Manwal sa Magtutudlo sa Seminary sa Daang Tugon

Mga Sulod
Ulohan nga Pahina
Pasiuna sa Manwal sa Magtutudlo
Daang Tugon nga mga Leksiyon
- Welcome sa Daang Tugon
- Moises 1; Abraham 3
- Genesis 1–2; Moises 2–3; Abraham 4–5
- Genesis 3–4; Moises 4–5
- Genesis 5; Moises 6
- Moises 7
- Genesis 6–11; Moises 8
- Genesis 12–17; Abraham 1–2
- Genesis 18–23
- Genesis 24–33
- Genesis 37–41
- Genesis 42–50
- Exodo 1–6
- Pasko sa Pagkabanhaw
- Exodo 7–13
- Exodo 14–18
- Exodo 19–20; 24; 31–34
- Exodo 35–40; Levitico 1; 4; 16; 19
- Numeros 11–14; 20–24; 27
- Deuteronomio 6–8; 15; 18; 29–30; 34
- Josue 1–8; 23–24
- Mga Maghuhukom 2–4; 6–8; 13–16
- Ruth; 1 Samuel 1–7
- 1 Samuel 8–10; 13; 15–16
- 1 Samuel 17–18; 24–26; 2 Samuel 5–7
- 2 Samuel 11–12; 1 Mga Hari 3; 6–9; 11
- 1 Mga Hari 12–13; 17–22
- 2 Mga Hari 2–7
- 2 Mga Hari 16–25
- 2 Mga Cronicas 14–20, 26, 30
- Esdras 1, 3–7; Nehemias 2, 4–6, 8
- Ester
- Job 1–3; 12–14; 19; 21–24; 38–40; 42
- Mga Salmo 1–2; 8; 19–33; 40; 46
- Mga Salmo 49–51; 61–66; 69–72; 77–78; 85–86
- Mga Salmo 102–103; 110; 116–119; 127–128; 135–139; 146–150
- Mga Panultihon 1–4; 15–16; 22; 31; Ecclesiastes 1–3; 11–12
- Isaias 1–12
- Isaias 13–14; 22; 24–30; 35
- Isaias 40–49
- Isaias 50–57
- Isaias 58–66
- Jeremias 1–3, 7, 16–18, 20
- Jeremias 31–33; 36–38; Mga Pagbangotan 1, 3
- Ezequiel 1–3; 33–34; 36–37; 47
- Daniel 1–7
- Oseas; Joel
- Amos; Abdias; Jonas
- Miqueas; Nahum; Habacuc, Sofonias
- Hageo 1–2; Zacarias 1–4, 7–14
- Malaquias
Mga Leksiyon sa Pagpangandam sa Kinabuhi
- Doktrinal nga Kahanas: Pagpangita og mga Tubag sa Akong mga Pangutana
- Mga Kahanas sa Pagtuon sa Kasulatan
- Giya sa Alang sa Kalig-on sa mga Kabatan-onan
- Pag-ugmad sa Pagbarog pinaagi sa Kinaugalingong Paningkamot
- Pisikal ug Emosyonal nga Kahimsog
- Pagpangandam alang sa Umaabot nga Edukasyon ug Panarbaho
- Magmalamposon sa Pag-eskwela
- Pagpangandam sa Misyonaryo
- Pagpangandam alang sa Templo
- Mga Pagtulun-an sa mga Lider sa Simbahan
Apendiks

Malaquias 4: Gahom sa Pagselyo

“Malaquias 4: Gahom sa Pagselyo,” Manwal sa Magtutudlo sa Seminary sa Daang Tugon (2026)

“Malaquias 4: Gahom sa Pagselyo,” Manwal sa Magtutudlo sa Seminary sa Daang Tugon

Malaquias: Leksiyon 159

Malaquias 4

Gahom sa Pagselyo

Sa balaang mga templo, hiusahon sa Manluluwas ang mga pamilya hangtod sa hangtod pinaagi sa mga yawe sa pagselyo. Gitagna ni Malaquias nga ipasig-uli sa Manluluwas kini nga mga yawe aron “pabalikon ang kasingkasing sa mga amahan ngadto sa mga bata, ug ang kasingkasing sa mga bata ngadto sa ilang mga amahan” (Malaquias 4:6). Kini nga leksiyon makatabang sa mga estudyante nga mobaling sa ilang mga kasingkasing ngadto sa ilang mga ginikanan, mga katigulangan, ug umaabot nga kaliwatan.

