1 Ndien ke akpanikɔ ke ami ndɔhɔ mbufo, ke ami menɔ mbufo idiɔŋɔ, man mbufo efiɔk ini emi mme ŋkpɔ emi edida itie—nte ke ami nyebok, nto ke anyan edisuana, ikɔt mi, O ufɔk Israel, ndien nyafiak nsiak ke otu mmɔ Zion mi;

2 Ndien esese, emi edi ŋkpɔ emi ndinɔde mbufo nte idiɔŋɔ—koro ke akpanikɔ ke ami ndɔhɔ mbufo nte ke ini mme ŋkpɔ emi ami ndɔhɔde mbufo, ye emi ami ndidɔhɔde mbufo ke ini emi amakebe mbaŋa idem mi, ndien ke odudu Edisana Spirit emi Ete edinɔde mbufo, eyenam mme Gentile efiɔk man mmɔ efiɔk kabaŋa mbon emi emi edide nsuhɔ ufɔk Jacob, ye kabaŋa ikɔt mi emi emi mmɔ edisuande;

3 Ke akpanikɔ, ke akpanikɔ, ami ndɔhɔ mbufo, ke ini Ete edinamde mmɔ efiɔk mme ŋkpɔ emi, edinyuŋ itode Ete idi, oto mmɔ esim mbufo;

4 Koro edi ifiɔk ke Ete ete yak esiak mmɔ ke isɔŋ emi, enyuŋ esiak mmɔ nte mbon emi ebɔhɔde eto ke odudu Ete, man mme ŋkpɔ emi edi eto mmɔ edisim nsuhɔ ubon mbufo, man ediomi Ete osu emi enye okodiomide ye ikɔt esie, O ufɔk Israel;

5 Ke ntak oro, ke ini mme utom emi ye mme utom emi edinamde ke otu mbufo ke emi amakebe editode mme Gentile idi, inɔ ubon mbufo emi editahade ke unana edinim ke ntak ukwaŋ-ŋkpɔ;

6 Koro ntem ke Ete aduak ete enye oto mme Gentile edi, man enye owut mme Gentile odudu esie, ke ntak emi man mme Gentiles, edieke mmɔ midisɔŋke esit mmɔ, man mmɔ ekabade esit enyuŋ etiene mi enyuŋ ena uduɔkmmɔŋ ke enyiŋ mi enyuŋ efiɔk mme akpan ibuot ukpep-ŋkpɔ mi, man ebat mmɔ esin ke otu ikɔt mi, O ufɔk Israel;

7 Ndien ke ini mme ŋkpɔ emi editibede man ubon fo etɔŋɔ ndifiɔk mme ŋkpɔ emi—enye eyedi idiɔŋɔ ɔnɔ mmɔ, man mmɔ efiɔk ete ke utom Ete ama ɔtɔtɔŋɔ abaŋa ediomi ndisu emi enye akanamde ɔnɔ mme owo emi edide eke ufɔk Israel.

8 Ndien ke ini usen oro edidide, eyedikem ete ke ndidem eyekibi inua mmɔ; koro se owo mikitiŋke inɔ mmɔ ke mmɔ edikut; ndien se mmɔ mikikopke ke mmɔ edikere.

9 Koro ke usen oro, ke ntak mi ke Ete edinam utom, emi edidide akamba ye utibe utom ke otu mmɔ; ndien mmɔ eyedu ke otu mbon emi midibuɔtkeidem ke enye, okposuk edi ke edenowo editiŋ inɔ mmɔ.

10 Edi esese, uwem asaŋutom mi oyodu mi ke ubɔk; ke ntak oro mmɔ idinamke enye ɔdɔŋɔ, okposuk edi ke enye eyeyene ndo ke ntak mmɔ. Edi ami nyɔkɔk enye, koro ami nyowut mmɔ nte ke ifiɔk mi okpon akan ŋkari satan.

11 Ke ntak oro eyedikem ete ke owo ekededi emi midibuɔtkeidem ke mme ikɔ mi, emi ami ndide Jesus Christ, emi Ete edinamde enye ada ɔsɔk mme Gentile, ndien eyenɔ enye odudu man enye akpada mmɔ ɔsɔk mme Gentile, (eyenam kpa nte Moses eketiŋde) eyesibe mmɔ esio ke otu ikɔt mi emi edide eke ediomi.

