“Mga Maghuhukom 6–8: ‘Sa Pagkatinuod, Ako Mouban Kanimo,’” Manwal sa Magtutudlo sa Seminary sa Daang Tugon (2026)
“Mga Maghuhukom 6–8: ‘Sa Pagkatinuod, Ako Mouban Kanimo,’” Manwal sa Magtutudlo sa Seminary sa Daang Tugon
Mga Maghuhukom 2–4; 6–8; 13–16: Leksiyon 66
Mga Maghuhukom 6–8
“Sa Pagkatinuod, Ako Mouban Kanimo”
Human ang mga Israelinhon nag-ampo alang sa kaluwasan, gitawag sa Ginoo si Gideon aron luwason sila gikan sa ilang mga kaaway. Gipakita sa Ginoo ang Iyang kusog pinaagi sa pagtabang sa mga Israelinhon nga pildihon ang kapin sa 135,000 ka sundalo pinaagi lang sa 300 ka sundalo ni Gideon. Kini nga leksiyon makatabang sa mga estudyante nga mobati og mas dakong tinguha nga mosalig ni Jesukristo alang sa kalig-on.
Pagpangandam sa estudyante: Dapita ang mga estudyante sa pagpangita og usa ka kasulatan nga nagpakita sa kusog nga atong madawat gikan sa Ginoo. Sulod sa klase nga andam mopakigbahin niini.
Posibleng mga Kalihokan sa Pagkat-on
Lainlaing matang sa kusog
Diha sa pisara, ikonsiderar ang pagdrowing og stick nga porma og tawo [stick figure] nga nagbitbit og bug-at sa matag kamot, sama sa mosunod:
Ipangutana ang mosunod. Kon makatabang, pagdunol og daghang marker sa mga estudyante, ug ipasulat nila ang usa sa ilang mga tubag palibot sa drowing nga naa sa pisara.
-
Kinsa ang pipila sa mga tawo nga giisip nimo nga “kusgan”?
-
Unsa ang lainlaing paagi nga ang usa ka tawo nga kusgan?
Ipasabot nga usa sa matang sa pagkahimong kusgan mao ang abilidad sa usa ka tawo nga mosalig sa Ginoo.
Ikonsiderar ang paghatag og higayon sa mga estudyante nga susihon kon unsa ka dako ang ilang pagsalig sa Ginoo sa mahagiton nga mga sitwasyon nga ila tingaling maatubang. Pwede nimong gamiton ang mosunod nga mga situwasyon o maghunahuna og lain pang situwasyon nga may kalabotan sa imong mga estudyante.
Hunahunaa kon unsa ka posible nga mosalig ka sa kusog sa Dios diha sa lainlaing sitwasyon. Para sa kada sitwasyon nga gilista sa ubos, tinoa kon asa nimo ibutang ang imong kaugalingon sa mosunod nga diyagram.
-
Paghimo og importanteng mga desisyon
-
Pagsagubang sa pagkaangol o sakit
-
Pag-uswag isip usa ka tawo
-
Pagpaningkamot nga masulbad ang mga hagit uban sa pamilya o mga higala
Samtang magtuon ka bahin kang Gideon karon, iampo nga tabangan ka sa Langitnong Amahan nga mabati nimo ang kaimportante sa pagsalig sa Ginoo alang sa kusog diha sa imong kinabuhi. Hatagi og pagtagad ang mga hunahuna o mga pagbati nga mahimong ipadala sa Dios kanimo pinaagi sa Espiritu Santo.
Si Gideon ug ang mga Israelinhon
Aron tabangan ang mga estudyante nga masabtan ang konteksto sa Mga Maghuhukom 6, pwede nimong irebyo ang graphic sa siklo sa garbo gikan sa Leksiyon 65: “Mga Maghuhukom 2–4.” Pwede usab nimong basahon o ipamubo ang mosunod nga parapo.
Gihulagway sa Mga Maghuhukom 6 ang laing higayon dihang nakalimot ang mga Israelinhon sa Ginoo ug nawala ang Iyang mga panalangin. Usa ka grupo sa mga tawo nga gitawag og mga Midianhon ang misugod sa pagdaogdaog sa mga Israelinhon. Sulod sa pito ka tuig gikawat sa mga Midianhon ang mga lugas ug mga hayop sa mga Israelinhon panahon sa ting-ani. Isip resulta, nag-antos sa kawad-on ang mga Israelinhon. Kay desperado na, midangop sila sa Ginoo alang sa tabang. Human makahinumdom ang mga Israelinhon sa Ginoo ug mituaw ngadto Kaniya, nagpadala Siya og matarong nga tawo nga ginganlan og Gideon aron luwason sila gikan sa ilang mga kaaway.