Pagpangandam sa estudyante: Dapita ang mga estudyante nga mogahin og pipila ka minuto sa pagsusi sa FamilySearch.org o sa FamilySearch Tree app. Pananglitan, pwede nilang ilik ang mga paryente diha sa ilang family tree aron makakat-on og dugang bahin nila. O pwede nilang kompletohon ang pipila ka kalihokan sa family history nga anaa sa website o sa menu nga “Dugang Pa” diha sa app. Kon walay akses niini nga mga kapanguhaan ang mga estudyante, pwede silang makig-istorya sa usa ka ginikanan o sakop sa pamilya aron makakat-on bahin sa usa ka katigulangan.

Posibleng mga Kalihokan sa Pagkat-on

Mga gamot ug mga sanga

Ikonsiderar ang pagdapit sa mga estudyante nga magdrowing og usa ka kahoy nga adunay mga gamot ug mga sanga diha sa ilang mga journal sa pagtuon. Pwede usab nimo kining drowingon diha sa pisara.

Set of line art depicting a growing tree from a seedling to a full grown tree with roots, sunlight.

Nganong importante ang mga gamot ug sanga aron magpabiling himsog ang kahoy?

Dapita ang mga estudyante nga isulat ang ilang ngalan sa punoan sa kahoy nga ilang gidrowing.
Kon ikaw nagrepresentar sa punoan sa kahoy, kinsa girepresentar sa mga gamot ug mga sanga?

Kon kinahanglan, ipasabot nga sa mga kasulatan, sagad mogamit ang Ginoo og metapora sa kahoy nga naay mga gamot ug mga sanga aron magtudlo bahin sa pamilya. Pwede usab nimong tan-awon ang “Pinaagi sa Kamot ni Elias nga Propeta” (3:32) gikan sa time code 0:00 hangtod 0:35, nga anaa sa ChurchofJesusChrist.org.

3:32

Dapita ang mga estudyante nga i-label sa mga gamot ang katigulangan ug sa mga sanga ang kaliwatan. Ihatag ang mosunod nga mga instruksiyon:
Tupad sa mga gamot sa imong drowing, pagsulat og mubong deskripsiyon sa imong gibati bahin sa imong mga katigulangan (mga ginikanan, mga apohan, ug uban pa).
Tupad sa mga sanga sa imong drowing, isulat ang gilaoman nimo sa imong umaabot nga mga kaliwat o kon unsay imong napanglantawan dihang naghunahuna mo nila (mga anak, mga apo, ug uban pa).

Samtang imong tun-an ang Malaquias 4, ikonsider kon unsay gihimo sa Manluluwas aron palig-onon ug ipreserbar ang mga gamot ug mga sanga sa imong family tree. Pwede kang hilom nga mag-ampo, nga hangyoon ang Langitnong Amahan nga tabangan kang masabtan kon unsay imong mahimo aron mapalig-on ang imong mahangtorong pamilya.

Kay lainlain mag kahimtang ang kagikan sa mga estudyante, importanteng hisgotan ang doktrina sa mahangtorong pamilya uban ang pagkasensitibo ug pagsabot. Pahinumdomi ang mga estudyante nga bug-os nga nasayran sa Manluluwas ang ilang kahimtang ug makahatag siyag paglaom nga gikinahanglan ug pagkaayo sa ilang mga kagahapon, kasamtangang kahimtang, ug umaabot sa ilang pamilya pinaagi sa Iyang Pag-ula.

Mga panagna ni Malaquias

Basaha ang Malaquias 4:1, nga pangitaon ang gitudlo sa Ginoo bahin sa mga gamot ug mga sanga niini nga panagna sa Iyang Ikaduhang Pag-anhi.

Base sa imong nakat-onan bahin sa mga gamot ug mga sanga, unsa kaha ang gitudlo sa Manluluwas?

