Aisea e Tatau ai Pea Ona Ou Tauivi Pe a o Faigata Tele le Olaga?

O le olaga faaletino o se meaalofa taua mai le Atua—o se meaalofa e ao ona faatauaina ma puipuia (tagai i le Mataupu Faavae ma Feagaiga 18:10). Ua tuuina atu ia te oe aafiaga i le olaga faaletino e fesoasoani ia te oe e aoao ai ma fesoasoani ia te oe e faalagolago ai i lou Tama Faalelagi ma Lona Alo, o Iesu Keriso.

Na faamanatu mai e Elder Jeffrey R. Holland ia i tatou: “Po o a lava ou luitau, o’u uso e ma tuafafine—faalemafaufau pe faalelagona pe faaletino po o le a lava—aua e te filifili e faasaga i le taua tele o le ola e ala i le faamutaina! Faalagolago i le Atua. Taofimau i Lona alofa. Ia iloa o le a i ai le aso e susulu mai ai se malamalama ma mou atu ai le pogisa o tiga faaletino” (“Peiseai o se Ipu ua Nutililii,” Liahona, Nov. 2013, 42).

Na aoao mai Elder Orson F. Whitney: “E leai se tiga tatou te mafatia ai, leai se tofotofoga tatou te oo i ai e maimau. E aoga mo lo tatou a’otauina, i le atinaega o na uiga auaumama e pei o le onosai, faatuatua, lototoa ma le lotomaulalo. O mea uma tatou te mafatia ai, ma mea uma tatou te onosaia, ae maise lava pe a tatou onosaia ma le faapalepale, e atiina ae ai o tatou tagata, faamama ai o tatou loto, faalautele ai o tatou agaga, ma faia ai i tatou ia sili atu ona agamalu ma agaalofa, ma sili atu ona agavaa e ta’ua o fanau a le Atua … ma e ala mai i faanoanoaga ma mafatiaga, o le galulue punouai ma puapuaga, tatou te maua ai le aoaoina lea ua tatou o mai ai iinei ina ia maua, ma o le a faapea ona avea atili ai i tatou e pei o lo tatou Tama ma Tina oi le lagi” (sii mai i Aoaoga a Peresitene o le Ekalesia: Spencer W. Kimball [2006], 16).

Afai ua lagona le lofituina o ou luitau, saili se fesoasoani. E manaomia e tagata uma se fesoasoani mai isi, po o le a lava lo latou faatuatua. Na manaomia e Iesu le faamafanafanaga ma le malosiaga mai Lona Tama. E mafai e le Alii ona faamalosi ia te oe ma auina atu isi e fesoasoani ma faamafanafana ia te oe (tagai i le Mosaea 18:8; 24:15). Saili se fesoasoani faapolofesa pe talanoa i lou epikopo po o se isi tagata e te talitonuina. Saili se faamanuiaga faaleperisitua. Tatalo mo se fesoasoani, ma talitonu o le a e mauaina. E le’i faagaloina oe e le Atua.