“Ko e Vahevahe ʻa e Ngaahi Moʻoni ʻo e Ongoongoleleí ʻi he ʻOfa mo e Ongoʻingofuá,” Ngaahi Taukei Ako Folofolá (2024)
Ko Hono Vahevahe ʻa e Ngaahi Moʻoni ʻo e Ongoongoleleí ʻi he ʻOfa mo e Ongoʻingofua
Fakaʻuhingaʻí
Fakakaukau ke vahevahe ʻa e lea ko ʻeni ʻa Palesiteni M. Lāsolo Pālatí:
ʻOku ʻikai fiemaʻu ia ke tau kole fakamolemole koeʻuhí ko ʻetau ngaahi tui fakalotú pe holomui mei he meʻa ʻoku tau ʻiloʻi ʻoku moʻoní. Ka te tau lava ʻo vahevahe ia ʻi he laumālie ʻo e ʻofa mo e mahino. (M. Russell Ballard, “ʻOku Fēfē Ia ʻIate Kitautolu?,” Liahona, Siulai 2000, 33)
Tufa ʻa e laʻipepa tufa ko ʻení, pea lau ʻa e ngaahi tefitoʻi fakahinohino ki he vahevahe ʻa e ngaahi moʻoni ʻo e ongoongoleleí ʻi he ʻofa mo e ongoʻingofuá.
Ko Hono Vahevahe ʻa e Ngaahi Moʻoni ʻo e Ongoongoleleí ʻi he ʻOfa mo e Ongoʻingofua
Akoʻi e moʻoní ʻaki e ʻofa. Neongo ʻoku ʻikai fiemaʻu ke tau kole fakamolemole pe ongoʻi taʻefiemālie ʻi hono vahevahe ʻetau tuí, ka ʻi heʻetau holi ke loto-toʻá, mahalo te tau fetuʻutaki ʻi he taimi ʻe niʻihi ʻi ha ngaahi founga ʻoku taʻe-ʻofa. Te ke ala lotua ha tokoni ke fakafetuʻutaki hoʻo ʻofá ki ha niʻihi kehe ʻi he lolotonga hoʻo vahevahe ʻa e ngaahi moʻoni ʻo e ongoongoleleí. Te ke lava ʻo fehuʻi pē kiate koe, Te u lava fēfē ʻo vahevahe ʻa e foʻi moʻoni ko ʻení ʻaki e manavaʻofa mo e ʻofa?
Fakafanongo ke mahino. Feinga ‘i he faʻa fakakaukau ke mahino ʻa e ngaahi tūkungá mo e ngaahi fakakaukau ʻa e niʻihi kehé. ʻIloʻi te nau ala fakaʻuhingaʻi ha akonaki, fehuʻi, pe meʻa ʻi he ongoongoleleí ʻoku makatuʻunga ʻi haʻanau aʻusia ʻoku kehe ia mei haʻaú. Te ke lava ʻo fehuʻi pē kiate koe, Ko e hā ha meʻa ʻoku ou ʻilo fekauʻaki mo e tokotahá ni te ne lava ʻo tākiekina ʻa e founga te u vahevahe ai ʻa e foʻi moʻoni ko ʻení?
Loto-fakatōkilalo mo fakaʻapaʻapa. ʻIloʻi pea fakahaaʻi ʻa e ngaahi fakangatangata ʻo e mahino ʻokú ke maʻú. Fakakaukau ki he meʻa kuo ʻosi fakahā pe teʻeki ke fakahā ʻe he ʻEikí. Fakaʻatā ha ngaahi founga kehekehe ki hono fakaʻaongaʻi ʻo e ngaahi tefitoʻi moʻoni ʻoku moʻoní. Fakaʻapaʻapaʻi ʻa e niʻihi kehe ʻoku kehe ʻenau tuí mo ʻenau fakakaukaú. Fakakaukau ke ke fehuʻi pē kiate koe, Te u lava fēfē ʻo fakaʻapaʻapaʻi ʻa e niʻihi kehe ʻoku kehe ʻenau vakaí mo ʻenau fakakaukau fekauʻaki mo e foʻi moʻoni ko ʻeni ʻo e ongoongoleleí?