12 Ndien ikɔt mi emi edide nsuhɔ Jacob eyedu ke otu mme Gentile, iŋ, ke ufɔt mmɔ nte lion odude ke otu mme unam ikɔt, nte eyen lion odude ke otu udim erɔŋ, emi, edieke enye asaŋade ebe mbiba edighi enyuŋ awak enye ke mbai, ndien owo ndomo kiet ikemeke ndinam mmɔ ebɔhɔ.

13 Ubɔk mmɔ eyemenede abaŋa mme asua mmɔ, ndien eyesibe kpukpru mme asua mmɔ esio.

14 Iŋ, ɔyɔdɔdiɔk ɔnɔ mme Gentile ibɔhɔke mmɔ ekabade esit; koro eyedikem ke usen oro, Ete ɔdɔhɔ, ete ami nyesibe mme enaŋ mbakara mbufo nsio ke otu mbufo, ndien ami nyesobo mme chariot mbufo;

15 Ndien ami nyesibe mme obio nsio ke isɔŋ mbufo, nyuŋ ŋwuri kpukpru mme mkpɔsɔŋ ebiet mbufo;

16 Ndien ami nyesibe mme ifɔt nsio ke isɔŋ mbufo, ndien mbufo idinyeneke mme ebre idiɔŋ aba;

17 Mme ndisɔi mbiet ŋkpɔ mbufo ami nyesibe nsio, ye mme mbiet ŋkpɔ mbufo emi edadeda nsio ke otu mbufo, ndien mbufo idikponoke mme utom ubɔk mbufo aba;

18 Ndien ami nyewupede mme ɔtɔwɔk mbufo ke otu mbufo mfep; kpa ntre ŋko ami nyesobo mme obio mbufo.

19 Ndien eyedikem ete ke kpukpru mme nsu, ye mme abiaŋa, ye mme ufip, ye mme eŋwan, ye mme ŋkari oku, ye mme use, ke eyemen efep.

20 Koro eyedikem, Ete ɔdɔhɔ, ete ke usen oro owo ekededi emi midikabakede esit inyuŋ itiene Edima Eyen mi, mmɔ ke ami ndisibe nsio ke otu ikɔt mi, O ufɔk Israel;

21 Ndien ami nyesio mmɔ usiene ye ifuresit, kpa nte mme okpono ndem, utɔ nte mmɔ mikopke.

22 Edi edieke mmɔ edikabade esit inyuŋ ikpaŋutɔŋ inɔ mme ikɔ mi, inyuŋ isɔŋke esit mmɔ, ami nyasiak ufɔk Abasi mi ke ufɔt mmɔ, ndien mmɔ eyediduk ke ediomi enyuŋ ebat mmɔ esin ke nsuhɔ Jacob emi, emi ami nnɔde isɔŋ emi nte inyene mmɔ;

23 Ndien mmɔ eyeŋwam ikɔt mi, nsuhɔ Jacob, ndien ŋko kpa nte ediwak eke ufɔk Israel emi edidide, man mmɔ ekpebɔp obio, emi edikotde Obufa Jerusalem.

24 Ndien ke ini oro ke mmɔ ediŋwam ikɔt mi man ebok mmɔ ɔtɔ kiet, emi esuanade ke ofuri iso isɔŋ, edɔŋ ke Obufa Jerusalem.

25 Ndien ke ini oro ke odudu heaven edisuhɔde idi ke otu mmɔ; ndien ami ŋko nyodu ke otu mmɔ.

26 Ndien ke ini oro ke utom Ete editɔŋɔ ke usen oro, kpa ke ini emi edikwɔrɔde gospel emi ke otu nsuhɔ mbon emi. Ke akpanikɔ ke ami ndɔhɔ mbufo, ke usen oro ke utom Ete editɔŋɔ ke otu kpukpru ikɔt mi emi ekesuande, iŋ, kpa mme esien emi ekesopde, emi Ete akadade ɔwɔrɔ ke Jerusalem.

27 Iŋ, utom ɔyɔtɔŋɔ ke otu kpukpru ikɔt mi emi ekesuande, ye Ete nditim usuŋ emi mmɔ edidide itiene mi, man mmɔ ekot Ete ke enyiŋ mi.

28 Iŋ, ndien ke ini oro ke utom editɔŋɔ, ye Ete ke otu kpukpru idut ke nditim usuŋ emi edifiakde inam ikɔt esie enyɔŋ ufɔk ke isɔŋ inyene mmɔ.

29 Ndien mmɔ eyewɔrɔ ke ofuri idut; ndien mmɔ idiwɔrɔke ke ibumede, mme ke itɔk, koro ami nyebem mmɔ iso, Ete ɔdɔhɔ, nyenyuŋ nsaŋa mmɔ ke edem.