« ការស្វែងរកវិវរណៈផ្ទាល់ខ្លួនសម្រាប់សំណួររបស់ខ្ញុំ ៖ ការយល់ដឹងពីរបៀបដែលព្រះអម្ចាស់មានបន្ទូលមកកាន់អ្នក » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការស្វែងរកវិវរណៈផ្ទាល់ខ្លួនសម្រាប់សំណួររបស់ខ្ញុំ ៖ ការយល់ដឹងពីរបៀបដែលព្រះអម្ចាស់មានបន្ទូលមកកាន់អ្នក » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ចំណេះចំណានខាងគោលលទ្ធិ ៖ ការស្វែងរកចម្លើយចំពោះសំណួររបស់ខ្ញុំ ៖ មេរៀនទី ១៦២
ស្វែងរកវិវរណៈផ្ទាល់ខ្លួនសម្រាប់សំណួររបស់ខ្ញុំ
ការយល់ដឹងពីរបៀបដែលព្រះអម្ចាស់មានបន្ទូលមកកាន់អ្នក
ព្រះវរបិតាសួគ៌សព្វព្រះទ័យបង្ហាញពីគំនិត និងព្រះឆន្ទៈរបស់ទ្រង់ដល់បុត្រាបុត្រីរបស់ទ្រង់ ។ ការដឹងអំពីការណ៍នេះអាចជួយនៅពេលយើងស្វែងរកចម្លើយចំពោះសំណួររបស់យើង ធ្វើការសម្រេចចិត្តសំខាន់ៗ ហើយព្យាយាមធ្វើជាសិស្សដ៏ប្រសើររបស់ព្រះយេស៊ូវគ្រីស្ទ ។ មេរៀននេះអាចជួយសិស្សឲ្យយល់អំពីរបៀបដែលពួកគេអាចទទួលបានការណែនាំ និងវិវរណៈមកពីព្រះវរបិតាសួគ៌តាមរយៈព្រះវិញ្ញាណបរិសុទ្ធ ។
សកម្មភាពរៀនសូត្រដែលអាចមាន
ការស្គាល់សំឡេង
នៅពេលសិស្សចូលមកក្នុងថ្នាក់ សូមចាត់ពួកគេពីរបីនាក់នូវលេខផ្សេងៗគ្នាជាមួយនឹងការណែនាំដូចខាងក្រោម៖ « ពេលខ្ញុំហៅលេខរបស់អ្នក សូមនិយាយថា ‹ ព្រះអម្ចាស់មានបន្ទូលមកយើងតាមរយៈព្រះវិញ្ញាណបរិសុទ្ធ › » ។ ពន្យល់ថានៅពេលដែលលេខរបស់ពួកគេត្រូវបានហៅពួកគេអាចជ្រើសរើសនិយាយឃ្លាខ្សឹបៗ ឬជាសំឡេងធម្មតា ។
ដើម្បីចាប់ផ្តើមថ្នាក់ សូមអញ្ជើញសិស្សឲ្យបិទភ្នែក ។ ពន្យល់ថាពួកគេនឹងព្យាយាមកត់សម្គាល់មិត្តរួមថ្នាក់របស់ពួកគេដោយការស្តាប់សំឡេងរបស់ពួកគេ ។ ហៅលេខផ្សេងគ្នាម្តងមួយៗ ។ បន្ទាប់ពីសិស្សម្នាក់ៗដែលអ្នកហៅលេខនោះនិយាយឃ្លានោះហើយ សូមអញ្ជើញសិស្សផ្សេងទៀតនៅក្នុងថ្នាក់លើកដៃឡើង ប្រសិនបើពួកគេដឹងថាអ្នកណាជាអ្នកនិយាយ ។
បន្ទាប់មក សូមសួរសំណួរដូចខាងក្រោមនេះ ៖
-
តើវាងាយស្រួល ឬពិបាកកំណត់ថាអ្នកណាកំពុងនិយាយដែរឬទេ ? ហេតុអ្វី ?
-
ហេតុអ្វីបានជាវាពិបាកសម្រាប់ភ្ញៀវក្នុងថ្នាក់របស់យើងក្នុងការកំណត់អ្នកដែលនិយាយ ?