Fakatātaaʻi
Fakakaukau ke fakaʻaongaʻi ʻa e sīpinga ko ʻení pe ko ha sīpinga pē ʻaʻau ke fakatātaaʻi ʻaki ʻa e taukei ko ʻení.
Fakamatalaʻi ange ko ha foʻi moʻoni ʻe taha ʻe lava ke tau ako mei he Tokāteline mo e Ngaahi Fuakava 21:4–5 ʻoku pehē kuo fekauʻi kitautolu ʻe he ʻEikí ke tau tali ʻa e ngaahi lea ʻa e kau palōfitá ʻi he faʻa kātaki mo e tui. Fakatātaaʻi ʻa e founga ke vahevahe ai ʻa e foʻi moʻoni ko ʻení ʻi he ʻofa mo e ongoʻingofua ʻi he tūkunga ko ʻení: ʻOkú ke fakatokangaʻi ʻoku ʻi ai ha taha ʻi he fānaú naʻe faʻa lea ʻo māteakiʻi ʻa e palōfitá, kuó ne fakaangaʻi ia he taimí ni pea mo ha niʻihi ʻo ʻene ngaahi akonakí.
|
Ko e vahevahe ʻa e ngaahi moʻoni ʻo e ongoongoleleí ʻo ʻikai ha ʻofa pea ʻikai ha ongoʻingofuá |
Ngaahi fehuʻi ke fakakaukauʻí |
Ko e vahevahe ʻa e ngaahi moʻoni ʻo e ongoongoleleí ʻi he ʻofa mo e ongoʻingofuá |
|---|---|---|
Ko e vahevahe ʻa e ngaahi moʻoni ʻo e ongoongoleleí ʻo ʻikai ha ʻofa pea ʻikai ha ongoʻingofuá “ʻOku ʻikai ke ke muimui ki he fekau ʻa e ʻEikí ke tali e ngaahi lea ʻa e palōfitá ʻi he faʻa-kātaki mo e tui kakató.” | Ngaahi fehuʻi ke fakakaukauʻí Te u lava fēfē ʻo vahevahe ʻa e moʻoni ko ʻení ʻi he angaʻofa mo e ʻofá? | Ko e vahevahe ʻa e ngaahi moʻoni ʻo e ongoongoleleí ʻi he ʻofa mo e ongoʻingofuá “Naʻá ku fakakaukau ʻi he pongipongí ni ki ha meʻa naʻa tau talanoa ki ai ʻi he ʻaho atú. ʻE lava ke u vahevahe atu haʻaku aʻusia naʻá ne akoʻi au ki hono mahuʻinga ʻo e muimui ki he palōfitá ʻi he faʻa-kātaki mo e tuí?” |
Ko e vahevahe ʻa e ngaahi moʻoni ʻo e ongoongoleleí ʻo ʻikai ha ʻofa pea ʻikai ha ongoʻingofuá “ʻOku ʻuhinga ʻa e muimui ki he palōfitá ʻi he faʻa kātaki mo e tuí ke ʻoua naʻá ke fakaangaʻi ia pe ko ʻene ngaahi akonakí.” | Ngaahi fehuʻi ke fakakaukauʻí Ko e hā ha meʻa ʻoku ou ʻilo fekauʻaki mo e tokotahá ni te ne lava ʻo tākiekina ʻa e founga te u vahevahe ai ʻa e foʻi moʻoni ko ʻení? Te u lava fēfē ʻo fakaʻapaʻapaʻi ʻa e niʻihi kehe ʻoku kehe ʻenau vakaí mo ʻenau fakakaukau fekauʻaki mo e foʻi moʻoni ko ʻeni ʻo e ongoongoleleí? | Ko e vahevahe ʻa e ngaahi moʻoni ʻo e ongoongoleleí ʻi he ʻofa mo e ongoʻingofuá “Kuo lahi haʻatau pōtalanoa ʻi he kuohilí naʻá ke fakahaaʻi ai hoʻo ʻofa mo e houngaʻia ʻi he palōfitá. Kuó u fakatokangaʻi kimuí ni mai ʻoku hangē ʻokú ke fakaangaʻi lahi ange ia mo e niʻihi ʻo ʻene ngaahi akonakí. Te ke lava nai ʻo tokoni mai ke mahino kiate au pe ko e hā e meʻa kuo liliú?” |
Fakaangaanga
Faʻu ha tūkunga ʻo makatuʻunga ʻi ha foʻi moʻoni fakafolofola mei he ngaahi fealēleaʻaki fakakalasi ʻo e uike ní, pe fakaʻaongaʻi ha taha ʻo e ngaahi sīpinga ʻoku ʻoatu ʻi laló. ʻE lava ke fakaʻaongaʻi ʻe he kau akó ʻa e ngaahi tefitoʻi fakahinohino mei he laʻipepa tufá ke aleaʻi pe fakatātaaʻi ʻi ha fanga kiʻi kulupu iiki ʻa e founga te nau lava ai ʻo vahevahe ha moʻoni ʻo e ongoongoleleí ʻaki e ʻofa mo e ongoʻingofua.
