“Template alang sa Pagtudlo sa mga Mensahe gikan sa mga Lider sa Simbahan: Tun-i ug Gamita ang Pagtulun-an sa mga Sulugoon sa Ginoo,” Manwal sa Magtutudlo sa Seminary sa Daang Tugon (2026)
“Template alang sa Pagtudlo sa mga Mensahe gikan sa mga Lider sa Simbahan: Tun-i ug Gamita ang Pagtulun-an sa mga Sulugoon sa Ginoo,” Manwal sa Magtutudlo sa Seminary sa Daang Tugon
Mga Pagtulun-an sa mga Lider sa Simbahan: Leksiyon 207
Template alang sa Pagtudlo sa mga Mensahe gikan sa mga Lider sa Simbahan
Tun-i ug Gamita ang mga Pagtulun-an sa mga Sulugoon sa Ginoo
Makapadasig ang pagkahibalo nga ang Manluluwas makig-istorya gihapon sa Iyang pinili nga mga sulugoon karon. Sa tibuok tuig sa seminary, makabaton og daghang kahigayonan ang mga estudyante nga tun-an ang Iyang mga mensahe pinaagi niini nga mga sulugoon. Pwede nimong gamiton kini nga template isip usa ka himan sa pagtabang sa pagtudlo sa mga mensahe gikan sa mga lider sa Ang Simbahan ni Jesukristo sa mga Santos sa Ulahing mga Adlaw.
Pagpangandam sa estudyante: Ipakigbahin sa mga estudyante ang ulohan sa pakigpulong nga ilang tun-an diha sa klase. Awhaga sila nga basahon, tan-awon, o paminawon ang tanan o porsiyon sa pakigpulong sa dili pa magklase. Dapita ang mga estudyante nga mainampoong andamon ang ilang mga kasingkasing alang sa Espiritu Santo nga motudlo nila samtang magtuon sila sa mga mensahe sa mga sulugoon ni Jesukristo.
Posible nga mga Kalihokan alang sa Pagtuon sa mga Pakigpulong gikan sa mga Lider sa Simbahan
Pahinumdom: Alang sa mga ehemplo kon unsaon sa paggamit kini nga template, tan-awa sa Leksiyon 208: “Paglaom sa Israel.”
Kini nga template makatabang nimo sa pagtudlo sa imong mga estudyante sa mga mensahe gikan sa mga lider sa Simbahan. Wala kini gituyo nga mahimong usa ka nag-inusara nga leksiyon. Naglangkob kini og lainlaing ideya sa pagtudlo ug pagkat-on nga pwede nimong magamit kon magtudlo ka og pakigpulong nga gikan sa usa ka lider sa Simbahan.
Sa pagpangandam og leksiyon nga gikan sa pakigpulong, tun-i una ang pakigpulong nga giplanohan nimong itudlo, mangita kon hain nga mga kamatuoran ang labing importante alang sa imong mga estudyante nga masabtan ug magamit. Aron matabangan ka sa paghimo niini nga desisyon, (1) hatagi og pagtagad ang mga pag-aghat sa Espiritu, (2) hinumdomi ang tuyo sa dinasig nga tagsulat, (3) pangitaa ang makakabig nga mga kamatuoran nga makatabang nga mapalawom ang pagkakabig ngadto ni Jesukristo ug sa Iyang ebanghelyo, ug (4) ikonsiderar ang mga panginahanglan ug mga abilidad sa imong mga estudyante.
Dayon ikonsiderar ang pagpili og mga ideya nga gikan niini nga template—o mogamit og imong kaugalingong mga ideya—nga para nimo makatabang sa imong mga estudyante nga mailhan, masabtan, ug magamit ang mga kamatuoran nga imong gipili gikan sa pakigpulong. Mahimo kang mopili sa paggamit og ideya gikan sa matag seksiyon niini nga template diha sa imong leksiyon.