សូមបង្ហាញស្វ័យវាយតម្លៃខាងក្រោម ហើយអញ្ជើញសិស្សឲ្យគិតអំពីចម្លើយរបស់ពួកគេ ។
សូមពិចារណាពីចម្លើយរបស់អ្នកចំពោះសំណួរខាងក្រោម ។ អ្នកប្រហែលជាចង់កត់ត្រាគំនិតមួយចំនួនរបស់អ្នកទៅក្នុងសៀវភៅកំណត់ហេតុការសិក្សារបស់អ្នក ។
-
តើខ្ញុំមានទំនុកចិត្តប៉ុនណាក្នុងការស្គាល់ព្រះសូរសៀងរបស់ព្រះអម្ចាស់នៅក្នុងជីវិតរបស់ខ្ញុំ ?
-
តើខ្ញុំមានសំណួរអ្វីខ្លះអំពីការទទួលវិវរណៈពីព្រះវរបិតាសួគ៌ ?
សូមពិចារណាអំពីការថ្លែងទីបន្ទាល់ថា ព្រះវរបិតាសួគ៌ចង់មានបន្ទូលទៅកាន់បុត្រាបុត្រីរបស់ទ្រង់ម្នាក់ៗ ។ សូមពន្យល់ថា នៅពេលយើងស្វែងរកវិវរណៈ ទ្រង់នឹងជួយយើងបង្កើនទំនុកចិត្តរបស់យើងក្នុងការស្គាល់ព្រះសូរសៀងរបស់ទ្រង់ ហើយទទួលបានចម្លើយ និងការណែនាំពីទ្រង់ ។
សំឡេងតូចរហៀងៗ
ពេលរត់គេចពីមនុស្សដែលចង់បានជីវិតលោក ព្យាការីអេលីយ៉ាបានលាក់ខ្លួនក្នុងរូងភ្នំ ( សូមមើល ពង្សាវតារក្សត្រ ទី១ ១៩:១–១០ ) ។ កាលនៅទីនោះ ព្រះអម្ចាស់មានព្រះបន្ទូលទៅលោក ។
សូមអាន ពង្សាវតារក្សត្រ ទី១ ១៩:៩–១២ ដោយស្វែងរកអ្វីដែលអេលីយ៉ាបានរៀនអំពីរបៀបដែលព្រះអម្ចាស់ប្រាស្រ័យទាក់ទងជាមួយយើង ។
-
តើយើងរៀនអ្វីខ្លះអំពីព្រះអម្ចាស់ពីបទពិសោធន៍របស់អេលីយ៉ា ?
សូមជួយសិស្សឲ្យស្វែងរកថា វិធីមួយដែលព្រះអម្ចាស់ប្រាស្រ័យទាក់ទងជាមួយយើងគឺតាមរយៈសំឡេងតូចរហៀងនៃព្រះវិញ្ញាណបរិសុទ្ធ ។
សិស្សមួយចំនួនអាចឆ្ងល់ថាតើព្រះពិតជានឹងមានបន្ទូលទៅកាន់ពួកគេឬ ហើយប្រហែលជាមិនដឹងពីរបៀបដើម្បីដឹង នៅពេលទ្រង់ប្រាស្រ័យទាក់ទងនឹងពួកគេនោះទេ ។ សេចក្តីថ្លែងការណ៍ខាងក្រោម និងសកម្មភាពសិក្សាសម្រាប់ នីហ្វៃទី៣ ១១ ជួយដោះស្រាយកង្វល់ទាំងនេះ ។
ប្រធាន រ័សុល អិម ណិលសុន បានបង្រៀន ៖
យើងអាចអធិស្ឋានទៅព្រះវរបិតាសួគ៌របស់យើង ហើយទទួលបានការណែនាំ និងការដឹកនាំ ។… ប្រសិនបើយើងពិតជាទទួលព្រះវិញ្ញាណបរិសុទ្ធ ព្រមទាំងរៀនដើម្បីញែកដឹង ហើយយល់អំពីការបំផុសគំនិតរបស់យើង នោះយើងនឹងត្រូវបានណែនាំនៅគ្រប់បញ្ហា ទោះតូច ឬធំក្ដី ។
…តើព្រះពិតជា ចង់ មានបន្ទូលមកកាន់បងប្អូនមែនទេ ? មែនហើយ ! ( « Revelation for the Church, Revelation for Our Lives » Liahona ខែឧសភា ឆ្នាំ២០១៨ ទំព័រ ៩៤–៩៥ )
សូមពិចារណាចាប់គូសិស្សឲ្យអានខគម្ពីរខាងក្រោម ។ ដើម្បីជួយសិស្សសិក្សា សូមអញ្ជើញពួកគេឲ្យផ្អាកបន្ទាប់ពីអានខគម្ពីរនីមួយៗ ហើយពិភាក្សាជាមួយដៃគូអានរបស់ពួកគេអំពីអ្វីដែលពួកគេរកឃើញ ដែលអាចជួយយើងស្ដាប់ និងស្គាល់វិវរណៈមកពីព្រះ ។
សូមអាន នីហ្វៃទី៣ ១១:១–៧ ដោយរកមើលអ្វីដែលយើងអាចរៀនអំពីការឮ និងស្គាល់វិវរណៈមកពីព្រះ ។
-
តើអ្នកបានរៀនអ្វីខ្លះអំពីការទទួលវិវរណៈចេញពីដំណើររឿងនេះ ?
