“Pag-apil sa Buhat sa Templo ug sa Family History: ‘Motungas sa Bukid sa Zion ang mga Madaogon,’” Manwal sa Magtutudlo sa Seminary sa Daang Tugon (2026)
“Pag-apil sa Buhat sa Templo ug sa Family History: ‘Motungas sa Bukid sa Zion ang mga Madaogon,’” Manwal sa Magtutudlo sa Seminary sa Daang Tugon
Pagpangandam alang sa Templo: Leksiyon 204
Pag-apil sa Buhat sa Templo ug sa Family History
“Motungas sa Bukid sa Zion ang mga Madaogon”
Manluluwas, Manunubos, ug Tigluwas ang mga titulo nga nagpasabot ni Jesukristo isip Usa nga dinihogan sa Langitnong Amahan sa pagluwas kanato gikan sa atong pagkapukan nga kahimtang (tan-awa sa Isaias 61:1–3). Ang Manluluwas nagdapit nato sa pag-apil Kaniya sa Iyang buhat isip ang “mga manluluwas” (tan-awa sa Abdias 1:21) samtang kita moapil sa pagluwas sa atong patay na nga mga katigulangan. Kini nga leksiyon makatabang sa mga estudyante nga magtakda og tumong nga mahimong sama sa Manluluwas pinaagi sa pag-apil sa buhat sa templo ug sa family history.
Pagpangandam sa estudyante: Dapita ang mga estudyante nga mohimo og usa ka butang nga may kalabutan sa buhat sa templo ug family history, sama sa usa sa mosunod:
Paghimog account sa FamilySearch.org.
Paggahin og pipila ka minuto sa pagsusi sa impormasyon bahin sa imong pamilya sa FamilySearch.org.
Pangitaa ang usa ka ngalan sa imong mga katigulangan nga nagkinahanglan pang kompletohon ang mga ordinansa diha sa templo.
Pangutana sa ginikanan o apohan nga ipakigbahin ang usa ka butang bahin sa ilang kinabuhi o bahin sa usa ka katigulangan.
Posibleng mga Kalihokan sa Pagkat-on
Sa pagluwas
Ikonsiderar ang pagsugod sa klase pinaagi sa pagsulat sa pulong nga Pagluwas diha sa pisara.
Dayon ipakita ang hulagway ni Martin ug Willie nga nagkariton nga mga pioneer ug dapita ang mga estudyante sa pagpakigbahin sa mga detalye gikan sa mga hulagway nga nagpakita og panginahanglan sa pagluwas. O pwede nimong pangutan-on ang mga estudyante sa unsay ilang nahibaloan mahitungod sa panghitabo nga nagpasabot niin nga hulagway. Ang mosunod nga summary mahimong makatabang.
Gikan sa 1856 hangtod 1860, liboan ka mga pioneer nga mga Santos sa Ulahing mga Adlaw mibiyahe ngadto sa Walog sa Salt Lake gamit ang mga kariton. Sa Oktubre 1856, si Brigham Young mipadala og mga tigluwas sa pagtabang sa Martin ug Willie nga mga company nga nagkariton nga gatosan ka kilometro pa gihapon ang gilay-on nga nagkaduol ang tingtugnaw.
Si Bishop W. Christopher Waddell sa Presiding Bishopric mipakigbahin sa mosunod:
Usa ka sakop sa pundok ni Willie mihulagway sa desperado nga sitwasyon sa wala pa ang pag-abot sa unang grupo nga moluwas. Siya mipakigbahin, “[Sa dihang] ingon og mawala na ang tanan, … ug hapit wala nay rason nga magpadayon pa sa pagpaningkamot nga mabuhi, sama sa usa ka kilat sa mahayag nga panganod, ang Dios mitubag sa among mga pag-ampo. Ang pundok sa tigluwas, nga nagdala og pagkaon ug mga suplay … , nakit-an sa unahan. … Nagpasalamat gayod kami sa among pagkaluwas.”
Kining mga tigluwas mga bayani ngadto sa mga pioneer, mirisgo sa ilang kaugalingong mga kinabuhi sa grabe nga mga kondisyon sa panahon aron sa pagluwas sa kadaghanan kutob sa mahimo ngadto sa luwas nga kahimtang. (“Labaw Pa sa usa ka Bayani,” Liahona, Nob. 2023, 89–90)
-
Kon usa ka niining mga natanggong nga mga pioneer, nganong gikonsiderar man nimo nga kining mga tigluwas mga bayani?
