« ពង្សាវតារក្សត្រ ទី២ ១៧; ២៤–២៥ ៖ ការខ្ចាត់ខ្ចាយនៃពួកសាសន៍អ៊ីស្រាអែល » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ពង្សាវតារក្សត្រ ទី២ ១៧; ២៤–២៥ ៖ ការខ្ចាត់ខ្ចាយនៃពួកសាសន៍អ៊ីស្រាអែល » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ពង្សាវតារក្សត្យ ទី២ ១៦–២៥ ៖ មេរៀនទី ៨៨
ពង្សាវតារក្សត្យ ទី២ ១៧; ២៤–២៥
ការខ្ចាត់ខ្ចាយនៃពួកសាសន៍អ៊ីស្រាអែល
ពួកព្យាការី និងអ្នកដទៃទៀតតែងនិយាយអំពីការប្រមូលសាសន៍អ៊ីស្រាអែល ។ ដើម្បីយល់ពីការប្រមូលនេះ វាអាចមានប្រយោជន៍ដើម្បីយល់អំពីមូលហេតុដែលអ៊ីស្រាអែលត្រូវខ្ចាត់ខ្ចាយតាំងពីដំបូង ។ មេរៀននេះអាចជួយសិស្សឲ្យប្រើការខ្ចាត់ខ្ចាយនៃពួកសាសន៍អ៊ីស្រាអែល ដើម្បីកំណត់គុណលក្ខណៈរបស់ព្រះវរបិតាសួគ៌ និងព្រះយេស៊ូវគ្រីស្ទ ។
ការរៀបចំសិស្ស ៖ សូមអញ្ជើញសិស្សឲ្យអានគំនិតដើម្បីពិចារណា ៖ « ព្រះយេស៊ូវហៅ ‹ មកវិញ › ឱវង្សអ៊ីស្រាអែលអើយ › » ចេញពីសៀវភៅ ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ។ សុំឲ្យពួកគេមករៀនដោយរៀបចំដើម្បីចែកចាយគំនិត ឬសំណួរអំពីការខ្ចាត់ខ្ចាយនៃវង្សអ៊ីស្រាអែល ។
សកម្មភាពរៀនសូត្រដែលអាចមាន
ការខ្ចាត់ខ្ចាយនៃពួកសាសន៍អ៊ីស្រាអែល
មុនចាប់ផ្តើមថ្នាក់ អ្នកអាចដាក់ស្លាកកន្លែងខុសៗគ្នានៅក្នុងថ្នាក់រៀន ដូចជា នគរខាងជើង ( អ៊ីស្រាអែល ), នគរខាងត្បូង ( យូដា ), ស្រុកអាសស៊ើរ, ទ្វីបអាមេរិក និង បាប៊ីឡូន/ពើស៊ី ។
-
តើដោយរបៀបណា និងនៅពេលណា ដែលការប្រដៅកូនអាចជាសញ្ញានៃសេចក្ដីស្រឡាញ់ពីឪពុក ឬម្ដាយរបស់ពួកគេ ?
