« បុណ្យអ៊ីស្ទើរ ៖ សេចក្តីសង្ឃឹម និងសេចក្ដីសុខសាន្តតាមរយៈព្រះអង្គសង្គ្រោះ និងដង្វាយធួនរបស់ទ្រង់ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« បុណ្យអ៊ីស្ទើរ ៖ សេចក្តីសង្ឃឹម និងសេចក្ដីសុខសាន្តតាមរយៈព្រះអង្គសង្គ្រោះ និងដង្វាយធួនរបស់ទ្រង់ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
បុណ្យអ៊ីស្ទើរ
បុណ្យអ៊ីស្ទើរ
សេចក្តីសង្ឃឹម និងសេចក្ដីសុខសាន្តតាមរយៈព្រះអង្គសង្គ្រោះ និងដង្វាយធួនរបស់ទ្រង់
ព្រះអង្គសង្គ្រោះ ព្រះយេស៊ូវគ្រីស្ទបាននាំមកនូវសេចក្តីសង្ឃឹម និងសេចក្ដីសុខសាន្តតាមវិធីដែលអ្នកដទៃទំនងជាគិតថាមិនអាចទៅរួចទេ ។ ទ្រង់បានព្យាបាលមនុស្សខ្វាក់ អ្នកឈឺ និងមនុស្សខ្វិន ។ ទ្រង់បានប្រោសមនុស្សដែលបានស្លាប់ឲ្យរស់ឡើងវិញ ។ នៅទីបំផុត តាមរយៈការរងទុក្ខ សេចក្ដីស្លាប់ និងការមានព្រះជន្មរស់ឡើងវិញរបស់ទ្រង់ ទ្រង់បានយកឈ្នះអំពើបាប និងសេចក្ដីស្លាប់សម្រាប់មនុស្សលោកគ្រប់គ្នា ។ យើងអបអរសាទរ និងចងចាំព្រះអង្គសង្គ្រោះនៅបុណ្យអ៊ីស្ទើរ ។ មេរៀននេះអាចជួយសិស្សគិតពិចារណាអំពីសេចក្តីសុខសាន្ត និងសេចក្តីសង្ឃឹមដែលព្រះយេស៊ូវគ្រីស្ទប្រទានឲ្យពួកគេ ។
ការរៀបចំសិស្ស ៖ អញ្ជើញសិស្សឲ្យធ្វើសកម្មភាពមួយក្នុងចំណោមសកម្មភាពចំនួនបួននៅចុងបញ្ចប់នៃមេរៀននេះ ។ ឧទាហរណ៍ សិក្សាឯកសារ « ព្រះគ្រីស្ទដ៏មានព្រះជន្មរស់ » ដោយរកមើលឃ្លាដែលថ្លែងទីបន្ទាល់អំពី និងសេចក្តីសង្ឃឹមដែលព្រះអង្គសង្គ្រោះផ្តល់ឲ្យ ។ សូមលើកទឹកចិត្តពួកគេឲ្យមករៀនដោយរៀបចំខ្លួនចែកចាយឃ្លាដែលពួកគេពេញចិត្ត ។
សកម្មភាពរៀនសូត្រដែលអាចមាន
ការបាត់បង់ ឬការទទួលបានសេចក្ដីសង្ឃឹម និងសេចក្ដីសុខសាន្ត
សូមគូសរូបដូចខាងក្រោមដាក់លើក្ដារខៀន ។
អ្នកអាចសុំឲ្យសិស្សនឹកស្រមៃថាពួកគេបានរស់នៅនៅស្រុកអ៊ីស្រាអែល និងបានឃើញអំពីព្រះជន្មរបស់ព្រះអង្គសង្គ្រោះ ។ សូមសួរសំណួរខាងក្រោម ៖
-
តើបទពិសោធន៍អ្វីខ្លះនៅក្នុងព្រះជន្មរបស់ព្រះអង្គសង្គ្រោះអាចផ្តល់ឲ្យអ្នកនូវសេចក្តីសង្ឃឹមបន្ថែមទៀត ?
