« ចោទិយកថា ៦:៦–២៥; ៧:១–២៦; ៨:១–២០ ៖ ‹ ត្រូវឲ្យនឹកពីព្រះយេហូវ៉ា ជាព្រះនៃឯងវិញ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា( ឆ្នាំ២០២៦ )
« ចោទិយកថា ៦:៦–២៥; ៧:១–២៦; ៨:១–២០ ៖ ‹ ត្រូវឲ្យនឹកពីព្រះយេហូវ៉ា ជាព្រះនៃឯងវិញ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ចោទិយកថា ៦–៨; ១៥; ១៨; ២៩–៣០; ៣៤ ៖ មេរៀនទី ៥៩
ចោទិយកថា ៦:៦–២៥; ៧:១–២៦; ៨:១–២០
« ត្រូវឲ្យនឹកពីព្រះយេហូវ៉ា ជាព្រះនៃឯងវិញ »
ក្រោយពីព្រះបានដឹកនាំ និងការពារអស់ជាច្រើនឆ្នាំនៅទីរហោស្ថាន សាសន៏អ៊ីស្រាអែលហៀបនឹងតាំងទីលំនៅនៅលើដែនដីសន្យារបស់ពួកគេទៅហើយ ។ ទោះបីជាការមកដល់ដែនដីថ្មីរបស់ពួកគេជាការផ្លាស់ប្តូរដ៏កក់ក្ដៅក្ដី ក៏ការលួងលោមអាចល្បួងពួកគេឲ្យបំភ្លេចព្រះផងដែរ ។ តាមរយៈម៉ូសេ ព្រះអម្ចាស់បានបង្រៀនសាសន៏អ៊ីស្រាអែលអំពីសារៈសំខាន់ដែលពួកគេត្រូវចងចាំនូវអ្វីដែលទ្រង់បានធ្វើសម្រាប់ពួកគេ ។ មេរៀននេះមានគោលបំណងជួយសិស្សបង្កើនបំណងប្រាថ្នាដើម្បីចងចាំពីអ្វីដែលព្រះបានធ្វើសម្រាប់ពួកគេ ។
ការរៀបចំសិស្ស ៖ អញ្ជើញសិស្សឲ្យគិតពីរឿងប្រាំយ៉ាងដែលពួកគេទទួលអារម្មណ៍ថា ព្រះអម្ចាស់បានធ្វើចំពោះពួកគេកាលពីសប្ដាហ៍មុន ។ សូមអញ្ជើញពួកគេឲ្យជញ្ជឹងគិតអំពីរបៀបដែលការកត់សម្គាល់ពីអ្វីដែលព្រះអម្ចាស់កំពុងធ្វើចំពោះពួកគេអាចប្រទានពរដល់ជីវិតរបស់ពួកគេ ។
សកម្មភាពរៀនសូត្រដែលអាចមាន
វាអាចជាការងាយស្រួលក្នុងការ « បំភ្លេចព្រះអម្ចាស់ » ។
សូមពិចារណាចាប់ផ្តើមថ្នាក់រៀនដោយពិភាក្សាអំពីការល្បួងឲ្យបំភ្លេចព្រះ នៅពេលអ្វីៗដំណើរការល្អនៅក្នុងជីវិតរបស់យើង ។ វិធីមួយក្នុងការធ្វើបែបនេះគឺត្រូវបង្ហាញរូបភាពដូចតទៅនេះ ហើយសួរសំណួរខាងក្រោម ។
-
តើក្នុងស្ថានភាពទាំងនេះមួយណាដែលមនុស្សទូទៅទំនងជាចងចាំ ហើយពឹងផ្អែកលើព្រះ ? ហេតុអ្វី ?
-
ហេតុអ្វីបានជាវាអាចនឹងពិបាកជាងក្នុងការចងចាំព្រះ ហើយពឹងផ្អែកលើទ្រង់ នៅពេលជីវិតដំណើរការល្អសម្រាប់យើង ?
-
ហេតុអ្វីបានជាវាសំខាន់ក្នុងការចងចាំព្រះក្នុងគ្រប់កាលៈទេសៈ ?