សូមអាន គោលលទ្ធិ និងសេចក្តីសញ្ញា ៩៥:១ ដោយរកមើលពីរបៀបដែលព្រះវរបិតាសួគ៌ និងព្រះយេស៊ូវគ្រីស្ទ មានព្រះទ័យអំពីមនុស្សដែលទ្រង់ទាំងទ្វេត្រូវការកែតម្រូវ ឬវាយផ្ចាល ។
ជាច្រើនដងនៅក្នុងព្រះគម្ពីរសញ្ញាចាស់ អ៊ីស្រាអែលបានបះបោរប្រឆាំងនឹងព្រះវរបិតាសួគ៌ និងព្រះយេស៊ូវគ្រីស្ទ ហើយត្រូវការការកែតម្រូវ ។ ការណ៍នេះនាំឲ្យមានអ្វីហៅថា ការខ្ចាត់ខ្ចាយនៃពួកសាសន៍អ៊ីស្រាអែល ។ នៅពេលអ្នកសិក្សាពីការខ្ចាត់ខ្ចាយនៃពួកសាសន៍អ៊ីស្រាអែល សូមរកមើលរបៀបដែលព្រះវរបិតាសួគ៌ និងព្រះយេស៊ូវគ្រីស្ទបានបង្ហាញសេចក្តីស្រឡាញ់របស់ទ្រង់ទាំងទ្វេ ។
នៅទូទាំងពីរផ្នែកបន្ទាប់នៃមេរៀននេះ សិស្សនឹងផ្លាស់ប្តូរទីតាំងនៅជុំវិញបន្ទប់ដើម្បីយល់ពីរបៀបដែលអ៊ីស្រាអែលត្រូវបានខ្ចាត់ខ្ចាយ ។
សូមបំបែកសិស្សជាពីរក្រុមស្មើៗគ្នា ។ សូមឲ្យក្រុមមួយទៅជិតកន្លែងដែលដាក់ស្លាកថា នគរខាងជើង ( អ៊ីស្រាអែល ) ក្រុមមួយទៅជិតចំណុចដែលដាក់ស្លាកថា នគរខាងត្បូង (យូដា) ។
ជាជាងឲ្យសិស្សផ្លាស់ប្តូរជុំវិញថ្នាក់រៀន អ្នកអាចបង្ហាញក្រាហ្វិក « ក្រឡេកមើលនគរអ៊ីស្រាអែល និងនគរយូដា » ។ សិស្សអាចអានខគម្ពីរដូចគ្នា និងពិភាក្សាសំណួរដូចគ្នាពីមេរៀននេះ ប៉ុន្តែគ្រាន់តែធ្វើតាមជាមួយក្រាហ្វិកនេះ ។
នគរអ៊ីស្រាអែលខាងជើង
នៅឆ្នាំ៩៧៥ ម.គ.ស. បន្ទាប់ពីសាឡូម៉ូនបានសុគត បុត្រារបស់ទ្រង់ព្រះនាម រេហូបោមបានឡើងសោយរាជ្យ ។ រេហូបោមបានដាក់បន្ទុកយ៉ាងធំមកលើប្រជារាស្រ្ត ។ ពូជអំបូរទាំងដប់បានបះបោរប្រឆាំងនឹងរេហូបោម ហើយបានដើរតាមយេរ៉ូបោម ( សូមមើល ពង្សាវតារក្សត្រ ទី១ ១២:៦–១១, ១៩–២០ ) ។ ការបំបែកនេះបានបង្កើតបានជានគរខាងជើង និងខាងត្បូង ។
សូមអាន ពង្សាវតារក្សត្រ ទី២ ១៧:៧–១៨, ២២–២៣ ដោយរកមើលអ្វីដែលបានកើតឡើងចំពោះនគរអ៊ីស្រាអែលខាងជើង ។
-
តើមានអ្វីកើតឡើងចំពោះពួកគេ ហើយហេតុអ្វីបានជាវាកើតឡើង ?
សូមពន្យល់ថា នៅពេលអាសស៊ើរបានច្បាំងដណ្តើមយកនគរអ៊ីស្រាអែលខាងជើង ហើយបានយកប្រជាជនអ៊ីស្រាអែលជាច្រើននាក់ត្រឡប់ទៅស្រុកអាសស៊ើរវិញ ការណ៍នេះបានចាប់ផ្តើមការខ្ចាត់ខ្ចាយនៃពួកសាសន៍អ៊ីស្រាអែល ។ សូមឲ្យសិស្សភាគច្រើនឈរនៅជិត នគរខាងជើង ( អ៊ីស្រាអែល ) ដើម្បីផ្លាស់ប្តូរទៅផ្នែកនៃបន្ទប់ដែលបានដាក់ស្លាក អាសស៊ើរ ។ សូមចង្អុលបង្ហាញថា យើងច្រើនតែហៅពូជអំបូរទាំងនេះថាជាពូជអំបូរនៃសាសន៍អ៊ីស្រាអែលដែលបាត់ ។ អ្នកអាចផ្ដល់ឲ្យសិស្សដែលផ្លាស់ប្តូរទៅ អាសស៊ើរ នូវស្លាកមួយដែលនិយាយថា ពូជអំបូរដែលបាត់ ។ អ្នកអាចឲ្យសិស្សដែលបន្តនៅក្នុង អ៊ីស្រាអែល នូវស្លាកដែលនិយាយថា ពួកសាសន៍សាម៉ារី ។ អ្នកអាចចង់ពន្យល់ថា ពួកសាសន៍សាម៉ារីជាចំណែករបស់អ៊ីស្រាអែល និងជាផ្នែកនៃសាសន៍ដទៃ ( សូមមើលសេចក្តីណែនាំដល់បទគម្ពីរទាំងឡាយ « ពួកសាសន៍សាម៉ារី » នៅលើបណ្ណាល័យដំណឹងល្អ ) ។
-
តើអ្នកនឹងសង្ខេបពីមូលហេតុដែលអ៊ីស្រាអែលត្រូវខ្ចាត់ខ្ចាយដោយរបៀបណា ?
