Ko Hono Vahevahe Faingofua mo Mahino ʻa e Ngaahi Moʻoni ʻo e Ongoongoleleí

Fakamatalaʻi ange ko hono akoʻi faingofua mo mahino ʻo e moʻoní ko ha founga mālohi ia ke tali ʻaki e ngaahi fehuʻí mo fakamatalaʻi ʻa e ngaahi meʻa ʻoku hohaʻa ki aí. Fakaʻaliʻali mo lau ʻa e lea ko ʻeni ʻa Palesiteni M. Lāsolo Pālatí:

Ko e kole angamaheni taha ʻoku tau fanongo ki aí ko ha kiʻi meʻa faingofua ʻoku meimei peheni: “Talamai angé ha kiʻi meʻa fekauʻaki mo homou Siasí.” Ko e foʻi lea mahuʻinga hení ko e “kiʻí.” ʻOku ʻikai ke nau pehē mai, “Talamai ʻa e meʻa kotoa pē ʻokú ke ʻiló pea fekauʻi mai mo ha niʻihi kehe ke nau talamai ʻa e toenga ʻo e meʻa kotoa pē.” …

… ʻOku ʻi ai ha fiemaʻu vivili ke ʻi ai ha ngaahi fakamatala mahino mo faingofua ʻoku ʻomi kiate kinautolu ʻoku fieʻilo ki he ngaahi meʻa tefito fekauʻaki mo e Siasí he ʻaho ní. (M. Russell Ballard, “Tuí, Fāmilí, Ngaahi Moʻoní, mo e Ngaahi Fuá,” Liahona, Nōvema 2007, 25)

Te ke lava ʻo vahevahe ha sīpinga ʻe taha pe lahi ange ʻo e ngaahi sīpinga ko ʻeni ʻo e fakamatala faingofua mo mahino ʻo e moʻoni ʻo e ongoongoleleí pe fakaʻaongaʻi ha niʻihi ʻo haʻo ngaahi sīpinga pē ʻaʻau ke fakatātaaʻi ʻaki e taukei ko ʻení.

Ko e hā ʻa e lakanga fakataulaʻeiki? “Ko e lakanga fakataulaʻeikí ko e mafai mo e mālohi ia ʻo e ʻOtuá. Naʻe ʻi ai maʻu pē ia pea ʻe kei ʻi ai maʻu ai pē ʻo ʻikai hano ngataʻanga (vakai, ʻAlamā 13:7–8; Tokāteline mo e Ngaahi Fuakava 84:17–18). ʻOku fakafou ʻi he lakanga fakataulaʻeikí ʻa hono fakahoko ʻe he Tamai Hēvaní ʻa ʻEne ngāué ʻke fakahoko ʻa e moʻui taʻe-faʻa-mate mo e moʻui taʻengata ʻa e tangatá’ (Mōsese 1:39). ʻOku foaki ʻe he ʻOtuá ʻa e mafai mo e mālohi ki Hono ngaahi foha mo e ngaahi ʻofefine ʻi he māmaní ke tokoni ʻi hono fakahoko e ngāué ni” (Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 3.0, ChurchofJesusChrist.org).

Ko e hā ʻa e fakamoʻoni? Ko [e] fakamoʻoní ko ha koloa mātuʻaki mahuʻinga ia, ʻoku faʻa ʻalu fakataha mo ha ngaahi ongo fakalaumālie loloto. ʻOkú te faʻa maʻu fakalongolongo pē e ngaahi ongo ko ʻení pea fakamatalaʻi ko ha ʻkihiʻi leʻo siʻi’ [1 Ngaahi Tuʻi 19:12]. Ko hoʻo tuí ia pe ʻilo ʻo e moʻoní, ʻa ia ʻoku ʻoatu ko ha fakamoʻoni fakalaumālie ʻo fakafou ʻi he ivi tākiekina ʻo e Laumālie Māʻoniʻoní” (Gary E. Stevenson, “Ko Hono Tanumaki mo Vahevahe Hoʻo Fakamoʻoní,” Liahona, Nōvema 2022, 112).

Te u ʻilo fēfē nai kuo fakamolemoleʻi au ʻe he ʻOtuá? “ʻOku talaʻofa mai ʻa e ʻOtuá te Ne fakamolemoleʻi ʻa kinautolu ʻoku fakatomalá. ʻI he taimi ʻokú ke ongoʻi fiemālie ai mei he Laumālié, te ke lava ʻo ʻilo ʻoku ngāue ʻa e mālohi fakalelei ʻo e Fakamoʻuí ʻi hoʻo moʻuí” (Ki Hono Fakamālohia ʻo e Toʻu Tupú: Ko ha Fakahinohino ki hono Fakahoko ha Ngaahi Filí [2022], 8).

Te mou toe lava foki ʻo mamata ʻi he foʻi vitiō “What Happens after We Die?” (1:40), pea kumi ʻa e meʻa ʻokú ne ʻai ʻa e foʻi vitioó ni ko ha tali faingofua mo mahino ki he fehuʻi ko iá. Te ke lava ʻo fakaafeʻi ʻa e kau akó ke nau vahevahe ʻa e meʻa ne nau fakatokangaʻi ʻi heʻenau mamata ʻi he foʻi vitioó.

Te ke lava ʻo faʻu ha fehuʻi mei ha tefito pe akonaki mei he folofolá ke laukonga ʻi he uike ní. Pe te ke lava ʻo fili mei he ngaahi fehuʻi ʻoku ʻoatu ʻi laló. Fakaafeʻi ʻa e kau akó ke nau akoako mo hanau hoa ʻo taufetongi ʻi hono tali mahino mo faingofua ʻa e ngaahi fehuʻí . Poupouʻi ʻa e kau akó ke nau tali ʻa e fehuʻi takitaha ʻi he sekoni pē ʻe 30 ki he 60.

• ʻOku tui nai ʻa e Kau Māʻoniʻoni ʻi he Ngaahi ʻAho Kimui Ní kia Sīsū?

• Ko e hā e ʻuhinga ka u ka fiemaʻu ai ʻa e Tohi ʻa Molomoná, kapau kuó u ʻosi maʻu ʻa e Tohi Tapú?

• ʻOku fakahoko nai ʻe he kāingalotu homou siasí ʻa e mali tokolahí?

• Ko e hā e ʻuhinga ʻoku ou fiemaʻu ai ha tui fakalotu kuo ʻosi fokotuʻutuʻu māú?

• Ko e hā ‘a e Fakalelei ʻa Sīsū Kalaisí?

Te ke lava ʻo fakaafeʻi ha toko taha pe toko ua ʻo e kau akó ke vahevahe ʻa e meʻa ne nau ako ʻi he aʻusia ko ʻení.

ʻI he ngaahi uike ka hokó, fakaafeʻi ʻa e kau akó ke nau fakaangaanga ke vahevahe faingofua mo mahino ʻa e moʻoní. Manatuʻi ke toe vakaiʻi pea tuku ha taimi ʻi hoʻomou fakataha ka hokó ke fakamatala ai ʻa e kau akó ha faʻahinga aʻusia naʻa nau maʻu ʻi hono vahevahe faingofua mo mahino ʻa e ngaahi moʻoni ʻo e ongoongoleleí. Te ke lava foki ʻo fakaafeʻi ke nau vahevahe ha faʻahinga faingataʻa naʻa nau foua.