“Zacarias 10–14: Ang Adlaw sa Ginoo Moabot,” Manwal sa Magtutudlo sa Seminary sa Daang Tugon (2026)
“Zacarias 10–14: Ang Adlaw sa Ginoo Moabot,” Manwal sa Magtutudlo sa Seminary sa Daang Tugon
Hageo 1–2; Zacarias 1–4; 10–14: Leksiyon 157
Zacarias 10–14
Ang Adlaw sa Ginoo Moabot
Pinaagi sa Iyang mga propeta, gipadayag sa Ginoo ang bahin sa umaabot nga mga hitabo aron ato kining mailhan ug paaboton uban ang pagsalig. Gipanagna ni Zacarias nga mobalik ang Manluluwas ug protektahan ang Iyang katawhan gikan sa mga nasod nga nagkahiusa sa pagbatok kanila. Kini nga leksiyon makatabang sa mga estudyante nga mosalig nga ubanan sila sa Manluluwas panahon sa mga hitabo una pa ang Ikaduhang Pag-anhi.
Pagpangandam sa estudyante: Dapita ang mga estudyante nga basahon ang “Ikaduhang Pag-anhi ni Jesukristo” diha sa Mga Hilisgutan ug mga Pangutana (Librarya sa Ebanghelyo). Dasiga sila sa pagsulod sa klase nga andam sa pagpakigbahin sa ilang nakat-onan o sa ilang mga pangutana.
Posibleng mga Kalihokan sa Pagkat-on
Pagpaabot sa Ikaduhang Pag-anhi sa Manluluwas
Ikonsiderar ang pagsugod sa klase pinaagi sa paghangyo sa mga estudyante nga hunahunaon ang dagkong mga hitabo nga ilang gipaabot, sama sa pagbakasyon, pagserbisyo sa usa ka misyon, o pagpakasal. Dapita sila sa pagpakigbahin kon unsay ilang gibati niini nga mga hitabo.
Dayon ipakita ang hulagway sa Ikaduhang Pag-anhi sa Manluluwas. Dapita ang mga estudyante sa paglista og mga pulong diha sa pisara nga naghulagway sa posibleng bation sa mga indibiduwal bahin niini nga hitabo. Pwedeng iapil sa lista ang mga pulong nga sama sa kahinam, andam, masaligon, malinawon, nahadlok, nagduhaduha, nakulbaan, o dili segurado.
Aron masusi kon unsay ilang gibati bahin sa Ikaduhang Pag-anhi sa Manluluwas, pwedeng himoon sa mga estudyante ang mosunod.
Sa imong journal sa pagtuon, tubaga ang mosunod nga mga pangutana:
-
Hain sa mga pulong ang naghulagway sa imong gibati bahin sa Ikaduhang Pag-anhi sa Manluluwas?
-
Unsay nakaimpluwensiya sa imong gibati bahin niini nga hitabo?
Isulat ang imong mga pangutana bahin sa Ikaduhang Pag-anhi sa Manluluwas.
Samtang imong tun-an mga hitabo nga may kalabotan sa Ikaduhang Pag-anhi, paminawa ang mga impresyon gikan sa Espiritu aron mahibalo kon sa unsang paagi ka mahimong mas masaligon nga ang Manluluwas magauban kanimo panahon niini nga mga hitabo.
Pwede nimong dapiton ang mga estudyante nga ipakigbahin ang ilang gisulat. Awhaga ang mga estudyante nga pangitaon ang mga tubag sa ilang mga pangutana samtang gitun-an ang Zacarias.
Timan-i: Dili nimo kinahanglang tubagon ang tanang pangutana bahin sa Ikaduhang Pag-anhi sa Manluluwas. Kon gustong mokat-on og dugang ang mga estudyante, pwede nilang tun-an ang mga kapanguhaan nga sama sa “Ikaduhang Pag-anhi ni Jesukristo” diha sa Mga Hilisgotan ug mga Pangutana (Librarya sa Ebanghelyo).
Gipanagna ni Zacarias ang Ikaduhang Pag-anhi sa Manluluwas
Aron matabangan ang mga estudyante nga masabtan ang mga panagna ni Zacarias bahin sa Ikaduhang Pag-anhi sa Manluluwas, pwede nimong basahon o i-summarize ang mosunod nga parapo. Pwede usab nga basahon sa mga estudyante ang mga ulohan sa kapitulo para sa Zacarias 10; 12–14.
Gipanagna ni Zacarias nga sa kataposang mga adlaw, mahitabo ang usa ka dakong gubat, nailhan ingon nga gubat sa Armagedon (tan-awa ang Gipadayag 16:16), ang mahitabo duol sa Jerusalem. Ang tanang nasod sa yuta magpundok batok sa Jerusalem (tan-awa ang Zacarias 12:2–3). Ingon nga bahin sa gubat, atakihon ang Jerusalem samtang sudlon sa kasundalohan ang siyudad (tan-awa ang Zacarias 14:2). Dayon motungha ang Manluluwas sa Bukid sa mga Olibo (tan-awa ang Zacarias 14:4).
Aron matabangan ang mga estudyante nga makakat-on og dugang bahin sa kon sa unsang paagi tabangan sa Manluluwas ang Iyang katawhan panahon niini nga mga hitabo, ikonsiderar ang paggamit sa handout nga “Unsay Himoon sa Manluluwas Para sa …” Pwede ninyong basahon ang mga bersikulo ingon nga usa ka klase ug dapita ang mga estudyante nga isulat sa ubos sa matag pangutana ang mga pulong o hugpong sa mga pulong nga naghulagway kon unsay gisaad sa Manluluwas nga himoon alang niadtong matinud-anon.