បន្ទាប់ពីសិស្សបានចែកចាយគំរូមួយចំនួនហើយ អ្នកអាចលើករូបភាពមួយអំពីព្រះយេស៊ូវគ្រីស្ទនៅលើឈើឆ្កាងឡើង ដូចជា « ការឆ្កាង » ហើយពន្យល់ថា នេះប្រហែលជាពេលដែលពួកសិស្សមួយចំនួនត្រូវបានល្បួងឲ្យបាត់បង់សេចក្ដីសង្ឃឹម ។ ( ព្រះអង្គសង្គ្រោះបានសុគត ហើយមិនធ្លាប់មាននរណាម្នាក់បានរស់ឡើងវិញពីមុនឡើយ ) ។
បន្ទាប់មកបង្ហាញរូបភាពមួយអំពីការមានព្រះជន្មរស់ឡើងវិញរបស់ព្រះអង្គសង្គ្រោះ ដូចជា « ព្រះគ្រីស្ទ និងម៉ារានៅឯផ្នូរ » ហើយសួរថាតើព្រឹត្តិការណ៍នេះអាចមានឥទ្ធិពលដល់សេចក្តីសង្ឃឹមរបស់ពួកគេយ៉ាងដូចម្តេច ។
-
តើហេតុផលអ្វីខ្លះដែលមនុស្សអាចត្រូវបានល្បួងឲ្យបាត់បង់សេចក្តីសង្ឃឹមសព្វថ្ងៃនេះ ?
-
តើហេតុផលអ្វីខ្លះដែលមនុស្សអាចទទួលបានសេចក្តីសង្ឃឹមតាមរយៈព្រះអង្គសង្គ្រោះសព្វថ្ងៃនេះ ?
សូមពិចារណាសរសេរចម្លើយរបស់សិស្សនៅលើក្តារខៀននៅជាប់នឹងព្រួញដែលត្រឹមត្រូវ ។ សូមពន្យល់ថា យើងអាចធ្វើសកម្មភាពស្រដៀងគ្នាដោយការផ្លាស់ប្តូរពាក្យ សេចក្តីសង្ឃឹម ទៅជា សេចក្ដីសុខសាន្ត ។
សូមចំណាយពេលពិចារណាពីរបៀបដែលព្រះអង្គសង្គ្រោះជួយអ្នកឲ្យមានអារម្មណ៍នូវសេចក្តីសង្ឃឹម និងសេចក្ដីសុខសាន្តនៅក្នុងជីវិតរបស់អ្នក ។ សូមពិចារណាផងដែរអំពីហេតុផលដែលអ្នកអាចមានអារម្មណ៍ថា អ្នកកំពុងបាត់បង់សេចក្តីសង្ឃឹម និងសេចក្ដីសុខសាន្ត ។ សូមពិចារណាថា ហេតុអ្វីបានជាអ្នកប្រហែលជាត្រូវការសេចក្តីសង្ឃឹម និងសេចក្ដីសុខសាន្តនៅក្នុងជីវិតរបស់អ្នក ។
ពេញមួយមេរៀននេះ សូមស្វែងរកការណែនាំពីព្រះវិញ្ញាណបរិសុទ្ធ ដើម្បីជួយអ្នកគិតពិចារណាអំពីសេចក្ដីសុខសាន្ត និងសេចក្តីសង្ឃឹមដែលព្រះយេស៊ូវគ្រីស្ទផ្តល់ដល់អ្នក និងមនុស្សលោកទាំងអស់ ។
សេចក្តីសង្ឃឹម និងសេចក្ដីសុខសាន្តនៅក្នុងជីវិតរបស់យើង
