« សាការី ១–៨ ៖ ‹ ចូរវិលមកឯយើងវិញ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« សាការី ១–៨ ៖ ‹ ចូរវិលមកឯយើងវិញ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
បន្ទាប់ពី ៥០ ឆ្នាំនៃការជាប់ជាឈ្លើយនៅបាប៊ីឡូន និងស្រុកពើស៊ី វង្សអ៊ីស្រាអែលដែលនៅសេសសល់បានវិលត្រឡប់ទៅដែនដីបរិសុទ្ធរបស់ពួកគេវិញខាងរូបកាយ ប៉ុន្តែខាងវិញ្ញាណពួកគេនៅតែឆ្ងាយពីព្រះអម្ចាស់ ។ តាមរយៈព្យាការីសាការី ព្រះអង្គសង្គ្រោះបានបន្តការអញ្ជើញរបស់ទ្រង់ « ចូរវិលមកឯយើងវិញ » ( សាការី ១:៣ ) ដោយមានការសន្យាថាទ្រង់នឹង « នៅកណ្តាល [ រាស្ដ្ររបស់ទ្រង់ ] » ( សាការី ២:១០ ) ។ មេរៀននេះអាចជួយសិស្សឲ្យយល់ពីរបៀបដែលពួកគេអាចងាកទៅរកព្រះអម្ចាស់ ។
ការរៀបចំសិស្ស ៖ សូមអញ្ជើញសិស្សឲ្យជញ្ជឹងគិតពីអ្វីដែលពួកគេនឹងនិយាយទៅកាន់មិត្តម្នាក់ដែលមានអារម្មណ៍ថានៅឆ្ងាយពីសេចក្តីស្រឡាញ់របស់ព្រះអម្ចាស់ ។ បន្ទាប់មក សិស្សអាចចែកចាយដំបូន្មានរបស់ពួកគេជាមួយសិស្សក្នុងថ្នាក់ ។ សិស្សអាចសួរមិត្តភក្តិដែលទុកចិត្ត ឬឪពុកម្តាយថាតើការទូន្មានអ្វីដែលពួកគាត់នឹងផ្តល់ឲ្យក្នុងស្ថានភាពនេះ ។
សកម្មភាពរៀនសូត្រដែលអាចមាន
ហេតុអ្វីបានជាមនុស្សមួយចំនួនងាកចេញពីព្រះយេស៊ូវគ្រីស្ទ ?
សូមពិចារណាចាប់ផ្ដើមថ្នាក់ដោយការដាក់បង្ហាញរូបភាពនៃព្រះអង្គសង្គ្រោះនៅជិតនឹងរូបមនុស្សចង្កឹះដែលមានព្រួញចង្អុលចេញពីទ្រង់ ។
សូមរំឭកសិស្សថា នៅក្នុងព្រះគម្ពីរសញ្ញាចាស់ ពួកព្យាការីបានប្រកាសការអញ្ជើញរបស់ព្រះអង្គសង្គ្រោះឲ្យងាករក ឬវិលត្រឡប់មកកាន់ទ្រង់វិញដោយមិនគិតពីហេតុផលដែលពួកគេងាកចេញឡើយ ( សូមមើល ចោទិយកថា ៤:៣០–៣១; នេហេមា ១:៩ ) ។ ពេលខ្លះយើងងាកចេញដោយមិនដឹងថា យើងកំពុងឃ្លាតចេញនោះទេ ។
សូមអញ្ជើញសិស្សឲ្យគិតប្រសិនបើពួកគេ ឬមនុស្សដែលពួកគេស្រឡាញ់អាចនឹងងាកចេញពីព្រះអម្ចាស់ ។ អ្នកអាចអញ្ជើញពួកគេឲ្យជញ្ជឹងគិតអំពីស្វ័យវាយតម្លៃខាងក្រោមនេះ ។
តើសេចក្តីថ្លែងការណ៍ខាងក្រោមមួយណាដែលអ្នកមានអារម្មណ៍ថាពិតចំពោះអ្នក ?