សិស្សអាចស្វែងរកសេចក្តីពិតដូចជា ៖ ដោយសារតែអ៊ីស្រាអែលបានបដិសេធពួកព្យាការី និងបំពានសេចក្តីសញ្ញារបស់ពួកគេជាមួយព្រះអម្ចាស់ នោះទ្រង់បានធ្វើឲ្យពួកគេខ្ចាត់ខ្ចាយពាសពេញប្រជាជាតិ ។
នគរខាងត្បូងនៃយូដា
-
តើមកទល់ពេលនេះ អ្នកបានរៀនអ្វីខ្លះអំពីនគរខាងត្បូងនៃយូដា រួមទាំងស្ដេចដែលបានសោយរាជ្យនៅទីនោះ ?
សូមអញ្ជើញសិស្សឲ្យចែកចាយដំណើររឿងណាក៏បានដែលពួកគេចងចាំ ។ ឧទាហរណ៍ ពួកគេអាចនឹងលើកឡើងពីស្ដេចហេសេគា ឬស្ដេចយ៉ូសៀស ។ ប្រសិនបើពួកគេធ្វើដូច្នេះ អ្នកអាចបង្កើតស្លាកសម្រាប់ស្តេចមួយអង្គៗ ហើយឲ្យសិស្សកាន់ស្លាកទាំងនោះ ។ សូមលើកទឹកចិត្តសិស្សឲ្យចែកចាយពីរបៀបដែលព្រះអម្ចាស់បានប្រទានពរដល់ស្តេចទាំងនេះ និងប្រជារាស្រ្តចំពោះសេចក្តីជំនឿរបស់ពួកគេលើទ្រង់ ។ ស្ដេចសុចរិតទាំងពីរអង្គនេះបានសោយរាជ្យបន្ទាប់ពីអាសស៊ើរបានច្បាំងយកនគរនៃអ៊ីស្រាអែល ។
សិស្សក៏អាចនិយាយអំពីលីហៃ និងគ្រួសាររបស់លោកផងដែរ ។ ប្រសិនបើពួកគេធ្វើដូច្នោះ សូមអញ្ជើញពួកគេឲ្យចែកចាយអ្វីដែលពួកគេបានរៀន ។ ប្រសិនបើពួកគេមិនធ្វើទេ អ្នកអាចឲ្យពួកគេធ្វើដូចខាងក្រោម ។ អ្នកអាចបង្កើតស្លាកសម្រាប់ លីហៃ និងក្រុមគ្រួសាររបស់គាត់ សម្រាប់ឲ្យសិស្សពីរបីនាក់កាន់ ។
សូមអាន នីហ្វៃទី១ ១:៤ ដោយរកមើលអ្នកផ្សេងទៀតរស់នៅក្នុងនគរយូដា ។
សូមអាន នីហ្វៃទី១ ២:១–៤; ១៨:២២–២៣ ដោយរកមើលអ្វីដែលបានកើតឡើងចំពោះគ្រួសារនេះ ។
-
តើពរជ័យអ្វីខ្លះដែលយើងបានទទួលមកពីព្រះវរបិតាសួគ៌ ដោយសារព្រះអម្ចាស់បានដឹកនាំលីហៃ និងគ្រួសាររបស់លោកចេញពីក្រុងយេរូសាឡិម ដែលជាផ្នែកនៃការខ្ចាត់ខ្ចាយនេះ ?
