“Zacarias 1–8: ‘Balik Kamo Kanako,’” Manwal sa Magtutudlo sa Seminary sa Daang Tugon (2026)
“Zacarias 1–8: ‘Balik Kamo Kanako,’” Manwal sa Magtutudlo sa Seminary sa Daang Tugon
Hageo 1–2; Zacarias 1–4; 10–14: Leksiyon 156
Zacarias 1–8
“Balik Kamo Kanako”
Human sa 50 ka tuig nga pagkabihag sa Babilonia ug Persia, ang nahibilin sa balay ni Israel pisikal nga mibalik sa ilang balaang nasod, pero sa espirituhanon layo gihapon sila sa Ginoo. Pinaagi ni propetang Zacarias, gisubli sa Manluluwas ang Iyang pagdapit, “balik kamo kanako” (Zacarias 1:3), uban ang saad nga Siya “mopuyo uban [sa Iyang katawhan]” (Zacarias 2:10). Kini nga leksiyon makatabang sa mga estudyante nga masabtan kon unsaon pagdangop ngadto sa Ginoo.
Pagpangandam sa estudyante: Dapita ang mga estudyante nga pamalandongon kon unsay ilang isulti sa usa ka higala nga mibati nga layo sa gugma gikan sa Ginoo. Pwede nga mangandam ang mga estudyante sa pagpakigbahin sa ilang tambag ngadto sa klase. Pwede nga pangutan-on sa mga estudyante ang sinaligang higala o ginikanan kon unsay ilang ikatambag sa ingon niini nga situwasyon.
Posibleng mga Kalihokan sa Pagkat-on
Nganong ang ubang tawo mobiya kang Jesukristo?
Ikonsiderar ang pagsugod sa klase pinaagi sa pagpakita og hulagway sa Manluluwas tupad sa gidrowing nga stick nga tawo nga naay arrow nga nagtudlo palayo kaniya.
Unsay pipila ka rason kon nganong tingali nga mobiya sa Ginoo ang mga tin-edyer?
Pahinumdomi ang mga estudyante nga sa tibuok Daang Tugon, gipahayag sa mga propeta ang pagdapit sa Manluluwas nga modangop o mobalik Kaniya bisan unsa pay rason sa ilang pagbiya (tan-awa ang Deuteronomio 4:30–31; Nehemias 1:9). Usahay mobiya kita nga wala makabantay nga mitipas na kita.
Dapita ang mga estudyante nga hunahunaon kon sila o ang ilang mga minahal nag-anam na bag ka layo gikan sa Ginoo. Pwede nimong dapiton ang mga estudyante nga pamalandongan ang mosunod nga pagsusi sa kaugalingon.
Hain sa mosunod nga mga pamahayag ang tinuod para nimo?
Gusto nakong tabangan ang akong mga minahal sa kinabuhi nga nag-anam nag kalayo gikan sa Ginoo.
Wala pa gyod nako mapamalandongi kon unsa ko ka suod sa Ginoo.
Natental ko nga mobiya gikan sa Ginoo.
Naningkamot ko pag-ayo nga magpabiling suod sa Ginoo ug hinaot makapabilin kong lig-on.
Samtang imong tun-an ang Zacarias, tinguhaa ang inspirasyon gikan sa Espiritu Santo aron tabangan ka sa imong personal nga mga kahimtang.
Pagdangop sa Ginoo
Human sa 50 ka tuig nga pagkabihag, daghan sa mga Israelinhon ang nakabalik ra gyod sa Jerusalem ug sa kasikbit nga mga lugar. Ilang gitukod pag-usab ang siyudad ug gisugdan ang pagtukod pag-usab sa templo sa Ginoo (tan-awa ang Esdras 5:1–2; 6:14). Pero bisan tuod og pisikal silang nakabalik sa Jerusalem, daghan pa gihapong mga tawo ang espirituhanong halayo gikan sa Ginoo. Iyang gipadala si propeta Zacarias aron tabangan ang katawhan nga mobalik Kaniya aron Siya “makapuyo uban [nila]” (Zacarias 2:10).
Basaha ang Zacarias 1:1–3, nga mangita kon unsay gidapit sa Ginoo nga himoon sa Iyang katawhan.
Paghimo og upat ka kolum diha sa pisara. Isulat o ipasulat sa estudyante ang mosunod nga dili kompletong kamatuoran diha sa pisara ibabaw sa mga kolum: Modangop kita sa Ginoo pinaagi sa …
Pwede nimong isulat ang mosunod nga mga tudling sa kasulatan diha sa pisara, usa sa matag kolum. Grupoha og tinag-upat ang mga estudyante ug dapita ang matag sakop sa grupo nga tun-an ang usa sa mga tudling. Dayon pwedeng kompletohon sa mga estudyante ang pamahayag sa kamatuoran gamit ang ilang tudling.
Zacarias 1:4
Zacarias 3:7 (Ang “dunggon ko ang imong mga pag-ampo ingon nga gidungog ko ang mga pag-ampo sa mga anghel” mahimong magpasabot sa pagbati nga hinlo ug angayan diha sa presensiya sa langitnong mga mensahero.)
Zacarias 7:9–10
Zacarias 8:16–17 (timan-i ang hugpong sa pulong nga “pagdinaitay kamo”)
Mogamit tingali og lainlaing pulong ang mga estudyante dihang makigbahin, apan tabangi silang kompletohon ang gipabaga nga kamatuoran gamit ang mga pamahayag nga sama sa:
… pagbiya gikan sa daotan (Zacarias 1:4).
… pagsunod sa mga gipahimatngon sa Ginoo (Zacarias 3:7).
… pagtratar sa uban nga adunay kaluoy ug pagmahal (Zacarias 7:9–10).
… paglihok ingon nga mga tigpasiugda og kalinaw (Zacarias 8:16–17).
Ikonsiderar ang pagsulat sa matag hugpong sa mga pulong diha sa haom nga mga kolum sa pisara.
Ang mosunod nga kalihokan mopalawom sa pagsabot sa mga estudyante sa mga kamatuoran nga ilang nailhan gikan sa Zacarias. Hatagi ang matag grupo og kopya sa handout nga “Makadangop Kita sa Ginoo Pinaagi sa …” Dapita ang mga estudyante nga magpares o maggrupo aron kompletohon ang handout. Ingon nga alternatibo, pwede kang mag-asayn og lainlaing senaryo sa lainlaing pares ug paandamon sila nga makigbahin ngadto sa mga pares nga naay lahing senaryo.
Ipakigbahin ang imong nakat-onan
Dapita ang mga grupo nga ipakigbahin ang ilang nakat-onan. Usa ka paagi sa pagbuhat niini mao ang pagdapit sa matag grupo nga isulat ang ilang mga tubag sa pag-aghat 2 o 3 para sa usa sa mga senaryo diha sa haom nga kolum sa pisara.
Human mopakigbahin ang mga estudyante, tabangi silang mamalandong sa ilang nakat-onan pinaagi sa pagdapit nila nga himoon ang mosunod.
Sa imong journal sa pagtuon, isulat ang usa o duha ka butang nga para nimo makatabang aron modangop ka sa Ginoo. Mainampoong modapit sa imong Langitnong Amahan sa pagtabang nimo sa imong mga paningkamot.
Pwede nimong taposon ang klase pinaagi sa imong pamatuod sa gugma sa Langitnong Amahan ug ni Jesukristo alang kanato ug ang Ilang padayon nga pagdapit nga modangop Kanila.