“Pagpangandam nga Mosulod sa Templo nga Takos: Ang Rekomend sa Templo,” Manwal sa Magtutudlo sa Seminary sa Daang Tugon (2026)
“Pagpangandam nga Mosulod sa Templo nga Takos: Ang Rekomend sa Templo,” Manwal sa Magtutudlo sa Seminary sa Daang Tugon
Pagpangandam alang sa Templo: Leksiyon 203
Pagpangandam nga Mosulod sa Templo nga Takos
Ang Rekomend sa Templo
Sa bag-ohay nga mga tuig ang Ginoo mipadali sa pagtukod sa mga templo sa tibuok kalibotan. Karon labaw pa kay sa kaniadto, ang mga miyembro sa Iyang Simbahan adunay mas dako nga mga oportunidad sa pagsulod sa Iyang balaan nga balay kon sila andam na ug takos sa pagbuhat sa ingon. Kini nga leksiyon makatabang sa mga estudyante nga mamalandong sa ilang katakos sa pagsulod sa balaan nga templo sa Langitnong Amahan ug ni Jesukristo.
Pagpangandam sa estudyante: Aron tabangan ang mga estudyante nga mangandam sa pagkat-on og dugang bahin sa mga sumbanan nga gitakda sa Ginoo aron makasulod sa templo, dapita sila nga basahon ang mga pangutana sa rekomend sa templo nga anaa sa apendiks sa Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022]. Dapita sila nga mosulod sa klase nga adunay bisan unsa nga mga pangutana bahin niini nga mga sumbanan.
Posibleng mga Kalihokan sa Pagkat-on
Girekomendar ngadto sa Ginoo
Aron tabangan nga ikonsiderar sa mga estudyante ang mga sumbanan sa Ginoo sa pagsulod sa Iyang balay, mahimo nimong dapiton sila sa paghunahuna sa ilang tubag sa usa o daghan sa mosunod nga mga sitwasyon:
-
Kinsa ang inyong irekomendar sa:
-
Paghimo og importante nga patid sa soccer? Ngano man?
-
Pagtabang ninyo nga magtuon para sa umaabot nga test? Ngano man?
-
Pagkanta og solo? Ngano man?
-
Paghatag ninyo og mga direksiyon? Ngano man?
-
Si Elder Ronald A. Rasband sa Korum sa Napulog Duha ka Apostoles mipakigbahin sa usa isa iyang kasinatian sa pagbisita sa iyang ugangan nga hapit na matapos ang iyang kinabuhi. Samtang mibisita si Elder Rasband, ang bishop sa iyang ugangan mobiya na. Iyang gisaysay kon unsay sunod nga nahitabo:
Mihisgot ko ni Blaine [iyang ugangang lalaki], “Dili ba nindot nga ang bishop mobisita.”
Mitan-aw si Blaine kanako ug mitubag, “Mas labaw pa niana. Mihangyo ko sa bishop nga moanhi kay gusto kong mainterbyu alang sa akong rekomend sa templo. Gusto kong mopanaw nga girekomendar ngadto sa Ginoo.” Ug mao gayud ang iyang gibuhat! (“Girekomendar ngadto sa Ginoo,” Liahona, Nob. 2020, 23)
-
Unsa kaha ang gipasabot nga mahimong “girekomendar ngadto sa Ginoo”?
Kon ang mga estudyante wala maghisgot niini, pwede nimong ipakigbahin nga isip kabahin sa mahigugmaong plano sa Langitnong Amahan para Iyang mga anak, Siya ug ang Manluluwas, nga si Jesukristo, miestablisar og mga sumbanan sa pagsulod sa templo. Ang pagsunod niini nga mga sumbanan morekomendar kanato nga takos nga mosulod sa Ilang balay.
Samtang magtuon kita karon, hatagi og maayo nga pagtagad ang mga pagbati ug mga hunahuna nga moabot sa inyong hunahuna ug kasingkasing pinaagi sa Espiritu Santo (tan-awa sa Doktrina ug mga Pakigsaad 8:2–3). Mao kin ang paagi sa Espiritu Santo nga makatabang nga mailhan ang unsay maayo ninyong buhaton, ug mga paagi nga mahimong molambo ang inyong mga paningkamot sa pagsunod sa Ilang mga sumbanan nga takos nga mosulod sa Ilang balay.