ការស្គាល់វិវរណៈមកពីព្រះ
សូមពន្យល់ថា វិធីមួយដែលយើងអាចរៀនស្គាល់ព្រះសូរសៀងរបស់ព្រះអម្ចាស់ក្នុងជីវិតរបស់យើង គឺដើម្បីយល់ពីវិធីផ្សេងៗដែលទ្រង់អាចប្រាស្រ័យទាក់ទងជាមួយយើង ។ ដើម្បីជួយរៀបចំសិស្សឲ្យរៀនពីរបៀបដែលព្រះអម្ចាស់អាចប្រាស្រ័យទាក់ទងជាមួយយើង សូមពិចារណាបង្ហាញពួកគេនូវទូរសព្ទឆ្លាតវៃ ឬបង្ហាញរូបភាពមួយ ហើយសរសេរសំណួរខាងក្រោមនៅលើក្ដារខៀន ។
-
តើមានវិធីណាខ្លះដែលអ្នកអាចទទួលសារតាមរយៈទូរសព្ទឆ្លាតវៃ ?
ចម្លើយដែលអាចធ្វើបានរួមមានការហៅទូរសព្ទ ការផ្ញើសារជាអក្សរ ការផ្ញើសារក្នុងកម្មវិធី និងសូម្បីតែរូបភាពដែលយើងជ្រើសរើសដើម្បីបង្ហាញនៅលើទូរសព្ទរបស់យើងក្តី ។ បន្ទាប់ពីការពិភាក្សាខ្លីមួយអំពីសំណួរខាងលើសូមលុបឃ្លា « ទូរសព្ទឆ្លាតវៃ » ហើយជំនួសវាដោយ « ព្រះវិញ្ញាណបរិសុទ្ធ » ។
-
តើមានវិធីអ្វីខ្លះដែលអ្នកអាចទទួលបានសារតាមរយៈព្រះវិញ្ញាណបរិសុទ្ធ ?
-
តើមានវិធីអ្វីខ្លះ ដែលការទទួលសារពីព្រះវិញ្ញាណបរិសុទ្ធខុសពីការទទួលសារនៅលើទូរសព្ទឆ្លាតវៃ ?