Gipasabot ni Elder D. Todd Christofferson sa Korum sa Napulog Duha ka Apostoles ang mosunod:

Kon wala ang mga pagselyo nga momugna og mahangtorong mga pamilya ug mosumpay sa mga henerasyon dinhi ug human dinhi, kita unya walay mga gamot ni mga sanga didto sa kahangtoran—kana, walay katigulangan ni umaabot nga kaliwatan. (“Ang Gahom sa Pagselyo,” Liahona, Nob. 2023, 21)

Pamalandongi kon unsay imong bation kon dili ka maselyo, o mahiusa hangtod sa hangtod, uban sa pamilya nga gimahal nimo.

Ang Malaquias 4:5–6 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.

Basaha ang Malaquias 4:5–6, nga pangitaon kon unsay gisaad sa Manluluwas nga buhaton aron maselyo ang mga pamilya. Makatabang tingali ang mga footnote samtang nagbasa ka.

Unsay imong nasabtan bahin niini nga tagna? Unsay imong mga pangutana?

Kon nagkinahanglan og tabang ang mga estudyante aron masabtan kini nga panagna, ikonsiderar ang pagdapit nila nga i-link o i-cross reference ang Malaquias 4:5–6 sa Doktrina ug mga Pakigsaad 110:13–16; 138:47–48. Pwede basahon sa mga estudyante kini nga mga tudling, nga pangitaon ang dugang mga panglantaw bahin sa panagna ni Malaquias.

Tabangi ang mga estudyante nga mailhan nga gipadala sa Manluluwas si Elias aron ipahiuli ang mga yawe sa pangselyo ug sa pagbaling sa mga kasingkasing sa mga pamilya sa matag usa. Kini nga saad natuman niadtong Abril 3, 1836, dihang nagpakita si Elias kang Joseph Smith ug Oliver Cowdery sa Templo sa Kirtland. Ang mga yawe sa pangselyo nga iyang gipahiuli naghimo og balaang mga ordinansa nga balido dinhi sa yuta ug sa langit. Apil niini ang mga ordinansa nga gihimo sa balaang mga templo.

Ikonsiderar ang pagpakita og hulagway sa templo ug ang mosunod nga pahayag.

Oakland California Temple Exterior image. This image features the temple and temple grounds. You see trees, the fountain, and the entrance of the temple.

Basaha ang mosunod nga pahayag gikan kang Elder Christofferson, nga mangita kon sa unsang paagi kita gipanalanginan sa Manluluwas pinaagi sa Iyang gahom sa pagselyo diha sa balaang mga templo:

[Sa templo sa Ginoo] atong makita ang kahalangdon ug kasagrado sa gahom sa pagselyo—makapahimo kini sa indibidwal nga kaluwasan ug sa pamilya nga kahimayaan nga makab-ot sa tanang mga anak sa Dios bisan asa ug bisan kanus-a sila nagpuyo dinhi sa kalibotan. Walay laing teyolohiya o pilosopiya o awtoridad nga makatupong sa maong kahigayonan nga maglakip sa tanan. Ang gahom sa pagselyo usa ka hingpit nga pagpadayag sa kaangayan, kaluoy, ug gugma sa Dios. …

Ang labing taas ug labing balaan nga pagpadayag sa gahom sa pagselyo anaa sa mahangtorong paghiusa sa lalaki ug babaye diha sa kaminyoon ug ang pagsumpay sa katawhan latas sa tanan nilang mga henerasyon. (“Ang Gahom sa Pagselyo,” Liahona, Nob. 2023, 20, 21)

Unsay nakadani nimo niini nga pamahayag?
Sa unsang paagi ang buhat sa templo nakatabang nimo nga mobati og koneksyon o mobaling sa imong kasingkasing sa namatay na, kasamtangan, o umaabot nga mga sakop sa pamilya?

