Training para sa Paggamit at Pag-akma ng Kurikulum ng Seminary

Nakasaad sa Layunin ng Seminaries and Institutes of Religion na “[tutulungan natin] ang mga kabataan at young adult na mapalalim ang kanilang pagbabalik-loob kay Jesucristo at sa Kanyang ipinanumbalik na ebanghelyo.” Ang layunin ay nagpatuloy sa pagsasabi ng sumusunod tungkol sa pagtulong sa mga estudyante na palalimin ang pagbabalik-loob:

Itinutuon natin ang bawat karanasan sa pagkatuto kay Jesucristo at sa Kanyang halimbawa, mga katangian, at kapangyarihang tumubos. Tinutulungan natin ang mga estudyante na matutuhan ang ipinanumbalik na ebanghelyo ni Jesucristo ayon sa nakasaad sa mga banal na kasulatan at mga salita ng mga propeta. Tinutulungan natin ang mga estudyante na magawa ang kanilang responsibilidad sa pag-aaral para sa kanilang sarili. Pinagsisikapan nating anyayahan ang Espiritu Santo na gawin ang Kanyang tungkulin sa bawat karanasan sa pagkatuto.

Ang kurikulum ng seminary ay maingat na ginawa at binuo upang matulungan kang magbigay ng ganitong uri ng karanasan sa pagkatuto. Ang bawat lesson ay itinutuon ang karanasan sa pagkatuto kay Jesucristo, tumutulong sa mga estudyante na matutuhan ang ebanghelyo mula sa mga banal na kasulatan at mga salita ng mga propeta, at nagbibigay ng mga pagkakataon para magawa ng mga estudyante ang kanilang responsibilidad sa karanasan sa pagkatuto. Sa pagsasama-sama ng tatlong mahahalagang elementong ito ng layunin nang may pagmamahal sa mga tinuturuan natin, inaanyayahan natin ang Espiritu Santo na gawin ang Kanyang tungkulin sa karanasan sa pagkatuto. Binigyang-diin sa Pagtuturo sa Paraan ng Tagapagligtas na “Ang Espiritu ang tunay na guro at ang tunay na pinagmumulan ng pagbabalik-loob.” Tanging sa pagtuturo natin sa pamamagitan ng Espiritu tunay na magaganap ang pagpapalalim ng pagbabalik-loob sa Tagapagligtas.

Ang kurikulum ng seminary ay maingat na nirebyu at pinag-ugnay-ugnay upang matulungan kang:

• Tiyakin ang katumpakan ng doktrina.

• Pagnilayan ang layunin ng inspiradong awtor.

• Panatilihin ang balanseng paraan sa pagpapakita ng mga alituntunin ng pagtuturo na katulad ng kay Cristo na matatagpuan sa Pagtuturo sa Paraan ng Tagapagligtas.

• Magbigay ng mga karanasan sa pagkatuto upang maibahagi at maipakita ng mga estudyante ang natututuhan nila.

• Gumamit ng iba’t ibang pamamaraan sa pagtuturo.

Maraming mahahalagang bagay na dapat tandaan habang naghahanda ng lesson. Ang paggamit ng kurikulum ay makatutulong na magabayan ka sa kung ano ang ituturo at kung paano magturo. Makatutulong din ito sa iyo para manatli ka sa matibay na pundasyon ng doktrina.

Narito ang ilang paraan kung paano mo gagamitin ang kurikulum:

• Basahing mabuti ang layunin para sa lesson. Matatagpuan ito sa buod ng dokumento at sa huling pangungusap ng pambungad sa bawat lesson. Ang lahat ng nilalaman at aktibidad ay nakaayon sa layuning ito o resulta ng pagkatuto.

• Basahin ang buong lesson. Pag-isipan kung paano nakaayon ang mga piniling banal na kasulatan na babasahin ng mga estudyante, mga katotohanang binigyang-diin, mga sipi, at aktibidad sa layunin ng lesson at kung paano nakatuon ang mga ito kay Jesucristo, nagtuturo ng doktrina, at nag-aanyaya ng masigasig na pag-aaral. Pagtuunan nang mabuti ang aktibidad sa pagkatuto bago matapos ang lesson, na nagbibigay ng pagkakataon sa mga estudyante na ipakita ang layunin ng lesson.

• Isiping sagutin ang mga tanong at gawin ang mga aktibidad na parang ikaw ang estudyante. Makakatulong ito sa iyo na matuto sa pamamagitan ng Espiritu at pumasok sa silid-aralan na napatibay, napasigla, at mas handang magbigay ng gayon ding karanasan sa iyong mga estudyante.

• Sikaping maunawaan at ituro ang lahat ng uri ng mga lesson na matatagpuan sa kurikulum, kahit na bago sa iyo ang mga ito. (Kabilang sa mga uri ng lesson ang mga lesson sa Kurso ng mga Banal na Kasulatan, mga lesson sa Pagsasanay sa Doctrinal Mastery, mga lesson sa I-assess ang Iyong Pagkatuto, at mga lesson sa Paghahanda sa Buhay.) Ang bawat isa sa mga karanasan sa pagkatuto na ito ay tumutulong sa natatanging mga paraan upang mapalalim ang pagbabalik-loob ng mga estudyante kay Jesucristo at sa Kanyang ebanghelyo.