ប្រសិនបើអ្នកមានអារម្មណ៍ថា សកម្មភាពសិក្សាព្រះគម្ពីរខាងក្រោមនេះអាចជាការពិបាកសម្រាប់សិស្សរបស់អ្នក អ្នកអាចអានវគ្គទីមួយ ហើយសួរសិស្សអំពីអ្វីដែលខគម្ពីរបង្រៀនអំពីវិធីដែលយើងអាចដឹង នៅពេលព្រះកំពុងមានបន្ទូលមកយើងតាមរយៈព្រះវិញ្ញាណបរិសុទ្ធ ។ ប្រសិនបើអ្នកអានវគ្គបទគម្ពីរនេះ អ្នកអាចជួយសិស្សឃើញពីខគម្ពីរនេះថា យើងអាចដឹងថាទ្រង់កំពុងទំនាក់ទំនងតាមរយៈព្រះវិញ្ញាណបរិសុទ្ធ នៅពេលយើងមានអារម្មណ៍ថាមានប្រាជ្ញា ការយល់ដឹង ឬចំណេះដឹងកើនឡើង ។ បន្ទាប់មក សិស្សអាចសិក្សាបទគម្ពីរមួយចំនួនផ្សេងទៀតដែលមាននៅក្នុងនោះ ជាគូៗ ឬក្រុមតូចៗ ។ សិស្សមិនចាំបាច់សិក្សាបទគម្ពីរទាំងអស់នេះទេ ។
សូមសិក្សាសេចក្តីយោងខគម្ពីរមួយចំនួនខាងក្រោម ។ សម្រាប់សេចក្តីយោងនីមួយៗដែលអ្នកសិក្សា សូមកំណត់វិធីដែលយើងអាចដឹង នៅពេលដែលព្រះកំពុងមានបន្ទូលមកកាន់យើងតាមរយៈព្រះវិញ្ញាណបរិសុទ្ធ ។ សរសេរសេចក្តីយោងដែលអ្នកបានសិក្សា និងអ្វីដែលអ្នកបានរៀននៅក្នុងសៀវភៅកំណត់ហេតុការសិក្សារបស់អ្នក ។
និក្ខមនំ ៣១:៣
យ៉ូហាន ១៤:២៦–២៧
យ៉ូហាន ១៦:១៣
កាឡាទី ៥:២២–២៣
គោលលទ្ធិ និងសេចក្តីសញ្ញា ៦:២១–២៣
គោលលទ្ធិ និងសេចក្តីសញ្ញា ៨:២–៣
គោលលទ្ធិ និងសេចក្តីសញ្ញា ១១:១២–១៣
យ៉ូសែប ស្ម៊ីធ—ប្រវត្តិ ១:១១–១២
វិធីមួយដែលអ្នកអាចធ្វើសកម្មភាពពីមុនគឺបោះពុម្ពច្បាប់ចម្លងជាច្រើននៃសំណៅមេរៀនដែលភ្ជាប់មកជាមួយ ហើយកាត់ចេញរូបភាពទូរសព្ទឆ្លាតវៃនីមួយៗ ។ សរសេរសេចក្ដីយោងបទគម្ពីរផ្សេងៗគ្នាលើទូរសព្ទឆ្លាតវៃនីមួយៗ ហើយបិទវាពេញបន្ទប់ ។ សូមអញ្ជើញសិស្សឲ្យដើរជុំវិញបន្ទប់ ហើយសិក្សាសេចក្ដីយោងនោះពីរឬបី ។
អ្នកក៏អាចពិចារណាដាក់សេចក្តីថ្លែងការណ៍ខ្លីៗនៅលើទូរសព្ទឆ្លាតវៃមួយចំនួនអំពីរបៀបដែលព្រះវរបិតាសួគ៌ប្រាស្រ័យទាក់ទងជាមួយយើង ។ សេចក្តីថ្លែងការណ៍ដែលអាចមានត្រូវបានរកឃើញនៅក្នុង ធនធានបន្ថែមទាំងឡាយ នៃមេរៀននេះនៅក្នុងបណ្ណាល័យដំណឹងល្អ ។
សូមរៀបចំសិស្សជាក្រុមតូចៗ ហើយអញ្ជើញពួកគេឲ្យចែកចាយអ្វីដែលលេចធ្លោចំពោះពួកគេពីសេចក្តីយោងបទគម្ពីរដែលពួកគេបានសិក្សា ។ ពួកគេក៏អាចចែកចាយបទពិសោធន៍ទាំងឡាយដែលពួកគេបានឮព្រះសូរសៀងនៃព្រះអម្ចាស់តាមរយៈព្រះវិញ្ញាណបរិសុទ្ធផងដែរ ។ ការណ៍នេះអាចរួមបញ្ចូលចម្លើយចំពោះសំណួររបស់ពួកគេ ឬសារលិខិតនៃការលួងលោម ឬការណែនាំផ្សេងទៀត ។ រំឭកពួកគេកុំឲ្យចែកចាយលម្អិតអំពីបទពិសោធន៍ផ្ទាល់ខ្លួនដ៏ពិសិដ្ឋហួសពេក ។
ប្រសិនបើមានប្រយោជន៍ អ្នកអាចមើល « Receiving Revelation » ( ៤:១៧ ) ចាប់ពីនាទីទី ០:០០–២:១៨ ដែលមាននៅគេហទំព័រ ChurchofJesusChrist.org ។ នៅក្នុងវីដេអូនេះ មនុស្សជាច្រើនឆ្លើយសំណួរ « តើព្រះវិញ្ញាណបញ្ជូនវិវរណៈមកកាន់អ្នកដោយរបៀបណា ? »
-
តើការយល់ដឹងពីវិធីផ្សេងៗដែលព្រះវរបិតាសួគ៌ប្រាស្រ័យទាក់ទងជាមួយយើងតាមរយៈព្រះវិញ្ញាណបរិសុទ្ធជួយអ្នកឲ្យស្គាល់វិវរណៈមកពីទ្រង់ដោយរបៀបណា ?