នៅបុណ្យអ៊ីស្ទើរ យើងអបអរសាទរការមានព្រះជន្មរស់ឡើងវិញរបស់ព្រះយេស៊ូវគ្រីស្ទ ការបញ្ចប់នៃពលិកម្មធួនរបស់ទ្រង់សម្រាប់យើង ។ នៅពេលអ្នកអានសេចក្តីថ្លែងការណ៍ខាងក្រោមមកពីប្រធាន រ័សុល អិម ណិលសុន សូមរកមើលសេចក្តីសង្ឃឹមដែលព្រះអង្គសង្គ្រោះអាចនាំមកក្នុងជីវិតរបស់យើង ។
នៅពេលទ្រង់បានរងទុក្ខសម្រាប់អំពើបាប និងភាពទន់ខ្សោយរបស់យើង បានសុគតនៅលើឈើឆ្កាង និងបានមានព្រះជន្មឡើងវិញ នោះព្រះអង្គសង្គ្រោះបានសរសេរដំណើររឿងរបស់មនុស្សជាតិឡើងវិញ ។ ដោយសារទ្រង់ យើងមិនចាំបាច់ត្រូវប្រឈមនឹងភាពទន់ខ្សោយ អំពើបាប និងភាពភ័យខ្លាចរបស់យើងតែម្នាក់ឯងនោះទេ ។ ដោយសារទ្រង់ សេចក្ដីស្លាប់មិនមែនជាទីបញ្ចប់នោះទេ ។ ការរស់ឡើងវិញនឹងកើតមានចំពោះមនុស្សទាំងអស់ដែលធ្លាប់រស់នៅ ។ ដោយសារទ្រង់ ក្រុមគ្រួសារអាចរួមរស់ជាមួយគ្នាជារៀងរហូត បាន ។ ដោយសារព្រះយេស៊ូវគ្រីស្ទ យើងអបអរសាទរពិធីបុណ្យអ៊ីស្ទើរ ។ ហើយបុណ្យអ៊ីស្ទើរគឺអំពីសេចក្ដីសុខសាន្ត និងសេចក្តីសង្ឃឹម ។ …
… នៅរដូវកាលបុណ្យអ៊ីស្ទើរនេះ ចូរយើងថ្វាយបង្គំ និងសរសើរទ្រង់ចំពោះសេចក្ដីសុខសាន្ត សេចក្ដីសង្ឃឹម ពន្លឺ និងសេចក្តីពិតដែលទ្រង់នាំមកឲ្យយើង ។ ( « The Peace and Hope of Easter » វីដេអូ ChurchofJesusChrist.org )
-
តើអ្នកអាចសង្ខេបអ្វីដែលប្រធាន ណិលសុន បានបង្រៀនដោយរបៀបណា ?
សិស្សអាចចែកចាយការយល់ដឹងផ្សេងៗ ។ សូមអរគុណពួកគេសម្រាប់ចម្លើយរបស់ពួកគេ ។ គោលការណ៍ដែលយើងអាចរៀនគឺថា តាមរយៈការរងទុក្ខរបស់ព្រះអង្គសង្រ្គោះ និងការមានព្រះជន្មរស់ឡើងវិញ យើងអាចមានសេចក្តីសុខសាន្ត និងសេចក្តីសង្ឃឹមនៅក្នុងជីវិតរបស់យើង ។
-
តើមានរបៀបណាខ្លះដែលប្រធាន ណិលសុន បានចែកចាយថាព្រះអង្គសង្រ្គោះអាចប្រទានសេចក្តីសង្ឃឹម និងសេចក្តីសុខសាន្តដល់យើង ?
-
អ្នកគិតថា ហេតុអ្វីការដឹងអំពីការរងទុក្ខរបស់ព្រះអង្គសង្រ្គោះ ការសុគត និងការមានព្រះជន្មរស់ឡើងវិញជួយយើងរកឃើញសេចក្តីសង្ឃឹម និងសេចក្តីសុខសាន្តតាមរយៈទ្រង់ ?