Pagbaling sa atong kasingkasing

Ang mosunod nga mga kalihokan makatabang sa mga estudyante sa pagpalig-on sa ilang relasyon sa ilang mga katigulangan ug paghimo og mga desisyon nga mopanalangin sa ilang umaabot nga mga kaliwatan. Depende sa nabiling oras, pwede nimong dapiton ang mga estudyante nga kompletohon ang usa o ang duha niini nga mga kalihokan. Ikonsiderar ang pagpahiangay sa mga instruksiyon sa mga panginahanglan sa imong mga estudyante. Pananglitan, pwede nimong tangtangon o usbon ang mga instruksiyon nga nagkinahanglan og teknolohiya kon dili kini available sa imong mga estudyante.

Kalihokan A: Ibaling ang imong kasingkasing sa imong mga katigulangan.

Kompletoha ang usa o kapin pa sa mosunod sa mga buluhaton. Samtang magtuon ka, pamalandongi kon sa unsang paagi ang Manluluwas ug ang Iyang gahom sa pagselyo mopalig-on sa imong mga katigulangan ug sa imong relasyon kanila. Irekord ang imong nakat-onan tupad sa mga “gamot” sa drowing nga anaa sa imong journal sa pagtuon.

Pagsulat og nindot nga handomanan sa imong ginikanan o apohan o pagbasa og bahin sa katigulangan sa seksiyon nga “Handomanan” sa FamilySearch.org o sa FamilySearch Tree app. Hunahunaa kon nganong gusto sa Manluluwas nga makonekta ka niini nga katigulangan.
Tun-i ang Doktrina ug mga Pakigsaad 128:16–18, nga pangitaon kon nganong importanteng bahin sa plano sa Dios ang paghimog mga bunyag para sa mga patay ug uban pang buhat sa templo.
Pangitaa ang “kasaysayan sa pamilya” ilawom sa Mga Hilisgotan diha sa seksiyon nga Kinatibuk-ang Komperensiya sa Librarya sa Ebanghelyo. Pagpili og usa sa mga pakigpulong, ug tun-i ang pipila o ang katibuk-an niini.
Pangitaa sa imong family tree alang sa mga katigulangan nga nagkinahanglan og ordinansa sa bunyag. Kon posible, adto sa temples.ChurchofJesusChrist.org ug paghimog appointment aron kompletohon ang mga bunyag.

Kalihokan B: Ibaling ang imong kasingkasing sa imong kaliwatan.

Kompletoha ang usa o kapin pa sa mosunod sa mga buluhaton. Samtang magtuon ka, pamalandongi kon sa unsang paagi ang Manluluwas ug ang Iyang gahom sa pagselyo mopalig-on sa imong kaliwatan. Irekord ang imong nakat-onan tupad sa mga “sanga” sa drowing nga anaa sa imong journal sa pagtuon.

Rebyoha ang mga pangutana diha sa interbiyo sa rekomend sa templo ug pamalandongi kon sa unsang paagi ang imong mga tubag mopanalangin sa imong pamilya karon ug sa umaabot. Kini nga mga pangutana makita sa apendiks sa Alang sa Kalig-on sa mga Kabatan-onan: Usa ka Giya sa Paghimo og mga Pagpili.
Pangitaa ang Tema sa Young Women o Tema sa Korum sa Aaronic nga Pagkapari, nga mangita sa hugpong sa mga pulong nga moandam nimo sa pagpanalangin sa imong umaabot nga kapikas ug mga anak.
Tun-i ang Doktrina ug mga Pakigsaad 49:15–17; 68:25–28, nga mangita kon unsay gitudlo sa Ginoo bahin sa kaminyoon ug pagpadako og mga anak. Hunahunaa kon sa unsang paagi ang imong mga desisyon karon makaimpluwensiya sa imong umaabot nga kaminyoon ug kon unsaon nimo pagpadako ang imong mga anak.
Sulati ang imong umaabot nga kapikas o mga anak nga ipasabot kon nganong ang imong gihimo karon angayan sa templo ug sa pagpangandam para sa mahangturong pamilya.

Kon mahuman na nila, ikonsiderar ang pagdapit sa mga estudyante nga andam mopakigbahin sa ilang nakat-onan o gibati niini nga kalihokan. Pwedeng apil niini ang mga butang nga ilang gisulat tupad sa mga gamot o mga sanga diha sa ilang journal sa pagtuon. Pwede usab nga ipakigbahin sa mga estudyante ang ilang gibati bahin sa Manluluwas ug sa Iyang tahas sa pagtabang nato nga madawat ang mga panalangin sa mahangturon nga pamilya.

