“Malaquias 3: Ang Pagbayad sa Ikapulo Moabli sa mga Bintana sa Langit,” Manwal sa Magtutudlo sa Seminary sa Daang Tugon (2026)
“Malaquias 3: Ang Pagbayad sa Ikapulo Moabli sa mga Bintana sa Langit,” Manwal sa Magtutudlo sa Seminary sa Daang Tugon
Malaquias: Leksiyon 158
Malaquias 3
Ang Pagbayad sa Ikapulo Moabli sa mga Bintana sa Langit
Sukad pa sa karaang panahon, gipanalanginan na sa Langitnong Amahan ang Iyang mga anak tungod sa ilang pagkaandam motuman sa Iyang balaod sa ikapulo. Tabangan kita sa mga pulong sa Ginoo pinaagi ni propetang Malaquias nga makakat-on kon sa unsang paagi kita Niya panalanginan tungod sa atong pagtuman sa Iyang balaod. Kini nga leksiyon makatabang sa mga estudyante nga mobati og tinguha sa pagtuman sa balaod sa Ginoo sa ikapulo.
Pagpangandam sa estudyante: Dapita ang mga estudyante nga mangandam sa pagpakigbahin og usa ka istorya diin gipanalanginan ang usa ka tawo tungod kay mituman sa sugo sa Ginoo sa pagbayad sa ikapulo. Kon makatabang, pwedeng pangutan-on sa mga estudyante ang ilang mga ginikanan o lider sa Simbahan o mangita og mga istorya diha sa Librarya sa Ebanghelyo.
Posibleng mga Kalihokan sa Pagkat-on
Pagbayad sa ikapulo
Sa pagsugod sa leksiyon, pwede tingali nimong ipakigbahin ang parte sa istorya nga nagpakita sa mga kahimtang dihang lisod ang pagbayad sa ikapulo. Pwede nimong ipakigbahin ang kasinatian ni Elder Cordón o ang imong kasinatian.
Kon kinahanglan, ipasabot nga ang ikapulo mao ang pagdonar sa “ikanapulong bahin sa atong kinitaan ngadto sa Simbahan” (Isangyaw ang Akong Ebanghelyo: Usa ka Giya sa Pagpakigbahin sa Ebanghelyo ni Jesukristo [2023], 85; tan-awa sab ang Doktrina ug mga Pakigsaad 119:3–4).
Basaha ang mosunod nga kasinatian gikan ni Elder Valeri V. Cordón sa Seventy, nga pangitaon kon nganong lisod para sa iyang mga ginikanan ang pagtuman sa balaod sa Ginoo sa ikapulo.
Human sa pipila ka hitabo nga may kalaotan sa gubat sa Central America, nahagsa ang negosyo sa akong papa. Gikan sa 200 ka full-time nga empleyado mius-os ngadto sa lima na lang ka operator sa pangtahi nga tawagon lang namo sa among balay kon gikinahanglan. Usa ka adlaw, nianang mga panahon sa kalisod, nadunggan nako ang akong mga ginikanan nga naghisgot kon ibayad ba nila o ipalit lang una og pagkaon para sa mga bata. (“Ang Pinulongan sa Ebanghelyo,” Liahona, Mayo 2017, 56)
-
Unsa ang ubang mga sirkumstansiya nga tingali atong atubangon diin lisod ang pagbayad sa ikapulo?
Ang mosunod nga graphic makatabang sa mga estudyante nga maghunahuna sa lohikal nga paagi sa tibuok leksiyon. Dapita ang mga estudyante sa pagdrowing sa graphic, o butang nga susama, diha sa blangko nga panid sa ilang mga journal sa pagtuon. Pwede usab kang magdrowing og susama diha sa pisara.
Itudlo ang lingin nga “Akong Pagbati”. Pahibaloa ang mga estudyante nga sa kataposan sa leksiyon, makabaton sila og higayon nga isulat ang ilang pagbati bahin sa ikapulo. Pwede nilang pamalandongan karon ang ilang giatubang nga mga kabalaka o kalisdanan sa pagbayad sa ikapulo. Pwede usab nilang pamalandongan kon sa unsang paagi sila makabenepisyo sa pag-ila sa mga panalangin nga gisaad sa Ginoo ngadto sa mga tawo nga mobayad og ikapulo.
Samtang imong tun-an ang balaod sa Ginoo sa ikapulo, makatabang nimo ang Espiritu Santo nga masabtan ang mga panalangin nga magamit nimo ug sa pagpalig-on sa imong tinguha nga tumanon kini nga balaod.
Pagbubo sa mga panalangin
Aron tabangan ang mga estudyante nga masabtan ang konteksto sa Malaquias 3, ipakigbahin ang mosunod nga summary sa Malaquias 1–2 sa kaugalingon nimong mga pulong.
Bisag ang katawhan sa panahon ni Malaquias padayong nagtanyag og mga halad ngadto sa Ginoo, gisupak nila Siya pinaagi sa pagtanyag og “hugaw nga pagkaon” ug buta, piang, ug masakiton nga mga hayop (tan-awa ang Malaquias 1:7–8, 13) ingon nga mga halad nga magsimbolo unta kang Jesukristo. Gibadlong sa Ginoo ang mga pari, nga “mibiya sa kamatuoran sa [Ginoo]” ug “nagtukmod hinuon sa kadaghanan sa pagbuhat og sayop” (Malaquias 2:8) tungod sa ilang daotang mga ehemplo. Sa Malaquias 3, gitudlo sa Ginoo ang usa ka paagi diin andam kitang mohimog sakripisyo ngadto Kaniya.