Ikonsiderar ang pagpakita og usa ka litrato sa usa sa imong mga katigulangan. Pwede nimong ipakigbahin gamay ngadto sa mga estudyante ang mahitungod niini nga katigulangan.
Sa samang paagi, ang Langitnong Amahan ug si Jesukristo mihangyo kanato sa pagluwas sa atong patay na nga mga katigulangan. Mahimo nato kini pinaagi sa pag-apil sa buhat sa templo ug sa family history.
-
Sa unsang paagi kaha ang atong patay na nga mga katigulangan nagkinahanglan nga luwason sama sa mga pioneer nga nagkariton?
Kon gikinahanglan, pwede nimong ipasabot nga kitang tanan nagkinahanglan sa mahinungdanong mga ordinansa aron makabalik ngadto sa Langitnong Amahan, lakip ang bunyag, pagdawat sa gasa sa Espiritu Santo, ug ang pagtuga sa templo. Ang atong patay na nga mga katigulangan dili makadawat niini nga mga ordinansa sa ilang kaugalingon. Ang Ginoo nag-andam og paagi para nila aron makadawat niini nga mga ordinansa pinaagi buhat sa templo alang sa mga patay (tan-awa sa Doktrina ug mga Pakigsaad 128:15).
Pamalandongi ang mosunod:
-
Unsa ang inyong gibati bahin sa pag-apil diha sa buhat sa templo ug family history? Ngano man?
Sa tibuok niini nga leksiyon, irekord ang bisan unsang espiritwal nga mga pag-aghat nga makatabang ninyo sa pag-ila sa mga paagi nga kamo mahimong usa sa mga tigluwas sa Langitnong Amahan ug ni Jesukristo alang sa imong mga katigulangan.
Mga Manluluwas sa Bukid sa Zion
Ikonsiderar ang pagdrowing og yano nga hulagway sa usa ka bukid ug usa ka templo ug dapita ang mga estudyante sa pagbuhat sa ingon diha sa ilang mga journal sa pagtuon. Sulati ang drowing og Bukid sa Zion. Dayon i-summarize o basaha ang mosunod sa pagtabang sa mga estudyante nga makasabot sa konteksto alang sa Abdias.
Human sa pagkabihag sa Jerusalem, ang propeta nga si Abdias nanagna nga daghan sa mga kaliwat ni Esau (ang kaluha nga igsoong lalaki sa propeta nga si Jacob) malaglag tungod sa pagkadaotan. Gipanagna usab ni Abdias ang paningkamot sa pagluwas alang niining mga kaliwat ug daghan pang uban. Mahimong makatabang ang pagkasayod nga niini nga bersikulo, ang “Bukid sa Zion” mahimong magpasabot sa siyudad sa Jerusalem ug sa templo niini.
Basaha ang Abdias 1:17, 21, nga mangita og mga pulong nga magpahinumdom nimo sa templo.
Mahimong ipasabot sa mga estudyante nga ang mga pulong sama sa pagluwas, pagkabalaan, o mga manluluwas. Dapita ang mga estudyante sa pagmarka sa hugpong sa mga pulong nga “motungas sa Bukid sa Zion ang mga madaogon” (Abdias 1:21).
-
Unsa kaha ang buot ipasabot sa pagkahimong “manluluwas … sa bukid sa Zion” (Abdias 1:21)?
Si Elder Gerrit W. Gong sa Korum sa Napulog Duha ka Apostoles mipasabot:
Ang Ginoo mihatag nato og balaang oportunidad nga mas mahisama Kaniya samtang kita motanyag nga mo-proxy sa makaluwas nga mga ordinansa sa templo nga gikinahanglan sa uban apan dili makahimo nga sila mismo. Mas makompleto kita ug mahingpit samtang kita mahimo nga mga “manluluwas … sa bukid sa Zion” (“Malipayon ug Hangtod sa Hangtod”, Liahona, Nob. 2022, 85)
Tingali kinahanglan nimong ipasabot nga ang puli nagpasabot sa pagrepresentar og laing tawo.
Mahimong isulat sa mga estudyante ang ilang tubag sa mosunod nga pangutana ubos sa ilang gidrowing nga templo.
