“‘Paglaom sa Israel’: Pagtuon sa mga Pagtulun-an sa mga Lider sa Simbahan,” Old Testament Seminary Teacher Manual (2026)
“‘Paglaom sa Israel’: Pagtuon sa mga Pagtulun-an sa mga Lider sa Simbahan,” Old Testament Seminary Teacher Manual
Mga Pagtulun-an sa mga Lider sa Simbahan: Leksiyon 208
“Paglaom sa Israel”
Pagtuon sa mga Pagtulun-an sa mga Lider sa Simbahan
Sa tibuok tuig, ang mga estudyante dunay pipila ka oportunidad sa pagtuon sa mga mensahe sa Ginoo nga gihatag sa Iyang dinasig nga mga lider. Ang “Template alang sa Pagtudlo sa mga Mensahe gikan sa mga Lider sa Simbahan” nga dokumento usa ka himan nga imong magamit sa pagtabang nimo nga magiyahan ang imong mga estudyante samtang magtuon sila niini nga mga mensahe. Kini nga leksiyon naghatag og ehemplo kon unsaon nimo paggamit ang template sa pagtudlo sa pakigpulong ni Presidente Nelson nga “Paglaom sa Israel” ([tibuok kalibotan nga debosyonal sa kabatan-onan, Hunyo 3, 2018], Librarya sa Ebanghelyo). Kini nga leksiyon makatabang sa mga estudyante nga lihokon ang mga pagdapit ni Presidente Nelson.
Pagpangandam sa estudyante: Ipakigbahin sa mga estudyante ang ulohan sa pakigpulong ni Presidente Nelson nga “Paglaom sa Israel.” Awhaga sila nga basahon, tan-awon, o paminawon ang tanan o porsiyon sa pakigpulong sa dili pa magklase. Dapita sila nga mainampoong andamon ang ilang mga kasingkasing alang sa Espiritu Santo nga motudlo kanila samtang magtuon sila sa mga mensahe sa mga sulugoon ni Jesukristo.
Posibleng mga Kalihokan sa Pagkat-on
Pahinumdom: Kini nga leksiyon naghatag og ehemplo kon unsaon paggamit sa mga magtutudlo ang “Template alang sa Pagtudlo sa mga Mensahe gikan sa mga Lider sa Simbahan” nga dokumento aron matabangan ang mga estudyante nga tun-an ang mga mensahe nga gikan sa mga lider sa Simbahan. Pwede nimong usbon ang mga ideya niini nga leksiyon, paggamit og lain-laing kombinasyon sa mga ideya gikan sa template, o paggamit og kaugalingon nimong mga ideya nga mas mahatag ang mga panginahanglan sa imong mga estudyante.
Sugdi ang leksiyon
Sugdi ang leksiyon sa paagi nga makapainteres sa mga hunahuna ug mga kasingkasing sa mga estudyante sa pagtabang nila nga maandam alang sa kasinatian sa pagkat-on. Ikonsiderar ang paggamit sa imong kaugalingong ideya o ang mosunod “Mga pangutana bahin sa hilisgotan” nga ideya diha sa “Mga pamaagi sa pagsugod sa leksiyon” nga seksiyon sa template.
Ipakita ang mosunod nga mga pamahayag. Ikonsiderar ang pag-highlight o paglinya sa hugpong sa mga pulong nga pagpundok sa Israel.
Si Presidente Russell M. Nelson miingon sa mosunod:
Akong minahal nga talagsaong kabatan-onan, gipadala kamo sa yuta niining tukma nga panahon, ang labing importanteng panahon sa kasaysayan sa kalibotan, aron motabang sa pagpundok sa Israel. Walay laing nahitabo dinhi sa yuta karon nga mas importante kay sa niana. Walay lain nga dunay mas dakong sangpotanan. Walay lain gayod. (“Paglaom sa Israel” [tibuok kalibotan nga debosyonal sa kabatan-onan, Hunyo 3, 2018], Librarya sa Ebanghelyo)
Ang mga estudyante mahimong maghisgot sa mosunod nga pangutana nga magkapares o diha sa gagmayng mga grupo. O mahimo nilang tagsa-tagasa nga isulat ang posibleng mga pangutana diha sa ilang journal.
-
Unsa nga mga pangutana ang anaa nimo o sa uban mahitungod sa pagpundok sa Israel—ang panghitabo nga gitawag ni Presidente Nelson nga labing importanteng butang nga “nahitabo dinhi sa yuta karon”?
Dapita ang mga estudyante sa pagpakigbahin sa mga pangutana nga ilang nahimo. Mahimo silang motubag og lain-laing mga pangutana, lakip ang mosunod:
-
Unsa ang pagpundok sa Israel?
-
Nganong ang pagpundok ang labing importanteng butang nahitabo sa yuta karon?
-
Ngano kaha nga kinahanglan kong moapil sa pagpundok sa Israel?
Ikonsiderar ang pagdapit sa mga estudyante sa pagsulat sa ilang mga pangutana diha sa pisara, magbilin og luna sa ubos sa matag pangutana.