Ngaahi potufolofola lahi ange ki hono fakaangaanga ʻo e taukei ko ʻení:
-
Foʻi Moʻoní: Koeʻuhí ʻoku ʻofa ʻa e ʻOtuá ʻi he kakai kotoa pē, ko e meʻa kotoa pē ʻokú Ne fakahokó ʻoku fakahoko ia ke ʻaonga kakato kiate kinautolu (vakai, 2 Nīfai 26:24).
-
Tūkungá: ʻOku veiveiua ha kaungā-ngāue naʻe toki hoko ha fakatamaki ki hono fāmilí kimuí ni, pe ʻoku ʻofa mo moʻui koā ʻa e ʻOtuá.
-
-
Foʻi Moʻoní: Ko e mali ʻi ha vahaʻa ʻo ha tangata mo ha fefine ko e tuʻutuʻuni ia ʻa e ʻOtuá (vakai, Sēnesi 2:18–24; 1 Kolinitō 11:11; Tokāteline mo e Ngaahi Fuakava 49:15–17).
-
Tūkungá: ʻOku fehuʻi atu ʻe ha kaungāʻapi, ʻoku pehē ʻoku fakatangata, ʻa e ʻuhinga ʻoku akoʻi ai ʻe homou siasí ko e malí ʻoku totonu ke ʻi he vahaʻa pē ʻo ha tangata mo ha fefine.
-
-
Foʻi Moʻoní: Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e siasi moʻoni mo moʻui pē taha ʻi he māmaní (vakai, Tokāteline mo e Ngaahi Fuakava 1:30).
-
Tūkungá: ʻOku fokotuʻu ʻe ha kaungāmeʻa, ʻa ia ʻoku mālohi ʻaupito ʻi ha siasi ʻe taha, ʻa e fehuʻi ko ʻení ʻi he mītia fakasōsialé: “Ko e hā e ʻuhinga ʻoku pehē ai ʻe he Kau Māmongá ko honau siasí ko e siasi moʻoni pē ia ʻe tahá”?
-
Fakaafe pea Toe Vakaiʻi
Fakaafeʻi ʻa e kau akó ke nau vahevahe ʻa e ngaahi moʻoni ʻo e ongoongoleleí ʻaki ʻa e ʻofa mo e ongoʻingofua ʻi heʻenau ngaahi fepōtalanoaʻaki mo e niʻihi kehé fekauʻaki mo e ongoongoleleí. Manatuʻi ke toe vakaiʻi ʻi he ngaahi uike ka hokó ʻaki hano fakaafeʻi e kau akó ke vahevahe ʻenau ngaahi aʻusiá mo e kalasí. Te ke ala fehuʻi ki he kau akó pe ko e hā ʻa e meʻa naʻe ola leleí mo e meʻa naʻe faingataʻá. Kumi ha ngaahi faingamālie ke hokohoko atu ai hono fakaangaanga ʻa e taukei ko ʻení ʻi he kalasí.