Ikonsiderar ang paghatag sa mga estudyante og nakaprinta o digital nga bersiyon sa pakigpulong nga tun-an sa mga estudyante. Pwede usab kang maghimo og handout sa mga porsyon sa pakigpulong nga gipili nimong tutokan.
Mga pamaagi sa pagsugod sa leksiyon
Paghunahuna og paagi sa pagsugod sa leksiyon nga makamugna og interes sa mga hunahuna ug mga kasingkasing sa mga estudyante sa pagtabang nila aron maandam alang sa kasinatian sa pagkat-on. Ang mosunod mao ang pipila ka mga ehemplo:
Makapukaw sa hunahuna nga pangutana o pamahayag. Pagpakigbahin og makapukaw sa hunahuna nga pangutana o pamahayag nga may kalabotan sa mensahe sa mamumulong ug dapita ang mga estudyante nga hisgotan kini sa makadiyot o irekord ang ilang inisyal nga mga tubag diha sa ilang mga journal. Pananglitan, mahimo nimong isulat ang ulohan sa pakigpulong diha sa pisara ug pangutan-a ang mga estudyante kon nganong kini nga hilisgotan importante sa atong panahon.
Mga leksiyon nga mogamit og butang, mga hulagway, o mga bidyo. Ipakigbahin ug hisgoti sa makadiyot ang leksiyon nga mogamit og butang, hulagway o bidyo nga aprobado sa Simbahan nga may kalabotan sa mensahe sa mamumulong.
Pagpakigbahin og istorya. Pagpakigbahin og istorya gikan o may kalabotan sa mensahe sa mamumulong. Usahay mas maayo nga ipakigbahin lang ang porsiyon sa istorya sa sinugdanan sa leksiyon aron mapukaw ang interes sa mga estudyante. Sa ulahing bahin sa leksiyon, pwedeng taposon ang istorya aron ihulagway ang katuyoan sa mensahe sa mamumulong.
Mga pangutana bahin sa hilisgotan. Ipakigbahin ang hilisgotan sa pakigpulong ug dapita ang mga estudyante sa pagsulat diha sa pisara o diha sa ilang mga journal ang bisan unsang pangutana nila o sa uban bahin niana nga hilisgotan. Mahimo nimong awhagon ang mga estudyante sa pagtinguha og mga tubag atol sa leksiyon.
May kalabotan nga senaryo. Pwede kang mopresentar og may kalabotan nga senaryo—o dapita ang mga estudyante sa paghimo og senaryo—sa usa ka tin-edyer nga makabenepisyo sa pagpaminaw ug paggamit sa mensahe sa mamumulong nga tun-an sa klase.
Pagsukod sa kaugalingon. Dapita ang mga estudyante nga personal nga sukdon o pamalandongan ang ilang kasamtangan nga pagsabot, kinaiya, o paggamit sa hilisgotan nga gihisgotan diha sa pakigpulong. Ang usa ka paagi nga mahimo nila kini mao ang pagpamalandong o pagrekord sa ilang mga tubag sa mga pangutana sa pagpamalandong sa kaugalingon. Mahimo nimong gamiton ang mga pangutana nga tingali anaa sa pakigpulong o magsulat og imong kaugalingon.
Mga pamaagi sa pagtuon sa mensahe
Aron matabangan ang mga estudyante nga magtuon sa pakigpulong, ikonsiderar ang paggamit sa imong mga ideya, usa o daghan sa mosunod nga mga ideya, o kombinasyon sa daghang ideya.
Pagpili og mga porsyon sa pakigpulong nga labing magamit, may kalabotan, ug angay sa mga abilidad sa mga estudyante. Pananglitan, mahimong maalamon nga himoong mugbo ug madumala ang mga bahin nga basahon sa mga estudyante, imbes nga hangyoon sila sa pagbasa sa tibuok pakigpulong.
