“ʻIkai Loto Taha kae ʻIkai ha Fekihiaki,” Ngaahi Taukei Ako Folofolá (2024)
ʻIkai Loto Taha taʻe ʻi ai ha Fekīhiakí
Fakaʻuhingaʻí
Fakaʻaliʻali pea fakamatalaʻi ʻa e lea ko ʻeni ʻa ʻEletā Kuenitini L. Kukí:
ʻOku ilifia pea feʻitangaki ha tokolahi. Neongo e ngaahi ongo ko ʻení, ka ʻoku fiemaʻu ke anga fakamatāpule ʻetau leá mo fakaʻapaʻapa ʻetau fengāueʻakí. Tautautefito ki he taimi ʻoku ʻikai ke tau loto taha aí. Ne ako mai e Fakamoʻuí ke tau ʻofa ʻi hotau ngaahi filí. … ʻOku ou fakaafeʻi ʻa kitautolu ke tau ʻiloʻi ko e founga ko ia ʻoku tau fakahaaʻi ʻaki ʻetau loto kehekehé, ko e meʻafua totonu pē ia ʻo kitautolú pe ʻoku tau muimui moʻoni koā ki he Fakamoʻuí. ʻOku sai pē ke loto kehekehe ka ʻoku ʻikai sai ke taʻe-fie-ʻulu-tukua. … Ka tau fakahaaʻi e ʻofá mo e fakaʻapaʻapá, ʻo aʻu ki he ngaahi tūkunga faingataʻá, te tau hoko ange ai ʻo tatau mo Kalaisi. (Quentin L. Cook, “ʻOku Tau Muimui ʻia Sīsū Kalaisi,” Liahona, Mē 2010, 84–85)
Fakamatalaʻi ange ko ha founga ʻe taha ʻe lava ai ke tau taʻeloto taha taʻe ʻi ai ha fakakikihí ko haʻatau tali ʻi ha founga te ne poupouʻi ʻa e fakaʻapaʻapá kae ʻikai ko e fakakikihí.
Fakatātaaʻi
Fakaʻaliʻali ʻa e saati ko ʻení, pea aleaʻi fakakalasi ʻa e ngaahi faikehekehe ʻi he fakamatala ʻi he ongo kōlomú.
|
Ngaahi Tali ʻOkú Ne Fakaafeʻi ʻa e Fakakikihí |
Ngaahi Tali ʻOkú Ne Fakaafeʻi ʻa e Fakaʻapaʻapá |
|---|---|
Ngaahi Tali ʻOkú Ne Fakaafeʻi ʻa e Fakakikihí ʻOku ʻikai ke u tui tatau mo koe koeʻuhí he ʻoku mahino pē hoʻo fehalākí. | Ngaahi Tali ʻOkú Ne Fakaafeʻi ʻa e Fakaʻapaʻapá Fakamālō atu ʻi hono vahevahe mai hoʻo ngaahi fakakaukaú. Neongo ʻoku kehekehe ʻeta tuí, ka ʻoku ou houngaʻia he ʻokú ta fakatou ongoʻi fiemālie pē he fevahevaheʻakí. … |
Ngaahi Tali ʻOkú Ne Fakaafeʻi ʻa e Fakakikihí ʻOkú ke taʻe-ʻilo. ʻOku ʻikai ke ke ʻilo e meʻa ʻokú ke talanoa ki aí. | Ngaahi Tali ʻOkú Ne Fakaafeʻi ʻa e Fakaʻapaʻapá Te ke lava ʻo tokoni mai ke mahino lelei ange kiate au hoʻo fakakaukau ki he … ? |
Ngaahi Tali ʻOkú Ne Fakaafeʻi ʻa e Fakakikihí ʻOku ou tui ko e moʻoní ē ʻoku ou maʻú pea ʻoku tonu pē ʻa e meʻa ʻoku ou tui ki aí. | Ngaahi Tali ʻOkú Ne Fakaafeʻi ʻa e Fakaʻapaʻapá ʻOku ou fakaʻapaʻapaʻi hoʻo tuí pea ʻoku ou lava ʻo sio ki heʻene mahuʻinga kiate koé. Tuku muʻa ke u vahevahe atu ʻa e ʻuhinga ʻoku mahuʻinga ai kiate au ʻeku tuí. |