-
ខ្ញុំចង់ជួយមនុស្សដែលខ្ញុំខ្វល់ខ្វាយដែលពួកគេងាកចេញពីព្រះអម្ចាស់ ។
-
ខ្ញុំមិនបានគិតថាខ្ញុំនៅជិតព្រះអម្ចាស់ប៉ុនណានោះទេ ។
-
ខ្ញុំមានអារម្មណ៍ត្រូវបានល្បួងឲ្យងាកចេញពីព្រះអម្ចាស់ ។
-
ខ្ញុំកំពុងព្យាយាមអស់ពីសមត្ថភាពដើម្បីនៅជិតព្រះអម្ចាស់ ហើយសង្ឃឹមថាខ្ញុំអាចរឹងមាំ ។
នៅពេលអ្នកសិក្សាសាការី សូមស្វែងរកការបំផុសគំនិតពីព្រះវិញ្ញាណបរិសុទ្ធ ដើម្បីជួយអ្នកក្នុងកាលៈទេសៈផ្ទាល់ខ្លួនរបស់អ្នក ។
ក្រោយពីការជាប់ជាឈ្លើយ ៥០ ឆ្នាំនៅទីបំផុត ពួកសាសន៍អ៊ីស្រាអែលជាច្រើនបានត្រឡប់ទៅក្រុងយេរូសាឡិម និងតំបន់ជុំវិញនោះ ។ ពួកគេបានស្ថាបនាទីក្រុងឡើងវិញ ហើយបានចាប់ផ្ដើមសាងសង់ព្រះវិហារបរិសុទ្ធរបស់ព្រះអម្ចាស់ឡើងវិញ ( សូមមើល អែសរ៉ា ៥:១–២, ៦:១៤ ) ។ ប៉ុន្តែទោះជាពួកគេបានត្រឡប់ទៅក្រុងយេរូសាឡិមវិញខាងរូបកាយក៏ដោយ ក៏មនុស្សជាច្រើននៅឆ្ងាយពីព្រះអម្ចាស់ខាងវិញ្ញាណដែរ ។ ទ្រង់បានចាត់ព្យាការីសាការីឲ្យទៅជួយប្រជាជនឲ្យវិលទៅរកទ្រង់វិញ ដើម្បីទ្រង់អាច « នៅកណ្តាល [ ពួកគេ ] » ( សាការី ២:១០ ) ។
សូមអាន សាការី ១:១–៣ ដោយរកមើលអ្វីដែលព្រះអម្ចាស់បានអញ្ជើញរាស្ដ្ររបស់ទ្រង់ឲ្យធ្វើ ។
បង្កើតជួរឈរចំនួនបួននៅលើក្ដារខៀន ។ សរសេរ ឬឲ្យសិស្សសរសេរសេចក្ដីពិតមិនពេញលេញខាងក្រោមនៅលើក្ដារខៀនខាងលើជួរឈរ ៖ យើងងាកទៅរកព្រះអម្ចាស់ដោយ …
អ្នកអាចសរសេរវគ្គបទគម្ពីរខាងក្រោមនៅលើក្ដារខៀន ដោយវគ្គបទគម្ពីរមួយក្នុងជួរឈរនីមួយៗ ។ រៀបចំសិស្សជាក្រុមដែលមានគ្នាបួននាក់ ហើយអញ្ជើញសមាជិកក្រុមនីមួយៗឲ្យសិក្សាវគ្គមួយក្នុងចំណោមវគ្គបទគម្ពីរទាំងឡាយ ។ បន្ទាប់មកសិស្សអាចបំពេញសេចក្ដីថ្លែងការណ៍នៃសេចក្ដីពិតដោយប្រើវគ្គបទគម្ពីររបស់ពួកគេ ។
-
សាការី ១–៤
-
សាការី ៣:៧ ( « យើងនឹងឲ្យឯងបានចូលក្នុងពួកដែលនៅទីនេះ » អាចសំដៅទៅលើអារម្មណ៍ស្អាតស្អំ និងស័ក្តិសមនៅចំពោះមុខពួកសារទូតសួគ៌ា សូមមើល footnote C ) ។
-
សាការី ៧:៩–១០
-
