E Faatatau i Lenei Aotelega: O Viiga—Mo Le Aiga ma le Ekalesia

Na fetalai mai le Alii e faapea, “Aua e fiafia lo’u agaga i le pese a le loto; ioe, o le pese a e amiotonu o se tatalo mai ia te a’u, ma o le a talia ma se faamanuiaga i luga o o latou ulu” (Mataupu Faavae ma Feagaiga 25:12). E mafai e musika paia ona aumaia le olioli, mafanafana, ma musumusuga. O le pepese faatasi e mafai ona tuufaasia ai o tatou aiga ma faapotopotoga i le faatuatua ma le tapuaiga.

A o le’i lolomi ma faasalaluina le tusi viiga fou i le lalolagi atoa, O Viiga—Mo Le Aiga ma le Ekalesia, matou te fiafia e faalauiloa atu faaeletonika ia vaega laiti o viiga fou. O le a faalauiloa atu se vaega fou o viiga i nai masina uma seia oo lava ina maua le aotelega atoa i tusilolomi. O le a filifilia musika fou mai viiga na fatuina e le Au Paia o Aso e Gata Ai, o viiga mai agaifanua faaKerisiano, ma pese o i le potutusi o musika paia a le Ekalesia i le lalolagi atoa. O nei pese filifilia o le a aofia ai viiga ma pese a tamaiti, o nei pese uma e mafai ona faaaoga i le fale, i sauniga faamanatuga, ma isi sauniga a le Ekalesia.

Matou te valaaulia outou ina ia faamasani i musika fou a o faalauiloa atu. Faaaoga nei pese filifilia i a outou tapuaiga i aso taitasi ma suesuega o le talalelei ma aoaoga, e le gata i le aiga ae o le lotu. O lautusi o musika ma pu’ega faalogologo e mafai ona maua i polokalama Potutusi a le Talalelei [Gospel Library] o Musika Paia ma i le music.ChurchofJesusChrist.org. O loo maua foi anomea e fai ai aoaoga e fesoasoani ai i tagata ma taitai o le ekalesia e faaaoga musika fou i o latou aiga ma faapotopotoga.

Matou te faafetai atu i le toatele o le au paia o e na saofaga o latou taimi, taleni, ma le malosi i lenei aotelega o musika paia. Ia faamanuiaina i tatou uma e le Alii a o tatou ofoina atu ia te Ia pese a o tatou loto e ala i musika paia.

5:10

2:14

3:21