ទីបន្ទាល់ពីព្រះអង្គសង្រ្គោះ
សកម្មភាពខាងក្រោមនឹងជួយសិស្សយល់កាន់តែច្បាស់ពីរបៀបដែលយើងអាចមានសេចក្តីសុខសាន្ត និងសេចក្តីសង្ឃឹមតាមរយៈព្រះយេស៊ូវគ្រីស្ទ ។ សូមពិចារណាដាក់តាំងសេចក្តីណែនាំដូចខាងក្រោម និងសេចក្តីយោងបទគម្ពីរនៅលើក្ដារខៀន ។ សូមអញ្ជើញសិស្សឲ្យសិក្សាអ្វីៗទាំងនេះពីរបី ឬខគម្ពីរផ្សេងទៀតដែលថ្លែងទីបន្ទាល់ពីព្រះអង្គសង្រ្គោះ ។ ឬអ្នកអាចចាត់តាំងបទគម្ពីរនីមួយៗទៅសិស្សផ្សេងៗគ្នា ។ បន្ទាប់មកសិស្សអាចចែកចាយជាមួយសិស្សក្នុងថ្នាក់នូវអ្វីដែលពួកគេរកឃើញអំពីរបៀបដែលព្រះអង្គសង្រ្គោះនាំមកនូវសេចក្តីសង្ឃឹម និងសេចក្តីសុខសាន្តដល់ជីវិតរបស់យើង ។
អានបទគម្ពីរខាងក្រោមមួយចំនួននៅក្នុងព្រះគម្ពីរសញ្ញាចាស់ ដោយរកមើលឃ្លាដែលពិពណ៌នាពីអ្វី ដែលព្រះអង្គសង្រ្គោះអាចធ្វើសម្រាប់យើង ។ ជញ្ជឹងគិតពីរបៀបដែលទ្រង់នាំមកនូវសេចក្តីសង្ឃឹម និងសេចក្តីសុខសាន្តនៅក្នុងជីវិតរបស់យើង ។
យ៉ូប ១៩:២៥–២៦
ទំនុកដំកើង ១៦:៨–១១
ទំនុកដំកើង ៣០:២–៥
ទំនុកដំកើង ៣៣:១៨–២២
អេសាយ ១:១៨
អេសាយ ១២:២
អេសាយ ២៥:៨–៩
អេសាយ ៤០:២៨–៣១
យេរេមា ១៧:៧–៨
សូមអញ្ជើញសិស្សឲ្យចែកចាយឃ្លាដែលពួកគេបានរកឃើញថា មានអត្ថន័យចំពោះពួកគេ ។ អ្នកអាចឲ្យពួកគេសរសេរឃ្លាទាំងនេះនៅលើក្ដារខៀន នៅជិតនឹងសញ្ញាព្រួញ « ការទទួលបានសេចក្ដីសង្ឃឹម » ។ សូមសួរពួកគេពីមូលហេតុដែលឃ្លាទាំងនេះមានអត្ថន័យ ។ អ្នកក៏ប្រហែលជាចង់លើកទឹកចិត្តសិស្សឲ្យគូសចំណាំឃ្លាដែលអ្នកផ្សេងចែកចាយ ។
គិតពិចារណាអំពីសេចក្តីសង្ឃឹម និងសេចក្តីសុខសាន្តដែលព្រះអង្គសង្រ្គោះបានប្រទាន
ដើម្បីជួយសិស្សគិតពិចារណាអំពីសេចក្តីសង្ឃឹម និងសេចក្តីសុខសាន្តដែលបានមកតាមរយៈព្រះអង្គសង្រ្គោះ សូមអញ្ជើញពួកគេឲ្យធ្វើសកម្មភាពមួយ ឬពីរនៃសកម្មភាពខាងក្រោម ជាថ្នាក់រៀនទាំងមូល ។ អ្នកអាចជ្រើសរើសអ្វីដែលអ្នកមានអារម្មណ៍ថានឹងមានប្រយោជន៍ ឬអាចជាជំនួយដល់សិស្ស ។ ឬអ្នកអាចសង្ខេបជម្រើសទាំងឡាយ ហើយអនុញ្ញាតឲ្យសិស្សជ្រើសរើសជម្រើសទាំងនោះជាថ្នាក់ទាំងមូល ថាតើសកម្មភាពណាមួយដែលពួកគេចង់ធ្វើ ។ អ្នកក៏អាចអញ្ជើញសិស្សឲ្យនឹកគិតពីគំនិតរបស់ពួកគេផ្ទាល់ ហើយសាកល្បងវា ។