សូមអញ្ជើញសិស្សឲ្យបំពេញឃ្លាខាងក្រោមនេះនៅក្នុងសៀវភៅកំណត់ហេតុការសិក្សារបស់ពួកគេ ។
ដោយគិតជាពិសេសអំពីទំនាក់ទំនងរបស់អ្នកជាមួយព្រះវរបិតាសួគ៌ និងព្រះយេស៊ូវគ្រីស្ទ សូមបំពេញសេចក្ដីថ្លែងការណ៍ខាងក្រោម ៖
ពេលអ្វីៗដំណើរការល្អនៅក្នុងជីវិតរបស់ខ្ញុំ ខ្ញុំទំនងជា ។
ពេលអ្វីៗដំណើរការមិនល្អនៅក្នុងជីវិតរបស់ខ្ញុំ ខ្ញុំទំនងជា ។
សូមលើកទឹកចិត្តសិស្សឲ្យស្វែងរកព្រះវិញ្ញាណ ដើម្បីជួយពួកគេយល់កាន់តែច្បាស់អំពីតម្លៃនៃការចងចាំព្រះវរបិតាសួគ៌ និងព្រះយេស៊ូវគ្រីស្ទ និងអ្វីដែលទ្រង់ទាំងទ្វេបានធ្វើសម្រាប់ពួកគេ ។
ការចងចាំព្រះអម្ចាស់
សូមពិចារណាអាន ឬសង្ខេបកថាខណ្ឌខាងក្រោម ដើម្បីជួយសិស្សឲ្យយល់ពីអ្វីដែលកំពុងកើតឡើងក្នុងជីវិតរបស់សាសន៏អ៊ីស្រាអែលនៅក្នុងគម្ពីរចោទិយកថា ។
ក្រោយពីបានដឹកនាំកូនចៅអ៊ីស្រាអែលអស់ ៤០ ឆ្នាំនៅក្នុងទីរហោស្ថាន ព្រះអម្ចាស់បានត្រៀមព្រះកាយជាស្រេចនឹងនាំពួកគេឆ្លងទន្លេយ័រដាន់ទៅកាន់ដែនដីសន្យា ។ តាំងពីចាកចេញពីស្រុកអេស៊ីព្ទ សាសន៏អ៊ីស្រាអែលបានពឹងផ្អែកលើព្រះអម្ចាស់សម្រាប់អាហារ ទឹក និងការការពារ ។ ឥឡូវនេះ សាសន៏អ៊ីស្រាអែលបានក្លាយជាកងទ័ពដ៏ខ្លាំងពូកែមួយ ហើយដែនដីសន្យាមានធនធានធម្មជាតិជាច្រើន ដែលនឹងធ្វើឲ្យជីវិតរបស់ពួកគេកាន់តែមានផាសុកភាព ។
សូមពិចារណាអញ្ជើញសិស្សឲ្យអានខគម្ពីរខាងក្រោម ហើយពិភាក្សាសំណួរខាងក្រោមជាមួយដៃគូ ឬជាក្រុមតូចៗ ។
សូមអាន ចោទិយកថា ៤:៧–៩; ៦:១០–១៣ និង ៨:៧–១៤ ដោយរកមើលការព្រមានម្តងហើយម្តងទៀត ដែលម៉ូសេបានព្រមានដល់ជនជាតិអ៊ីស្រាអែល ។
-
អ្នកគិតថា ហេតុអ្វីបានជាម៉ូសេ ព្រួយបារម្ភអំពីរឿងនេះ ?
-
អ្នកគិតថា ហេតុអ្វីសមាជិកនៃសាសនាចក្ររបស់ព្រះអង្គសង្គ្រោះនាសព្វថ្ងៃនេះនៅតែត្រូវការដំបូន្មានរបស់ម៉ូសេ ?