ព្រះមានបន្ទូលទៅកាន់អ្នក
ដើម្បីជួយសិស្សចែកចាយការឆ្លើយតបរបស់ពួកគេចំពោះសាច់រឿងខាងក្រោម ពួកគេអាចឆ្លើយសំណួរខាងក្រោមជាមួយដៃគូ ។ ការធ្វើបែបនេះនឹងផ្តល់ឲ្យសិស្សម្នាក់ៗនូវឱកាសដើម្បីចែកចាយអ្វីដែលពួកគេបានរៀន ។
ជាជម្រើសមួយផ្សេងទៀត អ្នកអាចអញ្ជើញសិស្សពីរនាក់មកខាងមុខថ្នាក់ ដើម្បីសម្តែងតាមសាច់រឿងនេះ ។ សិស្សម្នាក់អាចចែកចាយចម្លើយរបស់គាត់ ។ បន្ទាប់មក សិស្សទាំងពីរនាក់អាចជ្រើសរើសសិស្សថ្មីពីរនាក់ ដើម្បីសម្តែងតាមសាច់រឿងនោះ ។ អ្នកអាចធ្វើបែបនេះម្តងទៀត ពីរបីដង ។
សូមស្រមៃគិតអំពីសាច់រឿងខាងក្រោមនេះកើតឡើងនៅថ្ងៃអាទិត្យនេះ ៖
អំឡុងពេលការប្រជុំសាក្រាម៉ង់ អ្នកឡើងនិយាយម្នាក់បានដកស្រង់ប្រសាសន៍របស់ប្រធាន រ័សុល អិម ណិលសុន ថា « តើព្រះពិតជា សព្វព្រះទ័យ មានបន្ទូលមកកាន់បងប្អូនមែនទេ ? មែនហើយ ! » ( « Revelation for the Church, Revelation for Our Lives » Liahona ខែឧសភា ឆ្នាំ២០១៨ ទំព័រ ៩៥ ) ។ នៅពេលអ្នកចេញពីសាលាជំនុំបន្ទាប់ពីការប្រជុំ មិត្តរបស់អ្នកនិយាយ ៖ « ខ្ញុំប្រាថ្នាថាខ្ញុំអាចស្គាល់ការណែនាំ និងវិវរណៈមកពីព្រះក្នុងជីវិតរបស់ខ្ញុំ ប៉ុន្តែខ្ញុំមិនប្រាកដថាធ្វើដូចម្តេចនោះទេ » ។
-
ផ្អែកលើអ្វីដែលអ្នកបានរៀនពី និងអំពីព្រះវិញ្ញាណបរិសុទ្ធនៅថ្ងៃនេះ តើអ្នកនឹងនិយាយអ្វីទៅកាន់មិត្តរបស់អ្នក ?
សូមពិចារណាចែកចាយទីបន្ទាល់របស់អ្នកអំពីបំណងប្រាថ្នារបស់ព្រះអម្ចាស់ដើម្បីមានបន្ទូលមកកាន់យើងតាមរយៈសំឡេងតូចរហៀងនៃព្រះវិញ្ញាណបរិសុទ្ធ ។