Pagsulod sa templo aron mosimba sa Ginoo
Ang mosunod nga pamahayag ug mga pakisayran sa kasulatan makatabang sa mga estudyante nga makita nga ang Ginoo adunay giestablisar nga mga sumbanan sa pagsulod sa Iyang balang balay. Ikonsiderar ang pagbahin sa mga estudyante ngadto sa tulo ka grupo ug pag-asayn sa matag sakop sa grupo nga basahon ang usa sa mga pakisayran sa kasulatan.
Basaha ang mosunod nga pamahayag ni Elder Ronald A. Rasband sa Korum sa Napulog Duha ka Apostoles ug ang mga kasulatan nga nakalista sa ubos, nga mangita sa unsay inyong makat-onan mahitungod sa pagsulod sa balay sa Ginoo:
Ang templo mao ang balay sa Ginoo ug dangpanan gikan sa kalibotan. Ang Iyang Espiritu molukop niadtong kinsa mosimba sa sulod nianang sagrado nga mga bongbong. Gitakda Niya ang mga sumbanan diin kita mosulod isip Iyang mga bisita. (“Girekomendar ngadto sa Ginoo,” Liahona, Nob. 2020, 23)
Mga Salmo 24:3–4 (“bungtod sa Ginoo” mahimong magrepresentar sa templo)
Jeremias 7:1–3 (si Jeremias mao ang propeta atol sa panahon sa pagkadaotan sa Juda.)
Ezequiel 44:4–5, 9 (“timan-i pag-ayo” sa bersikulo 5 mahimong nagpasabot sa “hatagi og pagtagad ang”; “walay sirkonsisyon sa kasingkasing” sa bersikulo 9 mahimong magpasabot sa dili pagbulag sa ilang kaugalingon gikan sa sala ug sa kalibotan)
-
Unsa nga mga kamatuoran ang mahitungod sa pagsulod sa balay sa Ginoo ang mahimo natong makat-onan gikan sa pamahayag ni Elder Rasband ug niini nga mga tudling sa kasulatan?
Mahimong ilhon sa mga estudyante ang nagkalain-laing mga kamatuoran sama sa:
Ang Ginoo nagtakda sa mga sumbanan sa katakos sa pagsulod sa Iyang panimalay.
Ang Ginoo misugo sa mga lider sa pagkapari sa pagseguro nga mosulod kita sa Iyang balay nga takos.
Mahimo nimong ipasabot nga samtang ang tanan gidapit sa pagpangandam sa pag-adto sa templo, kinahanglan natong matuman ang sumbanan sa katakos sa Ginoo aron makasulod sa Iyang balay.
-
Sa unsang paagi ang mga sumbanan sa Ginoo sa pagsulod sa Iyang templo usa ka ebidensya sa Iyang gugma ug mga tinguha alang kanato?
Samtang tubagon sa mga estudyante ang miagi nga pangutana, tabangi sila nga makaila nga ang pagsunod sa mga sumbanan sa Ginoo makatabang nato nga mahimong sama Kaniya, makapahimo natong makita sa unsay maayo natong gibuhat sa atong mga paningkamot nga modangop Kaniya, ug mopanalangin kanato sa Iyang Espiritu ug kalinaw.
Mga pangutana sa rekomend sa templo
Aron matabangan ang mga estudyante nga masukod kon unsay ilang nahibaloan mahitungod sa mga gikinahanglan sa Ginoo aron makasulod sa Iyang balay, dapita ang mga estudyante sa pagrebyo sa mga pangutana sa rekomend sa templo diha sa apendiks sa Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022] sa Librarya sa Ebanghelyo. Sa laing paagi, pwede nimong iapud-apod ang mga kopya sa giya nga basahon, mga pahina 36–37 gikan sa Alang sa Kalig-on sa Kabatan-onan nga giya nga basahon o direktang isulat ang mga pangutana sa pisara.
Paklia ngadto sa mga pangutana sa rekomend sa templo nga makita sa apendiks sa Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022] ug buhata ang mosunod:
-
Basaha tagsa-tagsa ang mga pangutana sa rekomend sa templo ug pamalandongi (1) kon nakasabot ba kamo sa unsay gipangutana sa mga pangutana ug (2) sa unsang paagi ang pagsunod niini nga mga sumbanan mahimong moandam kanato sa pagsulod sa balaang balay sa Ginoo.
-
Pagpili og usa sa mosunod nga mga pangutana nga gusto pa ninyong makat-onan.