-
សិក្សា « ព្រះគ្រីស្ទដ៏មានព្រះជន្មរស់ » ដែលគណៈប្រធានទីមួយ និងកូរ៉ុមសាវកដប់ពីរនាក់បានសរសេរ ដោយរកមើលឃ្លាដែលថ្លែងទីបន្ទាល់ពីសេចក្តីសុខសាន្ត និងសេចក្តីសង្ឃឹមដែលព្រះអង្គសង្រ្គោះប្រទានឲ្យ ។ សិស្សអាចចែកចាយអ្វីដែលពួកគេរកឃើញ និងមូលហេតុដែលវាមានអត្ថន័យចំពោះពួកគេ ។
-
ជ្រើសរើសទំនុកតម្កើង ឬបទចម្រៀងផ្សេងទៀតដែលបង្រៀនពីសេចក្តីសុខសាន្ត និងសេចក្តីសង្ឃឹមដែលព្រះអង្គសង្រ្គោះបានប្រទានឲ្យ ។ ច្រៀងទំនុកតម្កើងនោះមួយចំនួន ។ បន្ទាប់មកចែកចាយឃ្លាចេញមកពីទំនុកតម្កើងនោះដែលមានអត្ថន័យចំពោះអ្នក ។ ឧទាហរណ៍មួយចំនួនគឺ « ខ្ញុំរកក្តីសុខឯណា? » ទំនុកតម្កើង ល.រ. ៦៩ « ព្រះប្រោសលោះខ្ញុំនៅរស់ » ទំនុកតម្កើង ល.រ. ៧៧ និង « ខ្ញុំស្គាល់ក្ដីស្នេហ៍ព្រះសង្គ្រោះ » សៀវភៅចម្រៀងកុមារ ទំព័រ ៤២ ។
-
សូមអានសេចក្តីថ្លែងការណ៍មកពីប្រធាន រ័សុល អិម ណិលសុន ឬមើល « The Peace and Hope of Easter, President Russell M. Nelson Palm Sunday Invitation » ចាប់ពីនាទីទី ៣:៥០ ដល់ ៥:១១ ។ ចែកចាយពីរបៀបដែលការចូលរួមនៅក្នុងព្រះវិហារ ឬការស្ដាប់សន្និសីទទូទៅជួយយើងគិតពិចារណាអំពីសេចក្តីសុខសាន្ត និងសេចក្តីសង្ឃឹមដែលព្រះអង្គសង្រ្គោះប្រទានឲ្យ ។
បុណ្យអ៊ីស្ទើរនេះ ខ្ញុំសូមលើកទឹកចិត្តអ្នកឲ្យផ្តោតលើព្រះអង្គសង្គ្រោះ ។ ប្រសិនបើអ្នកកំពុងស្វែងរកកន្លែងថ្វាយបង្គំ សូមចូលរួមជាមួយយើង ។ នៅថ្ងៃអាទិត្យ [ ឬជិតដល់ ] ថ្ងៃអាទិត្យបុណ្យអ៊ីស្ទើរ សន្និសីទទូទៅទូទាំងពិភពលោកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយនឹងត្រូវបានពោរពេញទៅដោយ និងតន្ត្រីដែលផ្តោតលើព្រះគ្រីស្ទ ។ យើងនឹងប្រមូលផ្ដុំ [ ដោយផ្ទាល់ និង ] ដោយអ៊ីនធឺណិតដើម្បីថ្វាយបង្គំព្រះប្រោសលោះរបស់យើង ។ សូមចូលរួមជាមួយយើង ។ អញ្ជើញមិត្តភក្តិរបស់អ្នក !