Pagsag-ulo

Pwede nimong tabangan ang mga estudyante sa pagsag-ulo sa pakisayran sa doktrinal nga kahanas ug sa mahinungdanong hugpong sa mga pulong sa kasulatan atol niini nga leksiyon ug dayon rebryohon kini sa umaabot nga mga leksiyon. Ang importanteng hugpong sa mga pulong sa kasulatan para sa Malaquias 4:5–6 maoy “Ipadala ko kaninyo si propeta Elias … ang kasingkasing sa mga bata ngadto sa ilang mga amahan.’” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Unsa kaha kon adunay sakop sa akong pamilya nga posibleng mopugong nga mag-uban kami hangtod sa hangtod?

Si Elder David A. Bednar sa Korum sa Napulog Duha ka Apostoles mitudlo:

Kaninyo nga nakasinati sa kagul-anan sa diborsyo sa inyong pamilya o mibati sa kasakit sa pagkapakyas sa pagsalig, palihog hinumdomi nga kini [ang sundanan sa Dios alang sa pamilya] magsugod pag-usab diha kaninyo! Usa ka sumpay sa kadena sa inyong mga henerasyon tingali naputol, apan ang ubang matarong nga mga sumpay ug ang nahabilin sa kadena importante gihapon sa kahangtoran. Makadugang kamo og kalig-on sa inyong kadena ug tingali gani makatabang sa pagpahiuli sa naputol nga mga sumpay. Kana nga buhat matuman sa tagsa-tagsa. (“Usa ka Lig-on nga Sumpay” [tibuok kalibotan nga debosyonal alang sa mga young adult, Sep. 10, 2017], Librarya sa Ebanghelyo)

Unsay pagbati sa Ginoo mahitungod niadtong mga tawo nga nagahimo og mga buhat sa templo ug family history?

Si Presidente Henry B. Eyring sa Unang Kapangulohan mipasabot:

Hunahunaa kon unsa ka dako ang pasalamat [sa Manluluwas] niadtong nagsakripisyo sa pagtrabaho ug sa hugot nga pagtuo aron makit-an ang mga ngalan sa ilang mga katigulangan ug niadtong nahigugma kanila ug Kaniya igo nga makatanyag kanila og kinabuhing dayon diha sa mga pamilya, ang labing dako sa tanang gasa sa Dios. Siya mitanyag kanila og walay kinutoban nga sakripisyo. Iyang higugmaon ug pasalamatan kadtong nagsakripisyo sa bisan unsang bili nga ilang mahimo aron tugotan ang ilang mga katigulangan sa pagpili sa Iyang tanyag sa kinabuhing dayon. (“Mga Kasingkasing Nahiusa sa Pagkabugkos,” Liahona, Mayo 2005, 79)

Sa unsang paagi ang akong mga desisyon karon makaimpluwensiya sa akong kaliwatan?

Si Elder Carlos A. Godoy sa Seventy mipahayag:

Nasayod kamo nga adunay usa ka plano alang kanato niining kinabuhia. Kamo nasayod nga ang mga pamilya mahimong mahangtoron. Nganong inyo mang irisgo ang inyong pamilya? Ayaw itugot nga mahimong huyang nga sumpay niining matahom nga kadena sa hugot nga pagtuo nga inyong gisugdan, o inyong nadawat, isip usa ka kabilin. Pagmalig-on. Kini ang inyong higayon sa pagbuhat niini, ug ang Ginoo makatabang kaninyo.

Gikan sa kinauyokan sa akong kasingkasing, dapiton ko kamo sa paghunahuna mahitungod niini, sa pagtan-aw sa unahan ug sa pagtimbang-timbang “Unsa ang sangpotanan niini” ug, kon gikinahanglan, mahimong igo nga maisogon aron mausab ang inyong dalan alang sa kaayohan sa inyong kaliwatan. (“Alang sa Kaayohan sa Inyong Kaliwatan,” Liahona, Nob. 2023, 18)

Dugang nga mga Kalihokan sa Pagkat-on

Pagsinati sa proteksiyon sa Ginoo

Human mabasa ang Malaquias 4:1, makabenepisyo tingali ang mga estudyante sa pagbasa sa mosunod nga mga bersikulo, nga naglangkob sa mga saad sa Ginoo ngadto sa mga matarong sa Iyang Ikaduhang Pag-anhi.