Dapita ang mga estudyante sa pagtinguha og personal nga pagpadayag sa tibuok nilang pagtuon, pagrekord sa mga pag-aghat diha sa ilang mga journal sa pagtuon o digital nga mga device. Dugang nga mga ideya sa pagtuon mahimong makita diha sa “Studying General Conference” sa ChurchofJesusChrist.org.
Mangita sa. Ang mga estudyante lagmit mas magmalamposon kon sila adunay butang nga ilang gipangita samtang sila nagtuon. Adunay pipila ka butang nga mapangita sa mga estudyante, sama sa:
-
Jesukristo. Ang mga estudyante mahimong mangita og makapadasig nga mga kamatuoran mahitungod sa Manluluwas, mga pagpamatuod o mga ehemplo bahin Niya, o mga pagtulun-an mahitungod sa Iyang gahom, maulaong pagsakripisyo, gugma, batasan, ug uban pa.
-
Mga tubag sa mga pangutana o mga kabalaka. Kon mogamit ka sa “Mga pangutana bahin sa hilisgotan” nga ideya diha sa “Mga pamaagi sa pagsugod sa leksiyon” nga seksiyon niini nga template, nan ang mga estudyante mahimong mangita sa mga tubag niini nga mga pangutana samtang sila magtuon. O pwede nimo silang dapiton nga mangita sa mga tubag sa personal nga mga pangutana o mga kabalaka nila o sa uban. Kon mahuman na ang pagtuon sa mga estudyante, dapita sila nga ipakigbahin ang ilang nakit-an. Kon isulat nimo ang mga pangutana diha sa pisara nga nailhan ganina sa mga estudyante, mahimong isulat sa mga estudyante ang ilang mga tubag ubos sa mga pangutana. Pwede dayon nilang ipasabot ang ilang mga tubag.
-
Mga paagi sa pagtabang nga may kalabotan nga senaryo. Kon gamiton nimo ang ideya sa “May kalabotan nga senaryo” diha sa “Mga pamaagi sa pagsugod sa leksiyon” nga seksiyon, nan ang mga estudyante mahimong mangita og mga paagi nga makatabang sa indibidwal ang mensahe sa mamumulong diha sa senaryo.
-
Makadasig nga mga pulong o hugpong sa mga pulong. Mahimong markahan sa mga estudyante o irekord ang mga hunahuna bahin sa mga pulong o hugbong sa mga pulong nga makadasig o makahuloganon ngadto kanila.
-
Mahangturong mga kamatuoran, mga pagdapit, ug gisaad nga mga panalangin. Ang mga estudyante mahimong mangita sa mahangtorong mga kamatuoran, mga pagdapit, ug gisaad nga mga panalangin nga makita diha sa pakigpulong. Pwede nilang markahan ang matag usa niini sa lainlaing paagi, o mahimo nilang irekord kini diha sa ilang mga journal ubos sa tulo ka managlahing kolum.
Indibidwal nga patuon. Ang mga estudyante kasagaran magmalamposon sa pagtuon nga sila ra. Dapita ang mga estudyante nga tun-an ang mga porsiyon sa pakigpulong ug dayon ireport ngadto sa klase o sa gagmayng grupo kon unsay ilang nakit-an.
Pagtuon diha sa gagmayng mga grupo. Pwede nimong iasayn ang mga estudyante nga magtuon diha sa gagmayng mga grupo. Mahimong magpasabot kini nga magpuli-puli sila sa pagbasa sa mga parapo, o maminaw silang tanan samtang magbasa ang usa ka sakop sa grupo.
Gamita ang audio o bidyo sa pakigpulong. Pwede nimong i-play ang audio o bidyo sa mga porsiyon sa pakigpulong nga para nimo labing importante alang sa imong mga estudyante nga tun-an. Ikonsiderar ang pagdapit sa mga estudyante sa pagsunod gamit ang giprinta o digital nga bersiyon sa pakigpulong. Pwede nilang markahan ang mga pamahayag nga motubag og piho nga pangutana o nga makita nila nga personal nga makahuloganon. Mahimo usab nilang irekord ang bisan unsang mga hunahuna o mga impresyon samtang magtuon sila.