Aron tabangan ang mga estudyante nga makita kon sa unsang paagi gipanalanginan sa Ginoo si Gideon ug ang iyang kasundalohan tungod sa pagsalig Kaniya alang sa kusog, ikonsiderar ang paggamit sa handout nga “Pagkakita sa Kusog sa Ginoo diha sa Asoy ni Gideon.” Tugoti ang matag estudyante nga mahimong pamilyar sa sulod sa kada seksiyon sa handout. Naa tingali daghang paagi sa paghimo niini.
Usa ka paagi mao ang pagbahin sa mga estudyante ngadto sa grupo nga tinagtulo ug iasayn sa kada sakop ang usa ka seksiyon sa handout. Pwedeng kompletohon sa mga estudyante ang ilang seksiyon ug dayon itudlo ngadto sa laing mga sakop sa grupo ang ilang nakat-onan. Pwede nilang sundon ang han-ay sa pagkasunodsunod sa mga seksiyon diha sa handout.
Ang laing paagi mao ang pagdapit sa mga estudyante nga humanon ang unang seksiyon sa handout uban ang usa ka kapares. Human ang igong panahon, pwedeng magbayloay og pares ang mga estudyante ug himoon ang ikaduhang seksiyon, ug mao usab ang ikatulong seksiyon.
Pagsalig sa Ginoo
Human makompleto sa mga estudyante ang handout, dapita silang ipakigbahin ang summary sa ilang nakat-onan gikan sa istorya ni Gideon.
Hangyoa ang pipila ka estudyante sa pagpakigbahin sa kamatuoran nga ilang gisulat para sa pagtuon sa kalihokan 3. Usa sa pananglitan mao ang mosunod: Kon mosalig kita sa Ginoo, panalanginan kita Niya sa Iyang kusog.
-
Unsa ang pipila ka paagi nga ang Ginoo makapalig-on kanato?
-
Sa unsang paagi makasalig kita sa Ginoo karon?
Aron mas masabtan kini nga kamatuoran, dapita ang mga estudyante nga hunahunaon nga ang ilang higala mi-text kanila. Naa sa usa ka situwasyon ang higala nga gibati niya nga dili igo ang iyang kusog. Ipakigbahin sa mga estudyante ang pipila ka pananglitan kon unsa kaha kini nga sitwasyon. Hangyoa ang klase sa pagpili og usa ka sitwasyon nga para nila labing makahuloganon kaayo nga hatagan og pagtagad karon.
Pag-andam og tubag nga pwede nimong itubag sa text. Isulat kini diha sa imong journal sa pagtuon. Kon gusto ka, pagdrowing og selpon nga naay mga text bubble, ug isulat sa sulod sa bubble ang imong tubag. Kinahanglang apil sa imong tubag ang labing menos duha sa mosunod:
1. Sa unsang paagi makatabang ang ehemplo ni Gideon.
2. Sa unsang paagi makatabang ang ubang mga kasulatan sa imong higala aron mosalig sa Ginoo. (Pipila ka pananglitan mao ang Mga Proverbio 3:5–6; Mga Taga-Filipos 4:13; Alma 26:12; Ether 12:27. Pwede usab nimong tan-awon ang “Pagsalig” diha sa Giya ngadto sa mga Kasulatan.)
3. Unsay imong nahibaloan bahin sa Ginoo nga nakatabang nimo sa pagsalig Kaniya.
4. Imong mga kasinatian dihang gibati nimo nga gipalig-on ka sa Ginoo labaw kay sa imong mga abilidad.
Pagdapit og pipila ka mga estudyante sa pagpakigbahin sa ilang mga tubag. Pangita og mga paagi nga mapasalamatan sila sa ilang pag-apil ug ipasabot kon unsa ka makahuloganon ang ilang mga tubag para kanimo ug sa ilang mga klasmeyt.
Makatabang tingali ang pagpakigbahin og personal nga kasinatian bahin kon sa unsang paagi ka nalig-on tungod sa pagsalig sa Ginoo. Pwede usab nimong ipasalida ang bidyo nga “Padayon Lang—inubanan sa Hugot nga Pagtuo” (ChurchofJesusChrist.org) gikan sa time code 6:08 hangtod 9:47. Si Elder Carl B. Cook sa Seventy mipakigbahin og usa ka kasinatian dihang bag-o pa lang siya nga Area Seventy. Gitahasan siya sa pagtambong og komperensiya sa stake uban ni Presidente Boyd K. Packer. Dihang gipangutana ni Elder Cook si Presidente Packer kon unsay plano niya para sa miting, miingon si Presidente Packer nga gusto niyang sundon ang Espiritu.
Panapos
Dapita ang mga estudyante sa pagtinguha sa giya sa Langitnong Amahan samtang ilang tubagon ang mosunod nga mga pangutana diha sa ilang mga journal sa pagtuon.
-
Unsang bahin sa imong kinabuhi ang gibati nimo nga morag dili igo ang kaugalingon nimong kusog?
-
Unsay imong nahibaloan o unsay imong nakat-onan bahin sa Ginoo nga makatabang aron mosalig ka Kaniya?
-
Unsay imong gibati bahin sa Ginoo ug sa Iyang tabang?