Ang Malaquias 3:8–10 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.
Basaha ang Malaquias 3:7–12, nga pangitaon ang gisaad nga mga panalangin sa Ginoo alang niadtong mohatag Kaniya sa ilang ikapulo. Isulat ang mga panalangin nga imong makita palibot sa “Mga Panalangin sa Ginoo” diha sa imong graphic.
Tingali makatabang sa mga estudyante ang pagkasayod nga ang hugpong sa mga pulong nga “sulayi ninyo ako karon” kana nagpsabot nga ang Dios nag-ingon nga, “Sulayi Ako niini”
-
Unsang mga kamatuoran ang imong nakat-onan bahin sa ikapulo gikan sa mga pulong sa Ginoo sa Malaquias 3:7–12?
Tugoti ang mga estudyante nga ipakigbahin ang mga kamatuoran nga ilang nailhan. Dapita ang mga estudyante nga isulat ang kamatuoran nga sama sa Samtang atong tumanon ang balaod sa Ginoo sa ikapulo, buhong kita Niyang panalanginan isip usa ka mubo nga sulat sa ilang mga kasulatan tupad niini nga mga bersikulo.
Aron tabangan ang mga estudyante nga masabtan kini nga kamatuoran, ikonsiderar ang pagdala sa klase og kaha, tasa, ug usa ka pitsel nga tubig. Ibutang ang tasa sa bandehado. Ipasabot nga ang tubig nagrepresentar sa mga panalangin nga ihatag kanato sa Ginoo dihang mobayad tag ikapulo. Dapita ang usa ka estudyante nga buboan og tubig gikan sa pitsel ang tasa hangtod nga moawas ang tubig paingon sa kaha. Ikonektar kini sa gisaad sa Ginoo diha sa Malaquias 3:10.
Ang balaod sa Ginoo sa ikapulo
Ang kauban nga handout nga, “Ang Balaod sa Ginoo sa Ikapulo,” mopalawom sa pagsabot sa mga estudyante sa mga panalangin nga ihatag sa Ginoo samtang atong tumanon ang Iyang balaod. Ikonsiderar ang pagbahinbahin sa mga estudyante ngadto sa gagmayng grupo ug paghatag sa matag grupo og kopya sa handout. Pwedeng magpulihanay ang mga estudyante nga kusgon og basa ang mga kinutlo. Human mabasa ang matag kinutlo, pwedeng magdugang ang mga estudyante og mga panalangin diha sa graphics sa ilang mga journal sa pagtuon.
Human madugangi sa mga grupo ang mga panalangin diha sa ilang graphics, pwedeng pamalandongan sa mga estudyante kon sa unsang paagi nila makita nga gipanalanginan sila sa Ginoo o ang uban tungod sa ilang pagtuman sa Iyang balaod sa ikapulo. Dayon pwedeng ipakigbahin sa mga estudyante ang pipila sa mga panalangin nga nasinati nila o sa uban tungod sa pagtuman niini nga balaod.
Ikonsiderar ang pagtan-aw sa “Ang Pinulongan sa Ebanghelyo,” nga anaa sa ChurchofJesusChrist.org, gikan sa time code 6:42 hangtod 7:40. Niini nga bidyo, madungog sa mga estudyante ang nahibiling bahin sa kasinatian ni Elder Cordón nga anaa sa sinugdanan sa klase.
-
Unsay atong makat-onan bahin sa Langitnong Amahan samtang gipanalanginan kita Niya tungod sa pagbayad sa ikapulo?
Human mahisgoti ang mga panalangin sa pagbayad sa ikapulo, pwede nimong ipasabot nga kadtong mobayad sa ikapulo dili tingali makadawat og mga panalangin nga gilaoman nila ug maglisod pa gani sa pinansyal. Makahunahuna tingali sila kon nganong padayon pa man silang magbayad sa ilang ikapulo. Pwede nimong basahon ang Malaquias 3:14, 16–17, nga pangitaon kon unsay gisaad sa Ginoo alang niadtong nagpadayon sa ilang pagkamatinud-anon ngadto Kaniya.
Pagtuman sa balaod sa Ginoo sa ikapulo
Tupad sa “Akong Pagbati” diha sa imong graphic, isulat ang mahitungod sa:
-
Unsa ang imong pagbati bahin sa pagtuman sa balaod sa Ginoo sa ikapulo.
-
Bisan unsa nga imong gitun-an o gibati karon nga nakadugang sa imong tinguha sa pagbayad sa ikapulo. Apil tingali niini ang gisaad nga mga panalangin gikan sa Ginoo nga gusto nimong madawat.
Dapita ang pipila ka estudyante nga andam ipakigbahin ang ilang pagbati bahin sa Ginoo ug sa Iyang balaod sa ikapulo. Pwede usab nimong ipakigbahin ang mga panalangin nga imong nadawat tungod sa pagtuman niini nga balaod.
Pagsag-ulo
Pwede nimong tabangan ang mga estudyante sa pagsag-ulo sa pakisayran sa doktrinal nga kahanas ug sa mahinungdanong hugpong sa mga pulong sa kasulatan atol niini nga leksiyon ug dayon rebryohon kini sa umaabot nga mga leksiyon. Ang importanteng hugpong sa pulong sa kasulatan para sa Malaquias 3:8–10 mao ang “Ang mga panalangin sa pagbayad sa ikapulo.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”