Bilang titser sa seminary, may pribilehiyo kang tulungan ang iyong mga estudyante na lumapit kay Jesucristo. Sa pamamagitan ng palagian mong pakikipag-ugnayan sa iyong mga estudyante, makikilala at mamahalin mo sila nang mabuti. Ang pagkilala at pagmamahal sa iyong mga estudyante ay magpapalakas sa iyong kakayahan na tumanggap ng inspirasyon mula sa Espiritu Santo kung kailan at paano gumawa ng mga pag-aakma sa kurikulum. Habang naghahanda ka ng mga lesson gamit ang kurikulum, simulan sa panalangin ang iyong paghahanda. Bibigyang-inspirasyon ka ng Ama sa Langit sa pamamagitan ng Espiritu Santo sa kung anong mga pag-aakma, kung mayroon man, ang maaari mong gawin sa nilalaman ng lesson upang mas matugunan ang mga pangangailangan at kakayahan ng iyong mga estudyante.

Kabilang sa mga dahilan kung bakit maaari mong iakma ang isang lesson ay:

• Upang matulungan ang mga estudyante sa mga napapanahong isyu at tanong. (Tingnan ang case study ni Brother Jones.)

• Upang gawing mas makabuluhan ang isang bahagi ng lesson batay sa mga pangangailangan, kakayahan, kultura, o mapagkukunang resource ng iyong mga estudyante. (Tingnan ang mga case study nina Sister Dube, Brother Reyes, at Sister Rodriguez.)

• Upang magamit ang mas bagong mga pahayag, tagubilin, o resource na ibinigay ng mga lider ng Simbahan. (Tingnan ang case study ni Sister Schmidt.)

• Upang makahanap ng mas magandang paraan na maisakatuparan ang isang bahagi ng lesson. Maaaring kabilang sa mga halimbawa ang pag-adjust sa object lesson sa paraang inihahanda pa rin ang isipan at puso ng mga estudyante na maturuan o anyayahan ang mga estudyante na isadula ang isang salaysay mula sa mga banal na kasulatan sa halip na manood ng video na naglalarawan ng parehong pangyayari. (Tingnan ang case study ni Brother Li.)

Bago iakma ang kurikulum, isiping tanungin ang sarili na gaya ng sumusunod:

• Ang pag-aakma bang gagawin ko ay nagbibigay pa rin ng karanasan sa pagkatuto na nakatuon kay Jesucristo, nagtuturo ng doktrina, at nag-aanyaya ng masigasig na pag-aaral?

• Ang pag-aakma bang gagawin ko ay naaayon sa mga pahiwatig ng Espiritu Santo at sa mga alituntunin ng pagtuturo na katulad ng kay Cristo na matatagpuan sa Pagtuturo sa Paraan ng Tagapagligtas?

• Ang pag-aakma bang gagawin ko ay nagpapakita ng layunin ng inspiradong may-akda?

• Ang pag-aakma bang ginawa ko ay nakatuon sa mga alituntunin na nagpapabalik-loob?

• Nauunawaan ko ba kung paano makakaapekto ang pag-aakmang ginagawa ko sa susunod na mga lesson at karanasan sa assessment para sa mga estudyante?

Bagama’t maaaring iakma ang alinman sa mga materyal sa kurikulum, inilalarawan ng sumusunod na diagram ang isang hanay kung paano maaaring maging mas angkop na iakma ang iba’t ibang bahagi ng isang lesson kaysa sa iba.

Halimbawa, ang layunin ng lesson, ang konteksto ng isang scripture block, o ang binigyang-diin na katotohanan ay maaaring hindi gaanong angkop na iakma kaysa sa kung paano nagsisimula ang isang lesson o kung anong mga halimbawa ang maaaring ibahagi ng titser tungkol sa isang binigyang-diin na katotohanan. Ang mga bagay na mas malapit sa kaliwang bahagi ay maaaring mas madalas gamitin, samantalang ang mga bagay sa kanang bahagi ay maaaring mas madalas na iakma. Tandaan na ang mga ito ay mga mungkahi. Ang mga titser ay hindi inaasahang iakma ang lahat ng nasa kanang bahagi, tulad ng hindi sila inaasahan na gamitin ang lahat ng nasa kaliwang bahagi.

Gagabayan ka ng Ama sa Langit sa pamamagitan ng Espiritu Santo kapag mapanalangin mong pinag-aralan ang Kanyang salita at pinaghandaan ang mga lesson para pagpalain ang Kanyang mga anak. Matutulungan ka Niya na maunawaan kung paano gamitin ang nakasaad sa kurikulum at kung kailan dapat gumawa ng mga pag-aakma para mas matulungan ang iyong mga estudyante.