Butangi og numero ang mga parapo ug ilibot ang pakigpulong. Isulat o i-type ang mga numero sa mga parapo diha sa kopya sa pakigpulong. Hatagi og kopya ang kada estudyante ug dapita sila nga mopili og usa ka butang nga pangitaon. Pwedeng basahon sa mga estudyante ang usa o daghang parapo, nga markahan ug magsulat og mubo nga mga sulat diha sa margin. Pwedeng ipasa sa sunod nga estudyante ang papel, nga sundon ang susama nga sumbanan. Human nila matun-an ang tanang parapo, iuli ang papel sa orihinal nga estudyante ug ipatan-aw nila ang mga panabot nga gipakigbahin sa laing mga sakop sa klase.
Gikutlo o may kalabotan nga mga kasulatan. Pwedeng pangitaon sa mga estudyante ang mga kasulatan nga gikutlo diha sa pakigpulong o sa mga endnote. Mahimo nilang basahon ang mga bersikulo ug magsulat og mubo nga sulat kon sa unsang paagi nakatabang ang pagkigpulong kanila aron mas masabtan ang gikutlo nga mga kasulatan o sa unsang paagi nakatabang nila ang gikutlo nga mga kasulatan nga mas masabtan ang mensahe sa pakigpulong. Mahimong markahan sa mga estudyante ang mga bersikulo sa ilang mga kasulatan o i-link kini diha sa Librarya sa Ebanghelyo.
Mga Pamaagi sa pagpalawom sa pagsabot
Ang katuyoan niini nga leksiyon mao ang pagtabang sa mga estudyante nga pamalandongan ug hisgotan ang pakigpulong nga ilang gitun-an. Pwede nimong gamiton ang imong mga ideya o usa o daghan sa mosunod nga mga kalihokan aron tabangan ang mga estudyante nga moapil sa panaghisgot. Ikonsiderar ang pag-follow up og mga pangutana samtang mopakigbahin ang mga estudyante. Kini nga opsiyon pwedeng himoon sa tinagsa-tagsa, naay pares, o sa gamayng grupo.
Motutok ngadto ni Jesukristo. Kon ang imong mga estudyante nagtuon sa pakigpulong nga mangita og makapadasig nga mga kamatuoran mahitungod ni Jesukristo, nan ikonsiderar ang pagpapilit og litrato Niya diha sa pisara. Dapita ang mga estudyante sa pagsulat palibot sa litrato kon unsay ilang nakit-an mahitungod Kaniya diha sa pakigpulong. Mahimo dayon nimong dapiton sila sa pagpakigbahin kon unsay ilang gisulat ug sa unsang paagi kana nakatabang nila nga mas makahibalo, mahigugma, o magtinguha nga mosunod ni Jesukristo.
Pagdrama-drama. Ang mga estudyante mahimong maghunahuna og usa ka tawo nga nangutana nila nga may kalabotan sa pakigpulong. Mahimo silang magpraktis sa pagtubag niana nga higala base sa unsay ilang nakat-onan sa pakigpulong. O, kon gigamit nimo ang “Mga paagi sa pagtabang nga may kalabotan nga senaryo” nga sugyot, nan ang mga estudyante magdrama-drama [role-play] kauban ang partner o gamayng grupo kon unsaon nila pagtabang ang tawo diha sa senaryo gamit ang ilang nakat-onan.
Tudloi ang usag usa. Ang mga estudyante mahimong magtudlo sa usag usa kon sa unsang paagi ang mensahe gikan sa pakigpulong may kalabotan o makahuloganon ngadto kanila. O pwede silang mopakigbahin sa usag usa kon unsay ilang nakat-onan mahitungod sa hilisgotan ug sa unsang paagi ang ilang nakat-onan nakatabang nila nga mas mosunod ni Jesukristo.