Pag-apud-apod og kopya sa handout nga giulohan og “Mga Pangutana sa Rekomend sa Templo” sa matag estudyante. Dapita sila sa pagsulat sa pangutana nga ilang nailhan diha sa kahon ibabaw sa handout. Mahimo dayong kompletohon sa mga estudyante ang nahibilin sa handout. Dugang nga tabang sa pagsabot sa pipila sa mga pangutana nga makita diha sa Dugang nga mga Kapanguhaan nga seksiyon niini nga leksiyon sa Librarya sa Ebanghelyo.
Hatagi ang mga estudyante og kahigayonan nga ipakigbahin ang mga panabot nga ilang naangkon gikan sa Espiritu Santo sa ilang pagtuon. Pwede nimo kining buhaton pinaagi sa pag-organisar nila ngadto sa gagmayng mga grupo ug pagdapit sa matag tawo sa pagpakigbahin sa ilang nakat-onan gikan sa ilang pagtuon. Mahimo nilang ipasabot kon sa unsang paagi ang ilang nakit-an nakatabang nila nga makasabot sa mga sumbanan sa Ginoo sa pagsulod sa Iyang balay. Awhaga ang mga estudyante sa pagrekord sa mga panabot nga ilang nakat-onan gikan sa ilang mga klasmeyt sa likod sa ilang handout.
-
Sa unsang paagi nga ang pagsunod sa mga sumbanan sa Ginoo aron makasulod sa Iyang balay makatabang nato nga mahimong mas sama Kaniya?
-
Sa unsang paagi kini nga mga sumbanan ebidensiya sa Iyang gugma?
Personal nga pagpamalandong
Samtang ang mga estudyante mamalandong sa ilang katakos sa pagsulod sa templo, ikonsiderar kon unsay bation sa imong mga estudyante. Unsa kaha ang pipila sa ilang mga kabalaka? Unsaon nimo pagpangandam sa pagtabang nila nga mobati sa gugma sa Langitnong Amahan ug sa kaseguroan sa Manluluwas nga pinaagi Kaniya, sila mahimong takos? Ang pagbasa sa mosunod nga pamahayag maoy usa ka paagi sa pagtabang sa mga estudyante nga mobati og paglaom nga, sila mahimong takos nga mosulod sa balay sa Ginoo uban ang tabang sa Manluluwas.
Si Elder Patrick Kearon sa Korum sa Napulog Duha ka Apostoles mitudlo kon sa unsang paagi ang tinguha sa atong Langitnong Amahan alang Iyang mga anak sa pagsulod sa Iyang gingharian. Ikonsiderar kon sa unsang paagi nga ang iyang gipakigbahin magamit usab sa Iyang tinguha nga ang Iyang mga anak makasulod sa Iyang balaan nga balay.
Akong mga higala, akong mga isigka disipulo sa dalan sa mortal nga kinabuhi, ang matahom nga plano sa atong Amahan, gani ang Iyang “talagsaon” kaayo nga plano, gidisenyo sa pagdala kaninyo balik sa panimalay, dili ang pagpahilayo kaninyo. Walay usa nga nagtukod og ali sa karsada ug nagbutang og usa ka tawo didto aron mopabalik kaninyo ug moabog kaninyo palayo. Sa pagkatinuod, ang nabali gayod hinuon kini. Ang Dios walay hunong sa pagtinguha kaninyo. “Gusto siya nga ang tanan Niya nga mga anak mopili sa pagbalik ngadto Kaniya,” ug Iyang gibuhat ang tanang posible nga paagi sa pagdala kaninyo og balik. (“Ang Tuyo sa Dios Mao ang Pagdala Kaninyo Balik sa Panimalay,” Liahona, Mayo 2024, 87) (time code 2:16 hangtod 3:01)
Seguroa nga ang mga estudyante adunay igong panahon sa pagbuhat sa mosunod nga pagpamalandong.
Pamalandongi ang inyong personal nga katakos sa pagsulod sa balay sa Ginoo. Usa ka paagi nga mahimo ninyo kini mao ang pagbasa pag-usab sa mga pangutana sa rekomend sa templo ug hilom nga tubagon ang matag usa sa inyong kaugalingon. Sa inyong journal sa pagtuon, o sa likod sa inyong handout, tubaga ang mosunod nga pangutana:
-
Ngano kaha nga ang Langitnong Amahan ug si Jesukristo gusto nga kamo makahibalo, mobati, o mobuhat?
Awhaga ang mga estudyante sa ilang mga paningkamot nga mahimo o magpabilin nga takos nga mosulod sa templo ug sa kaandam sa Manluluwas nga motabang kanato nga maandam sa pagsulod sa Iyang balay.