Samtang mangita ka og mga tubag niini nga mga pangutana karon, ikonsiderar kon sa unsang paagi ang kahibalo bahin ni Jesukristo ug sa Iyang ebanghelyo makatabang sa pagtubag sa mga pangutana.
Tun-i ang mensahe
Ang katuyoan niini nga seksiyon mao ang pagtabang sa mga estudyante nga tun-an ang mga porsiyon sa pakigpulong ni Presidente Nelson nga “Paglaom sa Israel”.” Ikonsiderar ang paggamit sa imong kaugalingong ideya o ang mosunod “Mangita sa: Mga tubag sa mga pangutana o mga kabalaka” nga ideya gikan sa “Mga pamaagi sa pagtuon sa mensahe” nga seksiyon sa template.
Kon ang imong mga estudyante walay kopya o digital nga bersiyon nga akses sa pakigpulong, ikonsiderar ang pag-apud-apod sa handout nga “Ang Pagpundok sa Israel” sa matag estudyante. Kini nga handout naglangkob og sinulat nga porsiyon sa pakigpulong nga mahisgotan niini nga leksiyon. Mahimo usab nimong dapiton ang mga estudyante sa pagtan-aw niini nga porsiyon sa pakigpulong diha sa bidyo nga “Paglaom sa Israel,” nga anaa sa ChurchofJesusChrist.org, gikan sa time code 30:26 hangtod 33:37.
Kon ang mga estudyante maglisod sa pagbasa o pagpaminaw sa taas nga mga seksiyon sa pakigpulong, ikonsiderar ang pagpakigbahin sa usa o duna ka parapo gikan sa handout ug pagdapit nila sa pagdrowing o pagsulat kon unsay ipasabot sa pagpundok sa Israel ngadto kanila.
Tun-i ang gihatag nga mga pinili gikan niini nga pakigpulong, nga mangita sa mga tubag sa bisan asa sa mga pangutana nga nakalista diha sa pisara. Mahimo ninyong markahan diha sa pakigpulong ang bisan unsang tubag nga inyong makit-an. Pwede ninyong ikonsiderar ang pagmarka sa mga tubag sa matag pangutana sa paagi nga lahi sa ubang mga pangutana. Pananglitan, mahimo ninyong linginan ang mga tubag sa usa ka pangutana ug linyahan ang mga tubag sa lain, o pwedeng markahan kining tanan og lainlaing kolor.
Human ang mga estudyante makatuon sa mga porsiyon sa pakigpulong nga imong gipili, ikonsiderar ang pagbahin nila nga magpares aron hisgotan ang mosunod nga mga pangutana.
-
Unsa nga mga pangutana nga para ninyo natubag sa mga porsiyon sa pakigpulong ni Presidente Nelson nga imong gitun-an? Sa unsang paagi kini natubag?
Ikonsiderar ang pagdapit sa mga estudyante sa pagsulat sa ilang mga tubag diha sa pisara ubos sa pangutana nga ilang gitubag. Mahimo nimong dapiton ang mga estudyante nga ipasabot ang ilang mga tubag.
Paggamit sa mensahe ni Presidente Nelson
Ang katuyoan niini nga seksiyon mao ang pagtabang sa mga estudyante nga maggamit ang mga pagdapit ni Presidente Nelson sa pagpundok sa Israel. Ikonsiderar ang paggamit sa imong kaugalingong ideya o ang mosunod nga “Ilha ug gamita ang mga pagdapit” nga ideya nga gikan sa “Mga paagi sa paggamit sa mensahe” nga seksiyon sa template.
Iapud-apod ang handout nga giulohan og “Mga Pagdapit sa Pag-apil sa Pagpundok sa Israel” ngadto sa tanang estudyante. Ikonsiderar ang pagdapit nila nga tun-an kini nga pahina sa tagsa-tagsa.
Pamalandongi ang mga panghunahuna o mga pag-aghat gikan sa Espiritu Santo nga moabot sa inyong hunahuna o kasingkasing samtang inyong tun-an ang mga pagdapit ni Presidente Nelson ngadto sa kabatan-onan. Ikonsiderar sa mainampoong paagi kon hain nga pagdapit ang para ninyo nga gusto sa Ginoo nga inyong dawaton ug sundon aron maapil sa pagpundok sa Israel. Tingali mobati ka nga nadani sa paglihok sa sobra sa usa ka pagdapit.
Isulat kini nga pagdapit diha sa inyong journal sa pagtuon. Pwede usab ninyong isulat kon sa unsang paagi ang paglihok niana nga pagdapit makatabang ninyo nga mas magpaduol sa Langitnong Amahan ug ni Jesukristo.
Ikonsiderar ang pagpakigbahin sa imong pagpamatuod sa mga kamatuoran nga gitudlo ni Presidente Nelson. Awhaga ang mga estudyante nga buhaton ang mga pag-aghat nga tingali ilang gibati.