បើចាំបាច់ សូមជួយសិស្សមើលថា ម៉ូសេមានការព្រួយបារម្ភថា ភាពចម្រុងចម្រើននឹងធ្វើឲ្យសាសន៏អ៊ីស្រាអែលភ្លេចព្រះ ។
សូមដាក់តាំងសេចក្តីថ្លែងការណ៍ដូចខាងក្រោមនេះសម្រាប់សិស្សយោងទៅ នៅពេលពួកគេស្វែងរកសេចក្តីពិតដោយក្លាហាន ។
អែលឌើរ ឌែល ជី រិនឡាន់ ក្នុងកូរ៉ុមនៃពួកសាវកដប់ពីរនាក់បានពន្យល់ពីមូលហេតុដែលព្រះវរបិតាសួគ៌ចង់ឲ្យយើងចងចាំទ្រង់ និងព្រះរាជបុត្រារបស់ទ្រង់ ។
ព្រះវរបិតាសួគ៌របស់យើងចង់ឲ្យយើងនឹកចាំដល់សេចក្ដីល្អសប្បុរសរបស់ទ្រង់ និងរបស់ព្រះរាជបុត្រាសំណព្វរបស់ទ្រង់ តែមិនមែនដើម្បីឲ្យបំពេញព្រះទ័យទ្រង់នោះទេ ប៉ុន្ដែសម្រាប់ឥទ្ធិពលនៃការចងចាំដល់សេចក្ដីសប្បុរសរបស់ទ្រង់មានមកលើយើងទៅវិញទេ ។ តាមរយៈការពិចារណាអំពីសេចក្ដីល្អរបស់ទ្រង់ នោះទស្សនវិស័យ និងការយល់ដឹងរបស់យើងបានរីកធំឡើង ។ តាមរយៈការគិតដល់សេចក្ដីមេត្តាករុណារបស់ទ្រង់ នោះយើងកាន់តែមានចិត្តរាបសា កាន់តែអធិស្ឋាន និងខ្ជាប់ខ្ជួនឡើង ។ …
គ្រប់ពេលដែលយើងប្រើ ទទួលប្រយោជន៍ ឬសូម្បីតែគិតពីអំណោយទានទាំងនេះ យើងគួរតែពិចារណាពីពលិកម្ម សេចក្ដីសប្បុរស និងក្ដីមេត្តាករុណារបស់អ្នកផ្ដល់ឲ្យ ។ គារវភាពចំពោះអ្នកផ្ដល់ឲ្យធ្វើឲ្យយើងមានអំណរគុណកាន់តែខ្លាំង ។ ការគិតដល់អំណោយរបស់ទ្រង់អាច និងគួរតែផ្លាស់ប្ដូរយើង ។ ( « Consider the Goodness and Greatness of God » Liahona ខែឧសភា ឆ្នាំ២០២០ ទំព័រ ៤១–៤២ )
-
តើអ្វីដែលលេចធ្លោចំពោះអ្នកចេញពីសេចក្តីថ្លែងការណ៍របស់អែលឌើរ រិនឡាន់ ?
ដោយផ្អែកលើអ្វីដែលលេចធ្លោសម្រាប់ពួកគេ សូមអញ្ជើញសិស្សឲ្យបំពេញសេចក្ដីថ្លែងការណ៍ដូចខាងក្រោមនៅក្នុងសៀវភៅកំណត់ហេតុការសិក្សារបស់ពួកគេ ៖
តាមរយៈការចងចាំពីសេចក្តីល្អរបស់ព្រះវរបិតាសួគ៌ និងព្រះយេស៊ូវគ្រីស្ទ …
សិស្សអាចនឹងរកឃើញរបៀបមួយចំនួនដើម្បីបំពេញសេចក្តីថ្លែងការណ៍នេះ ។ ឧទាហរណ៍មួយចំនួនរួមមាន ៖
… នោះទស្សនវិស័យ និងការយល់ដឹងរបស់យើងបានរីកធំឡើង ។
… យើងកាន់តែមានចិត្តរាបសា កាន់តែអធិស្ឋាន និងខ្ជាប់ខ្ជួនឡើង
… យើងអាចកែប្រែ ( ឬ ផ្លាស់ប្តូរ ) ។
អ្នកគួរតែសរសេរចម្លើយរបស់សិស្សនៅលើក្តារខៀន ។ សូមប្រាកដថាសិស្សយល់ពីអត្ថន័យនៃពរជ័យទាំងនេះ ។ របៀបមួយដើម្បីធ្វើការណ៍នេះគឺសួរថា តើការទទួលបានពរជ័យមានសភាពបែបណា ។ ឧទាហរណ៍ តើការកាន់តែអធិស្ឋាន និងកាន់តែខ្ជាប់ខ្ជួនអាចមានសភាពបែបណា ?
-
អ្នកគិតថា ហេតុអ្វីការចងចាំព្រះអម្ចាស់នាំឲ្យមានពរជ័យដ៏សំខាន់បែបនេះ ?
-
តើអ្នកបានដកពិសោធន៍នឹងសេចក្ដីពិតណាមួយដែលអែលឌើរ រិនឡាន់ បានចែកចាយដោយរបៀបណា ?