Pag-andam og pakigpulong. Pwede nimong dapiton ang mga estudyante nga maghimo og tulo hangtod sa lima ka minuto nga pakigpulong o leksiyon nga nagtudlo sa mensahe nga ilang gitun-an. Pwedeng ilakip sa mga estudyante ang ilang personal nga kasinatian o dugang mga pakisayran sa kasulatan nga nagsuporta sa mensahe. Pwede silang magpraktis nga ipakigbahin ang ilang pakigpulong sa usa ka pares, gamayng grupo, o sa klase.
Irekord ang imong mga hunahuna ug mga pagbati. Ikonsiderar ang pagdapit sa mga estudyante nga isulat ang ilang mga hunahuna o mga pagbati samtang magtuon sila sa pakigpulong. Pwedeng irekord sa mga estudyante ang bisan unsang aksiyon nga giaghat sa Espiritu nga himoon nila. Kon angay, pwede nimong hangyoon ang andam nga mga estudyante sa pagpakigbahin.
Paghimo og usa ka butang. Gamit ang ilang nakat-onan sa pakigpulong, ang mga estudyante mahimong dunay panahon sa paghimo og hulagway, drowing, poster, meme, post sa social media, ug uban pa. Magsilbi kining usa ka pahinumdom o usa ka butang nga makapadasig sa uban. Ang mga estudyante mahimong mopakigbahin ngadto sa klase o diha sa gagmayng grupo sa ilang gihimo.
Ipakigbahin sa uban. Mahimo nimong awhagon ang mga estudyante nga ipakigbahin ang mensahe gikan sa pakigpulong ngadto sa ilang pamilya o mga higala. Samtang sila mopakigbahin, pwedeng ilakip sa mga estudyante ang yano nga pagpamatuod o pagdapit sa paglihok sa unsay gitudlo.
Mga paagi sa paggamit sa mensahe
Ang katuyoan niini nga seksiyon mao ang paghatag og higayon sa mga estudyante nga gamiton ang ilang nakat-onan ug gibati gikan sa pagtuon sa pakigpulong. Pwede nimong gamiton ang imong ideya o usa o daghan sa mosunod aron matubag ang mga panginahanglan sa imong mga estudyante.
Alang sa dugang nga mga ideya, tan-awa sa Awhaga ang mga tigkat-on sa pagpakigbahin sa mga kamatuoran nga ilang nakat-onan diha sa Pagpalambo sa mga Kahanas sa Magtutudlo sa ChurchofJesusChrist.org.
Ilha ug gamita ang mga pagdapit. Usahay, ang mga pakigpulong maglakip og usa o daghang pagdapit. Mahimo nimong dapiton ang mga estudyante sa pag-ila niini nga mga pagdapit ug mainampoong ikonsiderar ang ilang gibati kon unsay ipabuhat sa Ginoo kanila sa paggamit sa usa ka pagdapit. Pwede usab nilang ikonsiderar kon sa unsang paagi ang pagdrama-drama niana nga pagdapit nakatabang nila nga mas mapaduol sa Langitnong Amahan ug ni Jesukristo.
Lihoka ang mga pag-aghat. Awhaga ang mga estudyante sa paglihok sa mga impresyon nga ilang nadawat samtang nagtuon sa pakigpulong. Mibati tingali sila nga kinahanglang mohimo og piho nga kausaban sa ilang kinabuhi, aron makatakda o makakab-ot og personal nga tumong, o aron mapakigbahin ang mensahe ngadto sa laing tawo.
Paghimo og plano. Pwedeng tubagon sa mga estudyante ang mga pangutana sama sa mosunod diha sa usa ka journal o digital nga device sa pagtabang nila nga magamit ang ilang nakat-onan:
-
Unsay akong plano nga buhaton?
-
Nganong kinahanglan nakong buhaton kini?
-
Kanus-a nako kini buhaton?
-
Kang kinsa ko moduol aron motabang nako?
-
Sa unsang paagi ang Manluluwas motabang nako?