Basaha ang Malaquias 4:2–3, nga pangitaon kon unsay gisaad sa Ginoo niadtong nahadlok (o naay pagtahod) Kaniya.

Unsay atong makat-onan bahin sa Manluluwas gikan sa gisimbolohan niini nga mga bersikulo?

Kon gikinahanglan, ipasabot nga ang hugpong sa mga pulong nga “mga nating baka sa toril” (bersikulo 2) nagtumong sa mga nating baka nga luwas, maayong pagpakaon, ug giatiman. Misaad ang Ginoo nga sama usab niaana ang Iyang pag-atiman ug pagmahal niadtong “nagsunod [Kaniya]” (bersikulo 2). Ang mga pulong nga “kaluwasan sa iyang mga pako” (bersikulo 2) nagpasabot sa makaayo ug makapanalipod nga gahom sa Ginoo, lakip sa Iyang Pag-ula. Ang hugpong sa mga pulong nga “pagatamakan ninyo ang mga daotan” (bersikulo 3) nagpasabot nga ang Ginoo motabang sa mga matarong sa pagbuntog sa daotan pinaagi sa paglaglag sa mga daotan sa Iyang Ikaduhang Pag-anhi.

Mga samin sa templo

Sa dili pa makompleto sa mga estudyante ang mga kalihokan ilawom sa seksiyong “Paghiusa sa atong kasingkasing,” pwede nimong ipakita ang hulagway sa mga samin diha sa usa ka lawak sa pagselyo sa templo. Makita nimo ang ehemplo sa sinugdanan niini nga leksiyon. Dapita ang mga estudyante nga ipakigbahin ang ilang nahibaloan bahin sa gisimbolohan sa mga samin diha sa lawak sa pagselyo.

Ingon nga alternatibo, pwede kang magdala og duha ka samin sa klase. Dapita ang duha ka estudyante nga gunitan ang duha ka samin nga mag-atubangay. Pwede kang magdapit og ikatulong estudyante nga motindog sa tunga ug moatubang sa usa sa mga samin. Pangutan-a siya kon pila ka repleksiyon ang iyang nakita. Ipasabot nga ang mga samin nagsimbolo sa nangagi ug umaabot nga mga henerasyon nga naselyo ingon nga usa ka mahangtorong pamilya.

Gipahiuli ang mga yawe sa pagkapari

Pwede nimong tabangan ang mga estudyante nga mahanduraw ang mga yawe sa pagselyo nga gipahiuli i Joseph Smith pinaagi sa pagtan-aw sa “Ang mga Yawi sa Pagkapari Gipasig-uli sa Templo sa Kirtland” (2:12). Dapita ang mga estudyante nga pangitaon kon sa unsang paagi nakaimpluwensiya ang mga yawe sa pangselyo ngadto sa unang Mga Santos sa Ulahing mga Adlaw.

2:12

Mga panalangin sa buhat sa templo ug family history

Imbes himoon ang mga kalihokan sa seksiyon nga “Paghiusa sa atong kasingkasing” sa leksiyon, pwede ninyong tan-awon ang “Ang Gisaad nga mga Panalangin sa Buhat sa Templo ug Family History 2” (4:04). Dapita ang mga estudyante sa paglista sa mga panalangin nga gihisgotan sa bidyo. Hangyoa ang pipila ka estudyante nga ipakigbahin kon hain sa mga panalangin ang ilang nadawat o gusto nilang madawat.

Hatagi og panahon ang mga estudyante nga mohimo og pipila ka buhat sa family history ug andamon ang mga ngalan para sa templo. Pwede nimong ipakita sa mga estudyante kon unsaon paggamit ang FamilySearch.org o ang FamilySearch Tree app, o pwede nimong dapiton ang mga estudyante nga pamilyar niini nga mga teknolohiya nga tudloan ang klase kon unsaon kini paggamit.

4:5