សូមឲ្យសិស្សដែលកាន់ស្លាក លីហៃ និងគ្រួសាររបស់លោក ផ្លាស់ប្តូរពី នគរយូដា ទៅផ្នែកនៃថ្នាក់ដែលបានដាក់ស្លាកថា ទ្វីបអាមេរិក ។
សូមអាន របាក្សត្រ ទី២ ៣៦:១៧–២០ ដោយរកមើលអ្វីដែលនេប៊ូក្នេសា ដែលជាស្តេចបាប៊ីឡូនបានធ្វើចំពោះប្រជាជនដែលរស់នៅក្រុងយេរូសាឡិមភ្លាមៗបន្ទាប់ពីលីហៃ និងគ្រួសាររបស់លោកបានចាកចេញ ។
សុំឲ្យសិស្សដែលនៅផ្សេងទៀតនៅក្នុង នគរយូដា ឲ្យផ្លាស់ប្តូរទៅកន្លែងនៃថ្នាក់រៀនដែលតំណាងឲ្យ បាប៊ីឡូន/ពើស៊ី ។ ប្រហែលជាចន្លោះឆ្នាំ៦០៥ និង ៥៨៧ មុន គ.ស ប្រជាជនបាប៊ីឡូនបាននាំសាសន៍យូដាជាច្រើននាក់ទៅកាន់បាប៊ីឡូន ហើយបានឡោមព័ទ្ធ ហើយនៅទីបំផុតបានបំផ្លាញក្រុងយេរូសាឡិម ( សូមមើល ពង្សាវតារក្សត្រ ទី២ ២៤:៨–១៦; ២៥:១–១២, ២១; យេរេមា ៥២ ) ។
អ្នកប្រហែលជាអាចសុំឲ្យសិស្សប្រាប់ឈ្មោះបុគ្គលមួយចំនួនដែលនៅទីបញ្ចប់បានរស់នៅក្នុងបាប៊ីឡូន ។ ប្រសិនបើពួកគេត្រូវការជំនួយ អ្នកអាចផ្ដល់ឲ្យសិស្សពីរបីនាក់នូវស្លាកដូចជា ដានីយ៉ែល, សាដ្រាក់, មែសាក់, អ័បេឌ-នេកោ ( សូមមើល ដានីយ៉ែល ១:១–៧ ) និង អេសេគាល ( សូមមើលសេចក្តីណែនាំដល់បទគម្ពីរទាំងឡាយ « អេសេគាល » នៅលើបណ្ណាល័យដំណឹងល្អ ) ។
សូមអានសេចក្តីសង្ខេបដូចខាងក្រោមនេះ ។ សូមពន្យល់ថា សាសន៍យូដាខ្លះនៅតែនៅពើស៊ី ( សូមមើល នាងអេសធើរ ២:៥–៧ ) ។ សុំឲ្យសិស្សមួយចំនួននៅក្នុង បាប៊ីឡូន/ពើស៊ី ឲ្យត្រឡប់ទៅកាន់កន្លែងនៃថ្នាក់រៀនដែលតំណាងឲ្យ នគរយូដា ។ អ្នកអាចបង្កើតស្លាកសម្រាប់ អែសរ៉ា និង នេហេមា សម្រាប់ឲ្យសិស្សពីរបីនាក់ដែលផ្លាស់ប្តូរទៅ នគរយូដា កាន់ក្នុងដៃ ។ សិស្សនឹងស្វែងយល់បន្ថែមអំពីអែសរ៉ា និងនេហេមានៅពេលក្រោយ ។
នៅក្រោមរាជ្យស្តេចស៊ីរូស ពួកពើស៊ីបានដណ្ដើមយកបាប៊ីឡូន ។ ប្រហែលជាឆ្នាំ៥៣៧ មុន គ.ស ព្រះអម្ចាស់បានបំផុសគំនិតស្តេចស៊ីរូសនៃពើស៊ី អនុញ្ញាតឲ្យសាសន៍យូដាត្រឡប់ទៅក្រុងយេរូសាឡិមវិញ ហើយសាងសង់ព្រះវិហារបរិសុទ្ធឡើងវិញ ( សូមមើល របាក្សត្រ ទី២ ៣៦:២២–២៣; យេរេមា ២៩:១០–១៤; អែសរ៉ា ១:១–៣ ) ។ នៅប៉ុន្មានឆ្នាំបន្ទាប់មក អែសរ៉ា នេហេមា និងអ្នកឯទៀតបានត្រឡប់ទៅក្រុងយេរូសាឡិមដើម្បីជួយសង់ទីក្រុងឡើងវិញ ហើយបញ្ចប់ការសាងសង់ព្រះវិហារបរិសុទ្ធ ( សូមមើល អែសរ៉ា ៧:៦–៨; នេហេមា ២:១–១១ ) ។