ការចងចាំព្រះអម្ចាស់អាចជួយយើងឲ្យប្រឈមមុខនឹងឧបសគ្គទាំងឡាយ
ដើម្បីទទួលបានដែនដីសន្យា សាសន៏អ៊ីស្រាអែលបានប្រឈមមុខនឹងឧបសគ្គមួយ ។ ព្រះអម្ចាស់បានមានបន្ទូលប្រាប់ពួកគេថា ពួកគេនឹងត្រូវដេញសាសន៍ដែលខ្លាំងជាងពួកគេចេញ ( ចោទិយកថា ៧:១ ) ។ ការដឹងថាសាសន៍នានាមានកម្លាំងខ្លាំងជាងពួកគេ អាចធ្វើឲ្យសាសន៏អ៊ីស្រាអែលជាច្រើនភ័យខ្លាច ។
ដើម្បីជួយសិស្សប្រដូចបទគម្ពីរទៅនឹងជីវិតរបស់ពួកគេ សូមពិចារណាសុំឲ្យពួកគេរាយបញ្ជីនៅក្ដារខៀននូវស្ថានភាព ដែលពួកគេកំពុងប្រឈមមុខ ឬនឹងប្រឈមមុខ ដែលពួកគេដឹងថាពួកគេត្រូវការជំនួយពីព្រះអម្ចាស់ ។
សូមអាន ចោទិយកថា ៧:១៧–២១; ៨:២–៤, ១៥ ដើម្បីមើលឃើញនូវអ្វីដែលព្រះអម្ចាស់ចង់ឲ្យសាសន៏អ៊ីស្រាអែលចងចាំ នៅពេលពួកគេប្រឈមនឹងឧបសគ្គនាពេលអនាគត ។
-
តើការចងចាំពីអ្វីដែលព្រះអម្ចាស់បានធ្វើកាលពីអតីតកាល អាចមានអត្ថប្រយោជន៍នៅពេលប្រឈមមុខនឹងឧបសគ្គនៅពេលអនាគតដោយរបៀបណា ?
អ្នកអាចអញ្ជើញសិស្សឲ្យរាយបញ្ជីស្ថានភាពទាំងឡាយ នៅពេលពួកគេដឹងថា ព្រះអម្ចាស់បានជួយពួកគេ ឬអ្នកដទៃទៀតកាលពីអតីតកាល ។ ប្រសិនបើអ្នកអញ្ជើញសិស្សឲ្យរៀបចំខ្លួន ការណ៍នេះអាចជាឱកាសដ៏ល្អមួយដើម្បីសួរពួកគេពីអ្វីដែលព្រះអម្ចាស់បានធ្វើសម្រាប់ពួកគេក្នុងសប្តាហ៍កន្លងមក ។
សូមឲ្យសិស្សចែកចាយពីរបៀបដែលការចងចាំពីអ្វីដែលព្រះអម្ចាស់បានធ្វើកាលពីអតីតកាល អាចជួយពួកគេ នៅពេលពួកគេប្រឈមមុខនឹងការលំបាកនាពេលបច្ចុប្បន្ន និងអនាគត ។
របៀបដែលយើងអាចចងចាំព្រះអម្ចាស់
ដើម្បីជួយសិស្សឲ្យយល់ពីតម្លៃនៃការចងចាំព្រះវរបិតាសួគ៌ និងព្រះយេស៊ូវគ្រីស្ទ និងមើលឃើញរបៀបមួយជួយយើងចងចាំទ្រង់ទាំងទ្វេ សូមបង្ហាញវីដេអូ « O Remember, Remember » ( ១:២៨ ) ដែលមាននៅលើបណ្ណាល័យដំណឹងល្អ ។ អ្នកអាចអញ្ជើញសិស្សឲ្យរកមើលអ្វីដែលប្រធាន ហែនរី ប៊ី អាវរិង នៃគណៈប្រធានទីមួយបានធ្វើ ដើម្បីមើលឃើញព្រះហស្ដរបស់ព្រះអម្ចាស់ និងលទ្ធផលដែលមានបន្ទាប់ពីនោះ ។
-
តើវាអាចមានឥទ្ធិពលអ្វីមកលើអ្នកក្នុងការមើលឃើញព្រះហស្តរបស់ព្រះនៅក្នុងជីវិតប្រចាំថ្ងៃរបស់អ្នក ?
ដើម្បីបញ្ចប់ សូមពិចារណាអញ្ជើញសិស្សឲ្យសរសេររបៀបមួយ ឬពីរដែលពួកគេអាចចងចាំព្រះវរបិតាសួគ៌ និងព្រះយេស៊ូវគ្រីស្ទបានកាន់តែប្រសើរ ហើយអញ្ជើញពរជ័យរបស់ទ្រង់ទាំងទ្វេមកក្នុងជីវិតរបស់ពួកគេ ។