ព្រះយេស៊ូវគ្រីស្ទមានព្រះជន្មរស់ ! ក្នុងនាមជាព្រះអង្គសង្រ្គោះដែលបានមានព្រះជន្មរស់ឡើងវិញ និងដ៏ធួនរបស់យើង ទ្រង់បានគង់នៅជិតដើម្បីជួយយើងរីកចម្រើនពីព្រឹត្តិការណ៍នៃវិនាដកម្ម និងមិននឹកស្មានដល់នៅក្នុងជីវិតរបស់យើង ។ នៅរដូវកាលបុណ្យអ៊ីស្ទើរនេះ ចូរយើងថ្វាយបង្គំ និងសរសើរទ្រង់ចំពោះសេចក្ដីសុខសាន្ត សេចក្ដីសង្ឃឹម ពន្លឺ និងសេចក្តីពិតដែលទ្រង់នាំមកឲ្យយើង ។ ( វីដេអូ « The Peace and Hope of Easter ប្រធាន រ័សុល អិម ណិលសុន ការអញ្ជើញនៅថ្ងៃអាទិត្យធាងចាក » នៅលើគេហទំព័រ ChurchofJesusChrist.org )
-
ចែកចាយបទពិសោធន៍នៃពេលដែលអ្នក ឬនរណាម្នាក់ដែលអ្នកស្គាល់បានទទួលអារម្មណ៍នៃសេចក្តីសុខសាន្ត និងសេចក្តីសុខសាន្តតាមរយៈព្រះអង្គសង្រ្គោះព្រះយេស៊ូវគ្រីស្ទ ។
បន្ទាប់ពីសិស្សបានបំពេញសកម្មភាពទាំងនេះមួយ ឬពីរ នោះអ្នកអាចចែកចាយវីដេអូមួយនៃវីដេអូខាងក្រោម ដើម្បីជួយពួកគេទទួលអារម្មណ៍នៃសេចក្តីសុខសាន្ត និងសេចក្តីសង្ឃឹមដែលព្រះអង្គសង្រ្គោះបានប្រទានឲ្យ ។
« The Prince of Peace » ( ២:៣២ )
« Because He Lives » ( ២:២៨ )
សេចក្ដីបញ្ចប់
សូមត្រឡប់ទៅក្រាហ្វិកនៅលើក្ដារខៀនវិញ ។ ពន្យល់ថា ខណៈដែលយើងទាំងអស់គ្នាអាចត្រូវបានល្បួងឲ្យបាត់បង់សេចក្តីសង្ឃឹមនៅពេលខ្លះ នោះយើងអាចជ្រើសរើសដើម្បីស្វែងរកសេចក្តីសង្ឃឹម និងសេចក្តីសុខសាន្តតាមរយៈព្រះអង្គសង្រ្គោះ ។
នៅក្នុងសៀវភៅកំណត់ហេតុអំពីបទគម្ពីររបស់អ្នក សូមសរសេរពីមូលហេតុដែលអ្នកត្រូវការសេចក្តីសង្ឃឹម និងសេចក្តីសុខសាន្តនៃព្រះអង្គសង្រ្គោះនៅក្នុងជីវិតរបស់អ្នក ។ បន្ទាប់មក សូមសរសេរកិច្ចការមួយចំនួនដែលអ្នកចង់ធ្វើ ដើម្បីផ្តោតលើព្រះអង្គសង្គ្រោះ និងសេចក្តីសង្ឃឹម និងសេចក្តីសុខសាន្តរបស់ទ្រង់ ។ ទាំងនេះអាចរួមទាំងការចងចាំបទគម្ពីរ ឬឃ្លាទាំងឡាយចេញពី « ព្រះគ្រីស្ទដ៏មានព្រះជន្មរស់ » ដែលអ្នកបានសិក្សានៅថ្ងៃនេះ ។
សូមពិចារណាផ្តល់ឱកាសដល់សិស្សដើម្បីចែកចាយអារម្មណ៍របស់ពួកគេ និងទីបន្ទាល់អំពីព្រះអង្គសង្រ្គោះ និងសេចក្តីសង្ឃឹម និងសេចក្តីសុខសាន្តដែលទ្រង់ប្រទានឲ្យ ។