte edenowo atuade eyen esie emi anamde utom ɔnɔ enye mbɔm.

18 Ke ini oro ke mbufo edikabade inyuŋ ifiɔk nte nnennen owo asaŋade isio ye idiɔk owo, enye emi anamde utom Abasi ye enye emi minamke utom Abasi esaŋade isio.