-
Unsay inyong nakat-onan gikan sa Abdias ug ni Elder Gong mahitungod sa pagkahimong “manluluwas … sa bukid sa Zion” (Abdias 1:21)?
Bisan og ang mga estudyante mogamit og lainlaing mga pulong, mahimo tingali silang mopakigbahin sa mosunod nga kamatuoran: Mahimo kitang mas sama sa Manluluwas kon atong pangitaon ang atong mga katigulangan ug ipahigayon ang makaluwas nga mga ordinansa alang nila diha sa templo.
-
Sa unsang paagi nga ang buhat sa templo alang sa imong patay na nga mga katigulangan nga itandi sa gamay nga paagi sa unsay gibuhat sa Manluluwas alang kanato?
Mahimo nimong ipasabot nga pinaagi sa Iyang Pag-ula, ang Manluluwas makaluwas kanato gikan sa sala ug kamatayon—butang nga dili nato mahimo sa atong kaugalingon (tan-awa sa Alma 34:8–12). Sa samang paagi, makatabang kita sa pagluwas sa atong mga katigulangan samtang atong ipahigayon ang makaluwas nga mga ordinansa alang kanila—butang nga dili nila mahimo sa ilang kaugalingon.
-
Unsa nga sama kang Kristo nga mga kinaiya ang atong mapalambo samtang atong pangitaon ang atong mga katigulangan ug ipahigayon ang mga ordinansa alang kanila diha sa templo?
Sa pagsugod
Bahina ang mga estudyante ngadto sa gagmayng mga grupo ug dapita sila sa pagpili og numero tali sa 1 ug 4. Dayon iapud-apod ang handout “Upat ka Paagi sa Pag-apil sa Buhat sa Templo ug sa Family History.” Dapita ang matag grupo sa pagbasa sa parapo nga motukma sa numero nga ilang gipili ug dayon hisgoti ang mga pangutana sa ubos diha sa ilang grupo. O mahimo nilang basahon ang tanang upat ka paagi ug pilia ang usa nga gusto nilang tutokan.
Ipakita ang mosunod nga mga pangutana. Mahimong isulat sa mga estudyante ang ilang mga tubag palibot sa ilang gidrowing nga templo.
-
Unsa ang practical nga mga paagi nga mahimong buhaton sa usa ka tin-edyer sama sa gisugyot ni Elder Gong?
-
Unsa ang ubang paagi nga kita mahimong moapil sa buhat sa templo ug sa family history? (Pwede nimong iapil ang mga kasinatian nimo o sa uban.)
Dapita ang mga estudyante nga ipakigbahin ang ilang mga tubag ngadto sa klase. Ang mga estudyante mahimong mosulat sa ilang mga tubag palibot sa gidrowing nga templo diha sa pisara. Mahimo kang mangita og dugang nga mga ideya diha sa artikulo nga “Family History Is for Everyone: 9 Fun Ways to Participate [Ang Family History Para sa Tanan: 9 ka Makalingaw nga Paagi sa Pag-apil],” anaa sa ChurchofJesusChrist.org.
Kon duna pay oras, gamita ang Andam na nga mga Ordinansa nga feature sa FamilySearch.org aron ipakita sa mga estudyante kon unsaon sa pagreserbar og mga ngalan alang sa templo.
-
Unsa nga mga panalangin o mga kasinatian ang inyong nasinati samtang miapil ka sa buhat sa templo ug sa family history?
Inyong tumong
Tinguhaa ang tabang sa Espiritu Santo samtang maghimo kamo og tumong diha sa inyong journal sa paghimo og usa sa nakalista nga mga sugyot diha sa pisara. Ang mosunod nga mga ideya mahimong makatabang nimo:
-
Giunsa ug kanus-a kamo makahimo sa buhat sa family history
-
Kinsa ang makatabang ninyo
-
Sa unsang paagi kini nga tumong makatabang ninyo nga mahimong mas mahisama ni Jesukristo
Ikonsiderar ang paghisgot nga daghang ward ug branch ang adunay mga consultant sa templo ug family history nga makatabang sa mga estudyante nga makasugod sa pag-apil sa buhat sa templo ug sa family history.
Taposa pinaagi sa pagpahayag sa pasalig sa abilidad sa imong mga estudyante na mahimong mga tigluwas ug “mga manluluwas … sa bukid sa Zion” (Abdias 1:21).