បុត្រាបុត្រីរបស់ព្រះវរបិតាសួគ៌មិនដែលវង្វេងបាត់ពីទ្រង់ឡើយ
អ្នកអាចចង់ចង្អុលបង្ហាញថា ក្រុមទាំងនេះជាច្រើនមិនដឹងថាមានអ្វីកើតឡើងចំពោះក្រុមផ្សេងទៀតទេ ។ តាមទស្សនៈរបស់ពួកគេ ក្រុមផ្សេងទៀតបានបាត់ ។
សូមអាន នីហ្វៃទី៣ ១៧:៤ ដោយរកមើលអ្វីដែលព្រះអង្គសង្គ្រោះបានចែកចាយជាមួយនឹងសាសន៍នីហ្វៃអំឡុងពេលការងារបម្រើរបស់ទ្រង់ក្នុងចំណោមពួកគេ ។
-
តើបងប្អូនមានចំណាប់អារម្មណ៍ទៅលើអ្វីខ្លះនៅក្នុងខនេះ ?
អ្នកអាចចង្អុលបង្ហាញថា ទោះបីជាអ៊ីស្រាអែលត្រូវបានខ្ចាត់ខ្ចាយក៏ដោយ ព្រះអម្ចាស់បានប្រើការខ្ចាត់ខ្ចាយនៃប្រជាជននៃសេចក្តីសញ្ញារបស់ទ្រង់ ដើម្បីប្រទានពរដល់ប្រជាជាតិដែលពួកគេត្រូវខ្ចាត់ខ្ចាយទៅដល់ដែរ ( សូមមើល « ការខ្ចាត់ខ្ចាយនៃពួកសាសន៍អ៊ីស្រាអែល » នៅក្រោមសេចក្តីណែនាំដល់បទគម្ពីរទាំងឡាយ « អ៊ីស្រាអែល » នៅលើបណ្ណាល័យដំណឹងល្អ ) ។ អ្នកអាចចង្អុលបង្ហាញថា « សេចក្តីសប្បុរស » នៅក្នុង អេសាយ ៥៤:៨ គឺជាការបកប្រែនៃពាក្យ hesed ។ សម្រាប់ព័ត៌មានចាំបាច់បន្ថែមទាក់ទងនឹងពាក្យ hesed សូមមើលអត្ថបទរបស់ប្រធាន ណិលសុន « សេចក្តីសញ្ញាដ៏នៅអស់កល្បអស់កាលជានិច្ច » លីអាហូណា ខែតុលា ឆ្នាំ២០២២ ទំព័រ ៥–៦ ។
សូមអាន ចោទិយកថា ៤:២៧–៣១ និង អេសាយ ៥៤:៧–១០ ដោយរកមើលអ្វីដែលព្រះអម្ចាស់បានសន្យាថានឹងធ្វើសម្រាប់អ៊ីស្រាអែលដែលបានខ្ចាត់ខ្ចាយ ។
-
តើគុណលក្ខណៈអ្វីខ្លះដែលអ្នកមើលឃើញនៅក្នុងព្រះវរបិតាសួគ៌ និងព្រះយេស៊ូវគ្រីស្ទ នៅពេលអ្នករៀនអំពីការខ្ចាត់ខ្ចាយនៃពួកសាសន៍អ៊ីស្រាអែល ?
សូមពិចារណាចែកចាយទីបន្ទាល់របស់អ្នកអំពីសេចក្តីស្រឡាញ់របស់ព្រះវរបិតាសួគ៌ចំពោះបុត្រាបុត្រីទាំងអស់របស់ទ្រង់ និងអំពីការសន្យារបស់ទ្រង់ក្នុងការប្រមូលសាសន៍អ៊ីស្រាអែលដែលបានខ្ចាត់ខ្ចាយ ។