Ngaahi Tali ʻOkú Ne Fakaafeʻi ʻa e Fakakikihí Ko ha tokotaha tāufehiʻa koe. | Ngaahi Tali ʻOkú Ne Fakaafeʻi ʻa e Fakaʻapaʻapá ʻOku ʻikai ke u fiemālie ʻi he meʻa naʻá ke toki lea ʻakí. ʻOku tonu nai ʻeku mahinó ko e meʻa ʻeni naʻá ke ʻuhinga ki aí, ke … ? |
Fakaangaanga
Fakaafeʻi ʻa e kau akó ke nau ngāue mo ha hoa pea akoako taufetongi ʻi hono faʻu ha ngaahi tali fakaʻapaʻapa ki he ngaahi tūkunga ko ʻení:
-
ʻOku lau Tohi Molomona ʻa ʻAlofonisō ʻi ha vakapuna. ʻOku fehuʻi ange ʻe he tokotaha ʻi hono tafaʻakí pe ko e hā e meʻa ʻokú ne laú. ʻI he fakamatala ange ʻe ʻAlofonisō fekauʻaki mo e Tohi ʻa Molomoná, ʻoku pehē ange ʻe he tokotahá, “Kuó u fanongo ko e tohi ko iá ko ha faʻu ʻataʻatā pē. Ko e lelei tahá ke nofotaha pē ʻi he Tohi Tapú.” ʻOku tali ange ʻe ʻAlofonisō, …
-
ʻOku talanoa ʻa e kalasi ʻinisititiuti ʻa Sulí fekauʻaki mo e ngaahi fatongia ʻo e houʻeiki tangatá mo fafiné. ʻOku pehē ʻe ha talavou ʻe taha ko Lōkani, ʻi ha leʻo fie-māʻolunga, “Koeʻuhí ʻoku maʻu ʻe he tangatá ʻa e lakanga fakataulaʻeikí, ko ia ʻokú ne aofangatuku e ngaahi meʻa ʻoku hoko ʻi hono ʻapí.” ʻOku ongoʻi ʻe Suli ʻoku filifilimānako mo fakatupu ʻita ʻa e lea ʻa Lōkaní. ʻOkú ne hiki leva hono nimá ʻo pehē ange, …
-
Kuo fakaangaʻi ʻe he kaungā loki ʻo Matá ʻa e ngaahi tuʻunga ʻulungaanga ʻa e Siasí. ʻOku fakatokangaʻi ʻe Mata ʻoku ngali fehangahangai ʻa e fakakaukau ʻa hono kaungā-lokí he ʻoku lahi e ngaahi palopalema ʻa hono kaungā-lokí ʻoku tupu ia mei heʻene ngaahi fili ʻi heʻene tōʻonga moʻuí. ʻI ha ʻaho ʻe taha ʻoku pehē ange ʻe he kaungā-loki ʻo Matá, “ʻOku taʻofi koe ʻe homou siasí ke ʻoua te ke fiefia. ʻOkú ke hangē ha pōpula ki he ngaahi fakakaukau kuo ʻosi hono kuongá.” ʻOku tali ange ʻe Mata, …
Fakaʻosi ʻa e ʻekitivitī ko ʻení ʻaki haʻo kole ki ha toko taha pe toko ua ʻo e kau akó ke nau vahevahe ha meʻa kuo nau ako.
Fakaafe pea Toe Vakaiʻi
Poupouʻi ʻa e kau akó ke nau fakaʻaongaʻi e taukei ko ʻeni ʻo e ʻikai loto taha mo e niʻihi kehé taʻe ʻi ai ha fekihiakí ʻi heʻenau ngaahi fepōtalanoaʻaki fekauʻaki mo e ongoongoleleí. Manatuʻi ke toe vakaiʻi ʻaki hano fakaafeʻi ʻa e kau akó ke nau vahevahe ʻenau ngaahi aʻusiá mo e kalasí. Te ke ala fehuʻi ki he kau akó pe ko e hā ʻa e meʻa naʻe ola leleí mo e meʻa naʻe faingataʻá. Kumi ha ngaahi faingamālie ke hokohoko atu ai hono fakaangaanga ʻa e taukei ko ʻení ʻi he kalasí.