Ingon nga alternatibo, pwede nimong bahinon ang klase ngadto sa tulo ka grupo ug iasayn sa kada grupo ang usa ka pangutana aron tun-an ug ipakigbahin sa klase.
Kon adunay pangutana ang mga estudyante bahin sa kon unsay mahitabo sa daotan sa Ikaduhang Pag-anhi sa Manluluwas, pwede nimo silang dapiton sa pagbasa sa Zacarias 14:12–13, 17–19. Gihulagway niini nga mga bersikulo ang mga kahimtang niadtong mga tawo nga mipili nga dili mosunod kang Jesukristo.
Human makompleto sa mga estudyante ang handout, dapita sila sa pagpangutana bahin sa ilang gitun-an. Kon dili ka segurado sa tubag, ingna sila nga wala ka kahibalo. Dapita sila nga pangitaon ang tubag. Pwede usab nimong pangitaon ang tubag uban nila panahon o human sa klase.
Ang mosunod nga mga pangutana makatabang sa mga estudyante nga mailhan ang mga kamatuoran gikan sa mga pagtulun-an ni Zacarias.
-
Unsay gitudlo niini nga mga tudling kanimo bahin kang Jesukristo?
Ingon nga bahin sa panaghisgot, dapita ang mga estudyante nga i-summarize ang ilang nakat-onan bahin sa Manluluwas ngadto sa usa ka simpleng kamatuoran. Ipakigbahin tingali sa mga estudyante ang lainlaing tubag, lakip ang mobalik si Jesukristo sa kataposang mga adlaw ug pundokon, luwason, ug protektahan ang Iyang katawhan.
Moabot ang gahom dihang maila sa mga estudyante nga ang mga kamatuoran nga ilang gitun-an gikan sa kasulatan maoy ebidensya sa gugma, gahom, ug kaluoy sa Langitnong Amahan ug ni Jesukristo diha sa ilang kinabuhi. Makatabang kini sa mga estudyante nga mobati nga mas duol ngadto Kanila.
Ang mosunod nga mga pangutana makatabang sa mga estudyante nga makab-ot kini nga pagsabot.
(Para sa dugang pagbansay sa pagsukna og mga pangutana nga mokonektar sa gugma, gahom, ug kaluoy sa Ginoo ngadto sa mga kamatuoran nga gitudlo sa kasulatan, tan-awa ang “Tabangi ang mga tigkat-on nga makaila sa gugma, gahom, ug kaluoy sa Ginoo diha sa ilang kinabuhi” diha sa Pagpalambo sa mga Kahanas sa Magtutudlo.)
-
Sa unsang paagi ang pagkahibalo sa kamatuoran bahin kang Jesukristo motabang nato nga atubangon ang Iyang Ikaduhang Pag-anhi nga masaligon?
-
Unsa ang pipila ka paagi nga gipundok, giluwas, ug gipanalipdan ni Jesukristo ang Iyang katawhan karon?
Apil sa mga tubag sa naunang pangutana lakip ang: Gipundok ni Jesukristo pinaagi sa pagdapit sa tanang mga modangop Kaniya, sundon ang Iyang ebanghelyo, ug dawaton ang mga panalangin sa templo. Siya moluwas pinaagi sa pagtanyag sa gasa sa Iyang Pag-ula ug sa mga ordinansa sa ebanghelyo. Nagapanalipod Siya pinaagi sa pagpadayag sa Iyang katuyoan pinaagi sa buhing mga propeta ug mga kasulatan.
Ipakita ang imong nahibaloan
Ang mosunod nga kalihokan motabang sa mga estudyante nga ipahayag ang ilang pagsalig sa gisaad sa Manluluwas nga himoon para sa Iyang katawhan dihang mobalik Siya pag-usab. Pwede kining himoon sa mga estudyante sa tinagsa o diha sa mga grupo. Dapita sila nga gamiton ang mga bersikulo sa kasulatan gikan sa handout aron kompletohon ang kalihokan.
Aron andamon ang mga estudyante nga isulat ang kaugalingon nilang mga liriko, pwede nimong ipasalida ang bidyo nga “Dali, O Hari sa mga Hari” (3:43) sa ChurchofJesusChrist.org.
Basaha ang liriko sa himno nga “Dali, O Hari sa mga Hari” (Himno, num. 30). Dayon pagsulat og dugang bersikulo sa himno. Iapil ang mga pagtulun-an ni Zacarias bahin sa gisaad sa Manluluwas nga himoon para sa Iyang katawhan panahon sa Iyang Ikaduhang Pag-anhi ug kon sa unsang paagi kini nga mga saad motabang nimo nga magmasaligon nga ubanan sa Manluluwas ang Iyang katawhan niining kataposang mga adlaw.
Dapita ang mga estudyante sa pagpakigbahin sa mga liriko nga ilang gisulat.
Pwede nimong ikonsiderar ang pagkanta sa himno ingon nga klase, apil ang usa o kapin pa sa mga bersikulo nga gisulat sa mga estudyante.
Sa pagtapos sa klase, pwede nimong ipakigbahin ang imong pamatuod sa Manluluwas ug kon sa unsang paagi ka Niya gitabangan nga masaligong magpaabot sa Iyang Ikaduhang Pag-anhi.