សាការី ៨:១៦–១៧ ( សូមកត់ចំណាំឃ្លា « សេចក្ដីសុខនៅក្នុងទ្វារក្រុងរបស់ឯងរាល់គ្នា » )
សិស្សអាចចែកចាយពាក្យផ្សេងៗ ប៉ុន្តែសូមជួយពួកគេបំពេញសេចក្តីពិតដែលមានអក្សរដិតជាមួយនឹងសេចក្តីថ្លែងការណ៍ដូចជា ៖
… ងាកចេញពីផ្លូវអាក្រក់ ( សាការី ១:៤ ) ។
… ដើរតាមផ្លូវរបស់ព្រះអម្ចាស់ ( សាការី ៣:៧ ) ។
… ប្រព្រឹត្តចំពោះអ្នកដទៃដោយសេចក្ដីមេត្តាករុណា និងសេចក្តីអាណិតអាសូរ ( សាការី ៧:៩–១០ ) ។
… ធ្វើជាអ្នកដែលផ្សះផ្សាគេ ( សាការី ៨:១៦–១៧ ) ។
សូមពិចារណាសរសេរឃ្លានីមួយៗនៅលើក្ដារខៀនក្នុងជួរឈរដែលត្រឹមត្រូវ ។
សកម្មភាពខាងក្រោមអាចជួយបង្កើនការយល់ដឹងរបស់សិស្សអំពីសេចក្តីពិតដែលពួកគេបានរកឃើញពីសាការី ។ ផ្តល់ច្បាប់ចម្លងនៃសំណៅមេរៀនដល់ក្រុមនីមួយៗ « យើងអាចងាកទៅរកព្រះអម្ចាស់ដោយ … » អញ្ជើញសិស្សឲ្យធ្វើការជាគូៗ ឬក្រុមតូចៗ ដើម្បីបំពេញសំណៅមេរៀននោះ ។ ជាជម្រើសមួយផ្សេងទៀត អ្នកអាចចាត់សាច់រឿងផ្សេងៗទៅគូផ្សេងៗគ្នា ហើយឲ្យពួកគេរៀបចំដើម្បីចែកចាយជាមួយគូដែលធ្វើសាច់រឿងផ្សេង ។
ចែកចាយពីអ្វីដែលអ្នកបានរៀន
សូមអញ្ជើញក្រុមឲ្យចែកចាយនូវអ្វីដែលពួកគេបានរៀន ។ វិធីមួយដើម្បីធ្វើបែបនេះគឺអញ្ជើញក្រុមនីមួយៗឲ្យសរសេរការឆ្លើយតបរបស់ពួកគេទៅនឹងការបំផុសគំនិត២ ឬ ៣ សម្រាប់សាច់រឿងមួយក្នុងជួរឈរដែលត្រឹមត្រូវនៅលើក្ដារខៀន ។
នៅពេលសិស្សបានចែកចាយរួចហើយ សូមជួយពួកគេជញ្ជឹងគិតពីអ្វីដែលពួកគេបានរៀនដោយអញ្ជើញពួកគេឲ្យធ្វើដូចខាងក្រោម ។
នៅក្នុងសៀវភៅកំណត់ហេតុការសិក្សារបស់អ្នក សូមសរសេររឿងមួយ ឬពីរដែលអ្នកមានអារម្មណ៍ថាអាចជួយអ្នកឲ្យងាកទៅរកព្រះអម្ចាស់ ។ សូមអញ្ជើញព្រះវរបិតាសួគ៌របស់អ្នកប្រកបដោយការអធិស្ឋាន ឲ្យជួយអ្នកជាមួយនឹងការខិតខំរបស់អ្នក ។
អ្នកអាចបញ្ចប់ដោយថ្លែងសក្ខីភាពរបស់អ្នកអំពីសេចក្ដីស្រឡាញ់ដែលព្រះវរបិតាសួគ៌ និងព្រះយេស៊ូវគ្រីស្ទមានសម្រាប់យើង និងការអញ្ជើញពេញដោយសេចក្ដីស្រឡាញ់ ឥតប្រែប្រួលរបស់ទ្រង់ទាំងទ្វេ ឲ្យងាកមករកទ្រង់ទាំងទ្វេ ។